Tuttut eqqissisimatitaanerat piniagaanerallu pillugu Namminersornerullutik Oqartussat nalunaarutaat nr. 15, 27. juni 1996-imeersoq.

Inuutissarsiutigalugu piniarnermut aallaaniarnermullu Inatsisartut inatsisaata nr. 12, 22. november 1984-imeersup § 3, imm. 3, § 4, imm. 1 §§ 6-a aamma 7-a aammalu § 9 imm. 2-a, allanngortinneralu Inatsisartut inatsisaat inuutissarsiutigalugu piniarnermut aallaaniarnermullu Inatsisartut inatsisaata allanngortinneqarneranut nr. 4, 16. maj 1990-meersup aamma inuutissarsiutigalugu piniarnermut aallaaniarnermullu Inatsisartut inatsisaata allanngortinneqarneranut Inatsisartut inatsisaata nr. 10, 29. april 1992-imeersup, inuutissarsiutiginagu piniarneq, aallaaniarneq aalisarnerlu pillugit Inatsisartut inatsisaata nr. 11, 29. april 1992-imeersup § 5 aamma § 6 imm. 1 -ia, kiisalu Kalaallit Nunaanni pinngortitamik allanngutsaaliuineq pillugu Inatsi-sartut inatsisaata nr. 11, 12. november 1980-imeersup § 2-ani imm. 3 aamma § 19 aalajangersarneqarput:

 

Atuuffii.

§ 1. Kalaallit Nunaanni tuttut (Rangifer tarandus) eqqissisimatitaanerannut aamma inuutissarsiutigalugu inuutissarsiutiginagulu piniarneqarnerannut aallaaniarneqarnerannullu nalunaarut atuuppoq, tuttuutit nujuitsut tassani pineqanngillat.

 

Eqqissisimatitaanerat.

§ 2. Periarfissiissutit § 3-mi taaneqartut eqqaassanngikkaanni Kalaallit Nunaanni tamarmi tuttut eqqissisimatitaapput.

 

Pisassarisat amerlassusilerneqarnerat agguataarneqarnerallu.

§ 3. Tuttut aallaaniarnikkut pisarineqarsinnaasut amerlassusissaat Naalakkersuisut ukiukkuutaartumik aalajangersarsinnaavaat.
Imm. 2. Pisassarisat Naalakkersuisunit killiliiffígineqarsinnaapput tuttut suiaassusiinut utoqqaassusiinullu aalajangersimasunut.
Imm. 3. Naalakkersuisut pisassarisat pisassiissutinut ikinnerusunut sumiiffiit killilikkat iluini piniarneqarsinnaasunut agguataarsinnaavaat.
Imm. 4. Naalakkersuisut pisassarisat imm. 1-3-mi aalajangersarneqartut agguaatissavaat aallaaniarnermut allagartat suussusii malillugit kommuninut imaluunniit sumiiffinnut kommunit aggornerisa avataaniittunut KNAPK aamma KANUKOKA suleqatigalugit.
Imm. 5. Ukiumoortumik pisassiissutit aammalu tamatumani piumasaqaatit piffissap tuttunniarfissap aallartinnginnerani nuna tamakkerlugu tusagassiuutitigut tamanut saqqummiunneqassapput.

 

Akuersissutinik tunniussuineq.

§ 4. Naalakkersuisut kommunimi pisassiissutinik kommunimi pineqartumi inuit allattorsimaffiannut najugaqartutut allassimasunut aammalu atuuttumik inuutissar-siutigalugu piniarnermut aallaaniarnermullu allagartalinnut imaluunniit inuutissarsiutiginagu piniarnermut aallaaniarnermullu allagartalinnut akuersissutinik tunniussissapput. Taamaattorli akuersissutinik tunniussuinermi akisussaassuseq Naalakkersuisut isumaqatigalugit kommunimut isumagisassanngortinneqarsinnaavoq, tak. imm. 3 aamma 4.
Imm. 2. Naalakkersuisut kommunit aggornerisa avataaniittunut inuit allattorsimaffíannut najugaqartutut allassimasunut aammalu atuuttumik inuutissarsiutigalugu piniarnermut aallaaniarnermut kiisalu inuutissarsiutiginagu piniarnermut aallaaniarnermullu allagartalinnut akuersissutinik tunniussissapput.
Imm. 3. Qinnuteqartunut inuutissarsiutigalugu piniarnermut aallaaniarnermullu allagartamik pigisaqartunut akuersissutinik tunniussineq pissaaq najukkami aalisartut piniartullu peqatigiiffiat suleqatigalugu. Inuutissarsiutigalugu piniarnermut aallaaniarnermullu allagartamik pigisaqarnissamik piumasaqarnerup saniatigut pisortat akuersissutinik tunniussuisut aalisartut piniartullu peqatigiiffiat suleqatigalugu immikkut ittunik kinaassusersiunngitsumillu piumasaqarsinnaapput qinnuteqartup akuersissummik tunineqannginnerani. Piumasaqaatinik taamaattunik pisoqassagaluarpat tamakku qinnuteqartunut takuneqarsinnaatinneqassapput takussutissatullu Aalisarnermut, Piniarnermut Nunalerinermullu Pisortaqarfimmut nassiunneqassallutik, kommuni akuersissutinik tunniussuinermut isumaginnittuuppat.
Imm. 4. Qinnuteqartunut inuutissarsiutiginagu piniarnermut aallaaniarnermullu allagartamik pigisaqartunut tunniussineq makitsinikkut pissaaq. Makitsineq ingerlanneqassaaq kikkunnilluunniit alaatsinaanneqarsinnaanngorlugu. Inuutissarsiutiginagu piniarnermut aallaaniarnermullu allagartaqarnissamik piumasaqarnerup saniatigut qinnuteqartut najugaqavissuussapput ukiullu kingulliit pingasut aalajangersimasumik nunaqareersimassallutik akuersissummik tunineqarsinnaassagunik.

 

Tuttunniarnissamut piffissarititat.

§ 5. Tuttunniarnissaq taamaallaat akuerisaavoq piffissami augustip 15-ianiit septemberip 10-anut ullut taaneqartut ilanngullugit.

 

Aallaaniarnissamut piumasaqaatit.

§ 6. Inuit § 4-mi imm. 1 imaluunniit imm. 2 malillugu akuersissummik pigisaqartut kisimik, akuersissummilu pisassarititatut amerlatigisuinnarnik tuttussinnaatitaapput.
Imm. 2. Akuersissut inummut atia taasamut tunniunneqassaaq allanullu tunineqaqqusaanani. Taamaakkaluartoq piginnaatitsissutikkut akuersissummut namminermut allassimasukkut pisaqarsinnaatitaaneq inummut allamut atuuttumik aallaaniarnermut allagartalimmut piumasaqaatinillu § 4, imm. 3-mik aammalu § 4, imm. 4-mi allassimasunik naammassinnittumut tunniunneqarsinnaavoq.
Imm. 3. Akuersissummi allassimassapput tuttut qassit pisarineqarsinnaanersut aammalu pisassat suiaassusii qanorlu utoqqaatigisusissaat allassimasinnaavoq, aammalu tuttunniarneq qaqugu sumilu ingerlanneqassanersoq.
Imm. 4. Tuttumik pisaqartoq kinaluunniit pinngitsoorani pisussaavoq nalunaarutigissallugit ulloq pisaqarfik, sumi pisaanera, suiaanera, utoqqaassusia naartusimappallu naartunera, pualassusia nalunaaqutsiuttakkakku normua taakkua ilisimatuutut misissuinermi atorneqassammata, takuuk § 9, imm. 1.
Imm. 5. Paasissutissat akuersissummut allattorneqassapput tunniunneqassallutillu piaarnerpaamik kingusinnerpaamillu tuttunniarnerup naanera sapaatip akunnerinik pingasunik kingoqqullugu. Akuersissutit Aalisarnermut, Piniarnermut Nunalerinermullu Pisortaqarfimmut toqqaannartumik nassiunneqassapput.
Imm. 6. Taamaattorli kommunip Naalakkersuisullu isumaqatigiinnerisigut kommunimut tunniussisoqarsinnaassaaq. Paasissutissat taava kommunimit Aalisarnermut, Piniarnermut Nunalerinermullu Pisortaqarfimmut ataatsimoortillugit nassiuteqqinneqassapput.
Imm. 7. Kinaluunniit tuttumik pisaqarnissamut akuersissummik pisoq Naalakkersuisunit pisussaafilerneqarsinnaavoq pisap ilaanik tikiussinissaminut tassunga ilaallutik alleqqut, uumasunik misissuinermi atugassat.
Imm. 8. Naalakkersuisut pisap ilaanik qanorpiaq tunniussisarnissamik erseqqinnerusunik najoqqutassiorsinnaapput.
Imm. 9. Imm. 5-imut tunngatillugu pisat piffissaq eqqorlugu nalunaarutigineqartarnissaat tuttunniarnissami tullermi akuersissutinik agguaassinermi pisassinneqarsinnaanissamut piumasaqaatinut ilanngunneqarsinnaavoq. Imm. 2 malillugu akuersissut allamut tunniunneqarpat akuersissummik piginnittooqqaartoq tassaajuarpoq pisanik nalunaartussaasoq.

 

Pinianermi periaasissat.

§ 7. Qoorortuut .222 Rem. taakkuninngaluunniit sullortunerusut kisimik tuttunniarnermi atorneqartussatut akuerineqarput. Qoorortuuaqqat, timmiarsiutit aamma aallaasit eqittaannarissat eqqarasuartaatilluunnit tuttunniarnermi atoqqusaanngillat.
Imm. 2. Tuttunniarfinni aavarnerup nalaani qimmilisartoqassanngilaq.
Imm. 3. Timmisartut, helikopterit kiisalu qamutit motorillit suulluunniit tuttunniarnermi imaluunniit tuttunniarnermut atatillugu assartuutitut atoqqusaanngillat.

 

Uumasut pisarineqartut atorneqarnissaat il.il.

§ 8. Tuttut pisarineqartut neqaat tamakkerlugit pisaqarfiusumi atorneqassapput imaluunniit tassanngaanniit nassarneqassallutik.
Imm. 2. Tuttut nassuinik katersisoqarsinnaavoq taamaallaat aavarfiup nalaani.

 

Nakkutilliineq.

§ 9. Inuit § 4-mi imm. 1 aamma 2 aamma § 6-imi imm. 1 naapertorlugit tuttunniarnissamut akuerineqartut akuersissummut ilanngullugu uumasumut ataatsimut nalunaaqutsiutassat ataasiaannarlugit atortakkat marluk assigiinnik normullit pissarsiarissavaat uumasut pisarineqartut kingusinnerusukkut uppernarsineqarnissaannut atugassatut.
Imm. 2. Uumasumik pisaqarniariarluni, kingusinnerpaamillu angallammut tuttunniarnermi angallatigineqartumut ikineqarneratigut, nalunaaqutsiutassat ataasiaannarlugit atortakkat quttoraanut aalajangerlugit ikkunneqassapput, katajaatsunngorlugit takulertorneqarsinnaasumut inissillugit.
Imm. 3. Nalunaaqutsiutassat ataasiaannarlugit atortakkat uumasumiiginnassapput taassuma tunineqarnissaata atorneqarnissaataluunniit tungaanut.
Imm. 4. Nalunaaqutsiutassat ataasiaannarlugit atortakkat tunniunneqarsimasut kisiannili atorneqanngitsut sapinngisamik piaartumik kingusinnerpaamillu piffissap aallaaniarfmsup naaneratigut Aalisarnermut, Piniarnermut Nunalerinermullu Pisortaqarfîmmut utertillugit nassiunneqassapput. Kommunip Naalakkersuisullu isumaqatigiinnerisigut kommunimut toqqaannartumik tunniussisoqarsinnaassaaq.

§ 10. Tuttunniartoq kinaluunniit politiit, aallaaniarnermik nakkutilliisut imaluunniit inuit allat tamatumunnga pisinnaatitaasut piumasaqarneratigut aallaaniarsinnaatitaanerminut uppernarsaammik atuuttumik takutitsisinnaasariaqarpoq.
Imm. 2. Tuttut pissatat naammattoorneqarpata piaartumik tamanna nakkutilliinermik suliaqartunut imm. 1-imi taaneqartunut nalunaarutigineqassaaq, taakku Naalakkersuisunit pisinnaatinneqarsinnaapput tuttup pineqartup toqunneqarnissaanut. Tuttu toqunneqarsimasoq Namminersornerullutik Oqartussanut tiguneqartussanngussaaq.

 

Immikkut akuersissuteqarneq.

§ 11. Naalakkersuisut nalunaarummi aalajangersakkat saneqqunneqarnissaannut immikkut akuersissuteqarsinnaapput, tassunga ilaalluni ilisimatusaatigalugu aallaaniarsinnaanermik akuersineq. Ilisimatusaatigalugu aallaaniarsinnaanissamut Naalakkersuisut erseqqinnerusunik najoqqutassiorsinnaapput.
Imm. 2. Naalakkersuisut aamma nalunaarutip malittarisassaani immikkut akuersissuteqarsinnaapput, tuttu inuit inuuneranik, timmisartumik imaluunniit nalinginnaasumik angallannermik navianartorsiortitsissagaluarpat, politiit, aallaaniarnermi nakkutilliisut imaluunnit allat taamatut pisinnaatitaaffilerneqarsimasut tuttumik pineqartumik toqutsinissaannik piginnaatitsisinnaapput. Tuttu toqutaq taassuma kingorna Namminersornerullutik Oqartussanut tiguneqartussanngussaaq.

 

Pineqaalissiinerit

§ 12. § 2-mi, kiisalu §§ 5-imiit 10-mut aalajangersakkanik unioqqutitsinerit akiliisitsinernikpineqaatissiissutaasinnaapput.
Imm. 2. § 2, aamma §§5-10 aalajangersakkanik unioqqutitsilluni tuttut pisarineqartut neqaat, amii tuttumerngillu allat arsaarinninnikkut Namminersornerullutik Oqartussanut iluaqutissanngorlugit arsaarinnissutiginneqarsinnaapput.

 

Atuutilersitsineq il.il.

§ 13. Nalunaarut una atuutilerpoq 1. juli 1996.
Imm. 2. Peqatigalugu Tuttut eqqissisimatitaanerat piniagaanerallu pillugu Namminersornerullutik Oqartussat nalunaarutaat nr. 18, 18. juli 1995-imeersoq atorunnaarsinneqarpoq.

Namminersornerullutik Oqartussat, ulloq 27.  juni 1996

Pâviâraq Heilmann

/

Petrus Biilmann