Isumaginninnermi perorsaasut misiliguimnik immikkut aaqqissuussamik ilinniartitaasarnerat pillugu Namminersornerullutik Oqartussat nalunaarutaat nr. 17, 30. juli 1996-imeersoq.
Meeqqat atuarfianni ilinniartitsisussat ilinniartitaasarnerat pillugu isumaginninermilu suliaqartussanik ilinniartitsisarnerit pillugit Inatsisartut peqqussutaanni nr. 1-imi, 16. maj 1989-imeersumi Inatsisartut peqqussutaatigut nr. 1-ikkut, 6. april 1996-imeersukkut allannguuteqartinneqartumi § 30 naapertorlugu aalajangersarneqarput:
Kapitali 1.
Ilinniartitaanerup siunertaa.§ 1. Ilinniartitaanerup siunertaraa inuit barnehjælperitut ilinniagallit Qeqertarsuup Tunuani kommunimi najugallit ilinniarteqqinnissaat, taamaalillutik atuarfinni, ullukkut aamma ulloq unnuarlu paaqqinniffinni, immikkut paaqqinniffinni utoqqaallu angerlarsimaffiini il.il. isumaginninnermi perorsaasutut suliassat isumagisinnaalissammatigit.
Imn. 2. Qeqertarsuup Tunuani kommunit pineqartut tassaapput
1) Aasiaat Kommuniat.
2) Kangaatsiap Kommunia.
3) Qasigiannguit Kommuniat.
4) Qeqertarsuup Kommunia.
5) Ilulissat Kommuniat.
6) Uummannap Kommunia.
Kapitali 2.
Ilinniartitaanerup aqunneqarnera.§ 2. Ilinniartaaneq Ilinniarfissuarmit ingerlanneqassaaq.
§ 3. Ilinniartitaaneq Isumaginninnermik Ilinniarfimmi rektorimit siulersorneqassaaq.
§ 4. Ilinniartumik anisitsisoqassatillugu rektori aalajangiisuusassaaq.
Imm. 2. Imm. 1 malillugu aalajangigaq Kultureqarnermut, Ilinniartitaanermut Ilageeqarnermullu Pisortaqarfimmut naammagittaalliuutigineqarsinnaavoq.§ 5. Ilinniarfik ilinniartitaanerup ingerlanissaanut aaqqissuussinermik suliarinnissaaq, tassani ilinniartitaanerup qanoq ingerlanissaa erseqqinnerusumik aalajangersarneqassaaq, tassunga ilanngullugit ilinniagassat assigiinngitsut naammassiniagassat ilinniarnermullu atatillugu angalanerit inissinneqarnerat. Ilinniartitaanermik aaqqissuussineq Kultureqarnermut, Ilinniartitaanermut Ilageeqarnermullu Pisortaqarfimmit akuerineqassaaq.
Kapitali 3.
Tiguneqarneq qinnuteqarnerlu.§ 6. Kultureqarnermut, Ilinniartitaanermut Ilageeqarnermullu Pisortaqarfik ilinniartitaanermut ilinniartussanik tigusisuussaaq.
§ 7. Tiguneqarnissamut qinnuteqarneq pissaaq tiguneqarnissamut immersuiffissamik Isumaginninnermik Ilinniarfimmut saaffiginninnikkut pissarsiarineqartumik immersuinikkut. Tiguneqarnissamut immersugassiaq qinnuteqartup qinnuteqartullu atorfeqarfigisaata ataatsimut immersussavaat. Immersugaq Kultureqarnermut, Ilinniartitaanermut Ilageeqarnermullu Pisortaqarfimmut nassiunneqassaaq. Kultureqarnermut, Ilinniartitaanermut Ilageeqarnermullu Pisortaqarfiup qinnuteqarnissamut killissarititaq aalajangissavaa.
Imm.2. Immersuiffissaq Isumaginninnermik Ilinniarfimmit suliarineqassaaq akuerineqassalluni Kultureqarnermut, Ilinniartitaanermut Ilageeqarnermullu Pisortaqarfimmit.
Kapitali 4.
Ilinniartitaanerup sivisussusia ilusilersugaaneralu.§ 8. Ilinniartitaaneq ukiunik marlunnik sivisussuseqarpoq. Ilinniartitaaneq 1. august 1996-imi aallartinneqassaaq soraarummeerfiullu nalaani maj/juni 1998-imi naammassineqassalluni.
Imm. 2. Ilinniartitaaneq atuagarsorluni ilinniarnerup, § 20 naapertorlugu paarlaaqatigiilluni suliamik misiliinerup § 19-ilu naapertorlugu sulilluni misiliinerup akornanni nikerarpoq imalu ingerlassalluni:
1) 1. - 31. august 1996: sulilluni misiliineq,
2) 1. september - 30. november 1996: atuagarsorluni ilinniarneq,
3) 1. december 1996 - 31. januar 1997: sulilluni misiliineq,
4) 1. februar - 31. marts 1997: atuagarsorluni ilinniarneq,
5) 1. april - 30. juni 1997: paarlaaqatigiilluni suliamik misiliineq, tassannga sapaatip akunnerani ataatsimi atuagarsorluni ilinniarneq,
6) 1. juli - 31. august 1997: sulilluni misiliineq,
7) 1. september - 31. oktober 1997: atuagarsorluni ilinniarneq,
8) 1. november - 30. februar 1998: sulilluni misiliineq, tassannga sapaatip akunnerani ataatsimi atuagarsorluni ilinniarneq aamma
9) 1. marts - 30. april 1998: atuagarsorluni ilinniarneq.
Imm. 3. Isumaginninnermik Ilinniarfiup Ilinniarfissuarmi ilinniartitsinerup sinnera eqqarsaatigalugu piffissat inissinneqarneri annikinnerusumik allanngorsinnaavai, tak. imm. 2.§ 9. Ilinniartitaaneq unitsinneqarallartoq immikkut ittumik pissutissaqartilluni nangeqqinneqarsinnaavoq rektorip akuersineratigut.
Imm. 2. Imm. 1 malillugu aalajangikkat Kultureqarnermut, Ilinniartitaanermut Ilageeqarnermullu Pisortaqarfimmut naammagittaalliuutigineqarsinnaapput.
Kapitali 4.
Ilinniartitaanerup imaa.
Atuagarsorluni ilinniarneq.§ 10. Atuagarsorluni ilinniarneq nalunaaquttap akunnerinik 1020-nik ilinniartitsinermik imaqarpoq tassaasunik:
1) Perorsaaneq/psykologi......................akunn. 340
2) Isumaginninnermi fagit.....................akunn. 204
3) Sannavik/isiginnaartitsineq/nipilersorneq..akunn. 340
4) Ilinniariaaseq.............................akunn. 68
5) Psykiatrimi socialmedicinimilu pikkorissarnerit..........................akunn. 68
Imm. 2. Ilinnianermi suliamillu misiliinermi ilitsersorneqarnissamik neqerooruteqartoqarsinnaavoq.§ 11. Ilinniartut ilinniartitsinermi peqataanissamut pisussaatitaapput.
§ 12. Ilinniartitaaneq akeqanngilaq.
§ 13. Ukiumit siullermit ukiut aappaannut atsaat ingerlaqqittoqarsinnaavoq ilinniarnermi peqataasimassuseq, ilinniartitsinermi peqataanertut nalunaarsorneqartoq, suliallu tunniussat rektorimit akuerineqarpata.
Fagit ataasiakkaat siunertaat.
§ 14. Perorsaanermi/psykologiimi fagip siunertaraa ilinniartut:
1) immikkoortumut perorsaanermut tunngasortaanut atatillugu:
a) perorsaanermik suliaqarnerup meeqqat, inuusuttut inersimasullu ataasiakkaat ineriartornerannut inuunerannullu inuiaqatigiinnilu pissutsinut attuumassuteqarneranik paasisimasaqalernissaat,
b) perorsaanermi isummanik taakkulu perorsaanermik suliaqarnermut attuumassuteqarnerannik paasisimasaqalernissaat, aamma
c) perorsaanermik ileqqorinnissamilu apeqqutinik misissueqqis-saarnissamut, naliliinissamut nassuiaanissamullu piginnaaneqalernissaat.
2) immikkoortumut psykologiimut tunngasortaanut atatillugu:
a) psykologiimi pissutsinik inuiaqatigiinni kultureqarnermilu atugassarititaasuni assigiinngitsuni inuit pissusilersornerannut, piviusunik paasinnittarnerannut, imminut paasinninnermut attuumassuteqartunik paasisimasaqalernissaat aamma
b) perorsaanermi sulianik naliliinissamut, pilersaarusiornissamut ingerlatsinissamullu piginnaaneqalernissaat.§ 15. Isumaginninnermi fagip siunertaraa isumaginninnermi pissutsinik isumaginninnermi ajornartorsiutinik misissueqqissaarnermi nassuiaanermilu tamakkiisumik isiginnittaatsimik atuisinnaalernissaq siunertaralugu ilinniartut inuit ataasiakkaat, ilaqutariit inuiaqatigiillu akornanni ataqatigiissumik ingerlanerannik tunngaviusumik ilisimasaqalernissaat. Tamatumunnga atatillugu ilinniartut isumaginninnermi perorsaasutut sulinermut atatillugu isumaginninnermi ajornartorsiutinik qaangiiniarnermut tunngavilersukkamik siunnersuusiorsinnaassapput.
§ 16. Fagip sannavik/isiginnaartitsineq/nipilersorneq siunertaraa ilinniartut
1) fagit pilersitsiviusut tunngaviusumik isumaat, suliassaqarfiit periaatsillu kiisalu tunuliaqutaat pillugit paasisimasarilikkaminnik ilisimasarilikkaminnillu perorsaanermik sulinerminni atuisinnaanngornissaat,
2) pinnguarnermik assassorlunilu sammisat nammineq aammalu meeqqat inuusuttullu tarnikkut, timikkut inooqatigiinnermilu ineriartornerannut pingaaruteqassusiannik misigisaqarnissaat paasinninnissaallu,
3) assassorluni suliaqarnerup oqaluttuarisaanermut, kulturimut inuiaqatigiinnullu atatillugu aammalu avatangiisit meeqqat, inuusuttut inersimasullu ineriartornerannut pingaaruteqarnerannik naliliisinnaalernissaat tunngavissiorsinnaalernissaallu.
4) meeqqat inuusuttullu pisariaqartitaannut soqutigisaannullu naapertuuttumik sammisassanik pilersitsiviusunik, misileraaffiusunik allatullu piginnaassutsimut ineriartorfiusunik toqqaasinnaanissamut, aaqqissuussisinnaanissamut ingerlatsinnaanissamullu namminersortumik allanillu suleqateqarnermi atuagarsornikkut sulinikkullu tunuliaqutaqalernissaat,
5) sammisassani ulluinnarni nalinginnaasumik periaatsinik atorluaanissamut sungiusarnissaat, taamaalillutik taakku anguniagaqarluni ataatsimoortitsinermut ilanngunneqarsinnaaqqullugit.§ 17. Fagip ilinniariaatsip siunertaraa ilinniartut ilinniariaatsimik ilisimasaqalernissaat, taamaalillutik ilinniarnerup ilinniarnerullu naammassinerata kingorna ilisimasaqalernissamut, isummernissamut tunngavissiisoqarnermi ilinniartitsinermilu allakkiorsinnaanissamut kiisalu atuariikkanik sulissutiginninnissamut atorsinnaalerlugu.
§ 18. Fagip psykiatriip/socialmedicinip siunertaraa ilinniartut
1) immikkoortumut psykiatriimut atatillugu psykiatriimik ilisimasaqalernissaat, tassunga ilanngullugit tarnikkut nappaatinik assigiinngitsunik inuunermilu pissutsini assigiinngitsuni inuit qanoq tigusisarnerannik, taamaalillutik tarnimikkut nappaatilinnik tarnimikkullu allaassutilinnik sullitaqarnerminni atorsinnaalerlugu, taamaalillutillu tarnikkut nappaatinik pitsaasumik paasinninnissamut siuarsaaqataasinnaalerlutik, tassunga ilanngullugu ilaquttanik immikkullu ilisimasalinnik suleqateqarnermik.
2) immikkoortumut socialmedicinimut atatillugu
a) inuuniarnermi atugassarisat aammalu peqqinnerup/napparsimanerup akornanni ataqatigiinnerat pillugu pissutsinillu meeqqat inuusuttullu aammalu nammineq peqqissuunermut napparsimanermullu pingaaruteqartunik ilisimasaqalernissaat paasisimasaqalernissaallu aamma
b) peqqinnissaqarfiup aaqqissugaaneranik suliaanillu ilisimasaqalernissaat, taamaalilluni ilinniartut meeqqat, inuusuttut inersimasullu, tassunga ilanngullugit inuit immikkut pisariaqartitsisut akornanni peqqinnerulernissamik pinaveersaartitsinermillu nalinginnaasumik suliaqarsinnaalersillugit allanillu suliallit allat suleqatigiinneranni peqataasinnaalersillugit.
Sulilluni misiliineq.
§ 19. Piffissani sulilluni misiliiffinni ilinniartoq atorfeqartitsinermi oqartussaasumut nalinginnaasumik suliani ingerlatissavai, ilinniartitaanermilu faginut atasumik suliassat annikinnerusut suliarissallugit.
Imm. 2. Ilinniartut piffissani sulillutik misiliiffimminni feriartassapput.
Paarlaaqatigiilluni suliamik misiliineq.
§ 20. Piffissami paarlaaqatigiilluni suliamik misiliiffiusumi ilinniartoq paaqqinniffimmi imalunniit isumaginninnerup iluani suliffeqarfimmi suliamik misiliissaaq.
Imm. 2. Siunertaavoq ilinniartoq nammineq allallu suleqatigalugit isumaginninnermik perorsaanermi suliani assigiinngitsuni peqataanissaa, tamannalu aqqutigalugu suleriaatsinik assigiinngitsunik takutitsivigineqarluni. Aammattaaq siunertaavoq ilinniartut perorsaanermi sulianik ingerlatsinermi ilisimasatigut inuttullu nassuiaateqarnikkut ikiuinissamut tunngavissaqalersinnissaat.
Imm. 3. Suliamik misiliinermi atugassarititat:
1) Suliamik misiliineq suliamik misiliiffimmi Isumaginninnermik Ilinniarfimmit akuerineqartumi ingerlanneqassaaq, Isumaginninnermillu Ilinniarfiup suliamillu misiliiffiup akornanni suliamik misiliinermut isumaqatigiisuteqartoqassaaq. Atorfeqarfigisaq suliamik misiliiffittut atorneqassanngilaq.
2) Suliamik misiliisoq suliamik misiliiffimmi sulinermi sapaatip akunneranut nalunaaquttap akunnerini 35-ni peqataanissaminut pisussaatitaavoq, suliamillu misiliinermut isumaqatigiissut naapertorlugu nipangiussisussaatitaalluni allanillu pisussaaffeqarluni.
3) Isumaginninnermik Ilinniarfik suliamik misiliiffiusoq suleqatigalugu suliamik misiliisoq suliamik misiliiffimmi akisussaasumik ilitsersuisulissavaa (suliamik misiliinermi ilinniartitsisumik).
4) Isumaginninnermik Ilinniarfiup suliamik misiliisoq suliamik misiliinerup nalaani allattarissanik suliassillugulu tunniusseqqusinnaavaa.
Kapitali 4.
Misilitsinneq naliliinerlu.
Atuagarsorluni ilinniarneq.§ 21. Ilinniartitaaneq uppernarsaaserneqassaaq perorsaanermi, psykologiimi isumaginninnermilu fagini ataatsimut suliamut tunngassutilinnik assigiinngitsunik oqaluttariarsornikkullu misilitsitsinikkut. Misilitsitsineq allattariarsorluni nalunaarusiaq tunngavigalugu ingerlanneqassaaq.
Imm. 2. Misilitsinneq nalilerneqassaaq naliliissummik angusivoq/angusinngilaqmik.
Imm. 3. Misilitsinnermi peqataassapput misilitsinnermik avataanit naliliisartut Kultureqarnermut, Ilinniartitaanermut Ilageeqarnermullu Pisortaqarfimmit toqqarneqassapput.§ 22. Ilinniartitaanermi misilitsinnerup nalunaarummi matumani aalajangersakkat naapertorlugit ingerlanneqarnissaa ilinniartitaanermi rektorip akisussaaffigaa.
§ 23. Misilitsinnerup ingerlanerani pissusissamisoortoqanngippat tamanna ingerlaannartumik Kultureqarnermut, Ilinniartitaanermut Ilageeqarnermullu Pisortaqarfimmut nalunaarutigineqassaaq.
§ 24. Soraarummeerneq ilinniartitsisunit fagini ilinniartitsisimasunit ingerlanneqassaaq, taamaalilluni ilinniartitsisoq soraarummeersitsisuulluni. Sapinngisamik soraarummeersitsisup soraarummeertullu akornanni oqaloqatigiinnertut iluseqassaaq, naliliisoq tassani peqataasinnaalluni. Atortut ilinniartup fagimi suliaqarneranut uppernarsaataaqataasinnaasut soraarummeernermi ilanngunneqarsinnaapput.
Imm. 2. Naliliisoq soraarummeersitsisorlu naliliinerup nalaani kisimiissapput. Soraarummeertoq naliliisoqareernerata kingorna naliliinermut oqaatsitigut naatsumik nassuiaaffigineqarnissaminik piumasaqarsinnaavoq.
Imm. 3. Ilinniartoq piffissalerlugu piareersartinneqarpat tamanna nakkutilliisoqarluni pissaaq.
Imn. 4. Oqaluttariarsorluni misilitsinneq tamanut ammavoq.§ 25. Ilinniartoq ilinniartitaanermut tiguneqarnermigut misilitsinnermut peqataasussanngussaaq.
Imm. 2. Misilitsinneq angusiffiunngippat ilinniartoq misilitseqqittussanngorsinnaavoq. Marloriaannarluni misilitseqqittoqarsinnaavoq.§ 26. Ilinniarnermi qanoq malinnaalluartigineq ilinniartitaanermi peqataanertut sulianillu tunniussinertut nalunaarsorneqassaaq ilinniartitaanerlu rektorimit akuerineqarpat aatsaat ilinniartoq § 21 naapertorlugu ilinniartitaanerup misilitsissutaani peqataasinnaalluni.
§ 27. Ilinniartut napparsimaneq, naartuneq allatulluunniit pissutissaqavilluni takkutinnginneq uppernarsaasigaq pissutigalugu misitsinnermik taassumaluunniit ilaa ingerlassimanngippagu rektorip aalajangiineratigut napparsimalluni soraarummeertoqarsinnaavoq.
Paarlaaqatigiilluni suliamik misiliineq.
§ 28. Piffissap suliamik misiliiffiup naammasinerani piffissap suliamik misiliiffiusup ingerlarnga ataatsimut nalilerneqassaaq naliliissummik "akuerineqarpoq" imaluunniit "akuerineqanngilaq".
Imm. 2. Ilinniartup ilinniakkatigut sulinikkullu piginnaassusaasa nalilerneqarneranni makku ilaapput:
1) ilinniartup makku paasisimasaqarfigilersimanerai
a) suliamik misiliiffiup siunertaa, inatsisai inatsisitigullu allatut tunngavii, aaqqissugaanera sulisullu katiterneqarnerat,
b) ajornartorsiutaasut inuillu suliffiup siunertarisai, tassunga ilanngullugu isumaginninnermi perorsaasutut suliassat nalinginnaasut,
c) suliamik misiliiffimmi suliat ingerlasarnerat, inissarsiuusseriaaseq, sulianik aqutsineq aalajangiisarnerillu,
d) suliamik misiliiffiup suliffiup iluani avataanilu suleqatai tamatumalu pingaaruteqassusia kiisalu
2) ilinniartup makku piginnaaneqarfigilersimanerai
a) isumaginninnermi perorsaasutut sulinermi suliat aalajangersimasut ingerlanneranni atuagarsornikkut ilisimasarilikkanik atuineq,
b) sulianik ingerlatsinermik aaqqissuussineq suliarinninnerlu, journalinik suliarinninneq, qinnuteqaatit inassuteqaatillu il.il.,
c) isumaginninnermi perorsaasutut sulinermi naliliinernik namminerlu isummanik ilisimasaqarnermik immikkullu i1isimasaqarnermik takutitsisinnaaneq,
d) isumaginninnermi ajornartorsiutinik sulissutiginninnermi allanik sulialinnik peqataatitsineq.
Imm. 3. Suliamik misiliiffimmit oqaaseqaammik pissarsereernerup kingorna Isumaginninnermik Ilinniarfik naliliisuussaaq.
Kapitali 5.
Angusinissamut piumasaqaatit.§ 29. Isumaginninnermi perorsaasutut ilinniartitaanermi angusinissamut perorsaanermi, psykologiimi isumaginninnermilu fagini misilitsissut angusiffiusimassaaq paarlaaqatigiillunilu suliamik misiliineq akuerineqarsimassalluni.
Kapitali 6.
Allattuiffiit soraarummeernermullu uppernarsaat§ 30. Ilinniartitaanermut rektori allattuiffinnik ingerlatsissaaq, tassunga ilinniartut tamarmik immikkut allattorneqarfeqassapput. Allattuiffimmut allanneqartassapput ilinniartoq pillugu paasissutissat, fagit, atsiukkat, peqataajunnaarsitsinerit immikkullu ittumik akuersinerit allat, suliamik misiliinermi naliliissut, misilitsinnermi naliliissut kiisalu faginut sulianullu akuersissutit.
Imn. 2. Allattuiffiup qanoq ilusilersornissaa pillugu Kultureqarnermut, Ilinniartitaanermut Ilageeqarnermullu Pisortaqarfik malittarisassiussaaq.§ 31. Ilinniartut "Immikkut ittumik aaqqissuussamik Isumaginninnermik Ilinniartitaaneq"-mik angusisut, tak. § 29, soraarummeersimanermut uppernarsaammik tunineqassapput. Uppernarsaat aalajangersimasumik oqaasertaqassaaq inummullu ataatsimut tunngasumik oqaasertaqassalluni.
Imm. 2. Inummut ataatsimut tunngasumik oqaasertaliussami makku ilisimatitsissutigineqassapput:
1) Ilinniartoq pillugu paasissutissat, piffissamilu soraarummeerfimmi sorlermi misilitsittoqarsimanersoq.
2) Suliamik misiliinermi naliliissut "akuerineqarpoq" kiisalu suliamik misiliiffiup suussusia.
3) Perorsaanermi, psykologiimi isumaginninnermilu fagini misilitsinnermi naliliissut "angusivoq".
Imm. 3. Aalajangersimasumik oqaasertaliussami nalunaarummi §§ 8, 10 aamma 29 ilanngunneqassapput. Aammattaaq allanneqassaaq ilinniartoq Isumaginninnermi perorsaasutut ilinniagaqarsimasoq.
Imm. 4. Soraarummeersimanermut uppernarsat ilinniartoq pillugu allattuivik tunngavigalugu rektorimit suliarineqassaaq. Rektorip uppernarsaat atsiussavaa.
Imm. 5. Kultureqarnermut, Iliniartitaanermut Ilageeqarnermullu Pisortaqarfik soraaarummeersimanermut uppernarsaatip qanoq ilusilersorneqarnissaa pillugu malittarisassiorsinnaavoq.
Kapitali 7.
Atortuulersitsineq il.il.§ 32. Nalunaarut 1. august 1996-imi atortuulissaaq, ukiumi ilinniarfiusumi 1996/97-imi ilinniartunut tiguneqartunut atuutissalluni.
Imm. 2. Ilinniartut 1. august 1996-imi ilinniartitaanermut tiguneqartut naammassippata ilinniartitaanermilluunniit unitsitsivippata kingusinnerpaamilluunniit 1. januar 1999-imi nalunaarut ingerlaannartumik atorunnaassaaq.
Namminersornerullutik Oqartussat, ulloq 30. juli 1996.
Konrad Steenholdt/
Karl Kristian Olsen