Aalisarnikkut, piniarnikkut nunalerinikkullu inuutissarsiutinut tapersiisarneq pillugu Inatsisartut peqqussutaat nr. 1, 2. maj 1996-imeersoq.
Kalaallit Nunaanni inuutissarsiutinut tapersiisarnernut Inatsit nr. 134, 28. marts 1984-imeersoq naapertorlugu matumuuna makku aalajangersarneqarput:
Kapitali 1.
Inuutissarsiutinut tapersiisarnikkut siunertat tunngaviillu.§ 1. Aalisarnikkut, piniarnikkut nunalerinikkullu inuutissarsiutit pimoorunneqarnerat unammillersinnaanerallu annertusarniarlugit kiisalu suliffeqarfiit siunissami suliffissaqartitsinerulernermut sunniuteqarsinnaasut nutaat pilersiortorneqarnissaat imaluunniit pigineqareersut isumannaarneqarnissaat siunertaralugu Namminersornerullutik Oqartussat kapitali 3-mi aamma kapitali 4-mi allassimasutut annertutigisunik inunnut ingerlatseqatigiiffinnulluunniit inuussutissarsiutinik pineqartunik Kalaallit Nunaanni ingerlatsisinnaatitaasunut Kalaallit Nunaanni aalajangersimasumik najugaqartunut angerlarsimaffeqartunulluunniit tapiissuteqarsinnaapput.
Imm. 2. Tapiissuteqarnermi inuutissarsiummut naleqquttumik aammalu ineriartortitsinissanut allanut, pisortat namminneerlutik imaluunniit ingerlatseqatigiiffiit suliffeqarfiilluunniit pisortat pigisaat aqqutigalugit aallartissimasaannut aallartinniarlugilluunniit eqqar-saatigisaannut, naleqqussakkamik, inissiiniartoqassaaq.§ 2. Tapersiissuteqartoqarnissaa, tapiissutit annertussusissaat atugassarititaasussallu pillugit apeqqutinik aalajangiiniarnermi makkua isiginiarneqassapput:
1) Inuutissarsiutissatut siunertanut inuiaqatigiit aamma aningaasassaqarniarnerup tungaanit isigalugu siuarsassallugit kissaatigineqartunut pingaartumik tapiissuteqartoqartassaaq.
2) Aatsaat tapiissuteqartoqarsinnaavoq ineriartortitsinermut kissaatigineqartumut, soorlu suliffissuarnut, angallatinut, umiarsualivinnut il.il. tunngatillugu aningaasaliinissanut pilersaarutinut aningaasaliissutissat naleqqutissappata.
3) Aatsaat tapiissuteqartoqarsinnaavoq ingerlatassanut teknikkikkut illersorneqarsinnaasunut, aammalu piffissaq ungasinnerusoq eqqarsaatigalugu aningaasarsiornissanut tunngatillugu ingerlaannarsinnaasutut nalilerneqarsinnaasunut.
4) Qinnuteqartup suliamut tunngatillugu piginnaasani uppernarsassavai taakkunuuna takuneqarsinnaanngorlugu sulliviup illersorneqarsinnaasumik ingerlanneqarnissaata isumannaarneqarnissaanut ingerlatsinikkut aqutsinikkullu piginnaassutsit pisariaqartinneqartut naammassineqarsimasut.
5) Aatsaat tapiissuteqartoqarsinnaavoq taarsigassarsiniartoq nammineerluni aningaasaliissuteqassappat pilersinniakkap pisiarinerani akit taakkulu ilaasa kapitali 3-mi aamma kapitali 4-mi aalajangersakkat malillugit taarsigassarsianit aningaasaliivigineqarsinnaasut akornanni assigiinngissutsip ikinnerpaamik amerlaqataannik. Nammineerluni aningaasaliissutissat minnerpaamik affai pigineqariissapput tassaassallutik taarsigassarsiniartup nammineq aningaasanngorlugit pigisai, sinnerilu akuersissuteqarnikkut allanit inuutissarsiunut tapersiisarnermut ataatsimiititaliumiunngitsoq taarsigassarsinikkut pissarsiarineqarsinnaallutik.
6) Suliffeqarfimmik nutaamik pilersitsinermut tapiissuteqartoqarsinnaanngilaq, § 8-mi aamma § 29-mi pissutsit taaneqartut eqqaassanngikkaanni, taarsigassarsiniartoq pisortanut akilereersimasassanik akiligassaqarpat.
Kapitali 2.
Inuutissarsiutinut Tapersiisarnernut Ataatsimiititaliap inuttalersugaanera, pisinnaatitaaffii pisussaaffiilu.§ 3. Peqqussummi aalajangersakkat naapertorlugit Inuutissarsiutinut Tapersiisarnermi Ataatsimiititaliaq tapiissuteqarnissamik aalajangiisassaaq.
Imm. 2. Ataatsimiititaliaq Inatsisartunit toqqarneqartunik, qinersinerup atuuttuusup ataatsip ingerlanerani ilaasortaasussanik, tallimanik inuttaqassaaq. Tamannalu ilutigalugu Inatsisartut toqqarneqartut akornanni kina ataatsimiititaliami siulittaasuussanersoq kinalu siulittaasumut tulliussanersoq toqqassavaat.
Imm. 3. Inatsisartunit ilaasortassatut toqqarneqartunut tamanut sinniisussanik aamma Inatsisartut toqqaassapput.
Imm. 4. Ataatsimiititaliap aalajangissavaa ilaasortaq suliassamut tunngatillugu ima soqutigisaqartigisoq ataatsimiititaliap suliassamik suliarinninnerani peqataasinnaanngitsoq.
Imm. 5. Ilaasortaasup suliassamut atatillugu nammineq ima attuumassuteqartigiguni peqataasinnaanissani nalor-ninaateqarsinnaasoq Ataatsimiititaliaq ilisimatissavaa.
Imm. 6. Ataatsimiititaliap suliassat inuiaqatigiinnut annertuumik kinguneqartussat, tassunga ilanngullugu immikkut ittumik aningaasanut tunngatillugu kinguneqarsinnaasut, Naalakkersuisunut saqqummiuteqqaarlugit aatsaat aalajangiiffigisinnaavai.§ 4. Ataatsimiititaliap aalajangigaanut tunngatillugu maalaarutaasut suliarineqartarnissaannut Inuutissarsiutinut Tapersiisarnernut Maalaaruteqartarfimmik taagorneqartumik pilersitsisoqassaaq.
Imm. 2. Maalaaruteqartarfik Inatsisartunit toqqarneqartunik, qinersinerup atuuttuusup ataatsip ingerlanerani ilaasortaasussanik, pingasunik inuttaqassaaq. Maalaaruteqartarfimmi ilaasortaasut Inuutissarsiutinut Tapersiisarnermi Ataatsimiititaliamut ilaasortaajutigi-sinnaanngillat.
Imm. 3. Qinnuteqartut Ataatsimiititaliap aalajangersimasai Inuutissarsiutinut Tapersiisarnermi Maalaaruteqartarfimmut, aalajangiisimanerup nalunaarutigineqartup tigunerata kingorna sapaatip akunneri sisamat qaangiutsinnagit, maalaarutigisinnaavaat.
Imm. 4. Inuutissarsiutinut Tapersiisarnermi Maalaaruteqartarfiup maalaarutigineqartoq tamakkiisumik ilaanna-kuusumilluunniit patsisissaqarsoriguniuk, maalaaruteqartarfiup suliaq pineqartoq inuutissarsiutinut tapersiisarnernut ataatsimiititaliamut suliareqqitassanngorlugu innersuussutigisinnaavaa, kisiannili maalaaruteqartarfik qinnuteqaatip akuerineqarnissaanik aalajangiisinnaanngilaq.
Imm. 5. Suliaq maalaarutigineqartoq maalaaruteqartarfimmit inuutissarsiutinut tapersiisarnermi ataatsimiititaliamut suliareqqitassanngorlugu innersuussutigineqartoq ataatsimiititaliamit maalaaruteqartarfiup suliamik suliarinninnera pillugu ilisimatitsissummik tigusaqarnerminiit sapaatit akunneri sisamat qaangiutsinnagit suliarineqassaaq. Suliaq suliareqqereerlugu ataatsimiititaliap aalajangiinera tamatuma kingornatigut maalaaruteqartarfimmut maalaarutigeqqinneqarsinnaanngilaq.§ 5. Naalakkersuisut nalunaarusiornikkut peqqussutip ingerlanneqarnissaa aalajangersassavaat, tassunga ilan-ngullugit ataatsimiititaliap suleriaasissaanut kommunillu peqataatinneqarnerannut tunngasut.
Imm. 2. Taamatuttaaq Naalakkersuisut nalunaarutikkut ilinniartitaanermut, aningaasaqarniarnermut aamma tek-nikimut tunngasutigut piumasaqaatit pillugit maleruagassanik aalajangersaasinnaapput, taarsigassarsisitsisoqartinnagu qinnuteqaateqartut suliassatullu pilersaarusiat naammassisimasassaannik.
Imm. 3. Naalakkersuisut aammattaaq nalunaarutikkut taarsigassarsianut, taarsigassarsianut qularnaveeqqusiissutinut tapiissutinullu allanut, peqqussut manna malillugu tunniunneqartunut piumasaqaatit allat pillugit maleruagassanik aalaj angersaasinnaapput.
Kapitali 3.
Inuutissarsiutinut ataasiakkaanut tapiissutit.
Aalisarneq piniarnerlu.§ 6. Inuussutissarsiutigalugu aalisarnermut piniarnermullu atugassanik motori ingerlasaat aalajangikkanik nutaanik angallatitaarniartunut, nunami tunisassiorfinnut pisatik tamakkerlugit tulaassisartunut, ernialinnik aamma erniaqanngitsunik taarsersugassaanngitsunillu taarsigassarsisitsisoqarsinnaavoq kiisalu imm. 2-miit 8-mut aalajangersakkat malillugit taarsigassarsisitsisarfinni namminersortuni pisortanilluunniit ingerlanneqartuni taarsigassarsianut qularnaveeqqusiisoqarsinnaalluni .
Imm. 2. Angallatinik imm. 1-imi pineqartunik pisaarniarnernut raajarniarnerinnavimmut atorneqartussanut imatut tapersiisoqarsinnaavoq aningaasaliissutit imatut annertussusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 65 %
2) Taarsigassarsiat erniaqanngitsut akilersugassaanngitsullu : 25 %
3) Nammineq aningaasaliissutit : 10 %
Imm. 3. Angallatinik imm. 1-imi pineqartunik pisaarnermut aalisakkanik allanik raajaanngitsunik aalisarnermut taamaallaat atorneqartussanut, pisut imm. 4-mi taaneqartut eqqaassanngikkaanni, imatut tapersiissuteqartoqarsinnaavoq aningaasalersuutit imatut annertussusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 60 %
2) Taarsigassarsiat erniaqanngitsut akilersugassaanngitsullu : 30 %
3) Nammineq aningaasaliissutit : 10 %
Imm. 4. Imm. 3 naapertorlugu angallatinik pisinermut tapersiissutit, pingaartumillu Qaanaami eqqaanilu aamma Tunumi taamaallaat atorneqartussanik, imatut aningaasalersorneqassapput:
1) Taarsigassarsiat erniallit imaluunniit taarsigassarsianut qularnaveeqqusiissutit : 60 %
2) Taarsigassarsiat erniaqanngitsut akilersugassaanngitsullu : 35 %
3) Nammineq aningaasaliissutit : 5 %
Imm. 5. Imm. 4-imi taaneqartutut pisoqartillugu piumasaqaataavoq taarsigassarsiniartup sumiiffimmi pineqartumi aalajangersimasumik najugaqarnissaa aamma angallatip angerlarsimaffeqarnissaa. Taarsigassarsisoq sumiiffimmut allamut nuussappat imaluunniit angallat sumiiffimmi pineqartumi atorneqarunnaassappat, tapersiissutit akuersissutigineqarsimasut imm. 3-mi allassimasutut procentinngorlugu annertussutsinut allanngortinneqarnissaa piumasaqaataasinnaavoq.
Imm. 6. Imm. 2-miit 4-mut taaneqartuni aningaasalersuineq § 9 naapertorlugu pisinermi aningaasartuutinit tamarmiusunit naatsorsorneqassaaq. Nammineq aningaasaliissutit minnerpaamik amerlassuseqassapput, aamma taarsigassarsiat erniaqanngitsut akilersugassaanngitsullu annerpaamik amerlassuseqarsinnaapput pisinermi akiusup aalajangersakkani procentinngorlugu avinnerisut taaneqartutut. Illuatungaani taarsigassarsiat erniallit imaluunniit taarsigassarsianut qularnaveeqqusiissutit annerpaamik amerlassuseqarsinnaapput pisinermi akiusup illuatungaanilu taarsigassarsiat erniaqanngitsut akilersugassaanngitsullu aamma nammineq aningaasaliissutit akornanni nikingassutaasutut.
Imm. 7. Imm. 2-miit 4-mut taaneqartuni taarsigassarsianut ernialinnut imaluunniit taarsigassarsianut qularnaveeqqusiissutinut kiisalu taarsigassarsianut erniaqanngitsunut akilersugassaanngitsunullu akilersuiffissap sivisussusissaa imatut aalajangersarneqarpoq:
1) Angallatinut qisummik sisammilluunniit sanaanut : ukiut 20
2) Angallatinut glasfiberimik sanaanut : ukiut 15
Imm. 8. Imm. 2-miit 4-mut taaneqartuni taarsigassarsianut ernialinnut imaluunniit taarsigassarsianut qularnaveeqqusiissutinut akilersuiffissap sivisussusia imatut aalajangersarneqassaaq akiliutissat siulliit angallatip tunniunneqarnerata kingornatigut kingusinnerpaamik ukiup ataatsip qaammatillu arfinillit qaangiunnerisigut akilersinneqartussanngorlugit.§ 7. Angallatinik atornikunik pisaarniarnernut imm. 2-miit 6-imut aalajangersakkat malillugit tapiissuteqartoqarsinnaavoq.
Imm. 2. Imm. 1 malillugu taamaallaat tapiissuteqartoqarsinnaavoq ataatsimiititaliaq siusinnerusukkut angallammut tapiissuteqarsimappat aamma tapiissutit taakku tamakkiisumik akilerneqarsimanngippata pissutissaatillugulu angallatip suli aallaqqaammut siunertaasussatut piumasaqaataasunut atorneqarnera.
Imm. 3. Imm. 1 malillugu annertunerpaamik tapiissuteqartoqarsinnaavoq ataatsimiititaliap ernialinnik, erniaqanngitsunik akilersugassaanngitsunillu taarsigassarsiaritissimasaanik imaluunniit taarsigassarsianut qularnaveeqqusiissutaanik suli atuuttunik tamakkiisumik ilaannakuusumilluunniit tigusisoqartillugu.
Imm. 4. Imm. 1 malillugu angallatinik aningaasalersuinermut annertunerpaanik tapiissutissanik naatsorsuinermi naatsorsuinermut tunngaviusutut taarsigassarsisitsinermi naligititaasut aalajangersarneqassapput, qanoq annertunerpaaffiliilluni taarsigassarsiat atuuttut il.il. tiguneqarsinnaanersut. Taarsigassarsisitsinermi naligititaasut imatut malittarisaqarluni aalajangersarneqassapput:
1) Angallatip pisiarineqarnerani siullermik akigititaasut tamarmiusut siullermik taarsigassarsisitsinermi angallammut naligititaasutut annertussuseqassapput.
2) Piffissap nalikilliliiffiup naareerneratigut angallatip nalingata sinnera siullermik taarsigassarsisitsinermi naligititaasut 10%-iannik annertussusilerneqassaaq.
3) Angallatinut qisummik sisammilluunniit sanaanut ukiut 20 aamma angallatinut glasfiberimik sanaanut ukiut 15-it ingerlanerini taarsigassarsisitsinermi naligititaasut assigiiaamik nalikillilerneqassapput. Ukiumoortumik nalikilliliinerit siullermik taarsigassarsisitsinermi naligititaasunit taakkunannga 10%-it ilanngaatigeriarlugit naatsorsorneqassapput. Taarsigassarsisitsinermi naligititaalersut taamaalillutik annertussuseqalissapput siullermik taarsigassarsisitsinermi naligititaasut piffissamut ingerlareersumut nalikilliliissutinik ilanngarlugit.
4) Ataatsimiititaliaq ukiuni kingullerni qaangiuttuni tallimani angallammik iluarsaassinermut tapiissuteqarsimappat, taarsigassarsisitsinermi naligititaasoq taarsigassarsiat ilaannut akiligassanngorsimanngitsunut aamma nalikilliliissutaasimasutut annertussusilerlugu qaffanneqassaaq.
Imm. 5. Imm. 1 naapertorlugu angallatinik pisinermut aningaasaliissutissanut annertunerpaamik taarsigassarsiat erniallit imaluunniit taarsigassarsianut qularnaveeqqusiissutit tiguneqarsinnaapput angallatip taarsigassarsisitsinermi nalingata 90%-iinik amerlassusillit, taarsigassarsiat erniaqanngitsut akilersugassaanngitsullu atuuttut, taarsigassarsisitsinermi naligititaasut 25%-ii tikillugit tiguneqarsinnaasut, ilanngaatigaugit. Nammineq aningaasaliissutit amerlassuserissavaat pisiarineqarneranit akiliutigineqartussat atuuttut aamma taarsigassarsisitsinermi naligititaasup assigiinngissutaat, taamaattoq pisinermi akip minnerpaamik 10%-ia.
Imm. 6. Imm. 1 malillugu taarsigassarsiat tiguneqarsinnaapput piffissap akilersuiffissap sinnera maannamut piffissap akilersuiffissap sinneratut atuuttutut sivisussusilerlugu. Taarsiulluguli piffissaq akilersuiffissaq nutaaq aalajangersarneqarsinnaavoq angallatip piunissaata sinneruttutut naatsorsuutigisaasup sivisoqataa, kisiannili ukiunik qulinik sivisunerpaaffissalerlugu.§ 8. Umiatsiaaqqanik sanarlaanik 16 fodinik minnerpaamik takissusilinnik ikkuttakkanik motorilinnik inuussutissarsiutigalugu aalisarnermut piniarnermulluunniit atorneqartussanik pisinermut imm. 2-miit 4-mut aalajangersakkat malillugit tapiissuteqartoqarsinnaavoq.
Imm. 2. Taamaallaat inunnut nammineq umiatsiaaqqaminnik qamutiminnilluunniit qimuttulinnik aalisarlutik piniarlutilluunniit ukiuni qaangiuttuni pingasuni agguaqatigiissillugu isertitaat ikinnerpaamik nammineq isertitaasa tamarmiusut 50%-iinik aamma agguaqatigiissillugu ikinnerpaamik 25.000 kr.-inik amerlassusilinnik isertitaqarsimasunut akileraartarnermut uppernarsaasiussanik uppernarsaasiisunut tapiissuateqartoqarsinnaavoq.
Imm. 3. Imm. 1 malillugu tapersiissuteqartoqassaaq umiatsiaaqqap pisiarinerani akit 75%-ii tikillugit tapiissuteqarnikkut. Umiatsiaaqqamut umiusimasumut aserorsimasumulluunniit qinnuteqaateqartup tamanna tikillugu pigisimasaanut sillimmasiissutitigut taartisisoqarsimappat umiatsiaaqqamut nutaamut pisiarinerani akit tapiissuteqarfigineqarsinnaasut sillimmasiissutitigut taarsiissutit amerlaqataannik ilanngarneqassapput.
Imm. 4. Imatut atugassaqartitsilluni tapiissuteqartoqassaaq tapiissutit utertinneqarnissaat piumasaqaatigineqarsinnaalluni umiatsiaaraq pisaarineqartoq pisaarineraniit ukiut tallimat qaangiutsinnagit allanut tunineqarpat imaluunniit inuussutissarsiutigalugu aalisarnermut piniarnermulluunniit atorneqarunnaarpat.§ 9. Angallatinut § 6, § 7 aamma § 8 malillugit aningaasalersorneqartunut pisinermi akigititaasunut ilaapput isumaqatigiissummi akigititassatut isumaqatigiissutit, aalisarnermut atortussanut pisariaqartinneqartunut pisinermi aningaasartuutit, kvartalimut sillimmasiissutinut akiliutit kiisalu angallatip tiguneqarnerani aningaasartuutit allat il.il. angallatip angerlarsimaffianiit aalisalersitsinissamut angallatip tamakkiisumik atortulersornissaanut pisariaqartinneqartutut naatsorsuutigineqartut.
Imm. 2. Angallatinut nutaanut pisaartoqarnerani aningaasartuutinik appartitsinissamut allaniit toqqaannartumik tapiissuteqartoqarpat pisiarinerani akit tapiissutit ilanngaatiginagit naatsorsorneqassapput, aamma taarsigassarsiat erniaqanngitsut akilersugassaanngitsullu aalajangersakkat siuliinniittut malillugit tapiissutit nalingannik annikillisinneqassapput.§ 10. Inuussutissarsiutigalugu aalisarnermut piniarnermulluunniit angallatinik motori ingerlasaat aalajangersimasunik allanngortiterinermut iluarsaassinermulluunniit imaluunniit atortunik, motorinik, sillimaniarnermut atortunik aamma teknikikkut atortulersuutinik allanik angallatinut taamaattunut pisinernut imm. 2-miit 5-mut aalajangersakkat malillugit ernialinnik taarsigassarsisitsisoqarsinnaavoq aamma ernialersugaanngitsunik akilersugassaanngitsunillu taarsigassarsisitsisoqarsinnaalluni imaluunniit taarsigassarsiniartarfinnit namminersortut imaluunniit pisortat pigisaannit taarsigassarsianut qularnaveeqqusiisoqarsinnaalluni, piumasaqaatit uku naammassineqarsimappata:
1) angallammut peqqussut una imaluunniit inuussutissarsiutinut tapersiisarneq pillugu siusinnerusukkut maleruagassat atuuttut malillugit tapiissuteqartoqarsimassasoq aamma tapiissutigineqarsimasunit akiitsut sinnerinik peqassasoq tassaasunik taarsigassarsiat erniallit imaluunniit taarsigassarsianut qularnaveeqqusiissutit,
2) angallatinut qisunnut sisannulluunniit tunngatillugu angallat ukiut 25-it sinnerlugit pisoqaassuseqassanngitsoq aamma angallatinut glasfiberinut ukiut 15-it sinnersimassanagit, pissutsit immikkut illuinnartut pissutigineqassanngippata, taamaattoqartillugu teknikikkut aningaasarsiornikkulu sukumiisumik naliliisoqarneratigut iluarsaassinermut aningaasartuutit 90 %-iinik ernialersukkanik taarsigassarsisitsisoqarsinnaassalluni, tassa erseqqissumik uppernarsaneqarsinnaassappat qinnuteqaateqartup angallat imatut pitsaatigisumik ingerlassinnaagaa taarsigassarsianut akilersugassanut pisussaaffiit eqqortissinnaallugit, aamma
3) angallat sillimmaserneqarsimassasoq aamma taarsigassarsiallip sillimmasiinermut akiliutissaq kingulleq akilereersimassagaa.
Imm. 2. Imm. 1 malillugu aalisarnermut atortunik pisinermut aamma annikinnerusumik iluarsaassinissanut aammalu teknikikkut atortulersuutinut annikinnerusunut imatut tapiissuteqartoqarsinnaavoq aningaasalersuinerit imatut amerlassusilerlugit:
1) Taarsigassarsiat erniallit imaluunnit taarsigassarsianut qularnaveeqqusiissutit : 90 %
2) Nammineq aningaasaliissutit : 10 %
Imm. 3. Imm. 1 malillugu allanngortiterinernut aamma annertuunik iluarsaanernut, motorinik aammalu teknikikkut atortulersuutinut annertunerusunik allanik pisinernut kiisalu isumannaallisaatinik pisiortornernut imatut tapiissuteqartoqarsinnaavoq aningaasaliissutit imatut amerlassusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 60 %
2) Taarsigassarsiat erniaqanngitsut akilersugassaanngitsullu : 30 %
3) Nammineq aningaasaliissutit : 10 %
Imm. 4. Imm. 1-imiit 3-mut aalajangersakkat malillugit taarsigassarsiat erniallit imaluunniit taarsigassarsianut qularnaveeqqusiissutit annerpaamik amerlassuseqarsinnaapput sanaartornermi aningaasartuutit illuatungaanilu taarsigassarsiaasinnaasut erniaqanngitsut akilersugassaanngitsullu aamma nammineq aningaasaliissutit akornanni nikingassutaasut. Taarsigassarsiat erniaqanngitsut akilersugassaanngitsullu annerpaamik aamma nammineq an-ingaasaliissutit minnerpaamik amerlassuseqassapput sanaartornermi aningaasartuutit procentinngorlugu avinnerisut taaneqartutut. Taamaattoq imm. 3 malillugu ikiorsiisoqarsimappat nammineq aningaasaliissutit 5%-imut appartinneqarsinnaapput taamaaqataannik taarsigassarsiat erniallit imaluunniit taarsigassarsianut qularnaveeqqusiissutit qaffanneqassappata.
Imm. 5. Imm. 1-imiit 3-mut aalajangersakkat malillugit taarsigassarsianut imaluunniit taarsigassarsianut qularnaveeqqusiissutinut piffissaq akilersuiffissaq imatut sivisunerpaaffilerneqarsinnaavoq:
1) aalisariutip tunniunneqareernerata kingorna pissarsiarineqartunut aalisarnermi atortunik pisinermut ikiorsiisoqarpat, ukiut pingasut
2) iluarsartuussinernut annikinnerusunut ammalu teknikikkut atortulersuutinut annikinnerusunut ikiorsiisoqarpat, ukiut tallimat,
3) isumannaallisaatinut ikiorsiisoqarpat, ukiut tallimat, aamma
4) allanngortiterinernut, annertunerusunik iluarsartuussinernut, motorinik aamma teknikikkut atortulersuutinik annertunerusunik pisinermut ikiorsiisoqarpat, ukiut qulit.
Nersutaatit, tuttuuteqarneq assigisaallu.
§ 11. Nersutaateqarnermut assigisaannullu inuussutissarsiummut atatillugu illuutit sanaartornerinut, pisiarinerinut allilerneqarnerinulluunniit tamatumunngalu atatillugu piginnittumut, atuisumut, aqutsisumut imaluunniit ikiortimut illuliuussinernut pisinernulluunniit ernialinnik taarsigassarsisitsisoqarsinnaavoq, taarsigassarsisitsisarfinnit namminersortunit pisortanilluunniit pigineqartunit taarsigassarsianut qularnaveeqqusiisoqarsinnaalluni imaluunniit ernialersugaanngitsunik taarsersugassaanngitsunillu taarsigassarsisitsisoqarsinnaalluni.
Imm. 2. Imm.l naapertorlugu taarsigassarsiat erniaqanngitsut taarsersugassaanngitsullu sanaartornermut pissarsinermulluunniit aningaasartuutit annerpaamik 60%-erisinnaavaat. Nersutaateqarnermulli assigisaanullu inuussutissarsiummut atatillugu namminerluni sanaartortoqarpat sanaartornermi atortussanut aningaasartuutit 90%-ii tikillugit erniaqanngitsunik taarsersugassaanngitsunillu taarsigassarsisitsisoqarsinnaavoq.
Imm. 3. Imm. 2. naapertorlugu taarsigassarsisitsinermi sanasunit ikiorneqarnernut pisariaqartunut ernialinnik taarsigassarsisitsisoqarsinnaavoq taarsigassarsianulluunniit qularnaveeqqusiisoqarsinnaalluni.
Imm. 4. Imm. 1 aamma imm. 2 naapertorlugit taarsigassarsiat sivisunerpaamik ukiuni 25-ni taarsersorneqassasut aalajangerneqassaaq. Imm. 3 naapertorlugu taarsigassarsiat sivisunerpaamik ukiuni qulini taarsersorneqassasut aalajangerneqassaaq.§ 12. § 11-mi aalajangersakkat tunngavigalugit illuliat kallerup innilernissaannut imaluunniit kallerup inniliuusernissaannut ernialinnik taarsigassarsisitsisoqarsinnaavoq imaluunniit taarsigassarsianut qularnaveeqqusiisoqarsinnaalluni kiisalu erniaqanngitsunik taarsersugassaanngitsunillu taarsigassarsisitsisoqarsinnaalluni.
Imm. 2. Imm. 1 naapertorlugu taarsigassarsiat erniaqanngitsut taarsersugassaanngitsullu annerpaamik sanaartornermut pisinermullu aningaasartuutit 60%-erisinnaavaat.
Imm. 3. Imm. 1 aamma imm. 2 naapertorlugit taarsigassarsiat taarsersornissaat sivisunerpaamik ukiunut qulinut aalajangerneqarsinnaavoq.§ 13. Nersutaatissarsinernut, tassunga ilanngullugit savat, tuttut aamma nersutit aminnanniartarfiit kiisalu maskiinarsinernut, nersutaateqarnermut atortussarsinernut assigisaannullu erniaqanngitsunik taarsersugassaanngitsunillu taarsigassarsisitsisoqarsinnaavoq imaluunniit taarsigassarsianut qularnaveqqusiisoqarsinnaalluni.
Imm. 2. Imm. 1 naapertorlugu taarsigassarsianut imaluunniit taarsigassarsiat qularnaveeqqusernerinut atatillugu erniaqanngitsunik taarsersugassaanngitsunillu traktorersinernut assaatinullu maskiinarsinernut, kiisalu maskiinanut allanut angisuunut motoorimik ikkunneqareersimasumik ingerlatilinnut, tamakkiisumik aningaasartuutit 30%-iat angullugu taarsigassarsisitsisoqarsinnaavoq.
Imm. 3. Imm. 1 aamma imm. 2 naapertorlugit taarsi-gassarsiat sivisunerpaamik ukiut qulit taarsersorneqassasut aalajangerneqarsinnaavoq.§ 14. Nunagissaanernut, tassunga ilanngullugit narsaasiornerit ujaraajaanerillu nutaat, marraasarterinerit, paqqersaanerit, kalkilersuinerit naggorissaasersuinerillu kiisalu imerterusiornerit, ungalulersuinerit assigisaallu, ernialinnik taarsigassarsisitsisoqarsinnaavoq imaluunniit taarsigassarsianut qularnaveeqqusiisoqarsinnaavoq kiisalu erniaqanngitsunik taarsersugassaanngitsunillu taarsigassarsisitsisoqarsinnaalluni.
Imm. 2. Imm. 1 naapertorlugu erniaqanngitsunik taarsersugassaanngitsunillu taarsigassarsiat annerpaamik aningaasartuutit 60%-erisinnaavaat.
Imm. 3. Imm. 1 aamm aimm. 2 malillugit taarsigassarsiat sivisunerpaamik ukiut qulit taarsersorneqassasut aalaj- angerneqarsinnaavoq.§ 15. Pigisat nalillit, § 11-mi, § 12-imi aamma § 13-imi aalajangersakkanut ilaatinneqartut, iluarsarneqarnerinut ernialinnik taarsigassarsisitsisoqarsinnaavoq imaluunniit taarsigassarsianut qularnaveeqqusiisoqarsinnaalluni kiisalu erniaqanngitsunik taarsersugassaanngitsunillu taarsigassarsisitsisoqarsinnaalluni, pigisat nalillit pisaarinerini aalajangersakkanisut annertutigisunik, kisiannili ukunani taarsigassarsiat taarsersornissaat sivisunerpaamik ukiut qulit ingerlassasoq aalajangerneqarsinnaalluni.
§ 16. §§-ini 11-mi, 12-imi, 13-imi, 14-imi 15-imilu aalajangersakkat naapertorlugit taarsigassarsiat erniallit taarsigassarsianulluunni.it qularnaveeqqusiinerit siunertarineqartumut taarsigassarsiat erniaqanngitsut taarsersugassaanngitsullu erniaasa annertunerpaaffissaattut aalajangikkap aammalu 90%-ip assigiinngissutaattut annerpaamik annertussuseqarsinnaapput; taamaattorli 95%-iusinnaalluni namminersorluni savaatilinngoqqaarnermut atatillugu.
Imm. 2. Savaatilittut aallarteqqaarnermut atatillugu nersutaatinut assigisaannullu inuussutissarsiummut atatillugu illuutinut nammineerluni sanaartukkatut sananeqartunut atortussanut aningaasartuutit 95%-ii tikillugit erniaqanngitsunik taarsersugassaanngitsunillu taarsigassarsisitsoqarsinnaavoq.
Imm. 3. Savaatilittut aallarteqqammersoq peqqussummi matumani imatut paasineqassaaq, taarsigassarsisoq sumiiffimmi savaateqarfimmik aallaqqaataanit illuliorfioreersimanngitsumi pilersitsisoq, pilersaarutaasutut pilersitsinissami atugassatut atorneqartussamik imaluunniit savaateqarfioreersumik taassumaluunniit ilaanik piginnittuulersoq.
Imm. 4. Imm. 1 aamma 2 naapertorlugit aningaasaliissutit 95%-iinut qaffatanik tapiissuteqarneq taamaallaat atorneqarsinnaavoq aningaasaliissutinut taarsigassarsisup savaatilittut aallartinnerata piviusunngortinneqarneranut ukiuni siullerni pingasuni aningaasaliissutinut pilersaarummut inuussutissarsiutinut tapersiisarnermut ataatsimiititaliap akuerisaanut ilanngunneqarsimasunut.§ 17. Taarsigassarsisup aningaasaqarniarnera eqqarsaatigalugu pisariaqartinneqartutut isumaqartoqarpat § 11-mi, § 12-imi, § 13-imi, § 14-imi § 15-imilu aalajangersakkat naapertorlugit taarsigassarsianut tunngatillugu erniat taarsersugassallu taarsersorlugit aallartinnissaat kinguartinneqarsinnaavoq taarsigassarsiat pilersinneriniit ukiut pingasut angullugit. Erniat akilersornissaannut tunngatillugu akilersuinissaq kinguartikkallarneqarsimappat, kinguartitsigallarnerup nalaani erniat taarsigassarsiarineqarsimasunut ilanngunneqassapput.
§ 18. Nerukkaatissanik kingunissanillu pisinermut ernialinnik taarsigassarsisisitsisoqarsinnaavoq pisinermi aningaasartuutit 100%-ii tikillugit. Taarsigassarsisut arlallit ataatsimut pisinerannut atatillugu tunini-aasartunut assartuisartullu suliffiutaannut akiliinissamut qularnaveeqqusiigallartoqarsinnaavoq.
Imm. 2. Imm. 1 naapertorlugu taarsigassarsiat tunniunneqartassapput taarsigassarsisup nersutaatiminik tunisinermigut isertitassai qularnaveeqqusiullugit.
Imm. 3. Imm. 1 naapertorlugu taarsigassarsiat ukioq ataaseq qaangiutsinnagu akilerneqareersimassapput.
Kapitali 4.
Ernianut tapiissutit qularnaveeqqusiinerlu.§ 19. Taarsigassarsisitsisarfinnit namminersortunit pisortanillu pigineqartunit taarsigassarsiat erniaasa appartinnissaannut kapitali 3-mi aalajangersakkat naapertorlugit ernianut tapiissuteqartoqarsinnaavoq.
Imm. 2. Kiisalu aamma inuutissarsiutinut tapersiisarnermi maleruagassat siusinnerusukkut atortuusut naapertorlugit taarsigassarsianut qularnaveeqqusiinernut atatillugu ernianut tapiissuteqartoqarsinnaavoq.§ 20. § 18-imi imm. 2-mi akilersuinissamut qularnaveeqqusiissutit eqqaassanngikkaanni taarsigassarsianut ingerlatsinermulluunnit sillimmatinut aningaaserivinni, sparekarsini taarsigassarsisitsisarfinniluunniit allanit pisortanit nakkutigineqartunit taarsigassarsiarineqarsimasunut taamaallaat qularnaveeqqusiisoqarsinnaavoq.
Kapitali 5.
Tapersiinermi atugassarititaasut.§ 21. Taarsigassarsiat nalinginnaasut maleruagassiat naalakkersuisunit aalajangersarneqarsimasut naapertorlugit ernialersorneqarlutillu taarsersorneqassapput. Taarsigassarsiat naafferarlugit tunniunneqarsinnaapput.
§ 22. Taarsigassarsiat erniaqanngitsut taarsersugassaanngitsullu, taarsigassarsiat qanoq sivisutigisumik taarsersornissaannut tunngatillugu kapitali 3-mi ukiut aalajangerneqarsimasut malillugit, nalikillilerneqassapput. Tamatuma saniatigut ernialinnik taarsigassarsisoqarsimappat imaluunniit pisaarniarnermut atatillugu taarsigassarsinermut qularnaveeqqusiisoqarsimappat, taava taarsigassarsiat erniaqanngitsut taarsersugassaanngitsullu taakkununnga taarsersuinissanut tunngatillugu aalajangersakkat assinginik nalikillilerneqassapput.
Imm. 2. Nalillit pissarsiarineqarsimasut nalikilliliinissamut piffissaritinneqartup aalajangerneqarsimasup ingerlanerani taarsigassarsisitsinermi sumut atornissaannut naatsorsuutigineqarsimasutut atorneqanngippata, imaluunniit taarsigassarsinermi, ernialinnik taarsigassarsinermi, taarsigassarsinermullu atatillugu qularnaveeqqusiunneqarsinnaasunut atugassarititaasut sumiginnarneqarsimappata, taava aningaasat nalikilliliissutigineqarsimanngitsut utertillugit akilerneqassapput. Aalajangerneqarsinnaavorli taarsigassarsiat uninngatiinnarneqarsinnaasut akiligassat sinnerisa siunissami ernialersorneqarnissaannik taarsigassarsiatullu ernialittut taarsersorneqarnissaannik periarfissaqartitsilluni piumasaqaatitalerlugit.§ 23. Taamaallaat taarsigassarsisitsisoqarsinnaavoq aamma taarsigassarsianut ingerlatsinermullu sillimmatitut taarsigassarsianut qularnaveeqqusiisoqarsinnaalluni isumannaallisaasoqarneratigut.
Kapitali 6.
Taarsigassarsiat taarsersorneri, pillaammik ernialiussat aamma akiliinngikkallarnissainik kiisalu isumakkeerinermik aamma atortuujunnaarsitsinernik aaqqissuussinerit.§ 24. Taarsigassarsiat qanoq sivisutigisumik akilersorneqarnissaat nalikillisikkiartuaartinneqarnissaalluunniit tunngavigalugu ukiumut amerlaqatigiikkuutaanik akiliisarluni taarsigassarsiat ikilisikkiartuaarneqassapput.
Imm. 2. Qularnaveeqqusiissutitut immaqalu taarsigassarsiat imaluunniit taarsigassarsisitsisarfimmit taarsigassarsiat erniaannut tapiissutitut tapersiisoqarsimassappat taarsigassarsiat taarsigassarsiniartarfimmilluunniit taarsigassarsiat taarsigassarsinermut isumaqatigiissummi pineqartumi aalajangersakkat malillugit ikilisinneqassapput.§ 25. Inuutissarsiutinut Tapersiisarnernut Ataatsimiititaliaq, pigisat nalillit sillimmasiunneqarsimappata, taarsigassarsianut atatillugu atugassarititaasut naapertorlugit ernianut akilersuinermik unitsitsigallarsinnaapput qaammatit aqqaneqmarluk tikillugit ukiut tallimat angullugit sivisussusilimmi, tassa akilersuinerit erniallu siunissami akilersuinissami angeqqatigiiaarlugit agguarneqarsinnaassammata taamaalilluni taarsigassarsiat sinneri sivisunerpaamik ukiut tallimat ingerlanerini akilerneqartussanngorlugit.
§ 26. Qularnaveeqqusiissutitut tapersiisoqarsimassappat atukkiisarfiup Inuutissarsiutinullu Tapersiisarnermi Ataatsimiititaliap akornanni isumaqatigiissuteqareernikkut atukkiisarfik pineqartoq akiliisitsinngikkallarsinnaavoq.
§ 27. Tapersiiffigineqarsimasoq akiliinngikkallarnissamik qinnuteqaateqareersimappat Inuutissarsiutinut Tapersiisarnermut Ataatsimiititaliaq aalajangeereertinnagu pillaatitut erniat naatsorsorneqassanngillat.
Imm. 2. Akiliinngikkallarnissaq nalunaarutigineqareersimappat pillaatitut erniat naatsorsorneqassanngillat taamaallaalli erniat akilersuutillu akilereerneqarsimasussaagaluit taarsigassarsianut nalinginnaasumik erniaritinneqartussatut aalajangerneqarsimasunik taamaallaat ernialersorneqassallutik.
Imm. 3. Allatut pisoqartillugu, tassa ullup akiliiffissap kingulliup kingornatigut kingusinnerpaamik qaammat ataaseq qaangiuttoq akiligassat akilerneqarsimanngippata, pillaatitut erniat taarsigassarsiat nalinginnaasumik erniaasa saniatigut ukiumut 6%-iusut naatsorsorneqarsinnaapput.§ 28. Inuutissarsiutinut Tapersiisarnernut Ataatsimiititaliap taarsigassarsiaritinneqareersimasut erniallit taarsigassarsianullu qularnaveeqqusiinerit taarsigassarsianut nutaanut allanngortissinnaavai pigisap nalillip taarsigassarsiaritinneqartunut tunngassutillip pigineqarnissaata sinneranik naatsorsuutigineqartumik sivisunerunngitsumik akilersuiffissalerlugit.
Imm. 2. Immikkut ittumik pisoqartillugu Inuutissarsiutinut Tapersiisarnernut Ataatsimiititaliap, Naalakkersuisut akuersinerisigut, inuutissarsiutinut tapersiissutitut akiitsut taarsigassarsianut ukiut tallimat tikillugit ernialersuisoqartussaajunnaarlugu akilersuisoqartussaajunnaarlugulu allanngortissinnaavai kiisalu suliffeqarfiup aningaasaqarnikkut aaqqissuussivigineqarneranut ilanngullugu aningaasat akiitsut immikkullu tapiissutit isumakkeersinnaallugit, taakku peqqussut manna imaluunniit inuutissarsiutinut tapersiisarneq pillugu siusinnerusukkut aalajangersakkat atuussimasut malillugit tapiissutaasimappata.
Imm. 3. Imm. 2 naapertorlugu aningaasanut tunngasunik aaqqissuusseqqinnermut atatillugu piumasarineqarsinnaavoq Namminersornerullutik Oqartussat sullivimmi pineqartumi, taanna ingerlatseqatigiiffimmit assigisaanilluuniit ingerlanneqarpat, siulersuisunut ataatsimik arlalinnilluunniit ilaasortaatitaqassasut.
Imm. 4. Imm. 1-imiit imm. 3-mut aalajangersakkat sulliviup taarsigassarsiani akilersornissaanut tunngatillugu pisussaaffini siunissami eqqortissinnaagai up-pernarsineqarsinnaappat atorneqarsinnaapput.§ 29. Inuutissarsiutinut Tapersiisarnermut Ataatsimiititaliaq angallatip, manna tikillugu aalisarnermik piniarnermillu inuutissarsiuteqarnermut atorneqarsimasup, unalu peqqussut aammalu siusinnerusukkut inuutissarsiutinut tapersiisarnernut tunngatillugu aalajangersakkat atortuusimasut naapertorlugit tapersiissuteqar-fiusimasup, atortuujunnaarsinneranut atatillugu inuutissarsiutinut tapersiissutinut akiitsut utertinnissaannut atatillugu erniaqanngitsoortitsisinnaavoq akiliinngik-kallartitsisinnaalluniluunniit. Kiisalu aamma Inuutis-sarsiutinut Tapersiisarnermi Ataatsimiititaliaq Naalakkersuisut akuersinerisigut taamatut atortuujunnaarsitsinermut atatillugu immikkut ittumik pisoqartillugu akiitsunik isumakkeerisinnaavoq.
Imm. 2. Imm. 1 naapertorlugu aatsaat tapiissuteqartoqarsinnaavoq angallatinik atortussaajunnaarsitsinermut atatillugu taakku imatut pisoqaassuseqassallutik angallammik taamaattumik nutaamik pisaarnermut taarsigassarsianut sivisunerpaamik piffissaq akilersuiffissamik sivisunerusumik aamma tamatumunnga peqatigitillugu naatsorsuutigineqarpat angallat aningaasaqarnikkut illersorneqarsinnaasumik ingerlanneqarsinnaajunnaartoq aamma aningaasaqarnikkut illersorneqarsinnaanngitsutut nalilerneqartoq angallatip iluarsaannissaa.
Imm. 3. Imm. 1 naapertorlugu tapiissutit aatsaat angallatip atortussaajunnaarsinneqartup taartissaanik pissarsiniarnermut atatillugu tapiissutigineqarsinnaapput.
Imm. 4. Imm. 1 naapertorlugu tapiissutit aatsaat tapiissutigineqarsinnaapput taarsigassarsiallip manna tikillugu angallamminik ingerlatsisimanera tunngavigalugu aamma taarsigassarsiat taarsersornissaannut atatillugu atorsinnaanera tunngavigalugit uppernarsineqartutut isigineqarpat taarsigassarsiallip atortup maannakkut taarsigassarsianut angallatitaarniarnermullu atatillugu atugassanut tunngatillugu pisussaaffinnik siunissami eqqortitsisinnaasoq.
Imm. 5. Imm. 1 malillugu ukiut tallimat tikillugit ernianut akiliisussaatitaajunnaartitsisoqarsinnaavoq akiligassanillu akilersuisoqanngikkallartitsisoqarsinnaalluni, tamatuma kingorna akiitsut taarsigassarsinermi atugassarititaasut naapertorlugit ernialersorneqassapput taarsersorneqassallutillu, angallatip atortuujunnaarsinneqartup taartissaanik angallatitaarnermut atatillugu taarsigassarsiat taarsersornissaasa sivisussusissaannit sivisunerunngitsumik piffissalerlugit.
Imm. 6. Imm. 1 malillugu tapiissuteqarnermut atatillugu angallammut atortuujunnaarsinneqartumut tunngatillugu taarsigassarsianut angallat nutaaq qularnaveeqqusiunneqassaaq.
Imm. 7. Imm. 1 malillugu tapiissuteqarnermut atatillugu Inuutissarsiutinut Tapersiisarnernut Ataatsimiititaliaq angallatit atortuujunnaarsinnissaannut atatillugu aningaasartuutissat aningaasalersornissaannut ernialinnik taarsigassarsisitsisinnaavoq. Tamanna aalajangersagaq malillugu taarsigassarsiat angallammut nutaamut atatillugu akiitsunut ilanngunneqassapput.
Imm. 8. Imm. 1-7 atuupputtaaq aalisariutinut raajarniarunnaarsimasunut.§ 30. Taarsigassarsiallit malittarisassat tamatumunnga atuuttut malillugit, angallat 75 BRT/120 BT-nit mikinerusoq imaluunniit angallatit uku arlaat atorlugu GR 6-355 "Tobias Noahsen", naqinnernik ilisarnaatit OZJO, GR 7-216 "Anįse", naqinnernik ilisarnaatit OUHK, GR 8-288 "Qarsaaq", naqinnernik ilisarnaatit OUUC, raajarniarsinnaatitaasut pisassanit pisassatik tamakkerlugit Namminersornerullutik Oqartussanut tunniutissappatigik, pisariaqartitsineq naapertorlugu sinerissap qanittuani raajarniarnermi pisarisinnaasanut naleqqussakkamik aalisarnermik pisariaqartitsineq naapertorlugu, tamatumunnga imm. 2-miit 4-mut aalajangersakkat malillugit taarsiissutinik akiliuteqartoqarsinnaavoq. Pisassanit pisassat tamarmiusut 1996-imi pisassanit pisassat atuutilerneranni taarsigassarsialimmut pineqartumik angallateqartumut tunniunneqartut minnerpaamik amerlaqatigissavaat.
Imm. 2. Angallat taarsigassarsiallip manna tikillugu raajarniarnermut atorsimasa ukiunit 20-nit pisoqaaneruppat, taarsigassarsiallip inuussutissarsiutinut tapersiisarfimmit taarsigassarsiai tamakkerlugit isumakkeerneqassapput.
Imm. 3. Angallat taarsigassarsiallip manna tikillugu aalisarnermut atorsimasaa ukiut 20-t inorlugit pisoqaassuseqarpat, taarsigassarsiallip inuussutissarsiutinut tapersiisarfimmit taarsigassarsiaasa ilaat angallatip tunineqarnerani iluanaarutitigut anguneqanngitsut (matussuserneqanngitsut) isumakkeerneqassapput.
Imm. 4. Imm.2 aamma 3-mi taaneqartutut taarsigassarsianik isumakkeerinerup saniatigut raajat tonsinngornerini tamani 1.000 kr.-nik akiliisoqassaaq, pisassanik pisassat ukiumi aalisarfiusumi tunniunneqarneranni pisinnaatitsissutaasoq naapertorlugu. Akiliutigineqartut aningaasanngorlugit taarsigassarsiallip nammineq atugassaatut tunniunneqassapput.
Imm. 5. Taarsigassarsiallip imm. 4 naapertorlugu pissai akiliisitsiniutaallutilluunniit allatut pinngitsaaliiniutaasinnaanngillat.
Imm. 6. Pisassanit pisassat imm. 1 naapertorlugu Namminersornerullutik Oqartussanit tiguneqartut naalakkersuisut aalajangiineratigut tuniniarneqarsinnaapput allatulluunniit atorneqarsinnaallutik tamanna pillugu malittarisassat qaqugukkulluunniit atuuttut malillugit. Pisassanit pisassanik tunisinermi akigitinneqartoq aalajangerneqassaaq imm. 4 naapertorlugu pisassanit pisassat pissarsiarineqarneranni akiliutigineqartumit minnerunngitsumik.§ 31. Umiusoqarneratigut imaluunniit sallunaveeqqut allanik pissuteqartumik akiligassalimmit pigineqarunnaarsimappat sallunaveeqqutip inuussutissarsiutinut tapersiisarnernut ataatsimiititaliamit tiguneqarnerata kingunerisaanik akiligassat atuuttumik sallunaveeqqusiinikkut isumannaarneqarsimanatik, akiligassat ernialersorneqarunnaassapput.
Imm. 2. Imm. 1-imi taaneqartutut pisoqartillugu aningaasanik taarsigassarsiallip akilersimasaatut amerlatigisunik akiitsunik ikilisitsinissamut ukiumoortumik tapiissuteqartoqarsinnaavoq.
Imm. 3. Imm. 1-mi akiligassat pineqartillugit ukiut tallimat qaangiunneranni qaammatisiutit ukiuata naanerani, inuussutissarsiutinut tapersiisarnermut ataatsimiititaliap akiligassat ilaat isumakkeersinnaavai. Ilaannakoortumik isumakkeerinninnermi akiligassanik 135.000,-kr.-init ikinnerusunut ikilisitsisoqarsinnaanngilaq.
Imm. 4. Isumakkeerinermi tunngavigineqassaaq, taarsigassarsisoq akiliinissamut ukiullu qaninnerpaat iluanni akiligassanik tamarmiusunik akiliinissamut periarfissaqassanngitsoq.
Imm. 5. Taarsigassarsisup akiliisinnaanermut periarfissai makku tunngavigalugit nalilerneqassapput:
1) Akiligassat amerlassusiat,
2) taarsigassarsisup inoqutaasalu nalilinnik pigisaqarnerat,
3) taarsigassarsisup inoqutaasalu maannakkut siunissamilu isertitaqarnissamut periarfissaat aamma
4) taarsigassarsisup ukioqqortussusia.
Imm. 6. Imm. 1-mi akiligassat pineqartillugit ukiut qulit qaanngiunneranni qaammatisiutit ukiuata naanerani, imm. 4-mi 5-milu pissutsit taaneqartut assigisaannik pisoqartillugu inuussutissarsiutinut tapersiisarnermut ataatsimiititaliap akiligassat tamakkiisumik isumakkeersinnaavai. Akiligassalli tamarmiusut isumakkeerneqarsinnaanerannut tunngaviussaaq, taarsigassarsisup ima akiliisimatiginissaa, akiliisinnaanermini periarfigisinnaasani naapertorlugit akiliisimassalluni.
Imm. 7. Imm. 3 aamma 6 naapertorlugit isumakkeerineq taamaallaat atorneqassaaq inunnut taarsigassarsialinnut pineqartorpianut.
Imm. 8. Imm. 1-itut pisuni inuussutissarsiutinut tapersiisarnermut ataatsimiitaliap akiligassat tamarmiusut isumakkeersinnaavai, taarsigassarsisoq 60-it sinnerlugit ukioqalersimappat imaluunniit pensionit utoqqarnullu angerlarsimaffiit il.il. pillugit Inatsisartut peqqussutaat naapertorlugu pensionisiaqarpat.
Kapitali 7.
Ikaarsaariarnermi atortuulersitsinermilu aalajangersakkat.§ 32. Manna tikillugu inuutissarsiutinut tapersiisarnernut maleruagassat naapertorlugit taarsigassarsiat allallu tapersiissutaasimasut Inuutissarsiutinut Tapersiisarnernut Ataatsimiititaliamit, tapersiinermut atatillugu atugassaritinneqartutut aalajangikkat malillugit, ingerlanneqassapput.
§ 33. Inuutissarsiornermik tapersiisarneq pillugu Inatsisartut peqqussutaata nr. 4-p, 20. november 1984-imeersup atortuulerneraniilli Namminersornerullutik Oqartussat inuutissarsiutinut tapersiisarnernut tunngatillugu manna tikillugu maleruagassaasimasut naapertorlugit atukkiinernut qularnaveeqqusiinernullu tapiissuteqartarnernut atatillugu pisinnaatitaaffiit pisussaaffiillu, siornatigut Naalagaaffimmit isumagisassaasimagaluartut pisussaaffigineqarlutillu, tiguaat. Naalagaaffiulli 1. januar 1985 sioqqullugu pisussaaffiulersimasut suli akisussaaffigai. Taamatut akisussaaffeqarneq pissutigalugu aningaasartuutit Naalagaaffiup Namminersornerullutik Oqartussanit matutissallugit pisinnaatitaavoq.
§ 34. Peqqussut manna 1. juni 1996 atortuulerpoq.
Imm. 2. §13, imm. 2-mi aalajangersagaq 1. januar 1986-ip kingornatigut taarsigassarsiaritinneqarsimasunut imaluunniit taarsigassarsianut qularnaveeqqusiisimanernut atatillugu atorneqartassaaq.§ 35. Peqqussutip matuma atortuulerneranut peqatigitillugu Aalisarnikkut, piniarnikkut nunalerinikkullu inuutissarsiutinut tapersiisarneq pillugu Inatsisartut peqqussutaat nr. 11, 3. november 1994-imeersoq atorunnaarpoq.
Imm. 2. Inuutissarsiornermik tapersiisarneq pillugu Inatsisartut peqqussutaat nr. 4, 20. november 1984-imeersoq naapertorlugu nalunaarutaasimasoq inuutissarsiutinullu tapersiisarneq pillugu kaajallaasitat atuuttut atuutiinnassapput, pequssut manna naapertorlugu aalajangersakkanik taarserneqarnissamik tungaanut.
Namminersornerullutik Oqartussat, ulloq 2. maj 1996
Lars Emil Johansen/
Pāviāraq Heilmann