Piniarneq aallaaniarnerlu pillugit Inatsisartut inatsisaat nr. 17, 31. oktober 1996-imeersoq.

 

Inatsisip atuuffii.

§ 1. Inatsit atuuppoq nunami imaanilu Kalaallit Nunaata oqartussaaffigisaani piniarnermut aallaaniarnermullu.

 

Inatsisip siunertaa.

§ 2. Inatsisip siunertaraa piniagassanit isumalluutit pissusissamisoortumik uumassusillillu eqqarsaatigalugit illersorneqarsinnaasumik iluaqutigineqarnissaasa qulakkeerneqarnissaat.
Imm. 2. Inatsisip atortinneqarnerani isumalluutit piujuarnissaat kinguaassiortuarnissaallu, ileqquusumik biologit siunnersuinerat naapertorlugu eqqarsaatigilluagaasumik ukiullu qanoq ilinera eqqarsaatigalugu pissarsiffiunerpaasumik iluaquteqarniarnissaq, piniarnermik inuussutissarsiuteqarnermi inuussutissarsiutinilu tamatumunnga attuumassuteqartuni aningaasaqarniarnikkut suliffissaqartitsiniarnikkullu isiginiagassat, inuussutissarsiornermi soqutigisat allat kiisalu innuttaasut sunngiffimminni sammisassaqarnissamut pisariaqartitaat pingaartinneqassapput.

 

Piniarsinnaanissamut aallaaniarsinnaanissamullu piumasaqaatit.

§ 3. Piniarneq aallaaniarnerlu inunnit taamaaliornissamut akuersissutaateqartunit taamaallaat ingerlanneqarsinnaavoq. Akuersissut inuussutissarsiutigalugu imaluunniit sunngiffimmi aallaaniarsinnaanermut allagartatut tunniunneqartarpoq, aammali takuuk § 4.
Imm. 2. Inuussutissarsiutigalugu piniarnermut aallaaniarnermullu akuersissut taamaallaat tunniunneqarsinnaavoq inunnut
1) inuiaqatigiinnut kalaallinut aalajangersimasumik attuumassuteqartunit;
2) Kalaallit Nunaanni najugalittut nalunaarsorneqarsimasunit Kalaallit Nunaannilu najugalittut ukiuni qaangiuttuni marlunni nalunaarsorneqarsimasunit; aamma
3) Kalaallit Nunaannut tamakkiisumik akileraartartussaatitaasunit Kalaallit Nunaannullu ukiuni qaangiuttuni marlunni tamakkiisumik akileraartartussaatitaasimasunit.
Imm. 3. Naalakkersuisut imm. 2, nr. 2-mi 3-milu piumasaqaatit atortinngitsoortissinnaavaat, qinnuteqartup Kalaallit Nunaannut attuumassuteqarnera aallaavigalugu tamanna naapertuuttutut isigineqarpat, qinnuteqartorlu ilinniarnermik assigisaanilluunniit pissuteqartumik Kalaallit Nunaata avataaniikkallarsimappat.
Imm. 4. Inuussutissarsiutiginagu piniarnissamut aallaaniarnissamullu akuersissut taamaallaat tunniunneqarsinnaavoq Qallunaat naalagaaffianni innuttaasunut Kalaallit Nunaanni najugaqavissunut. Nunani allani inuttaasut Kalaallit Nunaanni najugaqavissut ukiunilu marlunni ataannartumik najugaqarsimasut Qallunaat naalagaaffianni innuttaasutulli isigineqassapput.
Imm. 5. Aallaaniarsinnaanermut allagartat tunniunneqarnissaannut, pissarsiarinissaannut pigiunnaarsitaanissaannulluNaalakkersuisut maleruagassaliussapput.
Imm. 6. Naalakkersuisut imm. 5 malillugu malittarisassiornermut atatillugu kommunit peqqusinnaavaat tamatumunnga atatillugu allaffissornikkut ingerlatsinerup pisariaqartup ingerlannissaanut.

§ 4. Inuit § 3-mi pineqanngitsut piniarnernut aallaaniarnernullu suugaluartunulluunniit immikkut akuersissummik pigisaqassapput.
Imm. 2. Imm. 1 malillugu Naalakkersuisut akuersissummik tunniussitillugit akiliuteqartit-sinissamik aalajangiissapput, akiliutissallu angissusissaa Naalakkersuisunit aalajangiunneqassaaq. Akiliutissaq naatsorsorneqassaaq akuersissutit tunniunneqarnerani allaffissornikkut aningaasartuutit aallaavigalugit kiisalu inatsisip siunertaata isumagineqarneranut, akiliilluni piniartitsisarneq eqqartorneqartillugu.
Imm. 3. Ilisimatusarnikkut siunertanut Naalakkersuisut imm. 2-p atortinneqannginnissaanut immikkut akuersissuteqarsinnaapput.
Imm. 4. Naalakkersuisut imm. 1 malillugu piniarsinnaanermut aallaaniarsinnaanermullu akuersissutinik tunniussisarneq, pissarsisarneq pigiunnaarsitsinernullu pillugit kiisalu imm. 2 malillugu akiliuteqartitsinikkut pissarsiat atorneqarnerat pillugu erseqqinnerusunik malittarisassiorsinnaapput.
Imm. 5. Naalakkersuisut imm. 4 malillugu malittarisassiornermut atatillugu kommunit peqqusinnaavaat tamatumunnga atatillugu allaffissornikkut ingerlatsinerup pisariaqartup ingerlannissaanut, taamatullu Naalakkersuisut suliffeqarfiit takornariartitsisartullu peqatigiiffii ingerlatsinermik suliaqartussanngortillugit piginnaatissinnaallugit.

 

Eqqissisimatitsineq, piujuaannartitsiniarluni teknikkikkut iliuutsit, iluaquteqarniarneq il. il.

§ 5. Naalakkersuisut piniarnerup aallaaniarnerullu malittarisassatigut aqunneqarnerat pillugu iliuuseqarsinnaapput, tamatumunngalu atatillugu makku pillugit mallittarisassiorsinnaallutik:
1) Piffíssat eqqissisimatitsiviusut sumiiffiillu piniarfigineqannginnissaat aallaaniarfigineqannginnissaallu.
2) Pisanik piniarnermillu inerteqqutit imaluunniit killilersuinerit.
3) Pisarineqarsinnaasunik piffissanut sumiiffinnullu agguaassineq.
4) Pisassarititaasut iluanni pisassiissutit aalajangikkat aallaavigalugit §§3-4 malillugu piniarnerup suuneranut, kommuninut, angallatinut assigiinngitsunut, angallatinut ataasiakkaanut imaluunniit piniutinut piniariaatsinullu agguaassineq.
5) Inuit §§3-4 malillugit piumasaqaatinik naammassinnissimasut piniagassanik ataasiakkaanik piniarsinnaanerinut atugassarititaasunik erseqqinnerusunik aalajangersaaneq.
6) Piniutit, piniarnermi atortut taakkulu pisataasa ilusilersorneri atorneqartarnerilu, tamatumunnga ilanngullugu angallassissutit, piniutit piniariaatsilluunniit aalajangersimasut atorneqartarnerinut inerteqqutit.
7) Piniarnermi aallaaniarnermilu ileqqorissaarnissamut malittarisassat.
8) Pisat suliareqqaarneqartarnerat, iluaqutigineqarnerat tuniniarneqartarnerallu.
9) Piniakkat angissusissaat, qassinik ukioqarnissaat suiaassusiallu.
10) Uumasut piniarneqartarnissaat siunertaralugu nuunneqarnerat ingerlanneqarnerallu.
Imm. 2. Naalakkersuisut imm. 1 malillugu malittarisassiornermi kommuunit peqqusinnaavaat tamatumunnga atatillugu pisariaqartinneqartumik allaffissornikkut ingerlatsineq isumageqqullugu.
Imm. 3. Taamaattoq Naalakkersuisut piginnaatitsinerisigut imm. 1 malillugu kommuunimut ataatsimut atuuttumik kommunalbestyrelsi pineqartoq malittarisassiorsinnaavoq Naalakkersuisut akuersissuteqarnerisigut.
Imm. 4. Piniarnermi aallaaniarnermilu aallaasinik eqittaannartakkanik eqqarasuartaatinillu atuineq inerteqqutaavoq.
Imm. 5. Naalakkersuisulli malittarisassiorsinnaapput, piniagassat, sumiiffiit piffíssallu ilaat eqqarsaatigalugit § 3, imm. 2 malillugu piniarnermut aallaaniarnennullu aallaasit eqittaannartakkat atorneqarsinnaanerinut akuersissuteqarfiusinnaasunik.

 

Pisanikpinngortitamilu uumassusilinnik nujuartanik misissuinerit.

§ 6. § 5-imi imm. 1 aamma imm. 3 malillugit aalajangersakkat apeqqutaatinnagit Naalakkersuisut piniarnissamut aallaaniarnissamullu akuersissuteqarsinnaapput, nunami piniagassatigut isumalluutit paasiniarneqarnerannut ilisimatuussutsikkulluunniit misissuinernut atatillugu.

 

Kisitsisitigut paasissutissat.

§ 7. § 3 malillugu aallaaniarsinnaanermut allagartanik kiisalu § 4 malillugu akuersissutinik pigisaqartut uumassusilinnik naliliiniarnermut malittarisassaqartitsinikkullu ingerlatsinermi atugassanik pisat pillugit paasissutissiisarnissaannik Naalakkersuisut malittarisassiorsinnaapput.

 

Nakkutilliineq.

§ 8. Inatsit manna malillugu aalajangersakkat aammalu maleruaqqusat inatsit taanna tunngavigalugu pilersinneqartut malinneqarnerannik nakkutilliineq pillugu Naalakkersuisut malittarisassiorsinnaapput.
Imm. 2. Pisat, inatsit malillugu malittarisassianut akerliusumik pisarineqarsimasut, allanut tunniunneqartarnerat, pisisarneq tunisisarnerlu pinngitsoortinniarlugu Naalakkersuisut malittarisassiorsinnaapput, ilaatigut makku pillugit:
1) Allat pisaannik pissarsisimaneq pillugu paasissutissiinissamut pisussaaffeqarneq.
2) Inuit il. il. piniarnissamut aallaaniarnissamullu piginnaatitaaffeqanngitsut pisarisimasaannik taakkualuunniit ilaannik pissarsinissamut inerteqqutinik.
3) Uumasunik pisassalersuiffmsunik pisanik taakkualuunniit ilaannik, pisassat tamakkerneqareernerisigut, uumasunik taakkuninnga pissarsinissamut inerteqqutinik.
Imm. 3. Naalakkersuisut maleruaqqusanik aalajangersaasinnaapput, pisat suliarineqanngitsut, eqqissisimatitsinerup avataani pisarineqarsimasut tuniniarneqarsinnaasut ulluni aalajangersimasuni, eqqissisimatitsiffiusup atuutilereernerani. Ilanngullugu Naalakkersuisut ersarinnerusumik nassuiaassisinnaapput, pisat suliarineqanngitsut qanoq paasisariaqarnersut.

§ 9. Aalisarnermik nakkutilliisut politiillu piniarnermut aallaaniarnermullu angallatit kiisalu angallatit piniarnermut aallaaniarnermullu assartuissutigineqartut unitsissinnaavaat ikiffigalugillu sulinerminnut atatillugu misissuiffiginiarlugit, tassunga ilanngullugit angallatip pappialaataanik assigisaannillu misissuiffiginiarlugit kiisalu piniarnermut aallaaniarnermullu atortut misissorniarlugit, piumasarisinnaallugulu piniarnermut aallaaniarnermullu atortut qaqinneqarnissaat sulinerminnut atatillugu misissugassatut. Taamatuttaaq angallatit taamaattut Kalaallit Nunaanni umiarsualivimmut toqqarneqartumut ingerlaqqullugit naalakkerneqarsinnaapput pisaasa atortuisalu misissuiffigineqarnissaat niooqqarneqarnissaalluunniit siunertaralugu.

 

Piniarnermut Siunnersuisoqatigiit.

§ 10. Piniarnermut Siunnersuisoqatigiit Naalakkersuisunit pilersinneqassapput Aalisarnermut, Piniarnermut Nunalerinermullu Pisortaqarfímmit kiisalu piniarnermut tunngasunik soqutigisalinnik ilaasortaaffigineqartumit.
Imm. 2. Naalakkersuisut Piniarnermut Siunnersuisoqatigiit sulianut §§ 3, 4, 5, 6 aamma 7-mut tunngasunut tusarniaaffigisinnaavaat.

 

Pineqaatissiissutit.

§ 11. Akiliisitsinermikkinguneqarsinnaapput:
1) Inatsimmi §§3-5 aamma § 8 maleruagassallu §§3-5 aamma §§7, 8-lu naapertorlugit aalajangersarneqarsimasut unioqqutinneqarpata;
2) § 9 malillugu peqqussuteqarnerit, imaluunniit inatsit malillugu malittarisassiarineqarsimasut naapertorlugit peqqussuteqarnerit inerteqquteqarnerillu malinneqanngippata;
3) inatsit imaluunniit inatsit malillugu malittarisassiarineqarsimasut naapertorlugit akuersissuteqarnermut piumasaqaataasut ilaginnarneqarpata; aamma
4) pisortanut oqartussaasunut eqqunngitsunik paasinerluutaasinnaasunilluuniit paasissutissiisoqarpat, imaluunniit inatsimmi inatsilluunniit malillugu malittarisassiarineqarsimasut naapertorlugit peqqussutigineqartutut paasissutissiisoqanngippat.
Imm. 2. Inatsit malillugu maleruaqqusaliani aalajangersarneqarsinnaavoq maleruaqqusaliani aalajangersakkanik unioqqutitsineq akiliisitsinermik kinguneqarsinnaasoq.
Imm. 3. Angallat atorlugu unioqqutitsisoqartillugu angallammik piginnittoq atuisinnaatitaasorluunniit akiliisitaanissamut akisussaasunngortinneqarsinnaavoq, unioqqutitsineq piaaraluneernertut mianersuaalliornertulluunniit pineqartumut tutsinneqarsinnaanngikkaluarpalluunniit.

§ 12. Pinerluttulerinermik inatsimmi arsaarinnittarneq pillugu malittarisassat atuupputtaaq.

§ 13. Pissutissaqarluarpat naatsorsuutigissallugu angallat inatsimmik imaluunniit inatsit malillugu malittarisassiarineqartunik unioqqutitsinermut akiliisitsinermik kinguneqarsinnaasumut atorneqarsimasoq aalisarnermik nakkutilliisunit politiinilluunniit tigusarineqarsinnaavoq.

§ 14. Angallat § 13 malillugu tigusarineqartoq eqqartuussisoqareerneratigut akiliisitsissutissamilluunniit akuersereernikkut atortui tamaasa ilanngullugit tigummigallagassanngortinneqarsinnaavoq, aningaasat akiligassanngortinneqartut arsaarinnissutigineqartussanngortinneqartullu aamma suliamut aningaasartuutit akilerneqareerserlugit akiliinissamulluunniit qularnaveeqqusiisoqareerserlugu. Suliap inaarutaasumik aalajangiivigineqarneraniit qaammatit marluk qaangiutsinnagit tamanna pinngippat angallat atortullu naammassissutigineqarsinnaapput.
Imm. 2. Imm. 1-imi malittarisassaq atorneqassanngilaq angallammik atuisimasoq pisussaatitaanani atuisimappat. Imm. 1 atorneqassanngilaq angallatit piniutillu qularnaveeqqutitut tiguneqarnisaat Kalaallit Nunaanni eqqartuussisarneq pillugu inatsisip ajornartippagu.
Imm. 3. Tigummigallagassanngortitsineq akerlilerneqarpat Kalaallit Nunaanni eqqartuussisarneq pillugu inatsimmi kapitali 5, § 9 atorneqassaaq, taamaattorli apeqqut landsdommerimut suliassanngortillugu.

§ 15. Inatsimmik inatsilluunniit malillugu malittarisassiarineqarsimasunik unioqqutitsinerit pillugit suliat politiinit taamatullu angallatip nakkutilliissutip pineqartup naalagaanit aalajangiiffigineqarsinnaapput akiliisitsinerup, arsaarinninnerup suliamullu aningaasartuutit akuersissutigineqarnerisigut. Taamatuttaaq Kalaallit Nunaanni eqqartuussisarneq pillugu inatsimmi kap. 5, § 21 atorneqassaaq.
Imm. 2. Imm. 1 malillugu suliaq aalajangiivigineqanngippat, kredsrettimut taanna suliassanngortinneqassaaq.
Imm. 3. Suliap imm. 1 malillugu aalajangiivigineqarsimanera apeqqutaatinnagu landsdommerip qinnuteqaateqartoqareerneratigut akuerisinnaavaa suliap kredsrettimut suliassanngortinneqarnissaa. Tamannali aatsaat atuuppoq pissutsit immikkut ittut tamanna pissutissaqartippassuk, akuersissuteqarnerullu kingornatigut piaarnerpaamik qinnuteqaat saqqummiunneqarsimappat imaluunniit qinnuteqaateqartoq pissutsinik ilisimasaqalersimappat taakkunatigut qinnuteqaat taperserneqarsimalluni.

 

Atuutilersitsinermut ikaarsaariarnermullu aalajangersakkat.

§ 16. Inatsit 1. november 1996 atuutilerpoq.
Imm. 2. Tamatumunnga peqatigitillugu inuussutissarsiutigalugu piniarnermut aallaaniarnermullu inatsisartut inatsisaat nr. 12, 22. november 1984-imeersoq kiisalu inuussutissarsiutiginagu piniarneq, aallaaniarneq aalisarnerlu pillugit inatsisartut inatsisaat nr. 11, 29. april 1992-imeersoq atorunnaarsinneqarput.
Imm. 3. Inuussutissarsiutigalugu piniarnermut aallaaniarnermullu inatsisartut inatsisaat nr. 12, 22. november 1984-imeersoq kiisalu inuussutissarsiutiginagu piniarneq, aallaaniarneq aalisarnerlu pillugit inatsisartut inatsisaat nr. 11, 29. april 1992-imeersoq imaluunniit piniarneq, aallaaniarneq inuussutissarsiutiginagulu aalisarneq pillugit siusinnerusukkut malittarisassat malillugit maleruagassiarineqarsimasut atuutiinnassapput, aalajangersakkatigut inatsisartut inatsisaat manna naapertorlugu imaluunniit inatsisartut aalisarneq pillugu inatsisaat tunngavi-galugu suliarineqartutigut atorunnaarsinneqarnissamik tungaannut.

Namminersornerullutik Oqartussat, ulloq 31. oktober 1996.

Lars Emil Johansen

/

Pâviâraq Heilmann