Katersugaasiveqarnermut allagaateqarfeqarnermullu ataatsimiititaliap suleriaasissaa pillugu Namminersornerullutik Oqartussat nalunaarutaat nr. 2 af 26. januar 1996-imeersoq.

Inatsisartut katersugaasiveqarneq toqqorsiveqarnerlu pillugit peqqussutaanni nr. 4-mi 18. maj 1990-imeersumi § 21, imm. 3 malillugu katersugaasiveqarnermut allagaateqarfeqarnermullu ataatsimiititaliaq oqaaseqaateqartereerlugu makku aalajangersarneqarput:

 

Inissitsiterniarluni ataatsimiinneq

§ 1. Inatsisartunut nutaamik qinersisoqarnerata kingorna kingusinnerpaamik ullut 14-it qaangiutsinnagit katersugaasiveqarnermut allagaateqarfeqarnermullu ataatsimiititaliap allattoqarfia inissitsiterniarluni ataatsimiinnissamut ataatsimiigiaqqusissaaq. Piffissarititaasoq ullormit qinersivimmiit naatsorsorneqassaaq.
Imm. 2. Inissitsiterniarluni ataatsimiinnermi ataat-simiititaliap siulittaasussani taassumalu tullissaa ilaasortami akornanni qinissavai.

 

Ataatsimiigiaqqusineq

§ 2. Siulittaasup pisariaqarsorippagu ataatsimiititaliamiluunniit ilaasortat ikinnerpaamik pingasut tamanna kissaatigippassuk siulittaasoq ataatsimiigiaqqusissaaq.
Imm. 2. Ataatsimiigiaqqusineq allattoqarfik suleqatigalugu pissaaq.

§ 3. Ataatsimiigiaqqusineq sivikinnerpaamik qaammammik ataatsimik piffissaqartitsilluni pissaaq.
Imm. 2. Ataatsimiigiaqqusineq sivikinnerusumik piffissaqartitsilluni pisinnaavoq, taamaaliorneq ataatsimiititaliami ilaasortat tamarmik isumaqataaffigippassuk.
Imm. 3. Suliassani nukinginnartuni imm. 1-imi piffissarititaasumit sivikinnersumik piffissaqartitsilluni ataatsimiigiaqqusisoqarsinnaavoq. Taamatut pisoqarpat ataatsimiinneq ataatsimiititaliami ilaasortanit sapinngisamik amerlanerpaanit peqataaffigineqarsinnaanngorlugu ingerlanneqassaaq.

 

Oqaluuserisassat

§ 4. Oqaluuserisassaagallartut allattoqarfik suleqatigalugu siulittaasumit suliarineqassapput ataatsimiigiaqqusissummullu ilanngullugit nassiunneqassallutik.
Imm. 2. Ataatsimiititaliap ilaasortaasa siunnersuutaat ataatsimiinnermi oqaluuseritinniarneqartut ulloq ataatsimiiffissaq kingusinnerpaamik ullunik 14-inik sioqqullugu allattoqarfimmeeriissapput. Oqaluuserisassaagallartut nassiunneqareersimappata oqaluuserisassatut siunnersuutit takkuttut, atortussallu allaganngorlugit suliarineqarsimasut ulloq ataatsimiiffissaq kingusinnerpaamik ullunik 12-inik sioqqullugu ilaasortanut nassiussuunrieqassapput.
Imm. 3. Oqaluuserisassanngortinniarneqartut sivikinnerusumik piffissaqartitsilluni ilanngunneqarsinnaapput taamaaliornissaq ataatsimiititaliap ilaasortaasa tamarmik isumaqataaffigippassuk.
Imm. 4. Oqaluuserisassat suliarineqarnissaannut paasissutissat pisariaqartinneqartut allattoqarfiup pissarsiarissavai.

 

Ataatsimiinnerit siulersorneqarnerilu

§ 5. Katersugaasiveqarnermut allagaateqarfeqarnermullu ataatsimiititaliap ataatsimiinneri matoqqasuupput.
Imm. 2. Suliassat ataasiakkaat aalajangiiviginiarnerinut atanillugu ataatsimiititaliaq inunnik immikkut ilisimasalinnik aggersaasinnaavoq.

§ 6. Ataatsimiinnerit siulittaasumit, taassumaluunniit peqannginnerani siulittaasup tullianit siulersor-neqassapput.

 

Aalajangiinerit taasinerillu

§ 7. Ataatsimiititaliaq aalajangiisinnaassuseqarpoq ataatsimiigiaqqusineq §§ 2-mi 3-milu aalajangersakkat malillugit pippat, ilaasortallu ikinnerpaamik pingasut ataatsimeeqataappata. Ataatsimeeqataaneq telefoni atorlugu pisinnaavoq.
Imm. 2. Aalajangiinerit nalinginnaasumik amerlanerussuteqarluni taasinikkut pisassaput. Taasinerit amerlaqatigiitsillugit siulittaasup taasinera siulittaasulluunniit peqannginnerani siulittaasup tulliata taasinera aalaj angiisuussaaq.
Imm. 3. Inuit § 5, imm. 2 malillugu aggersarneqarsimasut taaseqataasinnaatitaanngillat.

 

Ataatsimiititaliap oqaaseqaatai tusarniaanernullu akissuteqaatai

§ 8. Ataatsimiititaliap oqaaseqaateqarnerani tusarniaanernulluunniit akissuteqarnerani ilaasortat kikkut oqaaseqaateqarnermi akissuteqarnermiluunniit peqataasimanersut oqaatigineqassaaq.
Imm. 2. Oqaaseqaatit isumaqatigiilluni oqaaseqatigineqartarnissaat ataatsimiititaliap anguniassavaa. Immikkut isummernerit ilaasortanit taamatut isummertunit kissaatigineqarpat oqaatigineqassapput.

 

Suliassani peqataasinnaassuseqarneq

§ 9. Suliassap suliarineqalinnginnerani ataatsimiititaliami ilaasortat suliassami peqataasinnaatitaaneq eqqarsaatigalugu ajornartorsiuteqarunik tamanna malugeqqussallugu pisussaaffeqarput.
Imm. 2. Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi 13. juni 1994-imeersumi kapitali 2-mi suliami peqataasinaannginneq pillugu malittarisassat aalajangersarneqarsimasut aamma matumani atuupput.

 

Nipangiussisimasussaatitaaneq

§ 10. Kikkulluunniit ataatsimiititaliap ataatsimiinnerini peqataasut pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi 13. juni 1994-imeersumi kapitali 8-mi nipangiussisimasussaatitaaneq pillugu malittarisassat aalajangersarneqarsimasut malittussaavaat.

 

Imaqarniliuineq taakkulu akuerineqartarnerat

§ 11. Ataatsimiititaliap ataatsimiinneri imaqaniliorneqartassapput, aalajangiinerit allattorsiaffiattut ilusilerneqarsimasumik.
Imm. 2. Ataatsimiinnerup imaqarniliorneqarnera ataatsimiinnerup kingorna kingusinnerpaamik qaammat ataaseq qaangiutsinnagu ilaasortanut nassiunneqartassaaq.
Imm. 3. Ataatsimiinnerup imaqarniliorneqarnera akuerineqartutut isigineqassaaq taassuma tiguneqarnerata kingorna ullut 14-it qaangiutsinnagit naqqiutissanik ilaasortanit ataatsimeeqataasunit allattoqarfimmut saqqummiussisoqarsimanngippat.
Imm. 4. Ataatsimiinnerup imaqarniliorneqarnera akuerineqarpat taassuma assilineqarnera Kultureqarnermut, Ilinniartitaanermut Ilageeqarnermullu Pisortaqarfimmut nassiunneqassaaq.

 

Ukiumoortumik nalunaarusiaq

§ 12. Katersugaasiveqarnermut allagaateqarfeqarnermullu ataatsimiititaliap sulinera pillugu ataatsimiititaliaq ukiumoortumik ataasiarluni nalunaarusiortassaaq.
Imm. 2. Nalunaarusiaq siulittaasup allattoqarfik suleqatigalugu suliarisassavaa.
Imm. 3. Nalunaarusiaq ataatsimiititaliap ukiumoortumik siullermeerluni ataatsimiinnerani ataatsimiititaliamut akuerisassanngorlugu saqqummiunneqartassaaq, tamatumalu kingorna Naalakkersuisunut nassiunneqartassalluni.

 

Atortuulersinneqarnera

§ 13. Nalunaarut manna 1. februar 1996 aallarnerfigalugu atortuulersinneqarpoq.

Namminersornerullutik Oqartussat, 26. januar 1996

Konrad Steenholdt

/

Karl Kristian Olsen