Aningaasarsianit akileraarutit pillugit Inatsisartut inatsisaata allannguutissaatut Inatsisartut inatsisaat nr. 2, 12. juni 1995-imeersoq.

 

§ 1

Aningaasarsianit akileraarutit pillugit Inatsisartut inatsisaanni nr. 5-imi 19. maj 1979-imeersumi, kingullermik Inatsisartut inatsisaatigut nr. 18-ikkut 3. november 1994-imeersukkut allanngortinneqartumi makku allannguutigitinneqassapput:

1. § 17, imm. 1, nr. 4 atorunnaassaaq.

2. § 17, imm. 2 aamma 3 atorunnaassapput. Tamatuma kingorna imm. 4 imm. 2-nngorpoq .

3. § 17 a-p kingornanut una ilanngunneqassaaq:
"§ 17 b. Soraarnerussutisiatigut inuunermullu sillimmasiissutitigut aaqqissuussinernut ingerlaavartumik inuuneq tamaat, toqunikkut unittussanik, pisartagaqarfigineqartartussanut akilersuutit, tamakkununnga ilanngullugit aapparisap qitornallu soraarnerussutisiassanit pisartagaqartinnissaannut kiisalu innarluutilittut ingerlaavartumik soraarnerussutisiassanut akilersuutit, aningaasarsiat akileraaruteqaataasussat naatsorsorneranni ilanngaatigineqarsinnaapput. Taamaattorli piumasarisat makku naammassineqarsimassapput:
1) aaqqissuussinerit tamakku pilersinneqarsimassapput soraarnerussutisiaqartitsinermi aningaasaateqarfiit Naalakkersuisunit akuerineqarsimasut ilaanni, imaluunniit soraarnerussutisiaqartitsinermi aningaasaateqarfimmi sillimmasiisarneq pillugu inatsimmi ilaatinneqartumi. Aaqqissuussinerit tamakku pilersinneqarsinnaapputtaaq sillimmasiisarfmni Naalakkersuisunit akuerineqarsimasuni imaluunniit Finanstilsynimit sillimmasiisarfinnik Danmarkimi ingerlatsisinnaatitaasuni,
2) utoqqalineq pissutigalugu soraarnerussutisiani inuuneq naallugu pisartagassanik, naammaataasunillu inuuneq naallugu pisartagassaanngitsunik aningaasartaqartuni, utoqqalineq pissutigalugu soraarnerussutisiat ilaannit naammaataasunit tunniunneqartut utoqqalineq pissutigalugu soraarnerussutisiat ilaannit inuuneq naallugu pisartagassanit tunniunneqartut 50 procentiinit amerlanerussanngillat,
3) utoqqalineq pissutigalugu soraarnerussutisiat siusinnerpaamik tunniunneqartalersinnaapput 60-inik ukioqalernermi, taakkunannga ukiukinnerunissaq Skatterådimit akuerineqarsimanngippat,
4) aappaasumut toqukkut qimagaasumut, taamattaaq aappaasumut avinneqarsimasumut, soraarnerussutisiarititat pisartagaritinneqassapput sivikinnerpaamik ukiuni qulini,
5) taamaattorli qitornanut toqukkut qimagasunut, aamma qitornarsianut, soraarnerussutisiarititat pisartagaritinneqarsinnaapput sivisunerpaamik qitornaasut 24-nik ukioqalernerat tikillugu, aamma
6) soraarnerussutisiatigut inuunermullu sillimmasiissutitigut aaqqissuussinerit danskit soraarnerussutisiaqartitsinermi aningaasaateqarfiini inuunermullu sillimmasiisarfiini pilersinneqarsimasut soraarnerussutisiaqalernissamut ileqqaakkat akileraaruserneqarnissaannut inatsimmi §§-ini 50-imi aamma 53 A-mi taaneqartunut ilaatinneqarsimassanngillat.
Imm. 2. Inuunermut sillimmasiisoqarpat sillimmasiisoq sillimmasersimassaaq sillimmasiinermillu piginnittuussalluni.
Imm. 3. Taamaattorli ingerlaavartumik inuuneq tamaat tunniunneqartartussat ukiumut 1.200 koruunit sinnersimassanngippatigik soraarnerussutisiaqartitsinermi aaqqissuussanit, imm. 1-imi taaneqarsimasunit, atorfinitsitaanermullu atasumik pilersinneqarsimasunit, tunniunneqartussat aningaasanngorlugit ataasiaannartumik tunniunneqarsinnaapput.
Imm. 4. Aaqqissuussinernut imm. 1-imi taaneqartunut akilersuutit pillugit ilanngaat piffissamut akilersuiffiusumut tunngatinneqassaaq, soorluttaaq ilanngaat ukiup aningaasarsiorfiup ilaani akiliuteqarfiusumi akissarsiat tamarmiusut 15 procentiannit annerusinnaanngitsoq. Aappariinnut ataatsimut akileraarusigaasunut ilanngaat aappariit akissarsiaasa tamarmiusut 15 procentiannit annerusinnaanngilaq. Namminersorlutik inuussutissarsiuteqartunut tunngatillugu naatsorsuinermut tunngavissaq aalajangerneqassaaq inuup taakkununnga naligitinneqarsinnaasup akissarsiaasut missingerlugit naatsorsuutigisat tunngavigalugit.
Imm. 5. Sulisup aningaasarsiaasa akileraaruteqaataasussat naatsorsorneranni ilaanngunneqassanngillat aningaasat sulisitsisumit aaqqissuussinernut imm. 1-imi taaneqartunut akilerneqartut.
Imm. 6. Aningaasat aaqqissuussinernit imm. 1-imi taaneqartunit tunniunneqartut tamarmik kiisalu aningaasat imm. 3 naapertorlugu tunniunneqartut aningaasarsiat akileraaruteqaataasussat naatsorsorneranni ilanngunneqassapput, taamaattorli takuuk § 17 c, imm. 5. Aningaasarsianik tunniussinermut naligitinneqassapput allamut tunniussineq imaluunniit pigisassanngortitsilluni qularnaveeqqusiussilluniluunniit tunniussineq alla taavalu qanoq iliuutsit il.il. aaqqissuussinerup ilanngaatiginnissinnaanermut patsisissaatitanik angusisimajunnaarneranik kinguneqartut, aningaasallu allamut tunniussinerup qanoq iliuuseqarnerulluunniit nalaani aaqqissuussinerup atorunnaarsitaanerani tunniunneqarsinnaasuugaluit, soorlu immaqa sillimmaserneqarnermut allagartap akeqanngitsup aningaasanngorlugu nalinga assigisaaluunniit, aningaasarsianut akileraaruteqaataasussanut naatsorsuunneqassapput.
Imm. 7. Naalakkersuisut immikkut ittunik pisoqartillugu soraarnerussutisiaqartitsinermi aningaasaateqarfinni soraarnerussutisiatigut aaqqissuussinerit ilanngaatigineqarsinnaanerat akuerisinnaavaat, taakkunannga aningaasanik tunniussineq imm. 1-imi oqaaseqatigiinni siullerni piumasarineqartumik naammassinnissimanngikkaluarpalluunniit.^"

4. § 17 b-p kingornanut ilanngunneqassaaq:
^"§ 17 c. Aningaasarsiat akileraaruteqaataasussat naatsorsorneqarneranni ilanngunneqartassanngillat tjenestemanditut soraarnerutissanut aamma Arbejdsmarkedets Tillægspensionimut nammineq akilersuutit aamma/imaluunniit sulisitsisup akilersuutai.
Imm. 2. Aningaasat aaqqissuussinernit imm. 1-imi taaneqartunit ingerlaavartumik tunniunneqartartut aningaasarsiat akileraaruteqaataasussat naatsorsorneqarneranni ilanngunneqartassapput.
Imm. 3. Aningaasarsiat akileraaruteqaataasussat naatsorsorneqarneranni danskit aningaaseriviini assigisaannilu soraarnerussutisiassanik katersiniarluni aaqqisuussinernit, soraarnerussutisiaqalernissamut ileqqaakkat akileraaruserneqarnissaannut inatsimmi kapitali 1-imi pineqartunut ilaatinneqartunit, kiisalu Lønmodtagernes Dyrtidsfondimi uninngasuutinit erniasiat ilanngunneqartassanngillat.
Imm. 4. Aningaasarsiat akileraaruteqaataasussat naatsorsorneqarneranni ilanngunneqartassanngillat pisortani atorfillit soraarnerussutisiaqalernissamut ileqqaagaannut sulisitsisup akiliutai, soraarnerussutisiaqalernissamut ileqqaakkat makkunatut iluseqartinneqarpata: naafferartumik akilersuilluni sillimmasiinerit, soraarnerussutisiaqalernissaq siunertaralugu naafferartumik akilersuilluni ileqqaakkat naafferartumik tunniunneqartussat, sillimmasiinerit akit nikerarneri najoqqutaralugit iluarsineqartartut, akit nikerarneri najoqqutaralugit ileqqaakkat, ataatsikkut akiliilluni sillimmasiinerit aammalu soraarnerussutisiaqalernissamut ileqqaakkat ataatsikkut tunniunneqartussat, aaqqissuussineq sulisumut pinngitsoorani ileqqaartitsissutaappat akileraartussaanerullu siornatigut pilersinneqarsimappat. Taamaattorli aaqqissuussineq soraarnerussutisiaqalernissamut ileqqaakkat akileraaruserneqarnissaannut inatsimmi § 50 naapertorlugu akileraarusigassanngortinneqarsimappata sulisitsisup akiliutai aningaasarsiat akileraaruteqaataasussat naatsorsorneqarneranni ilanngunneqartassapput.
Imm. 5. Aningaasarsiat akileraaruteqaataasussat naatsorsorneqarneranni soraarnerussutisiaqalernissamut aaqqissuussinerit maanaannaq atorunnaarsinneqartut nalingat ilanngunneqartassanngilaq, aaqqissuussinerit tamakku soraar-nerussutisiaqalernissamut ileqqaakkat akileraaruserneqarnissaannut inatsimmi kapitali 1-imi pineqartunut ilaasimappata."

5. § 17 c-p kingornanut ilanngunneqassaaq:
"§ 17 d. Aningaasarsiat akileraaruteqaataasussat naatsorsorneranni inuunermut sillimmasiissutinit soraarnerussutisiatigullu aaqqissuussinernit § 17 b-mi taaneqanngitsunit iluanaarutit ilanngunneqartassapput. Aningaasarsianit akileraartartussaatitaavoq piginnittoq imaluunniit piginnittup toqunerata kingornagut sillimmasiissutinit pisartagaqartussaatitaasoq. Iluanaarutit naatsorsorneqassapput illuatungaani sillimmasiussat ukiup aningaasarsiorfiup naanerani aningaasanngorlugit nalingata ukiup ingerlanerani sillimimmasiisumut tunniunneqarsimasunik tapikkat illuatungaanilu sillimmasiussat ukiup aningaasarsiorfiup aallartinnerani aningaasanngorlugit nalingata ukiup ingerlanerani sillimmasiisumit akiliutigineqarsimasunik tapikkat assigiinngissutaattut. Sillimmasiissutinit amigartoorutit § 21, imm. 1-imi maleruagassat malillugit taamaallaat ukiuni aningaasarsiorfiusuni tallimani tulliuttuni sillimasiissutinit taakkuusunit iluanaarutaasunit ilanngaatissanngorlugit nuunneqarsinnaapput.
Imm. 2. Inuunermut sillimmasiissutinit il.il., imm 1-imi pineqartunit, pisassat ingerlaavartumik tunniuttagaanngippata aningaasarsiat akileraaruteqaataasussat naatsorsorneranni ilanngunneqassanngillat.
Imm. 3. Taamaattorli imm. 1-imi 2-milu maleruagassat inuunermut sillimmasiissutinut il.il. sillimmasiisoq piffissap sillimmasiiffiusup isumaqatigiissutaasumik naanissaa nallertinnagu toquppat imaluunniit timimigut innarluuteqalerpat aatsaat tunniunneqarsinnaasunut atussanngillat, isumaqatigiissutaasumik naaffissaq taanna sillimmasiisup 80-inik ukioqalernerata kingornagut sillimmaserneqarnermut allagartami ullormit siullermit kingusinnerunngippat.
Imm. 4. Aningaasarsiat akileraaruteqaataasussat naatsorsorneranni ilanngunneqassanngillat aningaasat sillimmasiisup toqoreerneratigut pisartagaqartitsiniarluni sillimmasiissutinit, matumani ilaallutik timikkut innarluuteqalernermut taartisiat ataatsikkoortumik inuunermut sillimmasiissutinit imm. 3-mi pineqartunit kiisalu ajunaarnissamut sillimmasiissutinit tunniunneqartut.
Imm. 5. Imm. 1-imi 2-milu maleruagassat taamattaaq atussanngillat naafferartumik akilersuilluni sillimmasiinernut soraarnerussutisiaqalernissarlu siunertaralugu naafferartumik akilersuilluni ileqqaakkanut naafferartumik tunniunneqartussanut, sillimmasiinernut akit nikerarneri najoqqutaralugit iluarsineqartartunut, akit nikerarneri najoqqutaralugit ileqqaakkanut, ataatsikkut akiliilluni sillimmasiinernut soraarnerussutisiaqalernissamullu ileqqaakkanut ataatsikkut tunniunneqartussanut, soraarnerussutisiaqalernissamut ileqqaakkat akileraaruserneqarnissaannut inatsimmi kapitali 1-imi pineqartunut.
Imm. 6. Inuunermut sillimmasiissutit Skatterådip imm. 1 aamma 2 malillugit akileraarusigassanngortinngissinnaavai inuunermut sillimmasiineq pilersinneqarsimappat sillimmasiisoq Kalaallit Nunaannut akileraartartussanngorsimatinnagu."

6. § 24, imm. 1, nr. 4 imatut oqaasertaqassaaq:
"pisuussutit amerlissutaat kingornussarsianit imaluunniit kingornussarsiassanit siumuukkanit imaluunniit aappariinnermit pisut,"

7. § 24, imm. 2, 3 aamma 4 atorunnaassapput.

8. § 88-imi imm. 1-imi nr. 2-p kingornanut nr.-tut nutaatut ilanngunneqassapput:
"3) aningaasat, § 17 b-mi, imm. 5-imi pineqartut, sulisunut ataasiakkaanut tamanut atorneqartut, soraarnerussutisiaqalernissamut imaluunniit inuunermut sillimmasiilluni aaqqissuussinernut sulisitsisumit akilerneqartut, tamakkerlutik qanoq atsigineri,
4) tamakkiisumik ilaannakortumilluunniit akeqanngitsumik ajunngitsorsiat soorlu nerisaqarneq inisimanerlu, ineqarneq, najugaqarneq, angalanerit, biili telefoniluil.il.,

Nr. 3 aamma 4 tamatuma kingorna nr. 5-inngorput 6-inngorlutillu.

9. § 97, imm. 1, nr. 2-mi "§ 17, imm. 1, nr. 4-mi oqaaseqatigiinni siullerni" allanngortinneqassaaq imaalillugu: "§ 17b-mi".

10. § 97, imm. 1, nr. 4-mi "§ 17, imm. 1, nr. 4-mi" allanngortinneqassaaq imaalillugu: "§ 17 b, imm. 6, oqaaseqatigiit aappaanni".

11. § 97, imm. 2 imatut oqaasertaqassaaq:
"Soraarnerussutisiaqartitsinissamik neriorsuut imaluunniit sillimmasiinermut allagartaq aaqqissuussinernik assigiinngitsunik imaqarpat, akilersuutit imaluunniit akiliutit tamakkerlutik § 17 b-mi taaneqarnatik, soraarnerussutisiaqartitsinissamik neriorsuummi imaluunniit sillimmasiinermut allagartami allassimassaaq, akilersuutit akiliutilluunniit sillimmasiisaatsini taakkunani tamani qanoq agguaanneqarsimasut, soorluttaaq soraarnerussutisiaqartitsinermi aningaasaateqarfik imaluunniit sillimmasiisarfik ukiut tamaasa aningaasat qanoq agguaanneqarnerannik paasissutissiisassasoq."

 

§ 2

Inatsisartut inatsisaat ingerlaannaq atuutilissaaq.
Imm. 2. § 1, nr. 1, 2, 3, 4, 5, 6, 7, 9, 10 aamma 11 sunniuteqalissapput inatsisissatut siunnersuutip saqqummiunneqarnera aallarnerfigalugu.
Imm. 3. § 1, nr. 8 sunniuteqalissaaq 1995 aallarnerfigalugu.
Imm. 4. Soraarnerussutisiatigut inuunermullu sillimmasiinikkut aaqqissuussinernut, 18. februar 1992 sioqqullugu pilersinneqartunut soraarnerussutisiaqalernissamullu ileqqaakkat akileraaruserneqarnissaannut inatsimmi § 50 taamanikkut atortuusoq malillugu akileraarusersugassanngortitaasimasunut, mannalu tikillugu aningaasarsianit akileraarutit pillugit Inatsisartut inatsisaanni § 17, imm. 1, nr. 4 malillugu ilanngaatigineqarsinnaasunut, akilersuutit aningaasarsianik akileraaruteqaataasussanik naatsorsuinermi ilanngaatigineqartuaannarsinnaapput taamaalillutillu aningaasarsianit akileraarutit pillugit Inatsisartut inatsisaanni § 17 b-mi pineqartunut ilaaginnarsinnaassallutik.
Imm. 5. Inuunermut sillimmasiissutini, soraarnerussutisiaqalernissamut ileqqaakkat akileraaruserneqarnissaannut inatsimmi kapitali 1-imi pineqanngitsuni, pilersinneqarsimasunilu piffissami 18. februar 1992-imit inatsisissamut siunnersuutip saqqummiunneqarnerata tungaanut, ullormi inatsisissamut siunnersuutip saqqummiunneqarfiani pisiarinneqqinnermi aki aningaasarsianut akileraaruteqaataasussanut ilanngunneqartassaaq maanaannaq atorunnaarsitsinermi imaluunniit aningaasarsianit akileraarutit pillugit Inatsisartut inatsisaanni § 1, imm. 1, nr. 1 imaluunniit 2 malillugu akileraartussaanerup atorunnaarnerani, tassa sillimmasiinernut akilersuutit aningaasarsianit akileraarutit pillugit Inatsisartut inatsisaanni § 17, imm. 1, nr 4 malillugu ilanngaatigineqartarsimappata. Kalaallit Nunaannut akileraartartussaaneq sioqqullugu akilersuisoqartarsimappattaaq pisiarinneqqinnermi aki naleqqussarlugu naatsorsorneqartassaartaaq.
Imm. 6. Taamaattorli inuunermut sillimmasiissutit aningaasanngorlugu nalingat tamarmi, imm. 5-imi pineqartoq, 1. oktober 1995 nallertinnagu aaqqissuussinermut aningaasarsianit akileraarutit pillugit Inatsisartut inatsisaanni § 17 b-mi pineqartumut nuunneqassappat aningaasanngorlugu naliusoq taanna aningaasarsiat akileraaruteqaataasussat naatsorsorneqarneranni ilanngunneqassanngilaq.

Namminersornerullutik Oqartussat, ulloq 12. juni 1995.

Lars Emil Johansen

/

Daniel Skifte

---

Inatsisissatut siunnersuut saqqummiunneqarpoq siullermeerlugulu oqaluuserineqarluni 26. maj 1995-imi, taamaasillutik § 1, nr. 1, 2, 3, 4, 5, 6, 7, 9, 10 aam-ma 11 ullormit tassanngaaniit atortuulersinneqarlutik, tak. § 2, imm. 2. Taama-tuttaaq § 2, imm. 5 naapertorlugu pisiarinneqqinnermi aki ullormi 26. maj 1995-imi naatsorsorneqassaaq.