Aalisarnermut, piniarnermut nunalerinermullu tapersiisarneq pillugu Inatsisartut peqqussutaat nr. 8, 31. oktober 1996-imeersoq.
Kalaallit Nunaanni inuutissarsiutinut tapersiisarnernut inatsimmi nr. 134, 28. marts 1984-imeersumi § 1 naapertorlugu aalajangersarneqarput:
Kapitali 1.
Inuussutissarsiutinut tapersiisarnikkut siunertat tunngaviillu.§ 1. Aalisarnermik, piniarnermik nunalerinermillu inuussutissarsiutit pissarsiviulluartartut unammillersinnaasullu siuarsarneqarnissaat siunertaralaugu kiisalu suliffeqarfiit siunissami suliffissaqartitsinerulernermut sunniuteqarsinnaasut nutaat pilersiortorneqarnissaat imaluunniit pigineqareersut isumannaarneqarnissaat siunertaralugu kapitali 3-mi aamma kapitali 4-mi allassimasutut annertutigisunik inunnut ingerlatseqatigiiffinnulluunniit inuussutissarsiutinik pineqartunik Kalaallit Nunaanni ingerlatsisinnaatitaasunut Kalaallit Nunaanni aalajangersimasumik najugaqartunut angerlarsimaffeqartunulluunniit Namminersornerullutik Oqartussat tapiissuteqarsinnaapput.
Imm. 2. Tapiissuteqarnermi inuussutissarsiummut naleqquttumik aammalu ineriartortitsinissanut allanut, pisortat namminneerlutik imaluunniit ingerlatseqatigiiffiit suliffeqarfiilluunniit pisortat pigisaat aqqutigalugit aallartissimasaannut aallartinniarlugilluunniit eqqarsaatigisaannut, naleqqussakkamik, inissiiniartoqassaaq.§ 2. Tapersiissuteqartoqarnissaa, tapiissutit annertussusissaat atugassarititaasussallu pillugit apeqqutinik aalajangiiniarnermi makkua isiginiarneqassapput:
1) Inuussutissarsiutissatut siunertanut inuiaqatigiit aamma aningaasassaqarniarnerup tungaanit isigalugu siuarsassallugit kissaatigineqartunut pingaartumik tapiissuteqartoqartassaaq,
2) aatsaat tapiissuteqartoqarsinnaavoq ineriartortitsinermut kissaatigineqartumut, soorlu suliffissuarnut, angallatinut umiarsualivinnullu tunngatillugu aningaasaliinissanut pilersaarutinut aningaasaliissutissat naleqqutissappata,
3) aatsaat tapiissuteqartoqarsinnaavoq ingerlatassanut teknikkikkut illersorneqarsinnaasunut, aammalu piffissaq ungasinnerusoq eqqarsaatigalugu aningaasarsiornissanut tunngatillugu ingerlaannarsinnaasutut nalilerneqarsinnaasunut,
4) qinnuteqartup suliamut tunngatillugu piginnaasani uppernarsassavai taakkunuuna takuneqarsinnaanngorlugu sulliviup illersorneqarsinnaasumik ingerlanneqarnissaata isumannaarneqarnissaanut ingerlatsinikkut aqutsinikkullu piginnaassutsit pisariaqartinneqartut naammassineqarsimasut,
5) aatsaat tapiissuteqartoqarsinnaavoq taarsigassarsiniartoq nammineerluni aningaasaliissuteqassappat pilersinniakkap pisiarinerani akit taakkulu ilaasa kapitali 3-mi aamma kapitali 4, aalajangersakkat malillugit taarsigassarsianit aningaasaliivigineqarsinnaasut akornanni assigiinngissutsip ikinnerpaamik amerlaqataannik,
6) nammineerluni aningaasaliissutissat minnerpaamik affai pigineqariissapput tassaassallutik taarsigassarsiniartup nammineq aningaasanngorlugit pigisai, sinnerilu akuersissuteqarnikkut allanit inuussutissarsiutinut tapersiisarnermi ataatsimiititaliumiunngitsoq taarsigassarsinikkut pissarsiarineqarsinnaallutik aamma
7) suliffeqarfimmik nutaamik pilersitsinermut tapiissuteqartoqarsinnaanngilaq, § 8-mi aamma § 29-mi pissutsit taaneqartut eqqaassanngikkaanni, taarsigassarsiniartoq pisortanut akilereersimasassanik akiligassaqarpat.
Kapitali 2.
Inuussutissarsiutinut Tapersiisarnermi Ataatsimiititaliap inuttalersugaanera, pisinnaatitaaffii pisussaaffiilu.§ 3. Peqqussummi aalajangersakkat naapertorlugit Inuussutissarsiutinut Tapersiisarnermi Ataatsimiititaliaq tapiissuteqarnissamik aalajangiisassaaq.
Imm. 2. Ataatsimiititaliaq Inatsisartunit toqqarneqartunik, qinersinerup atuuttuusup ataatsip ingerlanerani ilaasortaasussanik, tallimanik inuttaqassaaq. Tamannalu ilutigalugu Inatsisartut toqqarneqartut akornanni kina ataatsimiititaliami siulittaasuussanersoq kinalu siulittaasumut tulliussanersoq toqqassavaat.
Imm. 3. Inatsisartunit ilaasortassatut toqqarneqartunut tamanut sinniisussanik aamma Inatsisartut toqqaassapput.
Imm. 4. Ataatsimiititaliap suliassat inuiaqatigiinnut annertuumik kinguneqartussat, tassunga ilanngullugu immikkut ittumik aningaasanut tunngatillugu kinguneqarsinnaasut, Naalakkersuisunut saqqummiuteqqaarlugit aatsaat aalajangiiffigisinnaavai.§ 4. Ataatsimiititaliap aalajangigaanut tunngatillugu maalaarutaasut suliarineqartarnissaannut Inuussutissarsiutinut Tapersiisarnermi Naammagittaalliuuteqartarfimmik taagorneqartumik pilersitsisoqassaaq.
Imm. 2. Naammagittaalliuuteqartarfik Inatsisartunit toqqarneqartunik, qinersinerup atuuttuusup ataatsip ingerlanerani ilaasortaasussanik, pingasunik inuttaqassaaq. Naammagittaalliuuteqartarfimmi ilaasortaasut Inuussutissarsiutinut Tapersiisarnermi Ataatsimiititaliamut ilaasortaajutigisinnaanngillat.
Imm. 3. Qinnuteqartut Ataatsimiititaliap aalajangersimasai Inuussutissarsiutinut Tapersiisarnermi Naamma-gittaalliuuteqartarfimmut, aalajangiisimanerup nalunaarutigineqartup tigunerata kingorna sapaatip akunneri sisamat qaangiutsinnagit, suliassiissutigisinnaavaat.
Imm. 4. Inuussutissarsiutinut Tapersiisarnermi Naammagittaalliuuteqartarfiup suliassiissutigineqartoq tamakkiisumik ilaannakuusumilluunniit patsisissaqarsoriguniuk, naammagittaalliuuteqartarfiup suliaq pineqartoq inuussutissarsiutinut tapersiisarnermi ataatsimiititaliamut suliareqqitassanngorlugu innersuussutigisinnaavaa, kisiannili naammagittaalliuuteqartarfik qinnuteqaatip akuerineqarnissaanik aalaj angiisinnaanngilaq.
Imm. 5. Suliassiissutigineqartoq naammagittaalliuuteqartarfimmit inuussutissarsiutinut tapersiisarnermi ataatsimiititaliamut suliareqqitassanngorlugu innersuussutigineqartoq ataatsimiititaliamit suliarineqassaaq, naammagittaalliuuteqartarfimmit suliap suliarineqarneranik ilisimatitsissummik tigusaqarnerminiit sapaatit akunneri sisamat qaangiutsinnagit. Suliamik suliareqqinnereernerup kingorna ataatsimiititaliap aalajangiinera tamatuma kingorna naammagittaalliuuteqartarfimmut suliareqqitassanngortinneqarsinnaanngilaq.§ 5. Naalakkersuisut nalunaarusiornikkut peqqussutip ingerlanneqarnissaa aalajangersassavaat, tassunga ilanngullugit ataatsimiititaliap suleriaasissaanut kommunillu peqataatinneqarnerannut tunngasut.
Imm. 2. Taamatuttaaq Naalakkersuisut nalunaarutikkut ilinniartitaanermut, aningaasaqarniarnermut aamma teknikimut tunngasutigut piumasaqaatit pillugit maleruagassanik aalajangersaasinnaapput, taarsigassarsisitsisoqartinnagu qinnuteqaateqartut suliassatullu pilersaarusiat naammassisimasassaannik.
Imm. 3. Naalakkersuisut aammattaaq nalunaarutikkut taarsigassarsianut, taarsigassarsianut qularnaveeqqusiissutinut tapiissutinullu allanut, peqqussut manna malillugu tunniunneqartunut piumasaqaatit allat pillugit maleruagassanik aalajangersaasinnaapput.
Kapitali 3.
Inuussutissarsiutinut ataasiakkaanut tapiissutit.
Aalisarneq piniarnerlu.§ 6. Inuussutissarsiutigalugu aalisarnermut piniarnermullu atugassanik motoreqareersunik nutaanik angallatitaarniartunut, nunami tunisassiorfinnut imaluunniit umiarsuarmut tunitsivimmut, naalakkersuisut immikkut akuersissuteqarnerisigut tunitsivissanngortitaasumut, pisatik tamakkerlugit tulaassisartunut, ernialinnik aamma erniaqanngitsunik taarsersugassaanngitsunillu taarsigassarsisitsisoqarsinnaavoq kiisalu imm. 2-miit 8-mut aalajangersakkat malillugit taarsigassarsisitsisarfinni namminersortuni pisortanilluunniit ingerlanneqartuni taarsigassarsianut qularnaveeqqusiisoqarsinnaalluni.
Imm. 2. Angallatinik imm. 1-imi pineqartunik pisaarniarnernut raajarniarnerinnavimmut atorneqartussanut imatut tapersiisoqarsinnaavoq aningaasaliissutit imatut annertussusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 62,5 %
2) Taarsigassarsiat erniaqanngitsut akilersugassaanngitsullu : 30 %
3) Nammineq aningaasaliissutit : 7,5 %
Imm. 3. Angallatinik imm. 1-imi pineqartunik pisaarnermut aalisakkanik allanik raajaanngitsunik aalisarnermut taamaallaat atorneqartussanut, pisut imm. 4-mi taaneqartut eqqaassanngikkaanni, imatut tapersiissuteqartoqarsinnaavoq aningaasalersuutit imatut annertussusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 55 %
2) Taarsigassarsiat erniaqanngitsut akilersugassaanngitsullu : 37,5 %
3) Nammineq aningaasaliissutit : 7,5 %
Imm. 4. Imm. 3 naapertorlugu angallatinik pisinermut tapersiissutit, pingaartumillu Qaanaami eqqaanilu aamma Tunumi taamaallaat atorneqartussanik imaluunniit 21 fod tikillugit imaluunniit 6,60 meterinik takissusilinnut, imatut aningaasalersorneqassapput:
1) Taarsigassarsiat erniallit imaluunniit taarsigassarsianut qularnaveeqqusiissutit : 50 %
2) Taarsigassarsiat erniaqanngitsut akilersugassaanngitsullu : 45 %
3) Nammineq aningaasaliissutit : 5 %
Imm. 5. Angallatinut Qaanaami eqqaanilu imaluunniit Tunumi atorneqartussanut, imm. 4 malillugu, piumasaqaataavoq taarsigassarsiniartup sumiiffimmi pineqartumi aalajangersimasumik najugaqarnissaa aamma angallatip sumiiffimmi pineqartumi angerlarsimaffeqarnissaa. Taarsigassarsisoq sumiiffimmut allamut nuussappat imaluunniit angallat sumiiffimmi pineqartumi atorneqarunnaassappat, tapersiissutit akuersissutigineqarsimasut imm. 3-mi allassimasutut procentinngorlugu annertussutsinut allanngortinneqarnissaat piumasaqaataasinnaavoq.
Imm. 6. Imm. 2-miit 4-mut taaneqartuni aningaasalersuineq § 9 naapertorlugu pisinermi aningaasartuutinit tamarmiusunit naatsorsorneqassaaq. Nammineq aningaasaliissutit minnerpaamik amerlassuseqassapput, aamma taarsigassarsiat erniaqanngitsut akilersugassaanngitsullu annerpaamik amerlassuseqarsinnaapput pisinermi akiusup aalajangersakkani procentinngorlugu avinnerisut taaneqartutut. Illuatungaani taarsigassarsiat erniallit imaluunniit taarsigassarsianut qularnaveeqqusiissutit annerpaamik amerlassuseqarsinnaapput pisinermi akiusup illuatungaanilu taarsigassarsiat erniaqanngitsut akilersugassaanngitsullu aamma nammineq aningaasaliissutit akornanni nikingassutaasutut.
Imm. 7. Imm. 2-miit 4-mut taaneqartuni taarsigassarsianut ernialinnut imaluunniit taarsigassarsianut qularnaveeqqusiissutinut kiisalu taarsigassarsianut erniaqanngitsunut akilersugassaanngitsunullu akilersuiffissap sivisussusissaa imatut aalajangersarneqarpoq:
1) Angallatinut qisummik sisammilluunniit sanaanut : ukiut 20
2) Angallatinut glasfiberimik sanaanut : ukiut 15
Imm. 8. Imm. 2-miit 4-mut taaneqartuni taarsigassarsianut ernialinnut imaluunniit taarsigassarsianut qularnaveeqqusiissutinut akilersuiffissap sivisussusia imatut aalajangersarneqassaaq akiliutissat siulliit angallatip tunniunneqarnerata kingornatigut kingusinnerpaamik ukiup ataatsip qaammatillu arfinillit qaangiunnerisigut akilersinneqartussanngorlugit.§ 7. Angallatinik atornikunik pisaarniarnernut imm. 2-miit 6-imut aalajangersakkat malillugit tapiissuteqartoqarsinnaavoq.
Imm. 2. Imm. 1 malillugu taamaallaat tapiissuteqartoqarsinnaavoq ataatsimiititaliaq siusinnerusukkut angallammut tapiissuteqarsimappat aamma tapiissutit taakku tamakkiisumik akilerneqarsimanngippata pissutissaatillugulu angallatip suli aallaqqaammut siunertaasussatut piumasaqaataasunut atorneqarnera.
Imm. 3. Imm. 1 malillugu annertunerpaamik tapiissuteqartoqarsinnaavoq ataatsimiititaliap ernialinnik, erniaqanngitsunik akilersugassaanngitsunillu taarsigassarsi-aritissimasaanik imaluunniit taarsigassarsianut qularna-veeqqusiissutaanik suli atuuttunik tamakkiisumik ilaannakuusumilluunniit tigusisoqartillugu.
Imm. 4. Imm. 1 malillugu angallatinik aningaasalersuinermut annertunerpaanik tapiissutissanik naatsorsuinermi naatsorsuinermut tunngaviusutut taarsigassarsisitsinermi naligititaasut aalajangersarneqassapput, qanoq annertunerpaaffiliilluni taarsigassarsiat atuuttut il.-il. tiguneqarsinnaanersut. Taarsigassarsisitsinermi naligititaasut imatut malittarisaqarluni aalajangersarneqassapput:
1) Angallatip pisiarineqarnerani siullermik akigititaasut tamarmiusut siullermik taarsigassarsisitsinermi angallammut naligititaasutut annertussuseqassapput,
2) piffissap nalikilliliiffiup naareerneratigut angallatip nalingata sinnera siullermik taarsigassarsisitsinermi naligititaasut 10%-iannik annertussusilerneqassaaq,
3) angallatinut qisummik sisammilluunniit sanaanut ukiut 20 aamma angallatinut glasfiberimik sanaanut ukiut 15-it ingerlanerini taarsigassarsisitsinermi naligititaasut assigiiaamik nalikillilerneqassapput aamma ukiumoortumik nalikilliliinerit siullermik taarsigassarsisitsinermi naligititaasunit taakkunannga 10%-it ilanngaatigeriarlugit naatsorsorneqassapput.
4) taarsigassarsisitsinermi naligititaalersut taamaa-lillutik annertussuseqalissapput siullermik taarsigassarsisitsinermi naligititaasut piffissamut ingerlareersumut nalikilliliissutinik ilanngarlugit, aamma
5) ataatsimiititaliaq ukiuni kingullerni qaangiuttuni tallimani angallammik iluarsaassinermut tapiissuteqarsimappat, taarsigassarsisitsinermi naligititaasoq taarsigassarsiat ilaannut akiligassanngorsimanngitsunut aamma nalikilliliissutaasimasutut annertussusilerlugu qaffanneqassaaq.
Imm. 5. Imm. 1 naapertorlugu angallatinik pisinermut aningaasaliissutissanut annertunerpaamik taarsigassarsiat erniallit imaluunniit taarsigassarsianut qularnaveeqqusiissutit tiguneqarsinnaapput angallatip taarsigassarsisitsinermi nalingata 90%-iinik amerlassusillit, taarsigassarsiat erniaqanngitsut akilersugassaanngitsullu atuuttut, taarsigassarsisitsinermi naligititaasut 25%-ii tikillugit tiguneqarsinnaasut, ilanngaatigalugit. Nammineq aningaasaliissutit amerlassuserissavaat pisiarineqarneranit akiliutigineqartussat atuuttut aamma taarsigassarsisitsinermi naligititaasup assigiinngissutaat, taamaattoq pisinermi akip minnerpaamik 10%-ia.
Imm. 6. Imm. 1 malillugu taarsigassarsiat tiguneqarsinnaapput piffissap akilersuiffissap sinnera maannamut piffissap akilersuiffissap sinneratut atuuttutut sivisussusilerlugu. Taarsiulluguli piffissaq akilersuiffissaq nutaaq aalajangersarneqarsinnaavoq angallatip piunissaata sinneruttutut naatsorsuutigisaasup sivisoqataa, kisiannili ukiunik qulinik sivisunerpaaffissalerlugu.§ 8. Umiatsiaaqqanik sanarlaanik 16 fodinik minnerpaamik takissusilinnik ikkuttakkanik motorilinnik inuussutissarsiutigalugu aalisarnermut piniarnermulluunniit atorneqartussanik pisinermut imm. 2-miit 4-mut aalajangersakkat malillugit tapiissuteqartoqarsinnaavoq.
Imm. 2. Taamaallaat tapiissuteqartoqarsinnaavoq qinnuteqaateqartunut akileraarutinut uppernarsaasiussatigut uppernarsaasunut:
1) Pineqartup ukiumi inaarutaasumik akileraaruteqarfiusumi kingullermi akileraartarnermi ilanngaatinik tamanik ilanngaassisoqannginnerani aningaasarsiai tamarmiusut umiatsiaaqqamit qimussimilluunniit aalisarnikkut piniarnikkulluunniit imaluunnit snescooterit atorlugit aalisakkanik pisanilluunniit assartuinikkut pissarsiarineqarsimasut ikinnerpaamik 25.000 kr.-iusimassasut,
2) isertitat taakku agguaqatigiissillugu pineqartup akissarsiaasa tamarmiusut ilanngaatitaqanngitsut ikinnerpaamik 50 %-erisimassagaat, aamma
3) qinnuteqaateqartup ukiup inaarutaasumik akileraaruteqarfiusp kingulliup naaneraniit piffissamut qinnuteqaateqarfiusumut umiatsiaaqqamit qimussimilluunniit aalisarnikkut piniarnikkulluunniit imaluunnit snescooterit atorlugit aalisakkanik pisanilluunniit assartuinikkut aningaasarsiami tamarmíusut minnerpaamik 50%-ii suli pissarsiarisassagai.
Imm.3. "Aningaasarsiat tamarmiusut umiatsiaaqqamit qimussimilluunniit aalisarnikkut piniarnikkulluunniit imaluunnit snescooterit atorlugit aalisakkanik pisanilluunniit assartuinikkut pissarsiarineqarsimasut"-ut paasineqassapput tunisinermi tuniniaanermilu isertitat tamarmiusut, akileraarusiisoqartinnagu aamma isertitanik pissarsinermut atatillugu aningaasartuutit ilanngaatigineqarsinnaasut tamaasa ilanngaatigineqartinnagit. Umiatsiaaqqamit allamit qinnuteqartumiunngitsoq pigineqartumit aalisarneq piniarnerluunniit pineqarpat, aningaasarsiatut tamarmiusutut aamma paasineqassapput akissarsiat, akileraarusiisoqartinnagu aamma ernianut aningaasartuutit, akileraartarnermi ilanngaatissat assigisaallu ilanngaatigineqartinnagit.
Imm.4. "Aningaasarsiatut ilanngaatitaqanngitsut tamarmiusut"-ut paasineqassapput aningaasarsiat A-t B-llu akileraaruteqaataasussat tamarmik, akileraarusiisoqartinnagu aamma ernianut aningaasartuutit, akileraartarnermi ilanngaatissat, aningaasartuutit ilanngaatigineqarsinnaasut assigisaallu ilanngatigineqartinnagit.
Imm. 5, Imm. 1 malillugu tapersiissuteqartoqassaaq umiatsiaaqqap pisiarinerani akit 75%-ii tikillugit tapiissuteqarnikkut. Umiatsiaaqqamut umiusimasumut aserorsimasumulluunniit qinnuteqaateqartup tamanna tikillugu pigisimasaanut sillimmasiissutitigut taartisisoqarsimappat umiatsiaaqqamut nutaamut pisiarinerani akit tapiissuteqarfigineqarsinnaasut sillimmasiissutitigut taarsiissutit amerlaqataannik ilanngarneqassapput.
Imm. 6. Imatut atugassaqartitsilluni tapiissuteqartoqassaaq tapiissutit utertinneqarnissaat piumasaqaatigineqarsinnaalluni umiatsiaaraq pisaarineqartoq inuussutissarsiutinut tapersiisarnermi ataatsimiititaliaq siumut isumaqatigiissuteqarfigeqqaarnagu pisaarineraniit ukiut tallimat qaangiutsinnagit allanut tunineqarpat imaluunniit tapiissuteqarfigineqartoq taaneqartutut piffissap ukiut tallimat ingerlanerini imm. 2, nr. 1 aamma 2-mi isertitatigut piumasaqaataasunik aalajangersakkanik naammassinnissinnaanngittuarsinnarpat.§ 9. Angallatinut § 6, § 7 aamma § 8 malillugit anin-gaasalersorneqartunut pisinermi akigititaasunut ilaapput isumaqatigiissummi akigititassatut isumaqatigiissutit, aalisarnermut atortussanut pisariaqartinneqartunut pisinermi aningaasartuutit, kvartalimut sillimmasiissutinut akiliutit kiisalu angallatip tiguneqarnerani aningaasartuutit allat il.il. angallatip angerlarsimaffianiit aalisalersitsinissamut angallatip tamakkiisumik atortulersornissaanut pisariaqartinneqartutut naatsorsuutigineqartut.
Imm. 2. Angallatinut nutaanut pisaartoqarnerani aningaasartuutinik appartitsinissamut allaniit toqqaannartumik tapiissuteqartoqarpat pisiarinerani akit tapiissutit ilanngaatiginagit naatsorsorneqassapput, aamma taarsigassarsiat erniaqanngitsut akilersugassaanngitsullu aalajangersakkat siuliiniittut malillugit tapiissutit nalingannik annikillisinneqassapput.§ 10. Inuussutissarsiutigalugu aalisarnermut piniarnermulluunniit angallatinik motoreqareersunik allanngortiterinermut iluarsaassinermulluunniit imaluunniit atortunik, motorinik, sillimaniarnermut atortunik aamma teknikikkut atortulersuutinik allanik angallatinut taamaattunut pisinernut imm. 2-miit 5-mut aalajangersakkat malillugit ernialinnik taarsigassarsisitsisoqarsinnaavoq aamma ernialersugaanngitsunik akilersugassaanngitsunillu taarsigassarsisitsisoqarsinnaalluni imaluunniit taarsigassarsiniartarfinnit namminersortut imaluunniit pisortat pigisaannit taarsigassarsianut qularnaveeqqusiisoqarsinnaalluni, piumasaqaatit uku naammassineqarsimappata:
1) angallammut peqqussut una imaluunniit inuussutissarsiutinut tapersiisarneq pillugu maleruagassat siusinnerusukkut atuuttut malillugit taarsigassarsianik ernialersukkanik imaluunniit taarsigassarsianut qularnaveeqqusiissutinik tapiissuteqartoqarsimassasoq
2) angallatinut qisunnut sisannulluunniit tunngatillugu angallat ukiut 25-it sinnerlugit pisoqaassuseqassanngitsoq aamma angallatinut glasfiberinut ukiut 15-it sinnersimassanagit, pissutsit immikkut illuinnartut pissutigineqassanngippata, taamaattoqartillugu teknikikkut aningaasarsiornikkullu sukumiisumik naliliisoqarneratigut tapersiisoqarsinnaassalluni, erseqqissumik uppernarsaneqarsinnaassappat qinnuteqaateqartup angallat imatut pitsaatigisumik ingerlassinnaagaa taarsigassarsianut akilersugassanut pisussaaffiit eqqortissinnaallugit, aamma
3) angallat sillimmaserneqarsimassasoq aamma taarsigassarsiallip sillimmasiinermut akiliutissaq kingulleq akilereersimassagaa.
Imm. 2. Imm. 1 malillugu aalisarnermut atortunik pisinermut aamma annikinnerusumik iluarsaassinissanut aammalu teknikikkut atortulersuutinut annikinnerusunut imatut tapiissuteqartoqarsinnaavoq aningaasalersuinerit imatut amerlassusilerlugit:
1) Taarsigassarsiat erniallit imaluunnit taarsigassarsianut qularnaveeqqusiissutit : 90 %
2) Nammineq aningaasaliissutit : 10 %
Imm. 3. Imm. 1 malillugu allanngortiterinernut aamma annertuunik iluarsaanernut, motorinik aammalu teknikikkut atortulersuutinut annertunerusunik allanik pisinernut kiisalu isumannaallisaatinik pisiortornernut imatut tapiissuteqartoqarsinnaavoq aningaasaliissutit imatut amerlassusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 60 %
2) Taarsigassarsiat erniaqanngitsut akilersugassaanngitsullu : 30 %
3) Nammineq aningaasaliissutit : 10 %
Imm. 4. Imm. 1-imiit 3-mut aalajangersakkat malillugit taarsigassarsiat erniallit imaluunniit taarsigassarsianut qularnaveeqqusiissutit annerpaamik amerlassuseqarsinnaapput sanaartornermi aningaasartuutit illuatungaanilu taarsigassarsiaasinnaasut erniaqanngitsut akilersugassaanngitsullu aamma nammineq aningaasaliissutit akornanni nikingassutaasut. Taarsigassarsiat erniaqanngitsut akilersugassaanngitsullu annerpaamik aamma nammineq aningaasaliissutit minnerpaamik amerlassuseqassapput sanaartornermi aningaasartuutit procentinngorlugu avinnerisut taaneqartutut. Taamaattoq imm. 3 malillugu tapersiissuteqarneq imaluunniit angallatip aalisarnermut allamut ikaarsaariarneranut atatillugu imm. 2 malillugu tapersiissuteqarneq pineqarpat nammineq aningaasaliissutit 5%-mut appartinneqarsinnaapput taamaaqataanik taarsigassarsiat erniallit imaluunniit taarsigassarsianut qularnaveeqqusiissutit qaffanneqarnerisigut.
Imm. 5. Imm. 1-imiit 3-mut aalajangersakkat malillugit taarsigassarsianut imaluunniit taarsigassarsianut qularnaveeqqusiissutinut piffissaq akilersuiffissaq imatut sivisunerpaaffilerneqarsinnaavoq:
1) aalisariutip tunniunneqareernerata kingorna pissarsiarineqartunut aalisarnermi atortunik pisinermut tapiissuteqartoqarpat,ukiut tallimanut.
2) Iluarsartuussinernut annikinnerusunut ammalu teknikikkut atortulersuutinut annikinnerusunut tapiissuteqartoqarpat, ukiut tallimat.
3) Isumannaallisaatinut tapiissuteqartoqarpat, ukiut tallimat.
4) Allanngortiterinernut, annertunerusunik iluarsartuussinernut, motorinik aamma teknikikkut atortulersuutinik annertunerusunik pisinermut tapiissuteqartoqarpat, ukiut qulit.
Nersutaatit, tuttuuteqarneq assigisaallu.
§ 11. Nersutaateqarnermut assigisaannullu inuussutissarsiummut atatillugu illuutit sanaartornerinut, pisi-arinerinut allilerneqarnerinulluunniit tamatumunngalu atatillugu piginnittumut, atuisumut, aqutsisumut imaluunniit ikiortimut illuliuussinernut pisinernulluunniit ernialinnik taarsigassarsisitsisoqarsinnaavoq, taarsigassarsisitsisarfinnit namminersortunit pisortanilluunniit pigineqartunit taarsigassarsianut qularnaveeqqusiisoqarsinnaalluni imaluunniit ernialersugaanngitsunik taarsersugassaanngitsunillu taarsigassarsisitsisoqarsinnaalluni.
Imm. 2. Imm.l naapertorlugu taarsigassarsiat erniaqanngitsut taarsersugassaanngitsullu sanaartornermut pissarsinermulluunniit aningaasartuutit annerpaamik 60%-erisinnaavaat. Nersutaateqarnermulli assigisaanullu inuussutissarsiummut atatillugu namminerluni sanaartortoqarpat sanaartornermi atortussanut aningaasartuutit 90%-ii tikillugit erniaqanngitsunik taarsersugassaanngitsunillu taarsigassarsisitsisoqarsinnaavoq.
Imm. 3. Imm. 2. naapertorlugu taarsigassarsisitsinermi sanasunit ikiorneqarnernut pisariaqartunut ernialinnik taarsigassarsisitsisoqarsinnaavoq taarsigassarsianulluunniit qularnaveeqqusiisoqarsinnaalluni.
Imm. 4. Imm. 1 aamma imm. 2 naapertorlugit taarsigassarsiat sivisunerpaamik ukiuni 25-ni taarsersorneqassasut aalajangerneqassaaq. Imm. 3 naapertorlugu taarsigassarsiat sivisunerpaamik ukiuni qulini taarsersorneqassasut aalajangerneqassaaq.§ 12. § 11-mi aalajangersakkat tunngavigalugit illuliat kallerup innilernissaannut imaluunniit kallerup inniliuusernissaannut ernialinnik taarsigassarsisitsisoqarsinnaavoq imaluunniit taarsigassarsianut qularnaveeqqusiisoqarsinnaalluni kiisalu erniaqanngitsunik taarsersugassaanngitsunillu taarsigassarsisitsisoqarsinnaalluni .
Imm. 2. Imm. 1 naapertorlugu taarsigassarsiat erniaqanngitsut taarsersugassaanngitsullu annerpaamik sanaartornermut pisinermullu aningaasartuutit 60%-erisinnaavaat.
Imm. 3. Imm. 1 aamma imm. 2 naapertorlugit taarsigassarsiat taarsersornissaat sivisunerpaamik ukiunut qulinut aalajangerneqarsinnaavoq.§ 13. Nersutaatissarsinernut, tassunga ilanngullugit savat, tuttut aamma nersutit aminnanniartarfiit kiisalu maskiinarsinernut, nersutaateqarnermut atortussarsinernut assigisaannullu erniaqanngitsunik taarsersugassaanngitsunillu taarsigassarsisitsisoqarsinnaavoq imaluunniit taarsigassarsianut qularnaveqqusiisoqarsinnaalluni.
Imm. 2. Imm. 1 naapertorlugu taarsigassarsianut imaluunniit taarsigassarsiat qularnaveeqqusernerinut atatillugu erniaqanngitsunik taarsersugassaanngitsunillu traktorersinernut assaatinullu maskiinarsinernut, kiisalu maskiinanut allanut angisuunut motoorimik ikkunneqareersimasumik ingerlatilinnut, tamakkiisumik aningaasartuutit 30%-iat angullugu taarsigassarsisitsisoqarsinnaavoq.
Imm. 3. Imm. 1 aamma imm. 2 naapertorlugit taarsigassarsiat sivisunerpaamik ukiut qulit taarsersorneqassasut aalajangerneqarsinnaavoq.§ 14. Nunagissaanernut, tassunga ilanngullugit narsaasiornernut ujaraajaanernullu nutaanut, marraasarterinernut, paqqersaanernut, kalkilersuinernut naggorissaasersuinernullu kiisalu imerterusiornernut, ungalulersuinernut assigisaannullu, ernialinnik taarsigassarsisitsisoqarsinnaavoq imaluunniit taarsigassarsianut qularnaveeqqusiisoqarsinnaavoq kiisalu erniaqanngitsunik taarsersugassaanngitsunillu taarsigassarsisitsisoqarsinnaalluni .
Imm. 2. Imm. 1 naapertorlugu erniaqanngitsunik taarsersugassaanngitsunillu taarsigassarsiat annerpaamik aningaasartuutit 60%-erisinnaavaat.
Imm. 3. Imm. 1 aamm aimm. 2 malillugit taarsigassarsiat sivisunerpaamik ukiut qulit taarsersorneqassasut aalaj angerneqarsinnaavoq.§ 15. Pigisat nalillit, § 11-mi, § 12-imi aamma § 13-imi aalajangersakkanut ilaatinneqartut, iluarsarneqarnerinut ernialinnik taarsigassarsisitsisoqarsinnaavoq imaluunniit taarsigassarsianut qularnaveeqqusiisoqarsinnaalluni kiisalu erniaqanngitsunik taarsersugassaanngitsunillu taarsigassarsisitsisoqarsinnaalluni, pigisat nalillit pisaarinerini aalajangersakkanisut annertutigisunik, taamaattorli matumani taarsigassarsiat taarsersornissaat sivisunerpaamik ukiuni qulini ingerlassasoq aalajangerneqarsinnaalluni.
§ 16. §§-ini 11-mi, 12-imi, 13-imi, 14-imi 15-imilu aalajangersakkat naapertorlugit taarsigassarsiat erniallit taarsigassarsianulluunniit qularnaveeqqusiinerit siunertarineqartumut taarsigassarsiat erniaqanngitsut taarsersugassaanngitsullu erniaasa annertunerpaaffissaattut aalajangikkap aammalu 90%-ip assigiinngissutaattut annerpaamik annertussuseqarsinnaapput; taamaattorli 95%-iusinnaalluni namminersorluni savaatilinngoqqaarnermut atatillugu.
Imm. 2. Savaatilittut aallarteqqaarnermut atatillugu nersutaatinut assigisaannullu inuussutissarsiummut atatillugu illuutinut nammineerluni sanaartukkatut sananeqartunut atortussanut aningaasartuutit 95%-ii tikillugit erniaqanngitsunik taarsersugassaanngitsunillu taarsigassarsisitsoqarsinnaavoq.
Imm. 3. Savaatilittut aallarteqqammersoq peqqussummi matumani imatut paasineqassaaq, taarsigassarsisoq sumiiffimmi savaateqarfimmik aallaqqaataanit illuliorfioreersimanngitsumi pilersitsisoq, pilersaarutaasutut pi-lersitsinissami atugassatut atorneqartussamik imaluunniit savaateqarfioreersumik taassumaluunniit ilaanik piginnittuulersoq.
Imm. 4. Imm. 1 aamma 2 naapertorlugit aningaasaliissutit 95%-iinut qaffatanik tapiissuteqarneq taamaallaat atorneqarsinnaavoq aningaasaliissutinut taarsigassarsisup savaatilittut aallartinnerata piviusunngortinneqarneranut ukiuni siullerni pingasuni aningaasaliissutinut pilersaarummut inuussutissarsiutinut tapersiisarnermi ataatsimiititaliap akuerisaanut ilanngunneqarsimasunut.§ 17. Taarsigassarsisup aningaasaqarniarnera eqqarsaatigalugu pisariaqartinneqartutut isumaqarfigineqarpat § 11-mi, § 12-imi, § 13-imi, § 14-imi § 15-imilu aalajangersakkat naapertorlugit taarsigassarsianut tunngatillugu erniat taarsersugassallu taarsersornerat kinguartinneqarsinnaavoq taarsigassarsiat pilersinneriniit ukiut pingasut angullugit. Erniat akilersornissaannut tunngatillugu akilersuinissaq kinguartikkallarneqarsimappat, kinguartitsigallarnerup nalaani erniat taarsigassarsiarineqarsimasunut ilanngunneqassapput.
§ 18. Nerukkaatissanik kingunissanillu pisinermut ernialinnik taarsigassarsisisitsisoqarsinnaavoq pisinermi aningaasartuutit 100%-ii tikillugit. Taarsigassarsisut arlallit ataatsimut pisinerannut atatillugu tuniniaasartunut assartuisartullu suliffiutaannut akiliinissamut qularnaveeqqusiigallartoqarsinnaavoq.
Imm. 2. Imm. 1 naapertorlugu taarsigassarsiat tunniunneqartassapput taarsigassarsisup nersutaatiminik tunisinermigut isertitassai qularnaveeqqusiullugit.
Imm. 3. Imm. 1 naapertorlugu taarsigassarsiat ukiup ataatsip ingerlanerani akilerneqarsimassapput.
Kapitali 4.
Ernianut tapiissutit qularnaveeqqusiinerlu.§ 19. Taarsigassarsisitsisarfinnit namminersortunit pisortanillu pigineqartunit taarsigassarsiat erniaasa appartinnissaannut kapitali 3-mi aalajangersakkat naapertorlugit ernianut tapiissuteqartoqarsinnaavoq.
Imm. 2. Kiisalu aamma inuussutissarsiutinut tapersiisarnermi maleruagassat siusinnerusukkut atortuusut naapertorlugit taarsigassarsianut qularnaveeqqusiinernut atatillugu ernianut tapiissuteqartoqarsinnaavoq.§ 20. § 18-imi imm. 2-mi akilersuinissamut qularnaveeqqusiissutit eqqaassanngikkaanni taarsigassarsianut ingerlatsinermulluunnit sillimmatinut aningaaserivinni, sparekarsini taarsigassarsisitsisarfinniluunniit allanit pisortanit nakkutigineqartunit taarsigassarsiarineqarsimasunut taamaallaat qularnaveeqqusiisoqarsinnaavoq.
Kapitali 5.
Tapersiinermi atugassarititaasut.§ 21. Taarsigassarsiat nalinginnaasut maleruagassiat naalakkersuisunit aalajangersarneqarsimasut naapertorlugit ernialersorneqarlutillu taarsersorneqassapput. Taarsigassarsiat naafferarlugit tunniunneqarsinnaapput.
§ 22. Taarsigassarsiat erniaqanngitsut taarsersugassaanngitsullu, taarsigassarsiat qanoq sivisutigisumik taarsersornissaannut tunngatillugu kapitali 3-mi ukiut aalajangerneqarsimasut malillugit, nalikilliivigineqassapput. Tamatuma saniatigut ernialinnik taarsigassarsisoqarsimappat imaluunniit pisaarniarnermut atatillugu taarsigassarsinermut qularnaveeqqusiisoqarsimappat, taava taarsigassarsiat erniaqanngitsut taarsersugassaanngitsullu taakkununnga taarsersuinissanut tunngatillugu aalajangersakkat assinginik nalikilliliivigineqassapput.
Imm. 2. Nalillit pissarsiarineqarsimasut nalikilliliinissamut piffissaritinneqartup aalajangerneqarsimasup ingerlanerani taarsigassarsisitsinermi sumut atornissaannut naatsorsuutigineqarsimasutut atorneqanngippata, imaluunniit taarsigassarsinermi, ernialinnik taarsigassarsinermi, taarsigassarsinermullu atatillugu qularnaveeqqusiunneqarsinnaasunut atugassarititaasut sumiginnarneqarsimappata, taava aningaasat nalikilliliissutigineqarsimanngitsut utertillugit akilerneqassapput. Aalajangerneqarsinnaavorli taarsigassarsiat uninngatiinnarneqarsinnaasut akiligassat sinnerisa siunissami ernialersorneqarnissaannik taarsigassarsiatullu ernialittut taarsersorneqarnissaannik periarfissaqartitsilluni piumasaqaatitalerlugit.§ 23. Taamaallaat taarsigassarsisitsisoqarsinnaavoq aamma taarsigassarsianut ingerlatsinermullu sillimmatitut akiligassarsianut qularnaveeqqusiisoqarsinnaalluni isumannaallisaasoqarneratigut.
Kapitali 6.
Taarsigassarsiat taarsersorneri, pillaanmik ernialiussat aanuna akiliinngikkallarnissamik kiisalu isumakkeerinermik atortuujunnaarsitsinernillu aqqissuussinerit.§ 24. Taarsigassarsiat ima ikilisikkiartuaartinneqassapput ukiumi taarsersuiffiusumi ukiumut amerlaqatigiissunik akilersuuteqarnertigut nalikilliliivigineqartarnertigullu.
Imm. 2. Qularnaveeqqusiissutitut immaqalu taarsigassarsiat imaluunniit taarsigassarsisitsisarfimmit taarsigassarsiat erniaannut tapiissutitut tapersiisoqarsimassappat taarsigassarsiat taarsigassarsiniartarfimmilluunniit taarsigassarsiat taarsigassarsinermut isumaqatigiissummi pineqartumi aalajangersakkat malillugit ikilisinneqassapput.§ 25. Inuussutissarsiutinut Tapersiisarnermi Ataatsimiititaliaq, pigisat nalillit sillimmasiunneqarsimappata, taarsigassarsianut atatillugu atugassarititaasut naapertorlugit ernianut akilersuinermik unitsitsigallarsinnaavoq qaammatit aqqaneq-marlukkuutaarlugit ukiullu tallimat angullugit sivisussusilimmi, tassa akilersuinerit erniallu siunissami akilersuinissami angeqqatigiiaarlugit agguarneqarsinnaassammata taamaalilluni taarsigassarsiat sinneri sivisunerpaamik ukiut tallimat ingerlanerini akilerneqartussanngorlugit.
§ 26. Qularnaveeqqusiissutitut tapersiisoqarsimassappat atukkiisarfiup Inuussutissarsiutinullu Tapersiisarnermi Ataatsimiititaliap akornanni isumaqatigiissuteqareernikkut atukkiisarfik pineqartoq akiliisitsinngikkallarsinnaavoq.
§ 27. Tapersiiffigineqarsimasoq akiliinngikkallarnissamik qinnuteqaateqareersimappat Inuussutissarsiutinut Tapersiisarnermi Ataatsimiititaliaq aalajangeereertinnagu pillaatitut erniat naatsorsorneqassanngillat.
Imm. 2. Akiliinngikkallarnissaq nalunaarutigineqareersimappat pillaatitut erniat naatsorsorneqassanngillat taamaallaalli akilersuutinit akilereerneqarsimasussanit taarsigassarsianilu nalinginnaasumik erniaritinneqartussatut aalajangerneqarsimasoq akilerneqartussaasorlu.
Imm. 3. Allatut pisoqartillugu, tassa ullup akiliiffissap kingulliup kingornatigut kingusinnerpaamik qaammat ataaseq qaangiuttoq akiligassat akilerneqarsimanngippata, pillaatitut erniat taarsigassarsiat nalinginnaasumik erniaasa saniatigut ukiumut 6%-iusut naatsorsorneqarsinnaapput.§ 28. Inuussutissarsiutinut Tapersiisarnermi Ataatsi-miititaliap taarsigassarsiaritinneqareersimasut erniallit taarsigassarsianullu qularnaveeqqusiinerit taarsigassarsianut nutaanut allanngortissinnaavai pigisap nalillip taarsigassarsiaritinneqartunut tunngassutillip pigineqarnissaata sinneranik naatsorsuutigineqartumik sivisunerunngitsumik akilersuiffissalerlugit.
Imm. 2. Immikkut ittumik pisoqartillugu Inuussutissarsiutinut Tapersiisarnermi Ataatsimiititaliap, Naalak-kersuisut akuersinerisigut, inuussutissarsiutinut tapersiissutitut akiitsut taarsigassarsianut ukiut tallimat tikillugit ernialersuisoqartussaajunnaarlugu akilersuisoqartussaajunnaarlugulu allanngortissinnaavai kiisalu suliffeqarfiup aningaasaqarnikkut aaqqissuussivigineqarneranut ilanngullugu aningaasat akiitsut immikkullu tapiissutit isumakkeersinnaallugit, taakku peqqussut manna imaluunniit inuussutissarsiutinut tapersiisarneq pillugu siusinnerusukkut aalajangersakkat atuussimasut malillugit tapiissutaasimappata.
Imm. 3. Imm. 2 naapertorlugu aningaasanut tunngasunik aaqqissuusseqqinnermut atatillugu piumasarineqarsinnaavoq Namminersornerullutik Oqartussat sullivimmi pineqartumi, taanna ingerlatseqatigiiffimmit assigisaanilluuniit ingerlanneqarpat, siulersuisunut ataatsimik arlalinnilluunniit ilaasortaatitaqassasut.
Imm. 4. Imm. 1-imiit imm. 3-mut aalajangersakkat sulliviup taarsigassarsiami akilersornissaanut tunngatillugu pisussaaffini siunissami eqqortissinnaagai uppernarsineqarsinnaappat atorneqarsinnaapput.§ 29. Inuussutissarsiutinut Tapersiisarnermi Ataatsimiititaliaq angallatip, manna tikillugu aalisarnermik piniarnermillu inuussutissarsiuteqarnermut atorneqarsimasup, unalu peqqussut aammalu siusinnerusukkut inuussutissarsiutinut tapersiisarnernut tunngatillugu aalajangersakkat atortuusimasut naapertorlugit tapersiissuteqarfiusimasup, atortuujunnaarsinneranut atatillugu inuussutissarsiutinut tapersiissutinut akiitsut utertinnissaannut atatillugu erniaqanngitsoortitsisinnaavoq akiliinngikkallartitsisinnaalluniluunniit. Kiisalu aamma Inuussutissarsiutinut Tapersiisarnermi Ataatsimiititaliaq Naalakkersuisut akuersinerisigut taamatut atortuujunnaarsitsinermut atatillugu immikkut ittumik pisoqartillugu akiitsunik isumakkeerisinnaavoq.
Imm. 2. Imm. 1 naapertorlugu aatsaat tapiissuteqartoqarsinnaavoq angallatinik atortussaajunnaarsitsinermut atatillugu taakku imatut pisoqaassuseqarpata angallammik taamaaqataanik nutaamik pisaarnermut taarsigassarsianut sivisunerpaamik piffissaq akilersuiffissaq sivisunerujumaartoq aamma tamatumunnga peqatigitillugu naatsorsuutigineqarpat angallat aningaasaqarnikkut illersorneqarsinnaasumik ingerlanneqarsinnaagunanngitsoq aamma angallatip iluarsaannissaa aningaasaqarnikkut illersorneqarsinnaanngitsutut nalilerneqarpat.
Imm. 3. Imm. 1 naapertorlugu tapiissutit aatsaat angallatip atortussaajunnaarsinneqartup taartissaanik pissarsiniarnermut atatillugu tapiissutigineqarsinnaapput.
Imm. 4. Imm. 1 naapertorlugu tapiissutit aatsaat tunniunneqarsinnaapput taarsigassarsissup maannamut angallammik ingerlatsisinera tunngavigalugu taarsigassarsiallu taarsersornissaannut atatillugu aamma angallatip teknikikkut aalisarnikkullu piukkunnassusianut tunngassumik taarsigassarsisup maanna angallatitaarnerminut atatillugu taamalu siunissami taarsersuinermini pisussaaffimminik eqqortitsisinnaasoq uppernarsineqarsinnaasutut isigineqarpat.
Imm. 5. Imm. 1 malillugu ukiut tallimat tikillugit ernianut akiliisussaatitaajunnaartitsisoqarsinnaavoq akiligassanillu akilersuisoqanngikkallartitsisoqarsinnaalluni,tamatuma kingorna taarsigassarsiat taarsigassarsinermi atugassarititaasut naapertorlugit ernialersorneqassapput taarsersorneqassallutillu,angallatip atortuujunnaarsinneqartup taartissaanik angallatitaarnermut atatillugu taarsigassarsiat taarsersornissaasa sivisussusissaannit sivisunerunngitsumik piffissalerlugit.
Imm. 6. Imm. 1 malillugu tapiissuteqarnermut atatillugu angallammut atortuujunnaarsinneqartumut tunngatillugu taarsigassarsianut angallat nutaaq qularnaveeqqusiunneqassaaq.
Imm. 7. Imm. 1 malillugu tapiissuteqarnermut atatillugu Inuussutissarsiutinut Tapersiisarnermi Ataatsimiititaliaq angallatit atortuujunnaarsinnissaannut atatillugu aningaasartuutissat aningaasalersornissaannut ernialinnik taarsigassarsisitsisinnaavoq. Aalajangersagaq tamanna malillugu angallammut nutaamut atatillugu taarsigassarsiat akiitsunut ilanngunneqassapput.
Imm. 8. Imm. 1-7 atuupputtaaq aalisariutinut raajarniarunnaarsimasunut.§ 30. Angallatit aalisarnermut piniarnermullu atorneqartut siusinnerusukkut Inuussutissarsiutinut Tapersiisarnermi Ataatsimiititaliamit ernialersukkanik taarsigassarsisinneqanngisaannarsimasut taasigassarsianulluunniit qularnaveeqqusiiffigineqanngisaannarsimasut anin-gaasalersorneqarnerannut imm. 2 - 5-imi aalajangersakkat malillugit ernialersugaanngitsunik akilersugaanngitsunillu taarsigassarsisitsisoqarsinnaavoq, tassa angallat 1. oktober 1996 nallertinnagu pisaarineqarsimappat.
Imm. 2. Imm. 1 malillugu taarsigassarsiat, siusinnerusukkut inuussutissarsiutinut tapersiisarnermi ataatsimiititaliamit taarsigassarsiaritinneqarsimasut erniaqanngitsut akilersugassaanngitsullu angallatip ilaannakuusumik aningaasalersorneqarneranut, pisiarinerani akiata annerpaamik 25 %-iinik annertussuseqassapput § 9 malillugu naatsorsuusiorlugit allanngortiterinernut iluarsaassinernullu aningaasartuutinik, angallatip pisaarereerneratigut akiliutigineqarsimasunik, ilallugit, aamma 1. januar 1997 sioqqullugu. Taarsigassarsiat angallammut akiitsooreersut qularnaveeqqusiinikkut isumannaakkat 50 %-ii qaangissanngilaat.
Imm. 3. Imm. 1 malillugu taarsigassarsiat akiliutigineqarnerata kingornatigut ukiut qulit qaangiuppata tamakkiisumik nalikillilerneqassapput.
Imm. 4. Imm. 1 malillugu taarsigassarsiat angallat pineqartoq siullersut qularnaveeqqusiullugu isumannaarneqassapput.
Imm. 5. Imm. 1 malillugu tapiissutinik agguaassisarneq pillugu apeqqutit aalajangiivigineqarnerini § 2-mi pissutsit taaneqartut saniatigut uku sianiginiarneqassapput:
1) Taamaallaat tapiissuteqartoqarsinnaavoq angallat taanaatillugu teknikikkut nalilereerlugu sivikinnerpaamik ukiuni qulini suli pigineqartussatut naatsorsuutigineqarpat,
2) aalajangiisutut pingaartinneqassaaq qinnuteqaateqartut angallammik ingerlatsinerminni imminut akiler-sinnaasumik aalisarsinnaannertik uppernarsarsinnaappaassuk, aamma
3) taamaallaat tapiissuteqartoqarsinnaavoq aatsaat angallat aningaasarsiornikkut illersorneqarsinnaasumik ingerlanneqarsinnaappat, tamatumanissaaq eqqarsaatigalugit imm. 1 malillugu tapiissutit aamma taarsigassarsisitsisut allat aningaasaliissutigisimasaat.§ 31. Taarsigassarsiallit malittarisassat tamatumunnga atuuttut malillugit, angallat 75 BRT/120 BT-nit mikinerusoq imaluunniit angallatit uku arlaat atorlugu GR 6-355 "Tobias Noahsen", naqinnernik ilisarnaatit OZJO, GR 7-216 "Anáse", naqinnernik ilisarnaatit OUHK, GR 8-288 "Qarsaaq", naqinnernik ilisarnaatit OUUC, raajarniarsinnaatitaasut pisassiissutinit pigisat tamakkerlugit Namminersornerullutik Oqartussanut tunniutissappatigik, pisariaqartitsineq naapertorlugu sinerissap qanittuani raajarniarnermi pisarisinnaasanut naleqqussakkamik aalisarnermik pisariaqartitsineq naapertorlugu, tamatumunnga imm. 2-miit 4-mut aalajangersakkat malillugit taarsiissutinik akiliuteqartoqarsinnaavoq. Pisassiissutinit pigisat tamarmiusut 1. januar 1997-imi pisassiissutinit pigisat atuutilerneranni taarsigassarsialimmut pineqartumik angallateqartumut tunniunneqartut minnerpaamik amerlaqatigissavaat.
Imm. 2. Angallat taarsigassarsisup manna tikillugu raajarniarnermut atorsimasaa ukiunit 20-nit pisoqaaneruppat, taarsigassarsiallip inuussutissarsiutinut tapersiisarfimmit taarsigassarsiai tamakkerlugit isumakkeerneqassapput.
Imm. 3. Angallat taarsigassarsiallip manna tikillugu aalisarnermut atorsimasaa ukiut 20-t inorlugit pisoqaas-suseqarpat, taarsigassarsiallip inuussutissarsiutinut tapersiisarfimmit taarsigassarsiaasa ilaat angallatip tunineqarnerani iluanaarutitigut anguneqanngitsut (matussuserneqanngitsut) isumakkeerneqassapput.
Imm. 4. Imm.2 aamma 3-mi taaneqartutut taarsigassarsianik isumakkeerinerup saniatigut raajat tonsinngornerini tamani 1.000 kr.-inik akiliisoqassaaq, pisassiissutinit pigisat ukiumi aalisarfiusumi tunniunneqarneranni pisinnaatitsissutaasoq naapertorlugu. Akiliutigineqartut aningaasanngorlugit taarsigassarsiallip nammineq atugassaatut tunniunneqassapput.
Imm. 5. Taarsigassarsiallip imm. 4 naapertorlugu pissai akiliisitsiniutaallutilluunniit allatut pinngitsaaliiniutaasinnaanngillat.
Imm. 6. Pisassiissutinit pigisat imm. 1 naapertorlugu Namminersornerullutik Oqartussanit tiguneqartut naalakkersuisut aalajangiineratigut tuniniarneqarsinnaapput allatulluunniit atorneqarsinnaallutik tamanna pillugu malittarisassat qaqugukkulluunniit atuuttut malillugit. Pisassiissutinit pigisanik tunisinermi akigitinneqartoq aalajangerneqassaaq imm. 4 naapertorlugu pisassiissuti-it pigisat pissarsiarineqarneranni akiliutigineqartumit minnerunngitsumik.§ 32. Sinerissamut qanittumi raajarniarnermi aalisariutinik naleqqussaanissamut pisariaqartitsisoqarnera naapertorlugu imm. 2 - 6-imi aalajangersakkat malillugit angallatinik piginnittunut, tamanna pillugu maleruagasat atuuttut naapertorlugit angallammik 75 BRT/120 BT-init mikinerusumik imaluunniit angallatinik GR 6-355 "Tobias Noahsen"-imik, naqinnerit ilisarnaatai OZJO, GR "Ánáse"-mik, naqinnerit ilisarnaatai OUHK, imaluunniit GR 8-288 "Qarsaaq"-mik, naqinnerit ilisarnaatai OUUC raajarniarsinnaatitaasunut tapiissuteqartoqarsinnaavoq.
Imm. 2. Angallatip ataatsip arlallilluunniit, imm. 1-imi ilanngunneqartut, raajarniarunnaarnerannut atatillugu angallammillu ataatsimik arlalinnilluunniit taarserneqarlutik, aamma angallat angallatilluunniit raajarniarnermi sinneruttut tamakkerlutik siullermik angallataasimasunit annikinnerusunik pisaqarsinnaalerlutik aamma angallatip angallatilluunniit sinneruttut pisaqarsinnaassusiisa ukiumut pisassiissutit angallatinut pisassanngortinneqartut sinnersimanngippatigit, tapiissuteqartoqarsinnaavoq tassaasunik imm. 3 aamma imm. 4 naapertorlugit aningaasanngorlugit tapiissutinik.
Imm. 3. Imm. 2 malillugu tapiissuteqartoqassatillugu uku sianiginiarneqassapput:
1) angallatinik taarsersuinermut atatillugu pisaqarsinnaassutsip naleqqussarneqarnerata annertussusia,
2) siunertamut tamatumunnga ukiumut aningaasanut inatsisini immikkut aningaasaliissutit atugassanngortinneqartut imatut atorneqassasut, pisaqarsinnaassutsimik naleqqussaanermut pisariaqartitat sapinngisamik naammassineqarnissaannut sunniuteqaqataallutik,
3) angallatit aalisarunnaartut pisoqaassusiat aserfallatsaalineqarsimanerallu, tassa tamatumuunakkut anguniarneqassammat aalisariutit nutarteriffigineqarnerat,
4) akiitsut tamarmiusut, angallammik angallatinilluunniit aalisarunnaartunik pisaarnermut aserfallatsaaliinermullu atatillugu pilersimasutut uppernarsarneqarsinnaasut aamma
5) angallat angallatilluunniit sinneruttut akilersinnaasumik ingerlanneqalersinnaasutut naatsorsuutigineqarsinnaasut.
Imm. 4. Imm. 3 naapertorlugu pisaqarsinnaassutsimik naleqqussaaneq naatsorsuusiorneqassaaq angallatit ataasiakkaat ukiumut 1993-imi, 1994-imi aamma 1995-imi agguaqatigiissillugu aalisarsimanerisa aamma ukiumut pisassiissutit, 1. januar 1997-imi angallatinut agguaanneqartut, akornanni naligiissitsinikkut. Angallat piffissami qinnuteqaateqarfimmi piginnittumit piffissami 1993-imiit 1996-imut pissarsiarineqarsimappat, piginnittup qinnuteqarneratigut agguaqatigiissillugu ukiumut aalisartarsimanera naatsorsorneqarsinnaavoq ukiumut aalisartarsimaneq tunngavigalugu piffissamit pisaarfiusumiit 1996-ip naaneranut agguaqatigiissillugu qaammammut aalisartarsimaneq 12-imik amerlisarlugu naatsorsorlugu.
Imm. 5. Angallatit imm. 1-imi ilaatitaasut § 31 naapertorlugu raajarniarunnaarnerannut atatillugu aammattaaq § 31 malillugu tapiissuteqartoqarnerani tapiissuteqartoqarsinnaavoq tassaasunik aningaasanngorlugit tapiissutinik ilassutaasunik. Ilassutaasunik tapiissutit taakku naatsorsuusiorneranni taamatuttaaq imm. 3-mi nr. 1)-imiit 4)-mut atorneqassapput.
Imm. 6. Imm. 5 malillugu tapiissutit taarsigassarsiallit nammineq atugassaasut akiliutigineqassapput. Imm. 5 malillugu tapiissutigineqarsimasut naapertorlugit pissarsiassat akilersinniarneqarsinnaanngillat allatulluunniit pinngitsaaliissutiginiarneqarsinnaanatik.§ 33. Qularnaveeqqusiissutit inuussutissarsiutinut tapersiisarnermi ataatsimiititaliamit tiguneqarnerisa, umiunerup, imaluunniit qularnaveeqqusiissutit allanik pissuteqartumik taasigassarsialimmit pigineqarunnaarnerisa kingunerisaanik qularnaveeqqusiissutaareersutigut pissarsiassat isumannaarneqarsimanngippata, pissarsiassat erniaat naatsorsuusiorneqarunnaassapput.
Imm. 2. Imm. 1-imisut pisoqartillugu aammattaaq ukiumoortunik tapiissuteqartoqassaaq akiitsunik ikilisitsissutissanik aningaasatut taarsigassarsialimmit akilerneqarsimasutut amerlassusilinnik.
Imm. 3. Imm. 1-mi akiligassat pineqartillugit ukiut tallimat qaangiunneranni qaammatisiutit ukiuata naanerani, inuussutissarsiutinut tapersiisarnermi ataatsimiititaliap akiligassat ilaat isumakkeersinnaavai. Ilaannakortumik isumakkeerinninnermi akiligassanik 135.000,-kr.-init ikinnerusunut ikilisitsisoqarsinnaanngilaq.
Imm. 4. Isumakkeerinermi tunngavigineqassaaq, taarsigassarsisoq akiliinissamut ukiullu qaninnerpaat iluanni akiligassanik tamarmiusunik akiliinissamut periarfissaqassanngitsoq.
Imm. 5. Taarsigassarsisup akiliisinnaanermut periarfissai makku tunngavigalugit nalilerneqassapput:
1) Akiligassat amerlassusiat,
2) taarsigassarsisup inoqutaasalu nalilinnik pigisaqarnerat,
3) taarsigassarsisup inoqutaasalu maannakkut siunissamilu isertitaqarnissamut periarfissaat aamma
4) taarsigassarsisup ukioqqortussusia.
Imm. 6. Imm. 1-mi akiligassat pineqartillugit ukiut qulit qaanngiunneranni qaammatisiutit ukiuata naanerani, imm. 4-mi 5-milu pissutsit taaneqartut assigisaannik pisoqartillugu inuussutissarsiutinut tapersiisarnermi ataatsimiititaliap akiligassat tamakkiisumik isumakkeersinnaavai. Akiligassalli tamarmiusut isumakkeerneqarsinnaanerannut tunngaviussaaq, taarsigassarsisup ima akiliisimatiginissaa, akiliisinnaanermini periarfigisinnaasani naapertorlugit akiliisimassalluni.
Imm. 7. Imm. 3 aamma 6 naapertorlugit isumakkeerineq taamaallaat atorneqassaaq inunnut taarsigassarsialinnut pineqartorpianut.
Imm. 8. Imm. 1-itut pisuni inuussutissarsiutinut tapersiisarnermi ataatsimiitaliap akiligassat tamarmiusut isumakkeersinnaavai, taarsigassarsisoq 60-it sinnerlugit ukioqalersimappat imaluunniit pensionit utoqqarnullu angerlarsimaffiit il.il. pillugit Inatsisartut peqqussutaat naapertorlugu pensionisiaqarpat.
Kapitali 7.
Ikaarsaariarnermi atortuulersitsinermilu aalajangersakkat.§ 34. Peqqussut manna 1. januar 1997 atortuulerpoq.
Imm. 2. Peqatigitillugu aalisarnermut, piniarnermut nunalerinermullu tapersiisarneq pillugu inatsisartut peqqussutaat nr. 1, 2.maj 1996-imeersoq atorunnaarpoq.
Imm. 3. Inuussutissarsiornermik tapersiisarneq pillugu Inatsisartut peqqussutaat nr. 4, 20. november 1984-imeersoq naapertorlugu nalunaarutaasimasoq inuussutissarsiutinullu tapersiisarneq pillugu kaajallaasitat atuuttut atuutiinnassapput, peqqussut manna naapertorlugu aalajangersakkanik taarserneqarnissamik tungaannut.§ 35. Manna tikillugu inuussutissarsiutinut tapersiisarnernut maleruagassat naapertorlugit taarsigassarsiat allallu tapersiissutaasimasut Inuussutissarsiutinut Tapersiisarnermi Ataatsimiititaliamit, tapersiinermut atatillugu atugassaritinneqartutut aalajangikkat malillugit, ingerlanneqassapput.
§ 36. Inuussutissarsiornermik tapersiisarneq pillugu Inatsisartut peqqussutaata nr. 4-p, 20. november 1984-imeersup atortuulerneraniilli Namminersornerullutik Oqartussat inuussutissarsiutinut tapersiisarnernut tunngatillugu manna tikillugu maleruagassaasimasut naapertorlugit atukkiinernut qularnaveeqqusiinernullu tapiissuteqartarnernut atatillugu pisinnaatitaaffiit pisussaaffiillu, siornatigut Naalagaaffimmit isumagisassaasimagaluartut pisussaaffigineqarlutillu, tiguaat. Naalagaaffiulli 1. januar 1985 sioqqullugu pisussaaffiulersimasut suli akisussaaffigai. Taamatut akisussaaffeqarneq pissutigalugu aningaasartuutit Naalagaaffiup Namminersornerullutik Oqartussanit matutissallugit pisinnaatitaavoq.
Namminersornerullutik Oqartussat, ulloq 31. oktober 1996.
Lars Emil Johansen/
Pâviâraq Heilmann