Inissianik attartorneq pillugu inatsisartut peqqussutaata allanngortinneqarneranik inatsisartut peqqussutaat nr. 9, 31. oktober 1996-imeersoq.

 

§1.

Inissianik attartorneq pillugu inatsisartut peqqussutaanni nr. 3-mi, 13. juni 1994-imeersumi, kingullermik inatsisartut peqqussutaatigut nr. 8, 30. oktober 1995-i-meersukkut allanngortinneqartumi, makku allannguutigitinneqassapput:

1. § 4 imatut oqaasertalerneqassaaq:
"§ 4. Namminersornerullutik Oqartussat kommunillu illuutaanni inissiat atorneqanngitsut inissarsiortunut, utaqqisunut allattorsimaffimmiittunut, innersuunneqartassapput, taamaattoq tak. imm. 2 aamma 3.
Imm. 2. Imm. 1-imi utaqqisunut allattorsimaffimmi taaneqartunit siulliullugit innersuunneqartassapput nutarsaanermut (nutaanillu sananiarluni) isaterinermut atatillugu Namminersornerullutik Oqartussat kommunillu inisseeqqinnissami inissiat pisariaqartitaat, tak. imm. 4.
Imm. 3. Taarsiullugu inissat pisariaqartitat naammassineqareeraangata, tak. imm. 2, imm. 1-imi utaqqisunut allattorsimaffimmi taaneqartunit siulliullugit inissiat atorneqanngitsut innersuunneqassapput pissutsit kinguliiniittut malillugit imatut tulleriinnilerlugit:
1) Inissiat atorneqanngitsut amerlanerpaamik 50%-ii sulisorisanut inissiatut innersuunneqartassapput, tak. imm. 5.
2) Inissiat atorneqanngitsut amerlanerpaamik 20%-ii allamut nuukkusulluni qinnuteqartunut innersuunneqartassapput, tak. imm. 6.
3) Inissiat atorneqanngitsut amerlanerpaamik 20%-ii isumaginninnikkut ajornartorsiutit nukinginnartut aaqqiivigineqarnissaanni kommuninut innersuunneqartassapput, tak. imm. 7.
Imm. 4. Nutarsaanermut (nutaanillu sananiarluni) isaterinermut atatillugu taarsiullugu inissatut innersuunneqartut naammaginartumik angissuseqassasut, inissisimassasut, pitsaassuseqassasut atortulersorneqassasullu anguniarneqassaaq, inissiamilu qimatami ineqarnermut akiliutitut atsigisumik akiliuteqartinneqassallutik.
Imm. 5. Sulisorisanut ataatsimoorussamik inissiaatit kommunini tamani inissiat aalajangersimasumik amerlassusilerlugit agguaanneqartassapput, amerlassusaallu Naalakkersuisunit aalajangersarneqartassaaq.
Imm. 6. Allamut nuukkusulluni qinnuteqaatit naammassineqarnissaanni tunngavissaatitaavoq qinnuteqartup inissiami qimanneqartussami piffissami aalajangersimasumik sivisussusilimmi najugaqarsimanissaa. Piffissap sivisussusissaa Naalakkersuisunit aalajangersarneqassaaq, tak. imm. 8.
Imm. 7. Kommunit kommunalbestyrelsip aalajangiinera naapertorlugu isumaginninnikkut ajornartorsiutit aaqqiiviginiarlugit inissianik innersuussisinnaatitaapput inissiat atorneeruttut tallimaagaangata tallimaannik. Ineqarnermut akiliut tassungalu atatillugu aningaasartuutit, inissiap kommunimit atorneqarsinnaalerfianit, attartortilernissaatalu tungaanut, kommunimit akilerneqartassapput. Aammattaaq attartortup, isumaginninneq pillugu inatsisit naapertorlugit aningaasaliiffigineqartarpat, attartornermik isumaqatigiissummik naammassinninnissaanut kommuni qularnaveeqqusiisussaavoq.
Imm. 8. Namminersornerullutik Oqartussat kommunillu inissiaataannik innersuussineq attartortitsinerlu pillugit maleruagassat erseqqinnerusut, aammattaaq utaqqisunut allattorsimaffimmiinnermut akiliut allamullu nuukkusulluni qinnuteqaatit naammassiumallugit inissianik innersuussineq, Naalakkersuisut aalajangersassavaat."

2. § 30, imm. 2 imatut oqaasertalerneqassaaq:
"Imm. 2. Attartukkamik nutarsaaneq (nutaanillu sananiarluni) isaterineq pissutigalugu Namminersornerullutik Oqartussat kommunilluunniit attartorneq atorunnaarsippassuk, tak. imm. 1, nr. 2, attartortoq inissaanik allamik innersuunneqassaaq, tak. § 4, imm. 2, aamma 4. Inissamik allamik innersuussisussaatitaaneq taamaallaat atuuppoq attartukkami atorunnaarsinneqartumi attartornermut isumaqatigiissut attartortumit malinneqarsimasaraangat."

 

§ 2.

Inatsisartut peqqussutaat atortuulerpoq ulloq 1. januar 1997.

Namminersornerullutik Oqartussat, ulloq 31. oktober 1996.

Lars Emil Johansen

/

Daniel Skifte