Aalisarneq pillugu inatsisartut inatsisaat nr. 18, 31. oktober 1996-imeersoq.
Kapitali 1.
Inatsisip atuuffia siunertaalu§ 1. Inatsimmi pineqarput Kalaallit Nunaanni imaanilu Kalaallit Nunaata aalisarnikkut oqartussaaffigisaani inuussutissarsiutigalugu inuussutissarsiutiginagulu aalisarneq, kiisalu oqartussaaffigisap tamatuma avataani kalaallit inuussutissarsiutigalugu aalisarnerat.
§ 2. Inatsisip siunertaraa aalisakkat naleqquttumik ilisimatuussutsikkullu illersorneqarsinnaasumik iluaqutigineqarnissaasa qulakkeerneqarnissaat.
Imm. 2. Inatsisip matuma atortinnerani aalisagaqartuarnissaa kinguaassiortuarnissaallu, aamma aaqqissuulluakkamik ukiullu qanoq ilinera apeqqutaatillugu uumasunik ilisimatuut nalinginnaasumik siunnersuinerat naapertorlugu pitsaanerpaamik iluaquteqarnissaq pingaartinneqassapput aammalu inuiaqatigiit allamut saassinnaanerannut pisariaqartitsineq.
Imm. 3. Inatsisip matuma atortinnerani inuussutissarsiutigalugu aalisarneq eqqarsaatigalugu aalisarneqarsinnaasut aalisariutillu pisarisinnaasaasa imminnut naleqquttuunissaat, kiisalu aalisarnermik inuussutissarsiuteqarnermi, suliffissuarni suliareqqiisarfíusuni inuussutissarsiutinilu allani inuussutissarsiummut attuumassuteqartuni aningaasarsiornikkut suliffissaqartitsiniarnikkullu isiginiagassat pingaartinneqassapputtaaq.
Kapitali 2.
Nassuiaatit.§ 3. Inatsimmi matumani "inuussutissarsiutigalugu aalisarneq" pisat tamarmiusut taakkualuunniit ilaasa tunineqarnissaat siunertaralugu aalisarnertut paasineqassaaq.
Imm. 2. Inatsimmi matumani "inuussutissarsiutiginagu aalisarneq" nammineq pisat atornis-saat siunertaralugu aalisarnertut paasineqassaaq.
Imm. 3. Inatsimmi matumani "assigiimmik inuussutissarsiutillit" inuussutissarsiutitut pingaarnertut inuussutissarsiutigalugu aalisarnermik, saniatigooralugu inuussutissarsiutitut inuussutissarsiutigalugu aalisarnermik imaluunniit inuussutissarsiutiginagu aalisarnermik ingerlatsinersut naapertorlugu inuttut ataatsimoortutut ersarinnerusumik killilerneqarsimasutut paasineqassapput.
Imm. 4. Inatsimmi matumani "inuiaqatigiinnut kalaallinut aalajangersimasumik attuumassuteqartoq" inuttut inoqutigiinnermik, illumik attartornermik pisinermilluunniit allatigulluunniit pissuteqartumik Kalaallit Nunaanni angerlarsimaffeqarniartutut ersersitsisimasutut paasineqassaaq.§ 4. Inatsimmi matumani "TAC" imartani Kalaallit Nunaata aalisarnikkut oqartussaaffigisaani aalisakkanut aalajangersimasunut ukiumut akuerisaasumik pisarineqarsinnaasut katillutik amerlassusiattut paasineqassaaq.
Imm. 2. Inatsimmi matumani "aalisariutit ilaat immikkoortut" angallatitut erseqqissumik killilerneqarlutik immikkoortutut Kalaallit Nunaanni angerlarsimaffeqartutut paasineqassaaq.
Imm. 3. Inatsimmi matumani "pisassiissutit" TAC-p ilaatut aalisariutit ilaannut immikkoortunut imaluunniit nunat allamiut aalisarnerannut § 7-imi taaneqartumut pisassanngortitaasutut paasineqassapput.
Imm. 4. Inatsimmi matumani "pisassiissutinit pigisat" pisassat procentinngorlugit ilaattut aalisariutaatileqatigiiffiup pigisaattut paasineqassaaq.
Imm. 5. Inatsimmi matumani "ukiumut pisassat" ukiumi aalajangersimasumi pisassiissutinit aalajangersimasunit aalisariutaatileqatigiiffimmut tonsinngorlugit annerpaamik pisarineqarsinnaatitaasutut paasineqassapput.
Imm. 6. Inatsimmi matumani "akuersissut" aalisagaqatigiinnik aalajangersimasunik naalakkersuisut aalisariutaatileqatigiiffímmut nalunaarutigisinnaasaannik aalisarsinnaatitaanertut paasineqassaaq.
Imm. 7. Inatsimmi matumani "angallat" immakkut nunakkullu assartuutitut suugaluartutulluunniit aalisarnermut atorneqartutut paasineqassaaq.
Kapitali 3.
Pisassanik TAC-millu aalajangersaaneq.§ 5. Naalakkersuisut ukiut tamaasa imartani Kalaallit Nunaata aalisarnikkut oqartussaaffigisaani aalisagaqatigiinnut aalajangersimasunut TAC-nik aalajangiisassapput. Pisassat kalaallit aalisariutaasa ilaannut immikkoortunut nunallu allamiut aalisarnerannut § 6-imi taaneqartumut agguarneqarneri nunat tamalaat isumaqatigiissutaanni aalajangersakkat mianeralugit naalakkersuisunit ingerlanneqartassapput. Tamatuma kingorna naalakkersuisut inatsisartunut nassuiaateqassapput TAC pisassiissutillu aalajangersarneqarnerinut tunngasunik paasissutissanik pisariaqartunik tamanik imaqartumik, tak. § 2.
Imm. 2. Aalajangersaanerit imm. 1-imi eqqaaneqartut kingusinnerusukkut naalakkersuisut allanngortippatigit imm. 1-imi eqqaaneqartutut inatsisartunut nassuiaateqartoqaqqissaaq.
Kapitali 4.
Kalaallit Nunaanni nunami imartanilu Kalaallit Nunaata aalisarnikkut oqartussaaffigisaani inuussutissarsiutigalugu aalisarsinnaaneq.§ 6. Imartani Kalaallit Nunaata aalisarnikkut oqartussaaffígisaani inuussutissarsiutigalugu aalisarneq taamaallaat angallatinit pigineqarnertik naapertorlugu Kalaallit Nunaanni angerlarsimaffeqartunit ingerlanneqarsinnaavoq.
Imm. 2. Angallat taamaallaat taamatut aalisarsinnaavoq
1) inummit ataatsimit inunnilluunniit ataasiakkaanit ataatsimoortunit, namminneq ataasiakkaarlutik aningaasatigut ajutoortoqassagaluarpat nammaqatigiillutik toqqaannartumillu akisussaasunit, aammalu imm. 3-mi piumasarineqartunik naammassinnissimasunit,
2) imaluunniit ingerlatseqatigiiffimmit, imm. 4-mi piumasarineqartunik naammassinnissimasumit,
3) imaluunniit Kalaallit Nunaanni ingerlatseqatigiiffímmit pisortanit pigineqartumit ingerlatseqatigiiffimmilluunniit Namminersornerullutik Oqartussanit piginneqataaffigineqartumit, pigineqartumit.
Imm. 3. Angallat imm. 2, nr. 1) naapertorlugu inunnit ataasiakkaanit pigineqarpat piumasarisat makku naammassineqarsimassapput:
1) Inuit pineqartut tamarmik inuiaqatigiinnut kalaallinut aalajangersimasumik attuumassuteqassapput;
2) inuit pineqartut tamarmik Kalaallit Nunaanni najugaqartutut inuit nalunaarsorsimaffianni lunaarsorsimassapput, Kalaallit Nunaannilu inuit aqqisa nalunaarsorsimaffianni ukiuni kingullerni marlunni nalunaarsorsimasimassallutik;
3) inuit pineqartut tamarmik Kalaallit Nunaannut tamakkiisumik akileraartartussaatitaassapput, qaammatisiutillu ukiuini kingullerni marlunni Kalaallit Nunaanni tamakkiisumik akileraartartussaatitaasimassallutik.
4) inuit pineqartut tamarmik qaammatisiutit ukiuini kingullerni marlunni inuussutissarsiutigalugu aalisartuusimassapput, namminerlu sulinikkut ukiuni kingullerni marlunni isertitaasa tamarmiusut 2/3-ii inuussutissarsiutigalugu aalisarnermit isertinneqarsimassapput. Inuussutissarsiutigalugu aalisartuunermut nallersuunneqarput piniartutut, savaatilittut, tuttuutilittut assigisaannillu inuussutissarsiuteqarnerit.
Imm. 4. Angallat imm. 2, nr. 2) naapertorlugu ingerlatseqatigiiffimmit pigineqarpat piumasarisat makku naammassineqarsimassapput:
1) ingerlatseqatigiiffik aktiaateqarluni ingerlatseqatigiiffmssaaq (A/S), piginneqataassuteqarluni ingerlatseqatigiiffmssaaq (Aps), piginneqatigiiffmssaaq (Amba) imaluunniit piginneqatigiilluni umiarsuaatileqatigiiffiussalluni;
2) ingerlatseqatigiiffiup aningaasaataasa ikinnerpaamik 2/3-ii (raajarniarnermi: ingerlatseqatigiiffmp aningaasaatai tamarmik) inunnit ataasiakkaanit imm. 3, nr. l)-3)-mi piumasaqaatinik naammassinnissimasunit toqqaannartumik toqqaannanngikkaluamilluunniit pigineqassapput.
3) ikinnerpaamik ingerlatseqatigiiffíup aningaasaataasa affaat aalisarnermik inuussutissarsiuteqartut, imm. 3, nr. 1-4-mi piumasaqaatinik naammassinnissimasut, toqqaannartumik toqqaannanngikkaluamilluunniit pigissavaat.
Imm. 5. Naalakkersuisut akuersissuteqarsinnaapput
1) imm. 3, nr. 2 aamma 3-mi aamma imm. 4, nr. 2-mi piumasaqaatit atuutinnginnissaannut, kinguaariit paarlaanneranni imaluunniit pineqartoq piffissat taaneqartut iluanni ilinniartitaaneq assigisaaluunniit siunertaralugu Kalaallit Nunaata avataani najugaqarallarsimappat;
2) imm. 3, nr. 4-mi piumasaqaatit atuutinnginnissaannut, pineqartoq piffíssap taaneqartup iluani ilinniarfímmi aalisarnikkulluunniit aalisartutut ilinniarsimappat aamma
3) imm. 3, nr. 4-mi piumasaqaatit atuutinnginnissaannut, uppernarsarneqarsinnaappat pissutsit immikkut issimasut isertitanit pissarsianik piumasaqaatit naammassineqarsinnaannginnerannik kinguneqartumik.
Imm. 6. Naalakkersuisut pissutsini immikkorluinnaq ittuni imm. 1-4-mi piumasarineqartut atorneqannginnissaannik akuersissuteqarsinnaapput, taamaaliorneq kalaallit aalisarnikkut inuussutissarsiornerannut imaluunniit Kalaallit Nunaanni suliffissuaqarnermut pingaaruteqarsorinaraangat.
Imm. 7. Naalakkersuisut imm. 1-4-mi piumasarisat naammassineqarsimanerinut uppernarsaateqaqqusisinnaapput.§ 7. Imartani Kalaallit Nunaata aalisarnikkut oqartussaaffigisaani inuussutissarsiutigalugu aalisartoqarsinnaavortaaq angallatinit § 6-imi ilaatinneqanngitsunit, taakku nunat tamalaat akornanni isumaqatigiissutit malillugit pisussaaffiit naapertorlugit, imaluunniit naalakkersuisunik immikkut isumaqatigiissuteqarsimaneq malillugu imartani Kalaallit Nunaata aalisarnikkut oqartussaaffigisaani aalisakkanik annertussutsinillu aalajangersimasunik aalisarnissamut akuersissuteqarfigineqarsimagaangata.
Imm. 2. Imm. 1 naapertorlugu aalisarneq tunngaviusumik killigititamiit (basisliniamiitt) 12 sømilit iluanni ingerlanneqarsinnaanngilaq. Naalakkersuisulli akuersissuteqarsinnaapput, pissutsit immikkut ittut, minnerunngitsumik Kalaallit Nunaanni nunami suliffíssuit tunisassiassanik pilersorneqarnerisa isiginiarneqarnissaata, taamaaliornissaq tunngavissaqartikkaangassuk.
Kapitali 5.
Nunami imaanilu aalisarnikkut Kalaallit Nunaata oqartussaaffigisaani inuussutissarsiutiginagu aalisarneq.§ 8. Inuit danskisut innuttaassusillit Kalaallit Nunaanni aalajangersimasumik angerlarsimaffillit imartani Kalaallit Nunaata aalisarnikkut oqartussaaffigisaani inuussutissarsiutiginagu aalisarsinnaapput. Nunani allani Danmarkiunngitsumi innuttaassusillit Kalaallit Nunaanni najugaqavissut ukiullu kingulliit marluk ataavartumik Kalaallit Nunaanniissimasut danskisut innuttaassuseqartutut pineqassapput.
Imm. 2. Aalisakkat aalajangersimasut inuussutissarsiutiginagu aalisarfiginissaannut immikkut akuersissuteqarfigineqarnissap piumasaqaataaneranik Naalakkersuisut malittarisassiorsinnaapput.
Imm. 3. Inuit imm. 1-imi ilaatinneqanngitsut inuussutissarsiutiginagu aalisassagunik immikkut akuersissuteqarfígineqassapput.
Imm. 4. Imm. 3 malillugu akuersissummik tunniussisoqartillugu Naalakkersuisut akiliuteqartitsissapput, Naalakkersuisut aalajangigaannik annertussuseqartumik. Akiliutissaq naatsorsorneqassaaq ilaatigut akuersissutit tunniunneqarnerani allaffissornikkut aningaasartuutit tunngavigalugit, ilaatigullu akiliilluni aalisartitsisarnermut atatillugu inatsisip siunertaata isumagineqarneranut aningaasartuutit tunngavigalugit.
Imm. 5. Imm. 3 malillugu aalisarsinnaanermut akuersissummik tunniussineq, pissarsineq annaasaqarnerlu kiisalu imm. 4 malillugu akiliutigitinneqartukkut isertitat atorneqarnissaat pillugu naalakkersuisut sukumiinemsunik malittarisassiorsinnaapput.
Imm. 6. Naalakkersuisut imm. 5 malillugu malittarisassiornermut atatillugu kommunit peqqusinnaavaat tamatumunnga atatillugu allaffissornikkut ingerlatsinerup pisariaqartup isumaginissaanut, taamatullu aamma suliffeqarfiit takornariartitsisarnermilu peqatigiiffiit piginnaatinneqarsinnaallutik ingerlatsinerup isumaginissaanut.
Kapitali 6.
Imartat Kalaallit Nunaata aalisarnikkut oqartussaaffigisaasa avataanni aalisarneq§ 9. Imartani Kalaallit Nunaata aalisarnikkut oqartussaaffigisaasa avataanni kalaallit aalisarnerannut naalakkersuisut malittarisassiorsinnaapput.
Kapitali 7.
Aalisarnerup nalinginnaasumik malittarisassatigut aqunneqarnera.
Akuersissutit il.il..§ 10. Naalakkersuisut pisuussutinik iluaquteqarniarnerup aqunneqarnissaa siunertaralugu § 6 aamma § 8 naapertorlugit Kalaallit Nunaanni aalisarneq pillugu malittarisassiorsinnaapput. Taamatut malittarisassiornermi pisarineqarsinnaasut, pisaqarsinnaassuseq pigineqartoq, assigiimmik inuussutissarsiutillit aalisarnermillu inuussutissarsiuteqarnerup pissusissamisoortumik nunap immikkoortuini assigiinngitsuni ineriartortinneqarnissaa isiginiarneqarsinnaapput, tassungalu atatillugu makku pillugit malittarisassiortoqarluni:
1) Pisassiissutigineqarsimasut piffissanut, sumiiffinnut, assigiimmik inuussutissarsiutilinnut aalisariutillu ilaannut immikkoortunut agguataarneri.
2) Pisassiissutigineqarsimasut assigiimmik inuussutissarsiutillit, aalisariutit ilaasa immikkoortut aalisarnermilu atortut pisassaannik, kiisalu angallatit ataasiakkaat pisassiissutinit pigisaannik ukiumulluunniit pisassaannik sukumiinerusumik aalajangersaalluni agguataarneri.
3) Piffissaq aalisarfiusinnaasoq sivisunerpaaq, tulaassinerit amerlassusii tulaassinermilu ataatsimi tulaassat annertussusigisinnaasaat akuerisat.
4) l)-3) malillugit malittarisassat naapertorlugit pisanik nalunaaruteqartussaatitaaneq.
5) l)-3) naapertorlugit immikkut killilersuinerit tamanna pisariaqartippassuk aalisakkanik erseqqissumik taaneqartunik aalisarnerup tulaassuinerullu unitsinneqarnera.
6) Aalisarnermut aalajangersimasumut pisaqarsinnaassutsip atorneqarsinnaasup annerpaap qummut killinganik aalajangersaaneq.
7) Aalisariutit ilaannut immikkoortunut assigiimmillu inuussutissarsiutilinnut agguataarineq.§ 11. § 6 naapertorlugu kalaallit aalisariutaasa pisaqarsinnaassusiisa aalisarnikkut periarfissanut naleqqussarneqarnissaat siunertaralugu, inuussutissarsiutigalugu aalisarnermut angallatinik 5 BRT sinnerlugu angissusilinnik siornatigut Kalaallit Nunaanni aalisariutitut nalunaarsorneqarsimanngitsunik pissarsisinnaanermut akuersissuteqaqqaartoqartarnissaanik naalakkersuisut malittarisassiorsinnaapput.
Imm. 2. Taamatuttaaq pisaqarsinnaassutsimik annertusisitsisumik angallatit allanngortiternerinut akuersissuteqaqqaartoqartarnissaanik naalakkersuisut malittarisassiorsinnaapput.
Imm. 3. Imm. 1 aamma imm. 2 naapertorlugit akuersissutini piumasaqaatigineqarsinnaavoq angallat aalisakkanik aalajangersimasunik aalisarnermut atorneqassasoq angallalluunniit aalajangersimasumik pisaqarsinnaassusilik aalisarunnaarsinneqassasoq.§ 12. § 6 naapertorlugu kalaallit angallataanni angallammi tunisassiorneq Naalakkersuisut akuersissuteqarnerisigut aatsaat pisinnaavoq.
Imm. 2. § 6 naapertorlugu kalaallit angallataannit § 7-ilu naapertorlugu nunat allamiut angallataannit angallammut allamut usingiarneq naalakkersuisut akuersissuteqarneratigut aatsaat pisinnaavoq.§ 13. § 7 naapertorlugu nunat allamiut aalisarnerat imartani Kalaallit Nunaata aalisarnikkut oqartussaaffigisaani aallarteqqusaanngilaq pisassat § 5 naapertorlugu aalajangersarneqartut naapertorlugit tamatumunnga naalakkersuisut akuersissuteqarsimatinnagit.
Imm. 2. Aalisagaqatigiinnik ataatsinik arlalinnilluunniit § 6 naapertorlugu kalaallit aalisarnerannut akuersissuteqarfigineqarsimanissaq, tassungalu ilanngullugu akuersissuteqarfigineqarnissamik piumasaqaatit angallatit angissusiinut erseqqissumik taaneqarsimasunut atuunnissaat pillugu naalakkersuisut malittarisassiorsinnaapput.
Imm. 3. Akuersissummik tunniussinissamik aalajangerniarnermut pingaaruteqartunik paasis-sutissiisarnissaq pillugu naalakkersuisut malittarisassiorsinnaapput.§ 14. § 6 naapertorlugu kalaallit aalisarnerannut akuersissutinik assigiinngitsunik sisamanik tunniussisoqarsinnaavoq:
1) Pisarineqarsinnaasut qummut killilerlugit piffissamut killilimmut akuersissutit.
2) Pisarineqarsinnaasut qummut killilerlugit piffissamut killeqanngitsumut akuersissutit.
3) Pisarineqarsinnaasut qummut killilernagit piffissamut killilimmut akuersissutit.
4) Pisarineqarsinnaasut qummut killilernagit piffissamut killeqanngitsumut akuersissutit. Inatsisartut piffissaqartitsilluarlutik ilimasaarereernikkut inatsisiliornikkut nr. 2) aamma nr. 4) naapertorlugu piffissamut killeqanngitsumut akuersissutit piffissamut killilimmut akuersissutinngortissinnaavaat.
Imm. 2. Akuersissummik piginnittut ataasiakkaat eqqarsaatigalugit piginnittoq pineqartoq aalisakkanik sunik, angallatit suut atorlugit sumiiffinnilu sorlerni aalisarsinnaanersoq, aalisarnermullu piumasaqaatit ersarinnerusut akuersissummi nalunaarneqarsinnaapput. Akuersissutinut nr. 2)-tut ittunut imm. 1 naapertorlugu annertussusiliussat § 5 malillugu pisat annertussusissaattut aalajangersarneqarsimasut ilaattut allassimassapput, maleruagassat naalakkersuisunit aalajangersarneqarsimasut malillugit. Tassunga ilanngullugu Naalakkersuisut ukiumut pisassat amerlanerpaaffissaat pillugit maleruagassiorsinnaapput.
Imm. 3. Akuersissutit imm. 1, nr. l)-itut 2)-tullu ittut eqqarsaatigalugit ukiumut pisassat annertussusaat pillugu naalakkersuisut ukiut tamaasa nalunaaruteqartassapput.
Imm. 4. Pisassiissutinit pigisat aalisariutit ilaannut immikkoortunut ataatsinut tunngatitaasut aalisariutit immikkoortut ilaannit allanit aalisarneqarsinnaanngillat.§ 15. Pisassiissutinit pigisat § 14, imm. 2 naapertorlugu aalisarnermut tunniunneqarsimasut taamaallaat pigisassatut qularnaveeqqutitulluunniit tunniunneqarsinnaapput.
Imm. 2. Imm. 1 malillugu tunniussinermut piumasaqaataavoq tunniussinerup naalakkersuisunit akuerineqarsimanissaa.
Imm. 3. Ingerlatseqatigiiffiit imaluunniit inuit ataasiakkaat pisassiissutinit pigisanik aalisariutit ilaannut immikkoortunut avataasiortunut pisassiissutigineqartunit pisiortornermikkut pisassiissutinit tamarmiusunit 33,3 %-ii qaangerlugit pigisaqalersinnaanngillat.
Imm. 4. Ingerlatseqatigiiffiit imaluunniit inuit ataasiakkaat pisassiissutinit pigisanik aalisariutit ilaannut immikkoortunut sinerissamut qanittumi aalisartunut pisassiissutigineqartunit pisiortornermikkut pisassiissutinit tamarmiusunit 10%-ii qaangerlugit pigisaqalersinnaanngillat.§ 16. Pisassiissutinit pigisat pissarsiarineqarnermik imaluunnit akuersissummut atajunnaarnermik kingorna qaammatit 18-it qaangiutsinnagit angallammut ataatsimut arlalinnulluunniit atassuteqartinneqaqqilersimassapput angallatinik taakkuninnga piginnittunut akuersissummik tunniussinikkut. Taamatut atassuteqartitsilerneq pinngippat piginnittoq pisussaavoq pisassiissutinit pigisat taamaattut tuniniarnissaannut. Piginnittup pisussaaffík taanna naammassinngippagu, naalakkersuisut pisassiissutinit pigisat utertissinnaavaat piginnittoq sinnerlugu tuniarneqarnissaat siunertaralugu.
Imm. 2. Pisassiissutinit pigisat utertinneqartut tuniniarneqartarnerat pillugu naalakkersuisut erseqqinnerusumik malittarisassiorsinnaapput.
Imm. 3. Umiusoqartillugu immikkullu pisoqartillugu § 16, imm. 1-ip atorneqannginnissaanut naalakkersuisut akuersissuteqarsinnaapput.§ 17. Pisassiissutinit pigisat kingornunneqarsinnaapput.
§ 18. Umiarsuaatileqatigiiffinnik kattussinermi pisassiissutinit pigisat ikilisinneqartarnerat pillugu naalakkersuisut malittarisassiorsinnaapput.
§ 19. Umiarsuaatileqatigiiffiup akuersissummut pisassiissutinullu pigisanut sunniuteqanngitsumik ukiumut pisassani taakkualuunniit ilaat tunisinnaavai,
1) ajutoornerup sivisuumilluunniit amutsivimmiinnerup,
2) pinngortitap, soorlu sikup, akornusiinerata imaluunniit
3) assigisaannik pisoqarnerata kilisaataatileqatigiiffmp ukiumut pisassaminik tamarmiusunik pisaqarsinnaanera ajornarsisissappagu.
Imm. 2. Ukiumut pisassanik tunniussineq pisinnaavortaaq immikkut pisoqartillugu aningaasaqarniarnikkut aqutsinikkullu pissutsit pisariaqartippassuk.
Imm. 3. Ukiumut pisassanik tunniussineq pisassiissutinit pigisanik atukkiussinertut isikkoqanngisaannassaaq.
Imm. 4. Ingerlatseqatigiiffiit Namminersornerullutik Oqartussanit pigineqartut imm. 1-3-mi aalajangersakkat apeqqutaatinnagit ukiumut pisassanik tunisisinnaallutillu pisisinnaapput.
Imm. 5. Ukiumut pisassat, aalisariutit ilaannut immikkoortunut ataatsinut tunngatinneqartut, aalisariutit ilaannit immikkoortunit allanit aalisarneqarsinnaanngillat..
Imm. 6. Imm. 1 -5 malillugit tunniussinerit naalakkersuisunit akuerineqassapput.§ 20. Kalaallit pisassaasa tamarmiusut ilaat umiarsuaatileqatigiiffinnut akuersissutinut ilaatinneqanngippata, Naalakkersuisut
1) taakku taakkuluunniit ilaat pisassiissutinit pigisatut tuniniarsinnaavaat;
2) taakku taakkuluunniit ilaat ukiumut pisassatut ukiumoortumik tuniniarsinnaavaat aamma
3) taakku taakkuluunniit ilaat ukiumut pisassatut tunniussinnaavaat misileraalluni aalisarnermut taarsiissutitut.
Imm. 2. Imm. 1-ili atuutinngilaq, umiarsuaatileqatigiiffiit ataatsit arlallilluunniit pisassiissutinit pigisaat taamaaliornikkut ikilissappata.
Imm. 3. Imm. 1, nr. 1) aamma 2) malillugit tunisinermi akip aalajangersarnerani, pissutsit makku pingaartinneqarsinnaapput:
1) Umiarsuaatileqatigiiffmp tunisassiorsinnaatitaanerata annertussusia.
2) 1. juni 1997-imi umiarsuaatileqatigiiffmp pisassiissutinit pigisaasa annertussusiat.
3) Umiarsuaatileqatigiiffiup nunap immikkoortuani sumi angerlarsimaffeqarnera.§ 21. Piginnittut ataasiakkaat ukiumut pisassatik tamakkeraangatigit aalisarneq ingerlaannaq unitsinneqartassaaq. Kalaallit pisassaat tamarmiusut nungunneqaraangata aamma taamatut pisoqartassaaq.
Imm. 2. § 7 naapertorlugu nunat allamiut angallataannut akuersissutit ingerlaannartumik atorunnaartassapput, aalisarneq pisassat tamarmiusut pisarineqarnerat pissutigalugu unitsinneqassapput. Akuersissut atorunnaarpat aalisarneq ingerlaannaq unitsinneqassaaq.
Imm. 3. Kalaallit Nunaata eqqaani aalisarnermut tunngatillugu maleruagassanik imaluunniit akuersissummi piumasaqaataasunik unioqqutitsineq kinguneqarsinnaavoq taassuma atorsinnaanerata killiliiffigineqarneranik, kiisalu annertuumik arlaleriarluniluunniit unioqqutitsisoqarnerani akuersissut arsaarinnissutigineqarsinnaavoq. Tamanna naalakkersuisut aalajangissavaat, nalunaarutigineqarneraniillu ullut 15-it qaangiutsinnagit Kalaallit Nunaata Eqqartuussivianut tamanna ingerlateqqinneqarsinnaavoq.§ 22. § 6 naapertorlugu kalaallit aalisarneranni akuersissummik pissarsinermut piumasaqaatigineqarsinnaavoq,
1) pisat tamakkerlugit ilaannaalluunniit Kalaallit Nunaanni tunisassiorfimmut tunisassiorfinnulluunniit aalajangersimasunut tunineqassasut, ilaatigut piffissani aalajangersimasuni aamma annertussutsinik, pitsaassutsinik pisallu suunissaannik aalajangersimasunik (tulaassisussaatitaaneq), aamma
2) inuttat ilaat amerlassutsimikkut aalajangersimasut Kalaallit Nunaanni najugaqavissuussasut (inuttat ilaat).
Imm. 2. Tulaassisussaatitaanermi piumasaqaatit inuttallu ilaasa aalajangersimasut najugaqavissuunissaat pillugu nalinginnaasumik malittarisassat naalakkersuisunit aalajangersarneqassapput.
Kapitali 8.
Eqqissisimatitsineq, piujuartitsinissaq siunertaralugu teknikkikkut iliuutsit il.il..§ 23. Naalakkersuisut pisuussutit illersorneqarnissaat pillugu, ilaatigut makku pillugit, malittarisassiorsinnaapput;
1) piffissat eqqissisimatitsiviusut aamma piffimmiit piffimmut aalisarfigeqqusaanngitsut,
2) angallatit sannaat atorneqarnerilu, tassunga ilanngullugu atortut aalisariaatsillu aalajangersimasut atorneqarnissaannut inerteqqutit;
3) aalisarnermi ileqqorissaarnissamut malittarisassat;
4) aalisakkat il.il. minnerpaaffissaat;
5) nigartat angissusissaat taakkulu uuttorneqarnerat, kiisalu,
6) aalisakkanik allanik aalisarnermi aalisakkat aalajangersimasut pisarisuukkat amerlanerpaaffígisinnaasaat.
Imm. 2. Taamaattorli Naalakkersuisut piginnaatitsineratigut malittarisassat imm. 1, nr. 1)-3)-mi taaneqartut kommunimut ataatsimut kommunalbestyrelsimit pineqartumit naalakkersuisunit akuerineqartumik suliarineqarsinnaapput.
Kapitali 9.
Aalisarnermi uumassusilinnik misissuinerit misileraallunilu aalisarnerit.§ 24. Aalisarnermi uumassusilinnik misissuinerit misileraallunilu aalisarnerit, aalisarnermik killilersuinerit atuuttut apeqqutaatinnagit, Pinngortitaleriffik aamma Qallunaat Nunaanni Avatangiisinik Misissuisoqarfímmit allanilluunniit naalakkersuisunit akuerineqarsimasunit ingerlanneqarsinnaapput. Pinngortitaleriffik oqaaseqaateqartereerlugu misileraalluni aalisarnermi piumasaqaatinik naalakkersuisut aalajangersaasinnaapput.
Imm. 2. Ilinniartitaanermut atatillugu aalisarnerit, aalisarnermik killilersuinerit atuuttut apeqqutaatinnagit, naalakkersuisunit akuerineqarlutik ingerlanneqarsinnaapput. Taamatut aalisarnermi piumasaqaatinik naalakkersuisut aalajangersaasinnaapput.
Kapitali 10.
Kisitsisitigut paasissutissat.§ 25. § 6 naapertorlugu kalaallit angallataasa, Kalaallit Nunaanni tunisassiorfiit allallu kisitsisitigut paasissutissiornermut atugassanik aalisarneq pillugu paasissutissanik aalajangersimasunik nassiussisarnissaanik peqqussutitalinnik naalakkersuisut malittarisassiorsinnaapput.
Kapitali 11.
Nakkutilliineq.§ 26. Inatsimmi inatsillu malillugu malittarisassiani aalajangersakkanik eqquutsitsinermik nakkutilliineq pillugu naalakkersuisut malittarisassiorsinnaapput.
Imm. 2. Pisat inatsit malillugu maleruagassianut akerliusumik pisarineqarsimasut allanut tunniunneqarnissaat, pisiarineqarnissaat tuniniarneqarnissaallu pinngitsoorniarlugu, naalakkersuisut ilaatigut makku pillugit malittarisassiorsinnaapput,
1) pisat tigusat pillugit paasissutissiisussaatitaaneq;
2) inunnit ingerlatseqatigiiffinnillu il.il., aalisarsinnaatitaanngitsunit pisanik tigusinissamut inerteqquteqarnerit kiisalu
3) pisarineqarsinnaasut pisarereernerisa kíngorna pisanik tigusisinnaanermik inerteqquteqarnerit.§ 27. Inatsimmi inatsillu malillugu malittarisassani aalajangersakkat malinneqarnerat maannamutut sakkutuut imarsiortut aalisarnermik nakkutilliisuisa politiillu nakkutigissavaat.
Imm. 2. Kalaallit Nunaanni Aalisarsinnaanermut Akuersissutinik Nakkutilliisoqarfik pisussaavoq akuersissutini, inatsit tunngavigalugu tunniunneqartuni, piumasaqaatit malinneqarnerat nakkutigissallugu, suliassallu allat naalakkersuisunit aalajangerneqartut suliarissallugit. Suliassat inatsimmi inatsillu malillugu malittarisassani aalajangersakkat malinneqarnerannik nakkutilliinermik ilaqarpata suliassat naalagaaffimmi oqartussat oqaloqatigereernerisigut aalajangersarneqassapput.§ 28. Sakkutuut imarsiortut aalisarnermik nakkutilliisuisa politiillu aalisariutit aalisakkanillu assartuutit suliassaminnik isumaginninniarlutik unitsillugillu ikkivigisinnaavaat, tamatumunngalu ilanngullugu umiarsuit allagaataat, aalisarnermi allattuiffiit, usinut tunisassiornernullu nalunaarsuiffiit assigisaallu misissuiffigisinnaallugit kiisalu aalisarnermi atortut pisallu misissuiffigisinnaallugit, aammalu aalisarnermi atortut suliamut atatillugu misissugassatut qaqeqqusinnaallugit. Aammattaaq angallatit taamaattut Kalaallit Nunaanni umiarsualivimmut toqqakkamut misissorneqariartorlutik imaluunniit pisanut atortunullu tunngasunik paasissutissiiartorlutik ingerlassasut naalakkerneqarsinnaapput.
§ 29. Naalakkersuisut aalisariutit akuersissummik pigisaqartut peqqusinnaavaat nakkutilliisunik Kalaallit Nunaanni Aalisarsinnaanermut Akuersissutinik Nakkutilliisoqarfimmeersunik (KANUAANA-meersunik) ilaqassasut, imartani Kalaallit Nunaata aalisarnikkut oqartussaaffigisaani angallatip aalisarneranik nakkutilliinissaq siunertaralugu.
Imm. 2. Umiarsuaatileqatigiiffîup pineqartup KANUAANA-p nalinginnaasumik nakkutilliinermut atatillugu angallammiinnerinut atatillugu angallammiinnermut nerisassanullu aningaasartuutit akilertassavai. Angallammi nakkutilliinermut atatillugu aningaasartuutinut umiarsuaatileqatigiiffiup annertunerusumik matussuseeqataasinnaaneranut malittarisassiornissamut naalakkersuisut piginnaatinneqarput. Nakkutilliinermut atatillugu aningaasartuutinut umiarsuaatileqatigiiffíup akiliutissaanut apeqqutaatinneqarsinnaavoq nakkutilliinermut atatillugu qanoq atugassaqartitsisoqarsimanersoq.
Imm. 3. Aalisarsinnaanermut akuersissutinik nakkutilliisut suliassaat pisinnaatitaaffíilu naalagaaffímmi oqartussat oqaloqatigereernerisigut naalakkersuisunit aalajangersarneqassapput.
Imm. 4. Aalisarsinnaanermut akuersissutinik nakkutilliisut kalaallit danskillu oqartussaasuinik attaveqaqatigiittarnissamut angallatip radiuanik nalunaarasuartaatitigullu atortorissaarutaanik atuinissamut periarfissaqassapput.§ 30. Sakkutuut imarsiortut aalisarnermik nakkutilliisuisa usit, piniutit il.il. misissorneqar-nissaat siunertaralugu aalisariutip piffissap aalajangersimasup iluani sumiiffímmi aalajangersimasumiinnissaa piumasarisinnaavaat. Piffissaq sumiissusissarlu sapinngisamik umiarsuup naalagaanut isumaqatigiissutigineqartassapput.
Imm. 2. Aaqqissuussineq imm. 1-imi taaneqartoq aalisarnissamut periarfissanut § 5 naaper-torlugu aalajangersarneqarsimasunut akornutaasumik atortinneqassanngilaq.§ 31. Angallat aalisarnissamut atortulersugaq imartami Kalaallit Nunaata aalisarnikkut oqartussaaffigisaani aalisarsinnaatitaaffiginngisaminiikkuni aalisarnermut atortuni angallatip iluaniitissavai umiatsiaallu inigisartakkaminniitissallugit.
Kapitali 12.
Aalisarneq pillugu Siunnersuisartoqatigiit.§ 32. Naalakkersuisoq Aalisarneq pillugu Siunnersuisartoqatigiinnik pilersitsissaaq aalisarnermi soqutigisaqaqatigiiffinnit kiisalu Aalisarnermut, Piniarnermut Nunalerinermullu Pisortaqarfimmit peqataaffigineqartumik.
Imm.2. Naalakkersuisut suliassani §§ 5, 7, 9, 10, 11, 13, 18, 20, 22 aamma 23-imut tunngasuni Aalisarneq pillugu Siunnersuisartoqatigiit tusarniartassavaat.
Kapitali 13.
Pineqaatissiissutit.§ 33. Akiliisitaanermik pineqaatissinneqassaaq
1) inatsisip § 6-iani, imm. 1 aamma 2-mik, § 7-ianik, § 8-anik, § 10-anik, § 12-ianik, § 13-ianik, § 15-imi, imm. 2, 3 aamma 4-mik, § 21-anik, § 24-ianik § 31-ianilluunniit unioqqutitsisoq;
2) § 28, § 29, imm. 1, § 30 § 35-iluunniit malillugit peqqussutinik inatsilluunniit malillugu malittarisassiat naapertorlugit peqqussutinik inerteqqutinilluunniit malinninngitsoq;
3) inatsit inatsilluunniit malillugu malittarisassiat naapertorlugit akuersissummi piumasarisanik sumiginnaasoq aamma
4) pisortanut oqartussaasunut paasissutissanik eqqunngitsunik paasinerluutaasinnaasunilluunniit nalunaaruteqartoq, inatsimmiluunniit inatsilluunniit malillugu malittarisassiat naapertorlugit peqqussutigineqartutut paasissutissiinngitsoq.
Imm. 2. Inatsit malillugu malittarisassiani aalajangersarneqarsinnaavoq malittarisassiani aalajangersakkanik unioqqutitsineq akiliisitaanermik kinguneqarsinnaasoq.
Imm. 3. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik assigisaalluunniit unioqqutitsisuuppat, ingerlatseqatigiiffik immini akiliisussanngortinneqarsinnaavoq.
Imm. 4. Angallat atorlugu unioqqutitsinerni angallatip piginnittua atuisualuunniit akiliisussanngortinneqarsinnaavoq, pineqartoq piaaraluni mianersuaalliorluniluunniit unioqqutitsisutut pisuutinneqarsinnaanngikkaluarpalluunniit. Pinerluttulerineq pillugu inatsimmi eqqartuussap akiliutigeqqusaq akilersinnaanngippagu pinerlussimasunut inissiisarfimmut inissinneqarsinnaaneranik malittarisassaq atortinneqassanngilaq.§ 34. Pinerluttulerineq pillugu inatsimmi arsaarinnittarneq pillugu malittarisassat taamatuttaaq atorneqassapput. Taamaattorli angallammit unioqqutitsilluni aalisartoqarpat piniutit atorneqartut, angallatip pisai tamarmiusut taakkualuunnit nalingi, unioqqutitsinani aalisarnermit pisarineqarsimasutut uppernarsineqartut nalingi pinnagit, arsaarinnissutigineqarsinnaapput.
Imm. 2. Taamatuttaaq ilungersunartumik arlaleriarluniluunniit pisat pillugit paasissutissiisimanngikkaanni amigartumilluunniit paasissutissiisimagaanni umiarsuarmik taassumaluunniit nalinganik arsaarinnittoqarsinnaavoq.
Imm. 3. Inatsit malillugu malittarisassiani aalajangersarneqarsinnaavoq malittarisassani aalajangersakkanik unioqqutitsinerit arsaarinninnermik kinguneqarsinnaasut.§ 35. Pisat imaluunniit pisat ilaasa nalingi arsaarinnissutigineqarpata arsaarinninnermut atatillugu angallat peqquneqarsinnaavoq pisat tamatumunnga naapertuuttut pisanit allanit immikkoorteqqullugit akuerissagaallu taakku oqartussanit § 28-imi taaneqartunit nalunaaqutserneqarnissaat. Taamaaliornikkut pisat nalingi arsaarinnissutigineqarsimasut pisallu allat akuleruttoornissaat pinngitsoortinneqarsinnaanngippat, angallat peqquneqarsinnaavoq pisat nalingi arsaarinnissutigineqarsimasut usingiaqqullugit.
Imm. 2. Immikkoortitsisimaneq nalunaaqutsersuisimanerlu attatiinnarneqassapput angallatip imartani Kalaallit Nunaata aalisarnikkut oqartussaaffigisaaniinnerani.§ 36. Pissutissaqarpat naatsorsuutigissallugu angallat inatsimmik inatsilluunniit malillugu malittarisassianik akiliisitaanermik imaluunniit arsaarinninnermik kinguneqarsinnaasumik unioqqutitsinermut atorneqarsimasoq, aalisarnermik nakkutilliisunit politiinilluunniit tigusarineqarsinnaavoq.
Imm. 2. Imartanili Kalaallit Nunaata aalisarnikkut oqartussaaffigisaasa avataani nunat allamiut angallataat aatsaat unitsinneqarsinnaavoq, misissuiffigineqarsinnaavoq tigusarineqarsinnaalluniluunniit, pissutissaqarpat naatsorsuutigissallugu imartap oqartussaaffígisap iluani unioqqutitsisoqarsimasoq, malersuinerlu aallartinneqarsimappat angallat suli aalisarnikkut oqartussaaffigisap iluaniitillugu uniganilu avammut ingerlaannarsimappat.§ 37. Angallat § 36 malillugu tigusarineqartoq eqqartuussisoqareerneratigut akiliisitsissutis-samilluunniit akuersereernikkut atortui tamaasa ilanngullugit tigummigallarneqarsinnaavoq akiliisitsissummut akiligassat arsaarinnissutigineqartullu nalingi suliassallu suliarineranni aningaasartuutaasut akilereerserlugit, imaluunniit akiligassat qularnaveeqqusernissaasa tungaannut, aammalu § 35 malillugu qanoq iliuusissat naammassineqarnissaasa tungaannut. Suliassap inaarutaasumik aalajangiivigineqarnerata kingorna qaammatit marluk qaangiutsinnagit tamanna pinngippat angallat atortullu naammassinnissutiginiarneqarsinnaapput.
Imm. 2. Imm. 1-imi malittarisassaq atortinneqassanngilaq angallammik atuisup taamaaliortussaatitaanani angallat atorsimappagu.
Imm. 3. Tigummigallarneqarneq akerlilerneqarpat Kalaallit Nunaanni eqqartuussisarnermut inatsimmi kap. 5, § 9 taamatut atortinneqassaaq, imaalilluguli apeqqut landsdommerimut saqummiunneqassalluni.§ 38. Inatsimmik inatsilluunniit malillugu malittarisassianik unioqqutitsinerit pillugit suliassat politiinit umiarsuulluunniit aalisarnermik nakkutilliissutip pineqartup naalagaanit akiliisitsissummik akuersinikkut, arsaarinninnikkut, suliassap suliarinerani aningaasartuutinut akilii-sinneqamikkut aamma § 35 malillugu iliuuseqarnikkut aalajangiiffigineqarsinnaapput. Kalaallit Nunaanni eqqartuussisarnermut inatsimmi kap. 5, § 21, imm. 1 taamatut atortinneqassaartaaq.
Imm. 2. Suliassaq imm. 1 malillugu aalajangiiffigineqanngippat Eqqartuussivimmut, Kredsretimut, suliassanngortinneqassaaq.
Imm. 3. Suliassat angallatinut 75 BRT/129 BT-init anginerusunut tunngasut, Kalaallit Nunaata Eqqartuussivianut, Grønlands Landsretimut, suliassanngortinneqassapput.
Imm. 4. Suliassaq imm. 1 malillugu aalajangiiffigineqarsimagaluarpalluunniit Kalaallit Nunaata Eqqartuussiviata qinnuigineqareernermigut suliassap Eqqartuussivimmut imaluunniit Kalaallit Nunaata Eqqartuussivianut suliassanngortinneqarnissaa akuerisinnaavaa. Aatsaalli taamaaliortoqassaaq pissutsit immikkut ittut tamanna pissutissaqartippassuk, aammalu taamaalioqqusineq akuersissuteqareernerup kingorna piaarnerpaamik imaluunniit qinnuteqartup taamaalioqqusinerup tapersersorneqarneranik ilisimasaqalersimanerata kingorna pippat.
Kapitali 14.
Atortuulersitsinermut ikaarsaariarnermilu aalajangersakkat.§ 39. Inatsit 1. november 1996 atortuulerpoq.
§ 40. Peqatigitillugu Inuutissarsiutigalugu aalisarneq pillugu inatsisartut inatsisaat nr. 17, 22. oktober 1990-imeersoq atorumaarsinneqarpoq. Inuutissarsiutiginagu piniarneq, aallaaniarneq aalisarnerlu pillugit Inatsisartut inatsisaanni nr. 11, 29. april 1992-imeersumi inuussutissarsiutiginagu aalisarneq pillugu aalajangersakkat taamatuttaaq atorunnaarsinneqarput.
Imm. 2. Malittarisassat inatsit imm. 1-imi taaneqartoq tunngavigalugu aalajangersarneqarsimasut atuukkallassapput malittarisassanik inatsisartut inatsisaannik matuminnga allanilluunniit tunngaveqarluni aalajangersarneqartutigut taarserneqarnissamik atorunnaarsinneqarnissamilluunniit tungaannut.
Namminersornerullutik Oqartussat, ulloq 31. oktober 1996
Lars Emil Johansen/
Pâviâraq Heilmann