Pappiaqqanik nalilinnik naqissusiinermi akitsuut pillugu Inatsisartut inatsisaata allanngortinneqarneranik Inatsisartut inatsisaat nr. 7, 23. oktober 1996-imeersoq.

 

§ 1

Pappiaqqanik nalilinnik naqissusiinermi akitsuut pillugu Inatsisartut inatsisaanni nr. 8-mi 31. oktober 1987-imeersumi, ilaatigut Inatsisartut inatsisaatigut nr. 6-kkut 20. oktober 1989-imeersukkut kingullermillu Inatsisartut inatsisaatigut nr. 10-kkut 13. juni 1994-imeersukkut allanngortinneqartumi makku allannguutigitinneqassapput:

1. § 2 atorunnaarsinneqarpoq.

2. § 3-mi imm. 1, 2 aamma 3 atorunnaarsinneqarput, taakkununngalu taarsiullugu uku ilanngunneqarlutik:
"Ingerlatseqatigiiffinni, peqatigiifinni assigisaannilu § 1-imi pigisamik aalaakkaasumik taaneqartumik piginninnissamik, attartortitsinissamik allatulluunniit ingerlatsinissamik pingaarnerutillugu siunertaqartuni piginneqataassutinik, anpartinik, aktianik assigisaannillu tunisaqarneq pigisap nalinginnaasumik niuernermi nalingata ilaanut piginneqatigiissut tunineqartoq ingerlatseqatigiiffiup il.il. aningaasaataanut tamarmiusunut naleqquttoq naqissusiinermi 1,5 %-imik akitsuuserneqassaaq.
Imm. 2. Taamaattorli imm. 1 malillugu naqissusiinissamut pisussaaffik atuutissanngilaq piginneqataassutinut ataasiakkaanut il.il. najugaqarnissamut pisinnaatitaaffik ilanngullugu aalajangersarneqarsimappat."

Imm. 4-mi matuma kingorna imm. 3-nngortumi allassimasoq "1 aamma 2 naapertorlugit" allanngortinneqarpoq ima: "1 naapertorlugu"

3. § 5, imm. 1 imatut oqaasertalerneqassaaq:
"Pantebrevit qularnaveeqqusiissutitullu uppernarsaatit (skadesløsbreve) pigisami aalaakkaasumi pialuutiniluunniit, matumani umiarsuit angallatillu nuannaariutaasartut ilanngullugit, qularnaveeqqusiunneqartut naqissusiinermi 1,5 %-imik akitsuuserneqassapput, erniat aningaasartuutillu ilanngunnagit."

4. § 6-imi oqaaseqatigiit siulliit imatut oqaasertaqassapput:
"Pialuutinik, matumani umiarsuit angallatillu § 4-mi taaneqartut ilanngullugit, tunisinermut atatillugu § 4 malillugu pappiaqqanik naqissuserneqartussaatitaasunik pilersitsisoqassaaq, pialuutinilu tunineqartuni qularnaveeqqusiineq § 5-imut attuumassuteqarpat naqissusiinermi akitsuutip tamarmiusup naqissusiinermi akitsuusiussassaatitaasoq § 4 imaluunniit § 5 malillugu naatsorsorneqarsimasoq 1,5 % sinnersimassanngilaa."

 

§ 2

Inatsisartut inatsisaat manna ingerlaannartumik atortuulersinneqarpoq inatsisissatullu siunnersuutip saqqummiunneqarnera aallarnerfigalugu atuussinnaassuseqalerluni.

Namminersornerullutik Oqartussat, ulloq 23. oktober 1996

Lars Emil Johansen

/

Daniel Skifte

---

Inatsisissatut siunnersuut saqqummiunneqarlunilu siullermeerlugu oqaluuseri-neqarpoq 1. oktober 1996-imi, taamaasillunilu Inatsisartut inatsisaat § 2 naa-pertorlugu ullormit tassanngaanniit sunniuteqalersumik atortuulersinneqarpoq.