Aalisarsinnaanermut akuersissuteqartarneq pillugu Namminersornerullutik Oqartussat nalunaarutaat nr. 18, 22. august 1996-imeersoq.

Inuussutissarsiutigalugu aalisarneq pillugu Inatsisartut inatsisaanni nr. 17-imi 22. oktober 1990-imeersumi, Inatsisartut inatsisaatigut nr. 10-kkut 4. november 1991-imeersukkut, Inatsisartut inatsisaatigut nr. 24-kkut 30. oktober 1992-imeersukkut aamma Inatsisartut inatsisaatigut nr. 4-kkut 2. maj 1996-imeersukkut allanngortin-neqartumi §§7-9, §§ 11, imm. 2 aamma 3, § 12, imm. 2, §13, § 18, § 19, imm. 1, § 28, imm. 2 aamma § 29, imm. 3 naapertorlugit aalajangersarneqarpoq:

 

Atuuffii

§ 1. Nalunaarut angallammik Kalaallit Nunaanni nalunaarsorsimasumik, inuussutissarsiutigalugu aalisarneq pillugu inatsimmi §§5 aamma 7 takukkit, aamma nunani allamiut angallataannik imartani Kalaallit Nunaata aalisarnikkut oqartussaaffigisaani inuussutissarsiutigalugu aalisarnermut, inuussutissarsiutigalugu aalisarneq pillugu inatsimmi § 6 takuuk, atuuppoq.
Imm. 2. Akuersissutinut nalunaarut manna malillugu tunniunneqartunut imartami sinerissap titarnerullu aalisarnikkut oqartussaaffimmut tunngaviusumik killeqarfiit avataanni 3 sømilit akornanni angallatinut usitussutsimut uuttuutaat malillugu 75 BRT/120BT-itut angissusilinnut anginerusunulluunniit aalisarnissaq inerteqqutaavoq. Taamaattoq takuuk imm. 4, nr. 2 aamma 3.
Imm. 3. Angallatinut OZTZ, OULB, OVXD, OWES, OYKA, OVOJ, OWMZ aamma OZTJ-imik radiukkut attaveqartilluni ilisarnaatilinnut imartap aalisarnikkut oqartussaaffiusup tunngaviusumik killeqarfia sinerissap qanittuani akuersissutinut tunngatillugu kangimut killeqarfiuvoq. Taamatuttaaq "raajakarsini" aalisarneq pillugu Namminersornerullutik Oqartussat nalunaarutaat atuuppoq.
Imm. 4. Nalunaarut manna malillugu akuersissummut tunniunneqartumut sinerissap titarnerullu aalisarnikkut oqartussaaffiup tunngaviusumik killingata 3 sømilinik avataaniittup akornanni imartami aalisartoqarsinnaavoq ukuninnga
1) angallatinut usitussutsimut uuttuutaat malillugu 75 BRT/120BT-itut angitigisunut mikinerusunulluunniit, aamma
2) angallatit OZJO, OUHK aamma OUUC-mik radiukkut attaveqartilluni ilisarnaatillit kiisalu
3) angallatinut uiluinniarnissamut akuersissuteqarfigineqarsimasunut.

§ 2. Nalunaarummi matumani angallatip usitussutsimigut killigititaasunik qaangiisimaneranut ataassisimaneranulluunniit aalajangiisuussaaq usitussutsikkut annertussuseq angallatip angissusiligaaneranut uppernarsaammi allassimasoq, angallatip angissusiligaaneranut uppernarsaasiinermi uuttuinermut maleruagassat sorliit atorneqarneri apeqqutaatinnagit.

 

Piffissaa killilerlugu akuersissut

§ 3. Piffissaa killilerlugu akuersissutit ukiumik ataatsimik sivisunerpaaffissalerneqartassapput.

§ 4. Piffissaa killilerlugu akuersissutit, pisat annertunerpaaffissaannik akuerisaasumik aalajangersagartallit, aalisarnernut makkununnga tunniunneqartassapput inuussutissarsiutigalugulu aalisarnermut piumasaqaataallutik
1) angallatit 75 BRT/120 BT-itut angissusillit anginerusunilluunniit atorlugit qaleralinniarnermut, nataarnarniarnermut,
2) angallatip angissusia apeqqutaatinnagu uiluinniarnermut, kiisalu
3) imartani nunat allat nunalluunniit tamalaat suleqatigiiffiisa aalisarnermik nakkutilliinissamut oqartussaaffigisaanni angallatit Kalaallit Nunaanni nalunaarsorneqarsimasut atorlugit aalisarnermut.

§ 5. Piffissaa killilerlugu akuersissutit, pisat annertunerpaaffissaannik akuerisaasumik aalajangersagartaqanngitsut, aalisarnernut makkununnga tunniunneqartassapput piumasaqaataallutillu inuussutissarsiutigalugu
1) immikkut pisuni, uumassusilinnik ilisimatuut siunnersuinerat angallatinut ataasiakkaanut pisat annertunerpaaffissaannik akuerisaasumik aalajangersaanissamut pissutissaqartitsinngikkaangat, kalaallit angallataat atorlugit aalisarnermi,
2) saattuarniarnermut, kalaallit angallataat atorlugit aalisarnermi pisassat aalisarneqarsinnaasut angallatinut Kalaallit Nunaanni nalunaarsorneqarsimasunut ataatsimoorussaappata,
3) imartani Kalaallit Nunaata aalisarnikkut oqartussaaffigisaani nunani allamiut angallataannik aalisarnermut, pisassat aalisarneqarsinnaatitaasut nunap angerlarsimaffigisap pineqartup angallataanut ataatsimoorussassaatillugit, aamma
4) imartani Kalaallit Nunaata aalisarnikkut oqartussaaffigisaani misileraalluni aalisarnermut, angallatip nunamit suminngaanneernera apeqqutaatinnagu.

 

Piffissaa killilernagu akuersissut

§ 6. Piffissaa killilernagu akuersissutit, pisat annertunerpaaffissaannik akuerisaasumik aalajangersagartallit, inuussutissarsiutigalugu raajarniarnermut tunniunneqartassapput piumasaqaataallutillu.
Imm. 2. Akuersissutip taamaattup pisassiissutinit pigisat akuersissummut tunngavigisaasut nalunaarpai, pisassiissutinit pigisat tassaallutik imartami pisassaqarfiusumi aalisariutit ilaannut immikkoortunut naalakkersuisut pisassatut aalajangigaasa procentiisa ilaat.
Imm. 3. Nalunaarummi matumani "aalisariutit ilaat immikkoortut", angallatitut erseqqissumik killilerneqarlutik immikkoortutut, tak. § 1, Kalaallit Nunaanni angerlarsimaffeqartutut paasineqassapput.
Imm. 4. Akuersissummut taamaattumut atatillugu ukiut tamaasa ukiup pisassaqarfiusup aallartinnginnerani ukiumut pisassat nalunaarutigineqartassapput. Ukiumut pisassanik nalunaarutikkut ukiumi tassani pisassiissutit pigisat tonsinngorlugit annertussusii nalunaarneqartarput.
Imm. 5. Kalaallit Nunaata Kitaani pisassanit sinerissap qanittuani aalisariutit ilaannut immikkoortunut pisassiissutigineqartunit kilisaatit raajarniutit, angallatip uuttuutaanut uppernarsaat malillugu 75 BRT/120 BT-init mikinerusut, angallatillu radiukkut attaveqartilluni ukuninnga ilisarnaatillit akuersissuteqarfigineqartussaapput
1) OZJO, OUHK aamma OUUC kiisalu
2) OZTZ, OULB, OVXD, OWES, OYKA, OVOJ, OWMZ aamma OZTJ.
Imm. 6. Raajanik kilisaatit 75 BRT/BT 120-nik angissusillit anginerusullu - § 6, imm. 5, nr. 1-imi taaneqartut pinnagit - Kalaallit Nunaata Kitaani raajartassanit aalisariutit ilaannut immikkoortunut avataasiutinut immikkoortinneqartunik Tunu-milu raajarniarnissamut akuersissuteqarfigineqassapput.

§ 7. Sinerissamut qanittumi raajarniarnissamut akuersissutinik pigisaqartut pointinillu pigisanik, akuersissutitaqanngitsunik, pigisallit, 1. september 1996-imiit taakkuninnga pisassiissutinit pigisanut allanngortitsiffigineqassapput.
Imm. 2. Naalakkersuisut pisassiissutinit pigisat pisassiissutit pigisat pillugit ataatsimiititaliaq Aalisarnermut Pisortaqarfiup, APK-p, KNAPK-p aamma Royal Greenland A/S-ip sinniisuinik ilaasortaaffigineqartoq tusarniaaffigeriarlugu aalajangersassavaat.
Imm. 3. Pisassiissutinit pigisat piffissami 1. september-imiit 31. december 1996-imut atuutissapput, naalakkersuisullu § 11 naapertorlugu pisassiissutinit pigisat taaneqartut piffissarititaasup naanerani ammut qummulluunniit iluarsiissuteqarfigi-sinnaavaat.
Imm. 4. Pisassiissutinit pigisat naalakkersuisut 1. januar 1997-imi inaarutaasumik aalajangersassavaat.

§ 8. Sinerissamut qanittumi raajarniarnissamut akuersissummik pigisaqartut pisassiissutinit pigisaasa aalajangersarneqarneranni akuersissummik pigisaqartut piffissami 1. juli 1993-imit 30. juni 1996-imut ukiumut agguaqatigiissillugu raajartarisimasai aallaavigineqassapput ukununnga
1) raajanik kilisaatinut, angallatip uuttuutaanut uppernarsaat malillugu 75 BRT/120 BT-init mikinerusunut kiisalu
2) angallatinut OZJO, OUHK aamma OUUC-mik radiukkut attaveqartilluni ilisar-naatilinnut.
Imm. 2. Imm. 1-imut ilaanngillat akuersissummik pigisaqartut
1) l.juli 1993-ip kingornatigut akuersissummik pissarsisimasut,
2) piffissap ilaannaanut akuersissummik pigisaqartut
Imm. 3. Akuersissutinik pigisaqartut imm. 2-mi attorneqartut pisassiissutinit pigisaasa aalajangersarneqarneranni qaammatit aalisarnissamut akuersissummik pigisaqartup aalisarsinnaatitaaffii piffissami aalisarnissamik akuersissutip tunniunneqarneranit 30. juni 1996-ip tungaanut qaammammut agguaqatigiissillugit raajartarisimasaanik gangerneri aallaavigineqassapput. Qaammat akuersissummik tunniussiviusoq pisassiissutinit pigisat naatsorsorneranni ilanngunneqassanngilaq.

§ 9. Angallatit § 6, imm. 5 nr. 2-mi taaneqartut atorlugit sinerissamut qanittumi raajarniarsinnaanermut akuersissutinik pigisallit pisassiissutinik pigisaasa aalajangersarneqarneranni, akuersissummik pigisaqartup piffissami 1. juli 1993-imit 30. juni 1996-imut agguaqatigiissillugu ukiumut raajartarisimasai aallaavigineqassapput.
Imm. 2. Aallaavissaq imm. 1-imi pissarsiarineqartoq tamatuma kingorna avataasiorluni raajarniarnermi agguagarsiassamut atasumut aamma sinerissamut qanittumi raajarniarnermi agguagarsiassamut atasumut agguarneqassaaq.
Imm. 3. Agguaaneq pissaaq akuersissummik pigisaqartup avataasiorluni sinerissamullu qanittumi aalisarnermi 1. september 1996-imi ukiumut pisassaasa procentinngorlugit agguarneqarnerat tunngavigalugu, § 7, imm. 1 takuuk.
Imm. 4. Taamaalereerpat pisassiissutinit pigisat aalajangersarneqarnissaannut tunngavissaq nanineqassaaq agguaqatigiissillugu raajartat, imm. 1-imi naatsorsorneqartut, sinerissamut qanittumi aalisarnerup procentinngorlugu aggorneranik, imm. 2 takuuk, amerlisarneqarnerisigut.

§ 10. Pointinik pigisanik akuersissutitaqanngitsunik pigisallit pisassiissutinit pigisaasa tunngavissaasa aalajangersarneqarneranni pointit pigisat amerlassusii taakkulu pissarsiarineqarneranni tonsinik nalingi aailaavigineqassapput.
Imm. 2. Taakkununnga ilaatinneqanngillat pointinik pigisanik pigisallit angallataat umiusimasut. Naalakkersuisut pisassiissutinit pigisat pillugit ataatsimiititaliap § 7, imm. 2-mi taaneqartup tusarniaaffigereerneratigut taakku pisassiissutinit pigisaat aalajangersassavaat.

§ 11. Sinerissamut qanittumi raajarniarnissamut pisassiissutinik pigisanik pigisallit pisassiissutinit pigisat agguaanneqartut naatsorsorneqarnerannut tunngaviit pillugit naammagittaalliuuteqarsinnaapput. Naammagittaalliuut Aalisarnermut Pisortaqarfimmit tiguneqareersimassaaq 1. december 1996 nallertinnagu uungalu nassiunneqassalluni: Aalisarnermut Pisortaqarfik Postboks 269, 3900 Nuuk.
Imm. 2. Naammagittaalliuutinik tunniussinissamut killissarititaq tassaavoq ulloq 1. december 1996. Killissarititaasup naareerneratigut naammagittaalliuutinik tunniunneqartussanut uppernarsaatissaq killissarititaasup naannginnerani siumut nalunaarutigineqassaaq.
Imm. 3. Naammagittaalliuuteqarneq tunngavigalugu naalakkersuisut nutaamik naliliissappata pisariaqarpoq uku uppernarsarneqarnissaat,
1) pisanik paasissutissiissutit pisassiissutinit pigisat naatsorsorneqarnerannut tunngavigineqarsimasut eqqortuusimanngitsut. Uppernarsaatit saqqummiunneqartut tassaassapput tunisat allagartaat aamma avammut tunisat allagartaat,
2) ullut aalisarfiunngitsoortut, akuersissummik piginnittuunngitsup akisussaaffigisaasa, pisarnermit pisat ikinnerunerannut annertuumik pissutaasimasut. Tamakku pillugit uppernarsaatissani paatsoorneqarsinnaanngitsumik takuneqarsinnaassaaq ullunut aalisarfiunngitsoortunut akisussaassuseq akuersissummik piginnittuunngitsumut tutsinneqarsinnaasoq.
Imm. 4. Aalisarnerup pissutsinit nammineq naalagaaffiginngisanit imaluunniit pinngortitap pissusiinit soorlu sikup pissusiinik silallu pissusiinik akornuserneqarsimaneranik tunngavilersuuteqarluni naammagittaalliuutit pisassiissutinit pigisanut tunngavilersuutinik allanngortitsinermut tunngavissatut ilaanngillat.

 

Aalajangersakkat tamanut atuuttut

§ 12. Akuersissut aamma - § 6, imm. 1 naapertorlugu piffissaa killilernagu akuersissut pineqarpat - ukiumut pisassanik nalunaarut taassumaluunniit assilineqarnera aalisartilluni angallammiitinneqartassapput.

§ 13. Akuersissut piginnittumut aalajangersimasumut ataatsimut tunniunneqassaaq, tassanilu allassimassallutik angallatit aalisarnermut atorneqarsinnaasut. Taamaattorli, § 6, imm. 1 naapertorlugu, akuersissummut piffissaa killiligaanngitsumut atatillugu, ukiumut pisassanik nalunaarummi tassunga atasumi angallatit taaneqassapput.
Imm. 2. Akuersissutip tunniunneqarnerani tunngaviusut allannguuteqarneri, taamatuttaaq piginnittut allannguuteqartillugit, inuussutissarsiutigalugu aalisarneq pillugu inatsimmi § 5 takuuk, naalakkersuisunut akuersissutigisassanngorlugit saqqummiunneqassapput.

§ 14. Taamaallaat angallatit naalakkersuisunit akuerisat atorneqarsinnaapput.
Imm. 2. Naalakkersuisut taamaallaat akuerisinnaavaat angallatit
1) inuussutissarsiutigalugu aalisarneq pillugu inatsimmi aalajangersakkanut naapertuuttumik pigineqartut, aamma
2) naalakkersuisut naliliinerat malillugu aalisarnissamut periarfissanut atuuttunut naleqquttumik aalisarsinnaassusillit.
Imm. 3. Akuerineqarnissamik qinnuteqaat naalakkersuisunut allaganngorlugu tunniunneqassaaq.

§ 15. Imartani Kalaallit Nunaata aalisarnikkut oqartussaaffigisaasa avataanni kinaluunniit § 4 imm. 1 nr. 3 naapertorlugu inuussutissarsiutigalugu aalisarnissamut akuersissuteqarfigineqarsimasoq, nunat tamalaat isumaqatigiissutaannik aalisarfiusumi Kalaallit Nunaannut atuuttunik, malinnittussaatitaavoq.
Imm. 2. Kinaluunniit, imm. 1 naapertorlugu imartami isumaqatigiissuteqarfiusimasumi inuussutissarsiutigalugu aalisartoq nakkutilliinermut allatulluunniit iliuutsinut nunat tamalaat isumaqatigiissutaat naapertorlugit ingerlanneqartunut akerlilersuisinnaanngilaq.

§ 16. § 1, imm. 2 - 4 §§ 4 aamma 5, § 6, imm. 1 - 3-p, § 14-ip, §§ 12 aamma 13, § 14, imm. 1-p, § 15, imm. 1 aamma 2-p unioqqutinneqarnerat kiisalu akuersissummi atugassarititaasut sumiginnarneqarnerat akiliisitsinermik kinguneqassaaq.
Imm. 2. § 15-imut akerliusumik inuussutissarsiutigalugu aalisarneq akiliisitsinermik kinguneqassaaq, nunat tamalaat isumaqatigiissutaat pineqaatissiisarnermut aalaj angersakkamik imaqanngikkaluarpataluunniit.
Imm. 3. Aktiaateqarluni ingerlatseqatigiiffik, aktieselskabi, piginneqataassuteqarluni ingerlatseqatigiiffik, anpartsselskabi, piginneqatigiiffik, andelsselskabi imaluunniit piginneqataassuteqarluni umiarsuaatileqatigiiffik unioqqutitsisuusimappat ingerlatseqatigiiffik immini akiliisitaanissamut akisussaatinneqarsinnaavoq.
Imm. 4. Pinerluttulerineq pillugu inatsimmi pinngitsaaliinikkut arsaarinnittarnermik maleruagassat atuupputtaaq.
Imm. 5. Kalaallit Nunaata eqqaani aalisarnermi malittarisassanik akuersissummiluunniit piumasaqaatinik unioqqutitsineq taassuma atorneqarsinnaatitaaneranut killiliissutinik kiisalu pissutsit ilungersunarnerutillugit imaluunniit unioqqutitsisoqaqqitsillugu piginnaatitaaffimmik arsaarinninnermik kinguneqarsinnaapput. Ta-makku pillugit naalakkersuisut aalajangiissapput, nalunaarutigineqarneranillu ullut 15-it qaangiutsinnagit Kalaallit Nunaata Eqqartuussivianut, Landsretsimut, suliassanngortinneqarsinnaalluni Inatsisartut inatsisaanni § 17, imm. 3 malillugu.
Imm. 6. Pineqaatissiissutit pillugit suliat allatigut aalisarneq pillugu inatsimmi aalajangersakkat malillugit suliarineqassapput.

§ 17. Nalunaarut 1. september 1996 atuutilerpoq.
Imm. 2. Atuutilersitsinikkut aalisarsinnaanermut akuersissuteqartarneq pillugu Namminersornerullutik Oqartussat nalunaarutaat nr. 3, 1. januar 1995-imeersoq kiisalu Kalaallit Nunaata Kitaani sinerissamut qanittumi raajarniarneq pillugu nalunaarut nr. 2, 1. januar 1995-imeersoq atuukkunnaarsinneqarput.

Namminersornerullutik Oqartussat, ulloq 23. august 1996

Pâviâraq Heilmann

/

Bent Buch