Ilinniagaqarnersiutit pillugit Inatsisartut peqqussutaat nr. 3, 2. maj 1996-imeersoq.
Inuutissarsiutinik ilinniartitsisarnermik Kalaallit Nunaannut inatsimmi nr. 582-imi, 29. november 1978-imeersumi § 5 naapertorlugu aalajangersarneqarput:
Kapitali 1.
Atuuffii§ 1. Namminersornerullutik Oqartussat Kalaallit Nunaanni ilinniartitaanernut ingerlanneqartunut ilinniagaqarnersiuteqartitsisarput.
Imm. 2. Ilinniartitaanernut Kalaallit Nunaata avataani ingerlanneqartunut ilinniagaqarnersiuteqartitsisoqarsinnaavoq:
1) ilinniarneq Kalaallit Nunaanni suliffissaqartitsisinnaasutut naatsorsuutigineqarsinnaappat, aamma
2) assigisaanik Kalaallit Nunaanni ilinniartitsisoqarsinnaanngippat.
Imm. 3. Immikkut illuinnartumik pisoqartillugu Naalakkersuisut imm. 2-mi piumasaqaatinik saneqqutsinissamut immikkut akuersissuteqarsinnaapput.§ 2. Ilinniagaqarnersiutit tunniunneqartarput ilinniartunut ilinniartitaanermik ilinniagaqarnersiuteqarfiusinnaatitaasumik ingerlataqartunut.
Imm. 2. Ilinniartitaaneq ilinniagaqarnersiuteqarfiusinnaasutut isigineqartarpoq, tamanna pillugu Naalakkersuisut aalajangersarlugit piumasaqaataannik naammassinnissimappat.
Kapitali 2.
Ilinniagaqarnersiutit suussusii annertussusiilu§ 3. Ilinniagaqarnersiutit tapiissutitut, immikkut tapiissutitut, taarsigassarsiatut landskarsimit aningaasalersukkatut imaluunniit aningaaserivinni taarsigassarsianut akiligassarsianullu qularnaveeqqutitut tunniunneqarsinnaapput.
Imm. 2. Ilinniagaqartut kattuffiisa siumut tusarniaavigereernerisigut tapiissutit annertussusissaat ukiumoortumillu taarsigassarsiat amerlanerpaaffissaat ukiut tamaasa aningaasanut inatsisikkut aalajangersarneqartassapput.
Imm. 3. Naalakkersuisut ilinniagaqartut kattuffiinut tamanna pillugu oqaaseqaammik siumut piniaqqaarlutik ilinniagaqarnersiutit suussusissaannut annertussusissaannullu malittarisassanik aalajangersaassapput, taamatuttaaq taarsigassarsianut akiligassarsianullu qularnaveeqqutit pillugit malittarisassanik.
Kapitali 3.
Ilinniagaqarnersiuteqarnissamut piumasaqaatit paasissutissiinissamullu pisussaaffik§ 4. Ilinniagaqarnersiuteqassagaanni danskisut innuttaasuseqarnissaq piumasaqaataavoq.
Imm. 2. Taamaattorli nunani allamiut ilinniagaqarnersiuteqarsinnaapput, nunat tamat akornanni isumaqatigiissutit Kalaallit Nunaannut atuuttut naapertorlugit Qallunaat Nunaanni innuttaasut assigalugit ilinniagaqarnersiuteqarsinnaatitaagunik.§ 5. Kalaallit Nunaanni ilinniarnernut tapiissuteqartoqarsinnaavoq inunnut Kalaallit Nunaanni najugaqavissunut.
§ 6. Kalaallit Nunaata avataani ilinniartitaanernut tapiissuteqartoqarsinnaavoq inunnut
1) qinnuteqarnermik nalaanni Kalaallit Nunaanni najugaqavissunut ilinniarnerullu aallartilivinnera sioqqullugu sivikinnerpaamik ukiuni tallimani najugaqavissimasunut, imaluunniit
2) sivikinnerpaamik ukiuni qulini Kalaallit Nunaanni najugaqavissimasunut Kalaallit Nunaatalu avataani sivisunerpaamik ukiuni pingasuni aalajangersimasumik najugaqarsimasunut.
Imm. 2. Imm. 1 naapertorlugu Kalaallit Nunaata avataani ilinniarnermut isumaginninnermulluunniit Kalaallit Nunaanni oqartussaasunit peqataaffigineqartunut atatillugu najugaqarnerit ilaatinneqanngillat.§ 7. Ilinniagaqartut inuuniarnermi aningaasartuutaasa akilerneqarnissaat siunertaralugu pisortanit ikiorsiissutinik allanik ataavartumik pisartagaqartinneqartut ilinniagaqarnersiaqanngitsoortitaasinnaapput.
Imm. 2. Ilinniagaqartut ilinniarnermik nalaani ilinniagaqarnerminnut atatillugu aningaasarsiaqartut imaluunniit ilinniarnerminnut atatillugu aningaasanik allanik, ilinniagaqarnersiutitut siunertalinnut matusissutissanik siunertalinnik, pisartut ilinniagaqarnersiuteqarsinnaatitaanngillat.§ 8. Ilinniagaqartut pissutsit imminerminnut tunngasut tamaasa ilinniagaqarnersiaqartitsinissamut pingaaruteqartut pillugit paasissutissanik tamanik Naalakkersuisunut nalunaaruteqassapput, kingusinnerusukkullu pissutsini tamakkunani allannguutaasinnaasut Naalakkersuisunut pilertortumik nalunaarutigisassavaat.
§ 9. Naalakkersuisut, ilinniagaqartut kattuffiinut tamanna pillugu oqaaseqaammik siumut piniaqqaarlutik ilinniagaqarnersiuteqarnissaq pillugu piumasaqaatinut erseqqinnerusunik malittarisassiorsinnaapput.
§ 10. Naalakkersuisut pisuni immikkut illuinnartuni § 4, imm. 1-imi, aamma §§ 5 aamma 6-imi, imm. 1-imi aalajangersakkat saneqqunneqarnissaat immikkut ittumik akuerissutigisinnaavaat.
Kapitali 4.
Ilinniarnermut taarsigassarsianik landskarsimit aningaasalersorneqarsunik ernialersuineq.§ 11. Taarsigassarsisoq ilinniagaqarnersiuteqarnissamut piumasaqaatinik sukkulluunniit aalajangersarneqartunik naammassinnitsillugu, iliniarnermut taarsigassarsiat landskarsirait aningaasalersorneqartut ilinniarnerup nalaani ernialersorneqarneq ajorput.
Imm. 2. Ilinniarnerup unitsinneqarnerata naammassineqarnerataluunniit kingorna ullormit aallartittumik pineqartup ilinniagaqarnerminut atatillugu taarsigassarsiaanut sukkulluunniit akiitsorineqartut ernialersorneqalissapput, pisortat sukkulluunniit diskontuat procentimik ataatsimik ilasaq atorlugu. Erniat ukiut tamaasa 31. december imaluunniit akilerneqarnissaannut piffissarititaasumi ikkullugit naatsorsuusiorneqartassapput.
Imm. 3. Ilinniagaqartoq ilinniagaqarnersiuteqarnissamut piumasaqaatinik sukkulluunniit aalajangersarneqartunik naammassinnikkunnaarpat, sukkulluunniit pineqartup ilinniagaqarnerminut atatillugu taarsigassarsiaanut akiitsuusut ernialersorneqalissapput imm. 2-mi aalajangersakkat malillugit.
Imm. 4. Pissutsit immikkut ittut pisariaqartilerpassuk Naalak-kersuisut imm. 3-p saneqqunneqarnissaanut immikkut ittumik akuersissuteqarsinnaapput.§ 12. Suliamik misiliivissaaleqinerup, ilinnianngiffeqarallarnerup, tassunga ilanngullugu naartunermi erninermilu ilinnianngiffeqarallarnerup napparsimanerullu uppernarsarneqartup kingunerisaannik ilinniarnermik unitsitsigallarneq § 11, imm. 2 malillugu unitsitsinertut isigineqassanngilaq.
Imm. 2. Ilinniarnermik unitsitsigallarneq ukioq ataaseq sinnerlugu sivisussuseqarpat, pineqartup ilinniagaqarnerminut atatillugu taarsigassarsiaanut sukkulluunniit akiitsuusut § 11-mi, imm. 2-mi aalajangersagaq malillugu ernialersorneqassapput, unitsitsinerup ukiumik ataatsimik sivisussuseqalernerata kingorna ullormit aallartittumik.§ 13. Ilinniagaqartoq ilinniarnerminik unitsitsereernermi kingorna ilinniarnerminik aallartitseqqissagaluarpat ilinniagaqarnersiuteqarnissamullu piumasaqaatinik sukkulluunniit aalajangersarneqartunik naammassinnilluni, pineqartup ilinniarnermi taarsigassarsiaanut sukkulluunniit akiligassanut ernialersuineq unitsinneqassaaq ilinniarnerup aallarteqqinneqarnerata kingorna aallartittumik.
Imm. 2. Ilinniartoq ilinniarnerup unitsereernerata naammassereernerataluunniit kingorna ilinniartitaanermik ilinniagaqarnersiuteqarfiusinnnasumik nutaamik aallartitsippat ilinniagaqarnersiuteqarnissamullu piumasaqaatinik sukkulluunniit aalajangersarneqartunik eqquutsitsilluni, pineqartup ilinniarnermi taarsigassarsiaanut sukkulluunniit akiligassanut ernialersuineq unitsinneqassaaq, ilinniarnerup nutaap aallartinneqarneranit aallartittumik.
Imm. 3. Ilinniartitaanerup unitsinneqarnerata naammassineqarnerataluunniit aqaguani atuutilersumik sukkulluunniit pineqartup ilinniagaqarnerminut atatillugu taarsigassarsiaannut akiitsorisat § 11-mi imm. 2-mi periaasissat allassimasut malillugit ernialersorneqarnerat aallarteqqinneqassaaq.
Imm. 4. Pissutsit immikkut ittut tamanna pisariaqalersippassuk Naalakkersuisut imm. 3-p immikkut saneqqunneqarnissaanut akuersissuteqarsinnaapput.§ 14. Ilinniagaqarnermi taarsigassarsiat landskarsimit aningaasalersorneqartut ernialersorneqarnerat pillugu Naalakkersuisut ilassutaasunik malittarisassaliorsinnaapput.
Kapitali 5.
Ilinniarnermut taarsigassarsiat landskarsimit aningaasalersorneqartut utertillugit akilersornerat.§ 15. Ilinniarnermi taarsigassarsiat landskarsimit aningaasalersorneqartut utertillugit akilersulernerat ilinniarnerup naammassi-nerata kingorna kingusinnerpaamik ukiup ataatsip qaangiunnerani aallartinneqassaaq. Ilinniarnerup unitsinneqarnerani utertitsilluni akilersuineq aallartinneqassaaq unitsitsinermit kingusinnerpaamik qaammatit pingasut kingorna.
Imm. 2. Suliamik misiliivissaaleqinerup, ilinnianngiffeqarallarnerup, tassunga ilanngullugu naartunermi erninermilu ilinnianngiffeqarallarnerup napparsimanerullu uppernarsarneqartut kingunerisaannik ilinniarnermik unitsitsigallarneq imm. 1 malillugu unitsitsinertut isigineqassanngilaq.
Imm. 3. Unitsitsigallarneq ukioq ataaseq sinnerlugu sivisussuseqarpat, taarsigassarsianik utertitsilluni akilersuineq tamanna pillugu Naalakkersuisut piumasaqaataat malillugu aallartinneqassaaq.
Imm. 4. Ilinniagaqartoq ilinniarnerminik ilinniagaqarnersiuteqarfiusinnaatitaasumik nutaamik aallartitsippat imaluunniit ilinniarnerminik unitsitaminik aallartitseqqippat ilinniagaqarnersiuteqarsinnaanermullu piumasaqaatinik naammassinnippat siornatigut taarsigassarsiaasimasunik utertitsilluni akilersuisussaatitaaneq unitsikkallarneqassaaq. Ilinniarnerup naammassineqarnerani unitsinneqarneraniluunniit utertitsilluni akilersuisussaatitaaneq imm. 1-imi aalajangersagaq malillugu atuuteqqilissaaq.§ 16. Ilinniarnermi taarsigassarsiat landskarsimit aningaasalersukkat erniaallu utertitsilluni akilersuisussaatitaanerup aallartinneranit ukiut 15-it qaangiutsinnagit akilerneqareersimassapput. Akilersuinerli pissaaq qaammammut ikinnerpaamik 500 kr.-inik akiliisarluni.
Imm. 2. § 15, imm 4 naapertorlugu utertitsilluni akilersuisussaatitaaneq unitsinneqarallassagaluarpat, imm. 1-imi piffissap akilersuiffiusussap sivisunerpaaffissaa piffissap utertitsilluni akilersuinerup unitsitsinneqarfigisimasaata sivisoqataanik sivitsorneqassaaq.
Imm. 3. Piffissap utertitsilluni akilersuisussaatitaaffiup aallartinnginnerani taarsigassarsisoq ilinniarnermi taarsigassarsiat akilersornissaat pillugu Naalakkersuisunik isumaqatigiissuteqassalluni pisussaatitaavoq.
Imm. 4. Taarsigassarsisoq Naalakkersuisunit peqquneqaraluarluni ilinniarnermi taarsigassarsiaasimasunik akilersuinissamut piffissaq eqqorlugu isumaqatigiissuteqarsimanngippat, Naalakkersuisut imm. 1-imi killissarititaasut iluanni taarsigassarsisumut akilersuinermi aaqqissuussineq naleqqunnerpaaq aalajangissavaat.
Imm. 5. Naalakkersuisut tamanna pillugu qinnuteqareernikkut utertitsilluni akilersuinissamut atugassarititaasunik oqalisaasinnaapput imaluunniit utertitsilluni akilersuinissamik kinguartitsisinnaallutik, taarsigassarsisoq suliffissaaleqineq, napparsimaneq, ernineq imaluunniit pissutsit allat immikkut ittut pissutigalugit utertitsilluni akilersuinissamut aaqqissuussinermik naammassinnissinnaanngippat. Taamaattorli imm. 1 naapertorlugu ukiuni 15-ini sivisunerpaamik piffissaq akilersuiffissarititaasoq saneqqunneqar-sinnaanngilaq.§ 17. Taarsigassarsisoq akilersuinissamut aaqqissuussinermik isumaqatigiissutaasumik aalajangikkamilluunniit malinninngippat Naalakkersuisut piumaffiginninnermikkut akiitsut ernialersuutaasimasut ilanngullugit ajunaarutaasussaajunnaarlugit ingerlaannartumik akiligassanngortissinnaavaat.
§ 18. Ilinniarnermi taarsigassarsianik utertitsilluni akilersuineq pillugu Naalakkersuisut erseqqinnerusumik malittarisassiorsinnaapput.
Kapitali 6.
Ilinniagaqarnersiutinik eqqunngitsumik tigusanik ernialersuineq utertitsillunilu akilersuineq.§ 19. Ilinniagaqartoq pissutsit § 8-mi taaneqartut pillugit eqqunngitsunik amigartunilluunniit paasissutissiippat, allannguutinilluunniit nalunaaruteqanngippat, eqqunngitsuliorluniluunniit ilinniagaqarnersiuteqarpat, Naalakkersuisunit ilinniagaqarnersiutaasimasut utertillugit akileqquneqarsinnaapput erniat ilanngullugit.
Imm. 2. Ilinniagaqarnersiutit eqqunngitsumik amigartumilluunniit paasissutissiinerup kingunerisaanik tigusisup tigusimasai piffissamit tigusiffiusumit aallartittumik ernialersorneqalissapput.
Imm. 3. Ilinniagaqarnersiutit tigusisartumit ajortumik isumaqarluni tiguneqarsimasut ernialersorneqalissapput piffissamit tigusisup tapiissutit eqqunngitsumik tigullugit ilisimaarinnilerfianinngaanniit aallartittumik.
Imm. 4. Imm. 2 aamma 3 malillugit tapiissuteqarsinnaatitaanani tapiissutit tiguneqartut ukiumoortumik ernialersorneqassapput pisortat sukkulluunniit diskontuat 6 procentimik ilallugu ernianut annertussutsip angeqqataanik. Sukkulluunniit akiligassaasut ernialersorneqassapput. Ernialersuineq ukiut tamaasa 31. decemberimi imaluunniit piffissami akiliiffiusumi pissaaq.§ 20. Ilinniagaqarnersiutit tigusisartumit ajunngitsumik isumaqarluni pisussaanagit tiguneqartarsimasut, tigusisartullu ingerlaannartumik utertissinnaanngisai, Naalakkersuisut ilinniarnermi taarsigassarsianut allanngorteqqusinnaavaat. Ilinniagaqarnersiutinik pisassarinngisanik ajunngitsumik isumaqarluni tiguneqarsimasunik ernialersuineq utertitsillunilu akilersuineq ilinniarnermut taarsigassarsianut malittarisassat atortuusut malillugit pissapput.
§ 21. Ilinniagaqarnersiutit eqqunngitsumik tiguneqartut ernialersorneqarnerat utertitsillugillu akilerneqarnerat pillugit Naalakkersut erseqqinnerusumik malittarisassiorsinnaapput.
Kapitali 7.
Ilinniagaqarnersiutinit ilanngaassuineq akilersuisitsinerlu§ 22. Naalakkersuisut ilinniagaqarnersiutinit makku ilanngaatigisinnaavaat:
1) Kollegianut Namminersornerullutik Oqartussanit kommuninilluunniit pigineqartunut ingerlanneqartunulluunniit nerisaqarnermut ineqarnermullu akiliutit.
2) ilinniagaqartut kattuffiinut ilaasortaanermut akiliutit.
Imm. 2. Ilinniagaqartoq kattuffimmit ilaasortaajunnaarpat ilinniagaqartut kattuffii tamanna pillugu Naalakkersuisunut allakkatigut ingerlaannartumik nalunaaruteqassapput.§ 23. Ilinniagaqartup ilinniagaqarnersiuteqarsinnaatitaanera akiligassanngortinneqarsinnaanngilaq inatsisitigulluunniit allatut malersorneqarsinnaanani.
Imm. 2. Naalakkersuisut taamaallaat ilinniagaqarnersiutinit ilanngaanerit pillugit nammineq piumasarisaq malillugu isumaqatigiissutaasunik akuersisinnaapput, aningaasat pineqartut qaammammut 500,00 kr.-it sinninngippatigit.§ 24. Naalakkersuisut ilinniagaqartup ilinniagaqarnersiuteqarsinnaatitaanerani annertuallaamik ilinniagaqarnersiutit ilinniagaqartup ajortumik isumaqarluni tigusimasai akilersissinnaavaat.
Kapitali 8.
Ingerlatsineq naanmagittaalliornerlu§ 25. Naalakkersuisut ilinniagaqarnersiutit pillugit malittarisassat ingerlanneqarnissaat pillugu malittarisassanik aalajangersaassapput.
§ 26. Ilinniagaqarnersiuteqartitsinissaq pillugu aalajangiinerit Ilinniagaqarnersiuteqartitsinermi Naammagittaalliuuteqartarfimmut allakkatigut suliassanngortinneqarsinnaapput aalajangiinerup tiguneranit sapaatip akunneri sisamat qaangiutsinnagit. Naammagittaalliuuteqartarfiup aalajangiinera ingerlatsinikkut oqartussaasunut allanut suliassanngortinneqarsinnaanngilaq. Immikkut akuersissuteqartoqarnissaanik aalajangiinerit Naammagittaalliuuteqartarfimmut suliassanngortinneqarsinnaanngillat.
Imm. 2. Naammagittaalliuuteqartarfik siulittaasumik ilaasortanillu pingasunik inuttaqassaaq, tamarmik piffissami Inatsisartut qinigaaffianni ilaasortaasussatut Kultureqarnermut, Ilinniartitaanermut Ilageeqarnermullu Naalakkersuisumit toqqagaasut. Ilaasortaq ataaseq ilinniagaqartut kattuffiinit inassuteqartoqarneratigut toqqarneqassaaq.
Imm. 3. Naalakkersuisut naammagittaalliuuteqartarfiup suleriaasissaanik aalajangersaassapput.
Kapitali 9.
Atortuulersitsinermi, atorunnaarsitsinermi nooriarnermilu aalajangersakkat§ 27. Peqqussut 1. august 1996-imi atortuulissaaq ullorlu taanna aallarnerfigalugu ilinniagaqarnersiutinut tunniunneqartunut atuutilissalluni.
Imm. 2. Tamatumunnga peqatigitillugu inuussutissarsiutinut ilin-niartitaaneq, ilinniagaqarnermut tapiissutit inuussutissarsiutinullu tunngasunik siunnersuineq pillugit Inatsisartut peqqussutaanni nr. 16-imi, 28. oktober 1993-imeersumi §§ 6-13 aamma 16 atorunnaarsinneqarput.§ 28. § 27, imm. 2-mi aalajangersagaq taaneqartoq naapertorlugu ingerlatsineq pillugu aalajangersakkat peqqussummut matumunnga akerliussanngikkunik atuutiinnassapput, peqqussut taanna naapertorlugu aalajangersakkanit allanngortinneqarnissaat atorunnaarsinneqarnissaalluunniit tikillugu.
§ 29. Ilinniagaqartunut 1. januar 1994 sioqqullugu ilinniartitaanermut tiguneqartunut § 6 sunniuteqanngilaq.
§ 30. Aningaaserivimmi taarsigassarsiat akiligassarsiallu naalagaaffimmit landskarsimillu qularnaveeqquserneqartut akilerneqarsimasut tamatumunnga malittarisassat maannamut atuuttut naapertorlugit 1. august 1996 tikillugu ernialersorneqassapput, imaalilluguli landskarsimit taarsigassarsiat, piffissami 1. august 1995-imiit 31. juli 1996 ilanngullugu taarsigassarsiaritinneqarsimasut, 1. august 1996-imiit atuutilersumik peqqussummi matumani maleruagassat malillugit ernialersorneqassallutik.
§ 31. Tapiiffigineqarsinnaatitaanani tapiissutit 1. august 1996 sioqqullugu tiguneqarsimasut tamanna pillugu malittarisassat maannamut atortuusut malillugit 1. august 1996-ip tungaanut ernialersorneqassapput. Tamatuma kingorna tapiissuteqarsinnaatitaanani tapiissutit tiguneqarsimasut § 19-imi aamma § 20-mi aalajangersakkat naapertorlugit ernialersorneqassapput.
§ 32. § 16, imm. 1 sunniuteqanngilaq taarsigassarsianut 1. august 1996-imi aalajangersarneqareersimasunut imaluunniit akilersuinissamik isumaqatigiissutigineqareersimasunut.
Namminersornerullutik Oqartussat, ulloq 2. maj 1996.
Lars Emil Johansen/
Konrad Steenholdt