Kommunalbestyrelsini nunaqarfinnilu aqutsisuni ilaasortat il.il., aammalu borgmesterit aamma borgmesterittulliisa akissarsiaqartinneqarnerat pillugu Namminersornerullutik Oqartussat nalunaarutaat nr. 35, 21. december 1995-imeersoq.

Kommunalbestyrelsit, nunaqarfinni aqutsisut il.il. pillugit Inatsisartut inatsisaata (aqutsinissamut inatsit) nr. 20, 3. november 1994-imeersup § 17-iani imm. 6 aamma imm. 7 aammalu § 37-a malillugit aalajangersarneqarput:

 

Kommunalbestyrelsini nunaqarfinnilu aqutsisuni ilaasortat il.il. akissarsiaqartinneqarnerat

§ 1. Kommunalbestyrelsini nunaqarfinnilu aqutsisuni ilaasortat ukiumut annerpaamik 40.000 kr.-inik kommunalbestyrelsimit aalajangersimasumik akissarsiaqartinneqassapput.
Imm. 2. Akissarsiatigut matussuserneqassapput kommunalbestyrelsini ilaasortat kommunalbestyrelsimi, aningaasaqarnermut ataatsimiititaliami, kommunalbestyrelsip ataatsimiititaliaani atauartuni aamma nunaqarfimmi aqutsisuni ilaasortaanerit.
Imm. 3. Akissarsiat tunniunneqartassapput assigiimmik aningaasartalerlugit kommunalbestyrelsimi ilaasortanut tamarmiusunut aamma aningaasat taama amerlatigisut nunaqarfimmi aqutsisuni ilaasortanut, taamaattoq tak. imm. 4.
Imm. 4. Kommunalbestyrelsimi ilaasortat ataatsimiititaliani imaluunniit nunaqarfimmi aqutsisuni ilaasortaajutiginngitsut aammalu nunaqarfimmi aqutsisuni ilaasortat kommunalbestyrelsimi ilaasortaajutiginngitsut ukiumut annerpaamik 30.000 kr.-inik akissarsiaqartinneqassapput.

§ 2. Kommunalbestyrelsip aalajangersinnaavaa kommunalbestyrelsip ataatsimiititaliaani atauartuni siulittaasut aamma nunaqarfimmi aqutsisuni siulittaasut akissarsiaminnut tapisiaqartinneqassasut.
Imm. 2. Ataatsimiititaliani siulittaasut akissarsiaannut tapisiarititanut kommunip aningaasartuutai ukiumut annerpaamik 200.000 kr.-inut amerlassusilerneqarsinnaapput.
Imm. 3. Nunaqarfimmi aqutsisuni siulittaasumut akissarsianut tapisiarititat annerpaamik ukiumut 40.000 kr.-inut amerlassusilerneqarsinnaapput.
Imm. 4. Imm. 2 aamma imm. 3 malillugit kommunalbestyrelsimi ilaasortat akissarsiaminnut tapisiaqartinneqarsinnaapput ukiumut annerpaamik 80.000 kr.-inik.

§ 3. Missingersuusiornermut atatillugu kommunalbestyrelsip aalajangersassavai ukiumi tulliuttumi §§ 1 aamma 2 malillugit akissarsiassat annertussusissaat.

§4. Kommunalbestyrelsimi imaluunniit nunaqarfinni aqutsisuni ilaasortaq piffissami sivikinnerpaamik qaammatinik marlunnik sivisussusilimmi ataatsimeeqataasarsinnaanngippat, taassumalu sinniisussaa tamanna pissutigalugu aggersarneqarsimappat, tak. aqutsinissamut inatsisip § 16-iani, imm. 2, piffissami tassani sinniisussaq akissarsiaqartinneqassaaq.
Imm. 2. Sinniisussaq aqutsinissamut inatsisip § 16-iani imm. 2-mi eqqartorneqartut avataaniittunik patsiseqarluni aggersarneqarsimappat sinniisussaq aalajangersimasunik akissarsiaqartinneqassaaq imaluunniit tapisiaqartinneqassaaq
1) pisussaaffinnik suliaqarallarneq qaammatit marluk sinnerlugit sivisussuseqarpat imaluunniit
2) piffissamut pisussaaffinnik suliaqarallarnermut tamarmiusumuttaanna qaammatinik marlunnik sivisuneruppat aammalu kommunalbestyrelsi isumaqarpat sinniisussaq aggersarneqarsimasariaqartoq aqutsinissamut inatsisip § 16-iani imm. 2 malillugu, tamannalu Nakkutilliisoqarfimmit akuerineqarpat.
Imm. 3. Pisussaaffinnik suliarinnikkallarneq qaammatinik marlunnik sivikinnerusimappat imm. 1 aamma imm. 2 apeqqutaatinnagit ullormut ataatsimiiffimmut 400 kr.-inik aamma § 7 naapertorlugu sulinikkut pissarsiassaagaluanut annaasanut taartisianik akissarsiaqartitsisoqassaaq. Pisussaaffinnik suliarinnikkallarnermut § 7 malillugu akissarsiaqartitsinermi akissarsiat imaluunniit tapisiat aalajangersakkat taakku naapertorlugit aalajangersimasumik akissarsianit amerlanerusinnaanngillat.

§ 5. § 4-mi imm. 1 aamma imm. 2-mi pineqartutut pisoqartillugu qinigaalluni ilaasortap akissarsiassai imaluunniit siulittaasutut qinigaasup akissarsiaminut tapisiai peerneqassapput piffissami ilaasortap allap taamatut akissarsiaqarallarnerata aallartinneraniit.
Imm. 2. § 4-mi, imm. 2, nr. 2 naapertorlugu akissarsiaqartitsinissamik kommunalbestyrelsi aalajangerpat qinigaalluni ilaasortaasup imaluunniit siulittaasutut qinigaasup ullormit peqanngiffimminit siullermiit akissarsiani utertissavai.

§ 6. §§1 aamma 2 malillugit aalajangersimasumik akissarsiat tunniunneqartassapput qaammatit naaneri tamaasa piffissami pineqartup akissarsiaqarsinnaatitaaffiata nalaani.
Imm. 2. Akissarsiassat amerlanaarlugit tunniussat, tak. § 5, utertillugit akilerneqarnissaat ingerlanneqarsinnaavoq sivisunerpaamik qaammatit pingasut ingerlanerini.

§ 7. Kommunalbestyrelsi aalajangersinnaavoq kommunalbestyrelsimi aamma nunaqarfimmi aqutsisuni ilaasortat ataatsimiinnersiaqartissallugit aamma sulinikkut pissarsiassaagaluanut annaasanut taartisiaqartissallugit kommunalbestyrelsimit toqqarneqarsimanertik malillugu angalaneranni uninnganerannilu makkunani peqataassallutik:
1) Pikkorissarnerni kommunalbestyrelsimi, nunaqarfimmi aqutsisuni imaluunniit ataatsimiititaliami ilaasortaanermut pingaaruteqartuusorisani peqataanerni aamma
2) Immikkut inatsisiliat naapertorlugit pisussaaffinni pineqartut toqqarneqarfigisimasaanni allani akilerneqartussaanngitsuni.
Imm. 2. Kommunalbestyrelsi aalajangersinnaavoq kommunalbestyrelsimi aamma nunaqarfimmi aqutsisuni ilaasortaanngitsunut, tak. aqutsinissamut inatsisip § 18-iani imm. 8, kommunimi pisussaaffilerneqartunut allanut ullormusiaqartitsinissamik unnuamullu tapisiaqartitsinissamik sulinikkullu pissarsiassaagaluanut annaasanut taartisiaqartitsinissamik. Kommunimi sulisuusut atorfinitsitaanerminnut ilaatillugu pisussaaffilerneqartut nalunaarut manna naapertorlugu immikkut akissarsiaqarsinnaatitaanngillat.
Imm. 3. Ullormusiat unnuamullu tapisiat tunniunneqartassapput naalagaaffimmi, Namminersornerullutik Oqartussani Kalaallit Nunaannilu kommunini tjenestemandit sulinerminnut atatillugu angalanerini aningaasartuutaanerusut akilerneqartarnerat pillugu malittarisassat qaqugukkulluunniit atuuttut malillugit.

§ 8. Sulinikkut pissarsiassaagaluanut annaasanut taartisisitsinissamik kommunalbestyrelsip aalajangerneratigut annerpaamik matuneqarsinnaapput:
1) Akissarsiaqarluni sulisup sulinikkut pissarsiassaagalui annaasat uppernarsarneqarsinnaasut imaluunniit
2) ullormut angalaffiusumut ataatsimut angalanermullu atatillugu angerlarsimaffiup avataani uninnganermut 600 kr. ataatsimiinnerup nalaani isertitat taamaallaat akissarsiaasimanngippata imaluunniit pisortanit tunniussaanngippata, isertitassaraluit amerlanerusut annaaneqarsimanerat uppernarsarneqarsinnaanngippat.

§ 9. Kommunalbestyrelsip imaluunniit nunaqarfimmi aqutsisut, ataatsimiititaliat atauartut aamma aningaasaqarnermut ataatsimiititaliap ataatsimiinnerinut atatillugu angalanermut uninnganermullu aningaasartuutit kommunalbestyrelsip taarsiissuteqarfigissavai akilissallugilluunniit, aalajangersinnaallunilu § 7 malillugu ataatsimiinnernut atatillugu angalanermut uninnganermullu aningaasartuutit taarsiissuteqarfigissallugit akilissallugilluunniit.
Imm. 2. Angallammik attartorluni angalanermut aningaasartuutinut kommunalbestyrelsip matusissutissaasa qaangersimassanngilaat Namminersornerullutik Oqartussat aamma KNAPK-p akornanni isumaqatigiissutit atuuttut malillugit akiliutissaatitaasut.
Imm. 3. Angalanerit allat akilerneqassapput angalanermut aningaasartuutivinnut naleqquttunik, taamaattoq annerpaamik angallassissutit tamanit atorneqarsinnaasut atorlugit angalanerni billetsinut nalinginnaasumik akigitinneqartartut assigalugit.

 

Borgmesterit borgmesterillu tulliisa akissarsiaqartitaanerat

§ 10. Borgmesterip akissarsiai aalajangersarneqassapput kommunalbestyrelsip atuuffissaanut imaluunniit atuuffissaata sinneranut.

§ 11. Akissarsiat annerpaamik amerlassuseqarsinnaapput tjenestemandit akissaateqarfiini 36-ianniittut, taakkununnga ilanngullugit tamanut tunnga-tillugu tapisiat aamma ferierneq pillugu inatsit malillugu immikkut feriernersiutit, akissarsiassaattut aalajangersarneqarsimasut taamaaqataannik. Kommunini inuitallattorsimaffiini nalunaarsimasunik ukiup akissarsiat aalajangersarneqarfianni januarip aallaqqaataani ikinnerpaamik 5.000-inik innuttaqartuni borgmesterit akissarsiaat annerpaamik amerlassuseqarsinnaapput tjenestemandit akissaateqarfiini 37-ianniittut, taakkununnga ilanngullugittamanuttunngatillugu tapisiat aamma ferierneq pillugu inatsit malillugu immikkut feriernersiutit, akissarsiaattut aalajangersarneqarsimasut taamaaqataannik.
Imm. 2. Kalaallit Nunaanni Kommunit Kattuffiata aamma Naalakkersuisut akornanni isumaqatigiissutitigut aalajangersakkat malillugit kommunalbestyrelsi aalajangersinnaavoq borgmesterip akissarsiaanut tapisiaqartitsisoqassasoq.
Imm. 3. Borgmesterip akissarsiai tunniunneqartassapput tjenestemandit qaammammusiallit akissarsiaasa tunniunneqartarnerat assigalugu.
Imm. 4. Borgmesterit Naalakkersuisut akuerseqqaarsimatinnagit borgmesteritut akissarsiaqaatigalutik kommunimi pisussaaffinnit allanit akissarsiaqarsinnaatitaanngillat.

§ 12. Borgmesterip tullii kommunini ataasiinnarmik borgmesterimut tullersorteqartuni aamma kommunini marlunnik borgmesterimut tullersorteqartuni ukiumuttullermut missingersuusiat akuersissutigineqarnerannut atatillugu kommunalbestyrelsip aalajangernera malillugu §§ 1 aamma 2-mi akissarsiat saniatigut annerpaamik borgmesterip akissarsiaasa 15%-iinik aalajangersimasumik akissarsiaqartinneqarsinnaapput.
Imm. 2. Borgmesterip tullii imm. 1 naapertorlugu akissarsiaqartitaasut borgmesteriugallarnermik nalaani immikkut akissarsiaqarsinnaatitaanngillat.
Imm. 3. Borgmesterip tullia imm. 1 naapertorlugu aalajangersimasumik akissarsiaqartinneqanngitsoq piffissami borgmesteriugallarnermini akissarsiaqartinneqarsinnaavoq pineqartoq kommunalbestyrelsimit peqquneqarsimaguni borgmesterip suliassaanik pisinnaatitaaffiinillu tamanik isumaginninnissamut, tak. aqutsinissamut inatsisip § 36-ani imm. 2, atuukkallarnissaalu sivikinnerpaamik ullunik 15-inik sivisussuseqassasoq ilimagineqarpat.
Imm. 4. Imm. 3 malillugu borgmesteriugallarnermut akissarsiassat naatsorsorneqarlutillu tunniunneqassapput tjenestemanditut atorfinni atuukkallarnermut akissarsisitsisarneq pillugu maleruagassat malillugit.

§ 13. Kommunalbestyrelsimi ilaasortaq aqutsinissamut inatsisip § 16-iani imm. 5 naapertorlugu borgmesteritut sulinissaminut peqquneqarsimasoq borgmesteritut akissarsiaqartinneqassaaq § 11 naapertorlugu.
Imm. 2. Kommunalbestyrelsimi ilaasortaq aqutsinissamut inatsisip § 16-iani imm. 5 naapertorlugu borgmesterip tulliatut siullertut imaluunniit kisimiilluni borgmesterip tulliatut sulinissaminut peqquneqarsimasoq akissarsiaqartinneqassaaq § 12 imm. 1 aamma imm. 2 naapertorlugit. § 5 imm. 1-imi akissarsiassanit ilanngaateqarnissaq pillugu maleruagassat aamma atorneqassapput borgmesterip tullianut sivikinnerpaamik qaammatini sisamani najuussinnaanngikkallartumut.

 

Atortuulersitsinermut aalajangersakkat

§ 14. Nalunaarut manna atortuulerpoq 21. december 1995, kingumoortu-millu atuutissalluni 1. april 1995 aallarnerfigalugu.
Imm. 2. Tamatumunnga peqatigitillugu atorunnaarsinneqarput Kalaallit Nunaanni Kommuninut Nakkutilliisoqarfiup kaajallaasitaa 24. oktober 1983-imeersoq kingusinnerusukkullu allannguutai aamma aalajangersimasumikakissarsiaqartitsilluni misileraanerit Inatsisartut inatsisaat nr. 19, 23. oktober 1990-imeersoq tunngavigalugu ingerlanneqarsimasut aammalu borgmesterit akissarsiaat pillugit Kalaallit Nunaanni Kommuninut Nakkutilliisoqarfiup kaajallaasitaa 21. november 1988-imeersoq.
Imm. 3. §§ 1 aamma 2 malillugit akissarsiat siullermik tunniunneqassapput, § 3 apeqqutaatinnagu, akissarsiassat aningaasartassaasa aalajangersarneqarnissaat pillugu kommunalbestyrelsip aalajangerneraniit.
Imm. 4. Ataatsimiititaliani siulittaasut maleruagassat maannamut atuuttut malillugit nalunaarutip matuma §§ 1 aamma 2, imm. 4 naapertorlugu akissarsiarineqarsinnaasunit amerlanerusunik akissarsiaqarsimasut tamanna pillugu kommunalbestyrelsip aalajangernera Naalakkersuisuliu akuersissuteqarnerat malillugit maannamut akissarsiarisartakkatik pigiinnarsinnaavaat kommunalbestyrelsip atuuffissaata sinnerani. Naalakkersuisut taamatut akuersissuteqarnermut atatillugu, kommunalbestyrelsillu tamatuminnga qinnuteqareerneratigut, §2-mi imm. 2-mi ataatsimiititaliani siulittaasut akissarsiaannuttapiliussat amerlanerpaaffissaasa sanioqqunneqarnissaa akuersissutigisinnaavaat.
Imm. 5. Peqqussummi §§10 aamma 11 atortuulersinneqassapput 1. april 1997. Tamatuma pinissaata tungaanut maleruagassat maannakkumut atuuttut malillugit borgmesterit akissarsiaqartinneqassapput.

Namminersornerullutik Oqartussat, ulloq 21. december 1995

Lars Emil Johansen

/

Kaj Kleist