Sinerissamut qanittumi raajarniarnermik nakkutilliineq pillugu Namminersornerullutik Oqartussat nalunaarutaat nr. 20, 22. august 1996-imeersoq.

Inuussutissarsiutigalugu aalisarneq pillugu Inatsisartut inatsisaanni nr. 17-imi 22. oktober 1990-imeersumi, inatsisartut inatsisaatigut nr. 24-ikkut 29. oktober 1992-imeersukkut aamma nr. 4-kkut 2. maj 1996-imeersukkut allanngortinneqartumi, § 8, imm. 1, nr. 4, §§ 22, 23, 24, 25, 26, 27, 28, imm. 2 aamma 29, imm. 3 naapertorlugit aalajangersarneqarpoq:

 

§ 1. Nalunaarut inuussutissarsiutigalugu raajarniarnermut imartani Kalaallit Nu-naata aalisarnikkut oqartussaaffigisaani 44°00'W-ip kitaani inunnit ingerlatseqatigiiffinnilluunniit kalaallit angallataannik, aalisarneq pillugu inatsimmi § 5 takuuk, angallatip usitussutsimut uuttuutaa malillugu 75 BRT/120 BT-init mikinerusunik, ingerlanneqartumut atuuppoq.
Imm. 2. Taamatuttaaq nalunaarut angallatinut radiukkut attaveqartilluni ima ilisarnaatilinnut atuuppoq:
1) OZJO, OUHK aamma OUUC kiisalu
2) OZTZ, OULB, OVXD, OWES, OYKA, OVOJ, OWMZ aamma OZTJ.
Imm. 3. Inuussutissarsiutigalugu aalisarneq pillugu inatsimmi § 19, imm. 2 naa-pertorlugu nalunaarutikkut allakkut imaluunniit ileqqoreqqusakkut allanik aalajangersaasoqarsimanngippat nalunaarut manna malillugu akuersissut tunniunneqartoq atorlugu sineriak kangimut killigalugu aalisartoqarsinnaavoq. Imm. 2-mi nr. 2)-mi angallatinut taaneqartunut "Raajakarsini" aalisarneq pillugu Namminersornerullutik Oqartussat nalunaarutaat nr. 1, l.januar 1995-imeersoq atuupportaaq.

§ 2. Raajarniartoqassappat piumasaqaataavoq angallammik piginnittumut angallat aalajangersimasoq atorlugu aalisarsinnaanermut akuersissuteqartoqarsimanissaa. Akuersissut piffissamut killiligaanngilaq.
Imm. 2. Akuersissuteqartoqassappat piumasaqaataavoq qinnuteqaateqartup piginnittuuneq pillugu aalisarneq pillugu inatsimmi malittarisassat naammassisimassagai. Akuersissummi ukununnga piginnaatitaaffinnut killiliussat aalajangersarneqarsinnaapput
1) angallammi tunisassiornermut,
2) imartamut aalisarfiusumut aamma
3) piffissamut aalisarfiusussamut.

§ 3. Angallatip nalunaarummi matumani usitussutsimut killiliussamik qaangiisimaneranut ataassisimaneranulluunniit usitussutsikkut angissuseq angallatip angissusianut uppernarsaammi allassimasoq aalajangiisuussaaq, uuttueriaatsimik maleruagassat suulluunniit angallatip angissusianut uppernarsaasiinermi atorneqarsimanerat apeqqutaatinnagu.

§ 4. Nalunaarummi matumani oqaaseq usingiaaneq tunisinerluunniit isumaqarput raajanik raajanillu tunisassianik aalisariummiit nunamut imaluunniit angallammut allamut nuussinertut, nuunneqartut usit tamarmiunerat imaluunniit usit ilaannari-neraat apeqqutaatinnagu aamma talittarfimmi imaannarmiluunniit nuussisoqarnera apeqqutaatinnagu.

 

Umiarsuup allattaaviini immersugassaq

§ 5. Inuit piginneqatigiiffiilluunniit aalisariutinik 75 BRT/BT 120-nik mikinerusunik angallatillit raajarniarnissamut akuersissummik pigisaqartut aamma angallatit § 1, imm. 2 nr. 1-imi taaneqartut aalisariarnerit tamaasa umiarsuup allattaaviinut allattuisassapput. Umiarsuup allattaaviini makku pillugit paasissutissat allattorneqartassapput:
1) angallatip naalagaata aqqa,
2) aalisarsinnaanermut akuersissutip imaluunniit akuersissutit angallatip aalisassutigisaasa normui,
3) angallatip aqqa,
4) angallatip nalunaarsorneqarnerata normua,
5) angallatip radiukkut attaveqartilluni ilisarnaataa,
6) aalisarnermi ukioq, ulloq, piffissaq, sumiiffik itissuserlu,
7) pisat, saniatigut pisat ilanngullugit, annertussusii aalisakkanut assigiinngitsunut kiilunngorlugit
8) aalisarnermut atortut suut atorneqarnersut atortullu nigartaqqortussusia minnerpaaq aamma
Imm. 2. angallatinut nammineq tunisassiorsinnaatitaasunut immikkoortiterisunullu aamma makku atuupput:
1) Pisat atorneqarnerat, saniatigut pisat ilanngullugit, kalinnernut tamanut, tassa pisat tunisassianut sorlernut suliarineqarsimanersut,
2) raajartat countikkaanut (agguaqatigiissillugu kiilumut amerlassusiat) immikkoortillugit allattorneqassapput countikkaanut tamanut annertussusiat kiilunut taallugu,
3) eqqakkat pitsaanngitsut eqqakkat ilanngullugit, aalisarnermi saniatigut pisat pillugit Namminersornerullutik Oqartussat nalunaarutaat naapertorlugu suunerinut immikkoortiterneqassapput,
4) angallatit imm. 2-mi uani taaneqartut avataasiorluni aalisarnermut umiarsuit allattaavii atuuttut atussavaat.
Imm. 3. Umiarsuit allattaaviinut allattuinermut umiarsuit allattaaviini immersugassaq Kalaallit Nunaanni Aalisarsinnaanermik Akuersissutinik Nakkutilliisunit (KANUAANA) suliarineqarsimasoq atorneqartassaaq.
Imm. 4. Umiarsuit allattaaviini immersugassaq atorneqartoq naqitaassaaq tulleriiaanillu normulersugaalluni atorneqassallunilu naqitami normulersuineq malillugu tulleriiaaraluni. Immersuiffissat atortussaajunnaarsinneqartut iginneqassanngillat, utertillugilli nassiunneqassallutik immersuiffissanullu atorneqartunut ilanngullugit paarineqassallutik, taamaalilluni normuisa tulleriinneri kipisaqattaartinnagit.
Imm. 5. Umiarsuup allattaaviini immersugassami kukkusumik allatanik iluarsiinerusinnaasut ataasiinnarmik paasineqarsinnaassapput. Iluarsiinermut lakki allaluunniit kukkusumik allatanik matusisoq atorneqassanngilaq, qaavisigulli titarsisoqaannartassalluni.
Imm. 6. Pisat annertussusii 5 %-imik eqqussusilerlugit nalunaarneqassapput.

 

Ittujaartiterineq

§ 6. Angallatit nammineq tunisassiortut pisat suliarineqarsimasut imatut ittujaartitertassavaat, pisat assigiinngitsut tunisassiallu assigiiaat tamarmik misissuinermut atatillugu suussusii paasineqarsinnaanngorlugit. Pisat/tunisassiat assigiit pisanit/tunisassianit allanit erseqqissumik immikkoortinneqarsimassapput. Aalisarnermi saniatigut pisat pillugit Namminersornerullutik Oqartussat nalunaarutaat naapertorlugu saniatigut pisat, pisat assigiinngitsut tamaasa immikkoortillugit ittujaartiterneqassapput, saniatigut pisanik nalunaaqutserneqarlutik.
Imm. 2. Angallatit imm. 1-imi taaneqartutut ittujaartiterinermut nalunaarusiamik allattugaateqassapput, usilersortarfinni tunisassiat inissisimanerannik angallammilu tunisassiat annertussusiannik kiilumut taallugit takutitsisumik. Ituujaartiterinermut nalunaarusiaq angallatip useerutivilluni usingiarneqarnissaata tungaavut angallammi tigummineqassaaq.
Imm. 3. Ittujaartiterinermut nalunaarusiaq ullormut qaangiuttumut ullut tamaasa allattuiffigineqartassaaq, nalunaaqutaq 0000-imiit nalunaaqutaq 2400-imut kalaallit Nunaata kitaani nalunaaqutaq malillugu naatsorsorneqartunik.

 

Pisassat atorneqarnerat

§ 7. Umiarsuup allattaaviini immersugassaq marlunngorlugu, immersuiffissallu atortussaajunnaarsinneqarunnartut ilanngullugit, usingiarnerit tunisinerilluunniit tamaasa, § 3 naapertorlugu pisanik tunitsiviusumut tunniunneqassapput.
Imm. 2. Umiarsuup allattaaviini aamma immersugassap assilineqarnerani akuersissuteqarfigineqarsimasup pigisaani tunitsiviup, tunitsiviup aqqa piffissarlu tunisiffiusoq naqissusiiffigisassavaa.
Imm. 3. Ukiumi ingerlasumi qaangiuttumilu umiarsuit allattaaviini immersugassat tamarmik assilineqarneri tunitsivimmit tunisisoqarsimaneranik uppernarsaalluni naqissuserneqarsimasut akuersissuteqarfigineqarsimasumit paarineqassapput.
Imm. 4. Inunnut ingerlatseqatigiiffinnulluunniit nammineq tunisassiortunut pisassanit atukkat pisanut assigiinngitsunut tassaapput umiarsuup allattaaviini pisatut nalunaarsorneqarsimasut.
Imm. 5. Pisanut nunami aalisakkerivimmut imaluunniit umiarsuarmut tunitsivimmut Kalaallit Nunaanni tunineqartunut pisassanit atukkat tassaapput annertussutsit annertunerpaat (kiilunngorlugit), tunisat allagartaanni imaluunniit umiarsuit allattaaviini immersugassani takuneqarsinnaasut. Tunisat allagartaata imarissavai raajat, ajornikut ilanngullugit, tunineqartut tamarmiusut countimillu aalajangersakkanik naammassinnissimanngitsut annertussusaat pillugit kisitsisitigut paasissutissat.
Imm. 6. KANUAANA-p pisassat ilanngartassavai umiarsuup allattaaviinit tunisallu allagartaannit paasissutissat tunngavigalugit.
Imm. 7. Tunitsiviup sapaatit akunneri tamaasa umiarsuup allattaaviini immersugassat tunisallu allagartaasa assilineqarneri katersorneqartut KANUAANA-mut, Box 501, 3900 Nuuk, nassiuttassavai. Tunisat allagartaanni allassimassapput angalanerup normuanik paasissutissat imaluunniit umiarsuup allattaaviini quppernerit normuinut innersuussinerit. Akuersissummik pigisaqaitup ukiumut pisassami 80 %-ii pisarereerpagit KANUAANA-p tunitsiviit qinnuigisinnaavai taakku tulaassinerup kinguninnguatigut faxikkut nassiuttaqqullugit.

 

Nakkutilliineq

§ 8. Angallatit nalunaarummi matumani pineqartut pisussaapput KANUAANA, Kangilinnguani Sakkutuut Imarsiortut (GLK) politiillu suleqatigissallugit suliffeqarfiit taakku suliassaminnik suliaqarneranni, Inuussutissarsiutigalugu aalisarneq pillugu inatsimmi §§ 22- 27 naapertorlugit.
Imm. 2. Angallatit pisussaapput KANUAANA-p, GLK-p politiillu sulisui angallammi immikkoortortaqarfinnut tamanut nakkutilliinermut attuumassuteqartunut akornutissaqanngitsumik tikitsisinnaatissallugit, taamatuttaaq angallatip ilisimasortamut majuartarfii maleruagassanut Danmarkimi Sųfartsstyrelsip tamakku pillugit atulersissimasaanut naapertuuttuutissallugit.

 

Immikkut akuersissuteqartarnerit

§ 9. Naalakkersuisut akuersissummik tunniussinermut atatillugu umiarsuup allattaaviinut allattuisarnissamut piumasaqaammik saneqqutsinissamut immikkut akuersissuteqarsinnaatitaapput.

 

Pineqaatiss iissutit

§ 10. Nalunaarummi matumani aalajangersakkanik unioqqutitsineq akiliisitsinermik, aalisarnermut atortunik atorneqartunik arsaarinninnermik, angallatip pisaanik tamanik imaluunniit taakku nalinginik, pisat inatsisit malillugit aalisarnikkut pissarsiarineqartutut uppernarsarneqartut ilanngunnagit, aamma/imaluunniit aalisarsinnaanermut akuersissummik atuisinnaajunnaarsitsinermik kinguneqarsinnaavoq. Tamakku pillugit suliassat inuussutissarsiutigalugu aalisarneq pillugu Inatsisartut inatsisaanni maleruagassat malillugit suliarineqartassapput.

 

Atuutilerfia

§ 11. Nalunaarut manna 1. september 1996 atuutilerpoq.

Namminersornerullutik Oqartussat, ulloq 23. august 1996

Pāviāraq Heilmann

/

Bent Buch