Aningaasarsiat A-t pillugit Namminersornerullutik Oqartussat nalunaarutaat nr. 27, 28. november 1996-imeersoq.

Aningaasarsianit akileraarutit pillugit Inatsisartut inatsisaanni nr. 5-imi 19. maj 1979-imeersumi, kingusinnerpaamik Inatsisartut inatsisaatigut nr. 2-kkut 2. maj 1996-imeersukkut allanngortinneqartumi, § 31, imm. 3, § 37, imm. 2 aamma imm. 4, § 38, imm. 1 aammalu § 91 naapertorlugit makku aalajangersarneqarput:

 

Aningaasarsiat A-t

§ 1. Inatsisartut inatsisaanni § 37, imm. 1-imi taaneqartut saniatigut makku aningaasarsiatut A-tut naatsorsuunneqassapput:
1) Soraarnerussutisiat, aningaasat utaqqiisit aningaasallu tunniunneqartartut akileraaruteqaataasussat taakkununnga assingusut, taakku siusinnerusukkut atorfeqarsimanermut atasuuppata,
2) pensionit, utoqqarnut angerlarsimaffiit il.il. pillugit Inatsisartut peqqussutaat naapertorlugu pensionit tunngaviusumik aningaasartaat,
3) soraarnerussutisiatigut aaqqissuussinernit pisartakkat akileraaruteqaataasussat aningaasarsianit akileraarutit pillugit inatsimmi § 17 b-mi § 17 c-milu taaneqartut,
4) naartunermut, erninermut meerarsiartaarnermullu atatillugu sulinngiffeqartarneq ullormusiaqartarnerlu pillugit Inatsisartut peqqussutaat naapertorlugu ullormusiat tunniunneqartartut,
5) aningaasarsianut annaasanut imaluunniit suliffissaagaluanut annaasanut taartisiat,
6) kisimiilluni erinarsortartutut nipilersortartutullu, timersornikkut aliikkusersuisartutut, nipilersortartutut, atuakkiortutut, allatut tamatigut eqqumiitsuliortutut, timersortartutut, aviisitigut allaaserinnittarnikkut, dommeritut, eqqartuusseqataasutut, illersuisutut freelancetullu nutserisartutut akissarsiat aammalu
7) Kalaallit Nunaanni sulinermi ajutoornermi sillimmasiinissamut peqqussut, tak. Kalaallit Nunaanni sulinermi ajutoornermi sillimmasiinissamut peqqussut, naapertorlugu akiliutisiat makku:
a) inatsisitigut piumasaasut malillugit ajunaarnissamut sillimmasiineq najoqqutaralugu sulliveqarluni akissarsiortunut ullormusiat,
b) innarluuteqarnermut taartisiat aamma qimataasunut taartisiat, taartisiat ukiumut pisassarititatut tunniunneqarpata,
8) aalisarnermit, piniarnermit, aallaaniarnermit, savaateqarnermit tuttuuteqarnermillu tunisassianik Kalaallit Nunaanni tunisinermi isertitat, piginneqatigiiffiit, peqatigiiffiit assigisaasaluunniit tunisarinngippatigit.

 

Aningaasarsiat aningaasarsiatut A-tut isigineqanngitsut

§ 2. Aningaasarsiaasartut ilaat makku aningaasarsiatut A-tut isigineqanngillat:
1) Kiffartuussinermi kajumissaatissiissutit aamma
2) inuinnaat illumi ikiortiminnut ikiortiminnullu allanut aningaasarsiarititaat, sulisitsisoq taassumaluunniit aapparisaa aningaasarsiat akileraaruteqaataasussat naatsorsorneranni pineqartumut akissarsiarititat ilaannik sumilluunniit ilanngaateqarsinnaanngippata.

 

Feeriarnersiutit aamma naalliuttuni sapaataanngitsuni akissarsiat

§ 3. Akileraarutinik A-nik feeriarnersiutinit sapaataanngitsunilu nalliuttuni akissarsianit unerartitsinermut piffissaq aamma akissarsiat taakkua akileraarusigaanerat pillugu makku atuupput:
1) Akissarsiortup feeriaqarnerani sulisitsisoq akissarsisitsisarpat akissarsiarititanit taakku-nannga feeriarnersiutinullu immikkut tapinit akileraarutinik unerartitsineqassaaq maleruagassiat aningaasarsianut A-nut allanut atuuttut malillugit, tak. aningaasarsianit akileraarutit pillugit inatsimmi § 38, imm. 1, oqaaseqatigiit siulliit. Feeriarnersiat akissarsiortut atorfeqarnerminni akissarsiaqarlutik feeriartussaatitaasimasut atorfimminnit soraarnerminni pisassaasa tungaasigut unerartitsineqassaaq maleruagassiat ataani 2)-mi, oqaaseqatigiinni siullerni allassimasut malillugit.
2) Sulisitsisup atorfilik feeriaqarnerani akissarsiaqartinnagu, taamaattorli ukiup feeriarnersia-qaataasussanik aningaasarsiorfiup tulliani ukiumi feeriarfissami akiligassanngorlugit toqqorneqartunik feeriarnersiaqartippagu, taava feeriarnersiat feeriarnissamut allagartap (feriekortip) il.il. tunniunneqarneratigut akissarsiortumut pisassanngortitsinermi akileraarutinik unerartitsisoqassaaq. Taamaattoq akileraarutinik unerartitsineq kingusinnerpaamik ukiumi feeriarnersiaqaataasussanik aningaasarsiorfimmi 31. december pissaaq. Taamaakkujortaaq sapaataanngitsuni nalliuttuni akissarsiarisassat ukiup feeriarnersiaqaataasussanik aningaasarsiorfiup ingerlanerani tunniunneqarsimanngitsut tungaasigut.
3) Feeriarnersiat aamma sapaataanngitsuni nalliuttuni akissarsiat akileraarusersorneqassapput qaammatisiutit malillugit ukiumi, qulaani maleruagassiani l)-imi aamma 2)-mi allassimasut malillugit unerartitsiviusussaasumi. Akileraarusiinermut akileraarutillu naatsorsorneqarneranni paasissutissat aningaasarsianit akileraarutit pillugit inatsimmi § 88, imm. 1 malillugu atugassat ukiumut aningaasarsiorfimmut taannaasumut tunngasumik tunniunneqassapput.

§ 4. Akissarsiortoq akileraartussaajunnaarpat aningaasarsiat A-t § 3-mi taaneqartut, taakkununnga ilaallutik akileraartussaajunnaarneq sioqqullugu feeriaqarnermi akissarsiassanut katersat, akileraaruteqaataasussaapput kingusinnerpaamik piffissami akileraartussaajunnaarfimmi. Akileraarutinik A-nik unerartitsisoqassaaq kingusinnerpaamik piffissami tassani.

§ 5. Inunnut nunani allani najugaqartunut, pensionit, utoqqarnut angerlarsimaffiit il.il. pillugit Inatsisartut peqqussutaat naapertorlugu, tak. § 1, nr. 2, pensioninik pisartagaqartunut, inunnut akileraartussaasunut aningaasarsianit akileraarutit pillugit inatsimmi § 31, imm. 1-imi aalajangersakkat taaneqartut assigalugit pisartakkanit pineqartunit aningaasarsiat akileraarusigassat naatsorsorneqassapput (inummut ilanngaateqartitsisoqassaaq).

§ 6. Nalunaarut 15. december 1996-imi atuutilissaaq.
Imm. 2. Nalunaarut ukioq aningaasarsiorfik 1997 aallarnerfigalugu sunniuteqalissaaq.
Imm. 3. Tamatumunnga peqatigitillugu aningaasarsiat A-t pillugit Namminersornerullutik Oqartussat nalunaarutaat nr. 45, 1. november 1990-imeersoq atorunnaarsinneqarpoq.

Namminersornerullutik Oqartussat, 28. november 1996.

Daniel Skifte

/

Kaare Hagemann