Avatangiisit innarlitsaaliorneqarnissaannik Inatsisartut peqqussutaata allanngortinneqarneranik Inatsisartut peqqussutaat nr. 14, 31. oktober 1996-imeersoq.

 

§ 1.

Avatangiisit innarlitsaaliorneqarnissaannik Inatsisartut peqqussutaanni nr. 12-imi 22. december 1988-imeersumi peqqussutikkut nr. 7-ikkut 13. maj 1993-imeersukkut allanngortinneqartumi allannguutigitinneqassapput:

1. § 7-ip kingorna uku ilanngunneqassapput:
"§ 7 a. Illoqarfiit nunaqarfiillu killeqarfiisa iluini assartuutit motorinik ingerlatillit aqqusinerni, illut akornini aqqusinerni, biilinik inissiisarfinni assigisaannilu taamatut atorneqartussatut naatsorsuussani taamaallaat atorneqarsinnaapput.
Imm. 2. Illoqarfiit nunaqarfiillu killeqarfiisa iluini nunaminertat imm. 1-imi taaneqartut avataanni kommunalbestyrelsi sulinermut atatillugu angallassinermut assigisaannullu piffissaa killilerlugu immikkut akuersissuteqarsinnaavoq. Piffissap immikkut akuersissuteqarfiup naanerani nunaminertat ileqqumittut peqqissaartumik ilusileqqinneqarnissaat kommunalbestyrelsip akisussaaffigaa, taamatullu immikkut akuersissuteqarnermut atatillugu nunaminertat isikkumittut ilusileqqinneqarnissaat pillugu kommunalbestyrelsi piumasaqaateqarsinnaavoq.
Imm. 3. Illoqarfiit nunaqarfiillu killeqarfiisa iluini nunaminertat immikkut ittut assartuutinut aalajangersimasunut, assersuutigalugu qamuteralannut (snescooterinut) ingerlaarfissat aqqutissalluunniit maleruaqqusatigut kommunalbestyrelsip aalajangersaavigisinnaavai. Maleruaqqusat atortuulersinneqarnerinut peqatigitillugu tamanut saqqummiunneqartassapput, ilisimatitsissutitullu Naalakkersuisunut nassiunneqarlutik.
Imm. 4. Naalakkersuisut kommuni pisussaatissinnaavaat nunaminertanik aqqutissanilluunniit immikkut ittunik aalajangersaanissamut, kommunimi illoqarfiup nunaqarfiilluunniit killeqarfiisigut ilummut avammulluunníit assartuutit motorimik ingerlatillit atorlugit assartuinissamut periarfissat isumannaarlugit.

§ 7 b. Angallassissutit sumi atorneqarsinnaanerat pillugu Naalakkersuisut nalunaarusiorsinnaapput.
Imm. 2. Nalunaarutit imm. 1-imi taaneqartut nunap ilaanut aqutsinikkut erseqqissumik nassuiarneqarsimasumut atuuttussanngorlugit ilusilerneqassapput.
Imm. 3. Nalunaarutit iiran. 1-imi taaneqartut assartuutinut assigiinngitsunut malittarisassanik assigiinngitsunik imaqarsinnaapput, assersuutigalugu sikkilinut qaqqakkoorutinut, snescooterinut, assartuutinut nunaannakkoorutinut sukkasuunut sukkaatsunullu, angallatinut timmeralaanut timmeralaajunngitsunullu, timmisartunut motorimik ingerlatilinnut il.il.
Imm. 4. Nalunaarutit imm. 1-imi taaneqartut imatut ilusilerneqarsinnaapput
a) nunaminertanik killilersuutitut/ assartuutit ilaasa atorneqarnissaannik inerteqquteqarfiusutut imaluunniit
b) nunaminertanik killilersuutitut assartuinermilu aqqutigineqartussatut, assartuutit ilaasa atorneqarnissaannik akuersissuteqarfiusutut, nunaminertap sinnerani ataatsimut isigalugu atuinissamik inerteqquteqarfiusutut.
Imm. 5. Nalunaarutit imm. 1-imi taaneqartut assartuutit siu-nertanut immikkut ittunut atorneqarnissaannik Naalakkersuisut immikkut akuersissuteqarsinnaanerannut periarfissaat pillugit tunaartarisassanik imaqassapput, assersuutigalugu piniarnermik ingerlatanut, pisortat assartuinerinut, ilisimatusarnikkut ingerlatanut allatigullu killilimmik atuinernut atatillugu.

§ 7 c. § 7 a-mi aamma 7 b-mi killilersuutit taaneqartut annaassiniarnernut, politiit misissuinerinut assigisaannullu atatillugu assartuinernut atuutinngillat.
Imm. 2. § 7 b-mi killilersuutit taaneqartut Naalakkersuisut kommunalbestyrelsillu avatangiisinik pinngortitamillu nakkutil-liinerannut atatillugu atuutinngillat."

2. § 46, imm. 2-mi "§ 7 malillugu" uuminnga taarserneqassaaq "§ 7, § 7 a aamma 7 b malillugit".

 

§ 2.

Inatsisartut peqqussutaat manna 1. november 1996 aallarnerfigalugu atortuulersinneqarpoq.

Namminersornerullutik Oqartussat, ulloq 31. oktober 1996.

Lars Emil Johansen

/

Marianne Jensen