Piujuartitsinissaq siunertaralugu aalisarnerup teknikkikkut iluarsartuussivigineqarnera pillugu Namminersornerullutik Oqartussat nalunaarutaat nr. 33, 14. december 1995-imeersoq.

Inuussutissarsiutigalugu aalisarneq pillugu inatsisartut inatsisaanni nr. 17-imi, 22. oktober 1990-imeersumi inatsisartut inatsisaatigut nr. 24-kkut, 29. oktober 1992-imeersukkut allanngortinneqartumi § 19-imi imm. 1, aamma § 28 naapertorlugit aalaj angersarneqarpoq:

 

§ 1. Nalunaarut imartanut Kalaallit Nunaata aalisarnikkut oqartussaaffigisaanut atuuppoq.
Imm. 2. Nalunaarut kapisilinniarnermut eqalunniarnermullu atuutinngilaq.
Imm. 3. "Killeqarfmnik sumiissusersinermi naleqqat" nalunaarummi matumani pineqartut tassaapput naleqqat imartat Kalaallit Nunaata aalisarnikkut oqartussaaffigisai pillugit statsministereqarfiup nalunaarutaani nr. 629-imi, 22. december 1976-imeersumi, 176-imi, 14. maj 1980-imeersumi aammanr. 637-imi, 6. september 1991-imeersumi aalaj angersarneqarsimasut.
Imm. 4. Nalunaarummi matumani angallatip oqimaassutsimut killigititamik qaangiisimaneranut ataassisimaneranulluunniit aalajangiisuussaaq oqimaassutsip angallatip uuttuutaanut uppernarsaammi (målebrev) allassimanera. Uuttueriaatsit pillugit maleruagassat sorliit angissusaanut uuttuummik atulersitsinermut tunngaviliisuusimanersut apeqqutaatinnagit.

 

Nigartaqqortussutsit uuttuutaasa minnerpaaffissaat

§ 2. Nalunaarummi matumani nigartaqqortussuseq najoqqutarineqartoq tassaavoq nigartap tamakkerluni iluatungimigut nerutussusiata uuttuutaa. Tamatumunnga ilaatinneqanngillat taamaallaat saattussanut pullatit nigartaat, imm. 9-mi pineqartut. Nigartaqqortussuseq qalorsuarni immikkoortortanut tamanut atuuppoq. Nigartat sanerai sisamat tamarmik takeqqatigiilluinnartut sananeqaammik assigiimmik qilernernik sisamanik aalajangikkat kisimik atorneqarsinnaapput. Uanili pineqanngilaq ammassanniarneq, tamatumani atorneqarsinnaammata nigartat arfinilinnik takeqatigiinnik sanerallit assigiimmik sananeqaatillit.
Imm. 2. Aalisakkanik imm. 3-miit 9-mut taaneqanngitsunik aalisarnermi nigartaqqortussutsimut 140 mm-it minnerpaaffissatut atuupput.
Imm. 3. Kinguppanniarnermi nigartaqqortussutsimut 40 mm-it minnerpaaffissatut atuupput.
Imm. 4. Eqalukkanik, ammassanik, saarullernanik, ammassassuarnik, putooruttunik qaleruaqanngitsunillu aalisarnermi qassutini/qaluni nigartaqqortussutsimut 16 mm-it minnerpaaffissatut atuupput.
Imm. 5. Qassusersorluni qaleralinniarnermi qassutini nigartaqqortussutsimut 220 mm.-it minnerpaaffissatut atuupput.
Imm. 6. Qassusersorluni saarullinniarnermi qassutini nigartaqqortussutsimut 160 mm.-it minnerpaaffissatut atuupput.
Imm. 7. Qassusersorluni nipisanniarnermi qassutini nigartaqqortussutsimut 270 mm-it minnerpaaffissatut atuupput.
Imm. 8. Qalorsuarnikikerinnarsiutiniksuluppaagarniarnermi nigartaqqortussutsimut 100 mm-it minnerpaaffissatut atuupput.
Imm. 9. Pullasersorluni saattuarniarnermi pullatini nigartaqqortussutsimut 140 mm-it minnerpaaffissatut atuupput, nigartap iluatigut qilernermiit qilernermut uuttorlugu.
Imm. 10. Piniutit imm. 2-miit 9-mut aalajangersakkat naapertorlugit atorneqartunit mikinerusunik nigartaqqortussusillit, qajannaarlugit aalajangerneqarsimanngikkunik imatullu ittujaarneqarsimanngikkunik ajornanngitsumik tigullugit atorneqarsinnaajunnaarlugit inissinneqarsimanngippata angallammiitinneqassanngillat.

 

Nigartaqqortussutsit uuttorneqartarnerat

§ 3. Qassutini nigartaqqortussutsit, saattussanut pullatit nigartaat tamatumani pinnagit, ilanngussami allassimasutut aalajangersarneqarsimapput.

 

Atortut qassutinut/qalorsuarnut aalajangikkat

§ 4. Nigartaqqortussusissanik aalajangersakkat atuuttut apeqqutaatinnagit atortulersuutit immikkoortuni 2-mi, 3-mi 4-milu taaneqarsimasut qalorsuit qulaatungaannut taamatuttaaq ataatungaannut ikkunneqarsinnaapput nungullarsaaneq annikillilerniarlugu aamma/imaluunniit qalorsuit ninngunerulersinniarlugit.
Imm. 2. Qalussiat qajannaallisaatit. Atortup affaani kingullermi qalussianik qajannaallisaatinik (aqajarua qalleq) ataasiinnavinnik ikkussisoqarsinnaavoq. Qalussiat qajannaallisaatit nigartaat minnerpaamik aqajaruata ilorliup nigartaannit marloriaammik annertunerussapput. Qalussiat qajannaallisaatit kaajallallugit nigartussusiat aqajaruata ilorliup kaajallallugu nigartussusianit annerussaaq.
Imm. 3. Ataatigut nungullarnaveeqqutit. Atortut suugaluartulluunniit (tingerlaatissiaq, allungiartorfissiat, qalussiat) qalorsuit ataannut affaanut kingullermut ikkunneqarsinnaapput. Nungullarnaveeqqutit sukkulluunniit qalorsuit kaajallallugit 50 %-at sinnerlugu qallersimassanngilaat.
Imm. 4. Rundstropit qajannaallisaatitut qalorsuit ilaannut atorneqarpata taakkua qalorsuit kaajallallugit annerpaamik 60%-ianit naannerussaanngillat. (uuttuut: nigartat amerlassusii nigartussutsimik gange-rlugu). Rundstrop-it taamaattut akornanni akuttussuseq minnerpaamik 1 meteriussaaq. Rundstropit taamatullu qalussiat qajannaallisaatit (aqajarua qalleq) ataatsikkut atorneqarpata rundstropit aqajaruanut ilorlermut taamaallaat ikkunneqarsinnaapput.
Imm. 5. Atortussat immikkoortuni 2-mi, 3-mi 4-milu taaneqanngitsut atorneqaqqusaanngillat.

 

3 sømilit iluanni aalisarnermut inerteqqutit

§ 5. Imartami sinerissap titarnerullu tunngaviusumik killissarititaasut avataanni 3 sømilit avataanniittoq tikillugu inerteqqutit makku atuupput:
1) Uiluinniarluni aalisarneq eqqaassanngikkaanni angallatinut angallatip uuttuutaanut uppernarsaat naapertorlugu 75 BRT/BR 120-mik taannaluunniit akimorlugu angissusilinnut aalisarneq inerteqqutaavoq, nalunaarummi allami allanik aalajangersaasoqarsimanngippat. 2) Ungusiniutit qalorsuilluunniit atorlugit saarullinniarneq, suluppaagarniarneq, nataarnarniarneq, qaleralinniarneq qeerarniarnerlu angallatinut tamanut inerteqqutaavoq.
3) Normu 2-mi aalajangersakkat apeqqutaatinnagit qalorsuit ungusiniutit imaluunniit kilisaatit qalorsui atorlugit saarullinniartoqarsinnaavoq Qaqortup pigisaani Sermersuup aalisarfiani (60°18,5'N - 60°26'N - 45°26'W - 45°19'W akornanni). Tamannali taamaallaat pisinnaavoq 200 meterit sinnerlugit ititigisumi aammalu angallatit angallatip uuttuutaanut uppernarsat malillugu 50 BRT/BT 90 init mikinerusut atorlugit.
Imm. 2. Aalajangersakkami imm. 1-imi, pkt 1, naapertorlugu, sinerissami imartani angallatinit mikinerusunit aalisarnermik ingerlatsiffiunngitsuni aamma sinerissap qanittuani aalisarnermik ineriartornermut akornusersuutaanngitsumik angallatit anginerusut ingerlatsinnaanerannut naalakkersuisut immikkut akuersissuteqartitsisinnaapput.

 

Aalisakkat ilaasa sumiiffinni aalajangersimasuniaalisaqqusaannginnerat

§ 6. Qalorsuarnik natersiutinik aalisarneq inerteqqutaavoq Kalaallit Nunaata Tunuani allorniusap sanimukartup 67°00'N-ip aamma sumiiffiit uku akornanni titarnernik killiligaasuni:
- 67°00'N, 32°00'W
- 65°40'N, 32°00'W
- 65°30'N, 33°10'W
- 65°10'N, 34°00'W
- 65°10'N, 35°00'W
- 64°20'N, 36°20'W
- 63°55'N, 36°45'W
- 63°31'N, 38°45'W
- 63°27'N, 39°30'W
- 63°45'N, 39°30'W
- Kalaallit Nunaata Tunuani sumiiffik 63°45'N.
Imm. 2. Angallatit Kalaallit Nunaata kitaani suluppaagarniarsinnaasut saarullinniarsinnaanatilli suluppaagarniaqqusaanngillat sumiiffimmi allorniusamik sanimukartumik 64°30'N-mit titarnerillu uku akornannit killiligaasumi:
- 64°30'N, 55°00'W
- 61°30'N, 50°30'W
- Kalaallit Nunaata Kitaani sumiiffik 61°30'N.

 

Aalisariaatsit ilaasa inerteqqutaanerat

§ 7. Qaartartut, toqunartut imaluunniit ilisimajunnaartississutaasinnaasut kiisalu aallaasit aalisarnermi atoqqusaanngillat. Qupinnguallatsitsisarluni aalisartoqaqqusaanngilaq immikkut ittumik akuersissuteqartoqartinnagu.
Imm. 2. Qassutit kivisittakkat atorneqaqqusaanngillat tunngaviusumik killeqarfimmiit avammut 3 sømilit avatannii aalisarnermi.
Imm. 3. Qalorsuarsorluni qaleralinniarneq inerteqqutaavoq.
Imm. 4. Imm. 3-imi inerteqqutaasumut naalakkersuisut immikkut akuersissuteqartitsisinnaapput, pisariaqartitsineq naapertorlugu TAC-ip tamakkerlugu aalisarneqarsinnaanera qulakkeerniarneqarpat. Taamma akuersissuteqartitsineq ukiumut ataatsimut atuuttussanngorlugu tunniunneqassaaq, aalisariutaatileqatigiiffiullu akuersissutaataanut allanneqassalluni.

 

Atortut aalajangersimasut atorneqaqqusaannginnerat

§ 8. Angallatip tunisassiorfittaani aaqqissuussinerit pisanik immikkoortiterneqarsimasunik toqqaannartumik avammut aqutsissutaasinnaasunik siunertaqartut inerteqqutaapput.

 

Aalisarnermut atortunik nalunaaqutsersuineq

§ 9. Aalisarnermut atortut piginnittup aqqanik aamma najugaanik imaluunniit angallatip aqqanik aamma umiarsualiviup ilisarnaataatut naqinnernik nalunaaqutserneqarsimassapput. Nalunaaqutsiussat imermit arrortinneqarsinnaassanngillat. Qassutini kivisittakkani nalunaaqutsiussat qimiaanut aalajangerneqassapput. Ningittakkanut nalunaaqutsiussat ningittakkanut namminernut aalaj angerneqassapput. Qalorsuarnut nalunaaqutsiussat qimiarsuarmut qullermut aalajangerneqassapput. Uiluinniutini saattuarniutinilu nalunaaqutsiussat sinaakkutaannut qullernut aalajangerneqassapput. Aalisarnermi atortuni kivisitakkani (bundgarn-it, qassutit kivisittakkat, ningittakkat ass.) taamatuttaaq puttaqutit nalunaaqutsiussat taamatut nalunaaqutsersimass apput.

 

Pineqaatissiissutit

§ 10. Nalunaarummi matumani aalajangersakkanik unioqqutitsineq akiliisitaanermik kinguneqarsinnaavoq. Angallammiit unioqqutitsisumik aalisartoqartillugu aalisarnermut atortut atorneqartut, angallatip pisai tamakkerlugit taakkualuunniit nalingat, taakkununnga ilanngunnagit pisat, unioqqutitsisuunngitsumik aalisarnikkut pisarineqarsimasutut uppernarsarneqartut. Tamatumani suliassat inuutissarsiutigalugu aalisarneq pillugu Inatsisartut inatsisaanni malittarisassat malillugit suliarineqartassapput.

 

Atortussanngortitaanera

§ 11. Nalunaarut atortuulissaaq 1. januar 1996.
Imm. 2. Tamatumunnga peqatigitillugu piujuartitsinissaq siunertaralugu aalisarnerup teknikkikkut iluarsartuussivigineqarnera pillugu Namminersornerullutik Oqartussat nalunaarutaat 17, 23. juli 1993 -imeersoq atorunnaarsinneqarpoq.

Ulloq 14. december 1995

Pâviâraq Heilmann

/

Bent Buch

---

Ilanngussaq

1. Nigartanik uuttuutinut nassuiaat

a) Nigartaqqortussutsinik aalajangiiniarnermi atorneqartarpoq nigartanik uuttuut 2 mm-imik issussusilik, saalimasoq, ninngusuumik ilutsimigullu allanngujaatsumik sanaaq. Ilusiligaavoq sanerai sammiveqatigiissillugit, taakku l:8-mik amiliartortunik illuttut attaveqartunik, imaluunniit narluinnartunik killilimmik amiliartussutsip taaneqartup assinganik. Nigartanut uuttuut nuuatigut putoqartinneqassaaq.

b) Nigartanik uuttuutip saavata silissusia mm-ikkaarlugu nalunaaqutsersorneqarsimassaaq killingisigut akuttoqatigiinnik sammivilitsigut iluseq taanna atorneqarpat, kiisalu killingisigut amiliartortutigut. Kingullertut taaneqartumik iluseqartinneqarpat silissusia mm-inik akuttussusilinnik nalunaaqutsersorneqassaaq akuttoqatigiinnillu silissusia kisitsisilerlugu nalunaaqutsersorneqassalluni.

2. Nigartanik uuttuutip atorneqarnera

a) Aalisarnermut atortut tasissimatinneqassapput nigartat teqeqqui atortup takissusia malillugu imminnut ungasinnerpaanngorlugit.

b) Nigartanik uuttuutip imm. 1-mi taaneqartup nuua nigartamut mangunneqassaaq uuttuut nigartanut naleqqiullugu equngatinnagu aamma atortup tanneranoortuanoortillugu.

c) Nigartanut uuttuut nigartanut mangunneqassaaq assaannarmik imaluunniit oqimaalutaq naqitsinermilluunniit uuttuut atorlugu nigartanik uuttuutip nigartat killinginut tattoqilluni uninnissaata tungaanut.

3. Nigartanik uuttorneqartussanik toqqaaneq

a) Nigartat uuttorneqartussat tulleriiaaginnaat 20-ussapput aalisarnermut atortup tanneranoortua malillugu toqqarneqartussat.

b) Katitillugit mersorneriniit, allunaasaniit qilersuutiniilluunniit 5o cm-imik qaninnerusumi nigartanik uuttuisoqassanngilaq. Ungasissusissaa ilaartornerniit, allunaasaniit qilersuutaasunilluunnit kipunganngitsumik uuttorneqassaaq, aalisarnermut atortut uuttuiffiup tungaanut isivillugit. Nigartat iluarsarsimasut alissimasulluunniit uuttorneqassanngillat, imaluunniit atortunut iluaqutinik aalajangiivigineqarsimasut.

c) Immikkoortoq a)-mi allassimasutut nigartat uuttorneqartussat tulleriiaaginnartuusariaqanngillat, tassa immikkoortoq b)-mik atuinikkut tamanna ajornassappat.

d) Atortut masatsillugit aatsaat uuttorneqarsinnaapput qerisimassanatillu.

4. Nigartat ataasiakkaat angissusiat

a) Nigartap angissusia tassaavoq uuttuutip uninnerani nalunaaqqutip killiffiusup silissusia, uuttuut imm. 2 malillugu atorneqarpat.

b) Nigartap sinai takeqqatigiissutut akuerineqassapput uuttortaanermi qilernerit marluk nigartamik tukimut katititsisut uuttuutip qeqqaniittutut naatsorsuunneqarpata.

5. Piniutip nigartaqqortussusianik aalajangiineq

a) Piniutip nigartaqqortussusia mm-inut uuttorneqassaaq imm. 3 aamma 4 malillugit uuttugassatut toqqarneqarsimasut amerlassusiisa nerutussusiinik agguaqatigiissitsinik-kut. Agguaqatigiissitsineq mm-imut ilivitsumut qaninnerpaamut allineqassaaq.

b) Nigartat uuttorneqartussat tamarmiusut amerlassusissaat imm. 6-imi aalajangersarneqarput.

6. Nigartanik uttuuinermi periaaseq

a) Nakkutilliinermi oqartussaasut nigartat tulleriiaat 2o-t imm. 3 malillugu toqqarneqarsimasut uuttussavaat, oqimaalutaq naqitsinermilluunniit uuttuut atornagu, kisiannili uuttuutip assaannarmik mangunneqarneratigut.

Tamatuma kingorna imm. 5 malillugu piniutit nigartaasa nerutussusiat aalajangerneqassaaq.

b) Naatsorsuereernerup kingorna nigartat nerutussusiat aalajangersakkanut atuuttunut naapertuutigunanngitsoq paasineqarpat nigartat tulleriiaat 20-t marluk, imm. 3 malillugu toqqakkat uuttortaqqinneqassapput.

Tamatuma kingorna imm. 5 malillugu nigartat uuttukkat 6o-it tunngavigalugit nigartat nerutussusiat naatsorsoqqinneqassaaq. Inernerineqartoq tassaavoq piniutit nigartaasa nerutussusiat, taamaattorli imm. C. takuuk.

c) Imm. a) imaluunniit b) malillugu nigartanik aalajangiineq angallatip naalagaaniit assortorneqarpat, nigartat nerutussusiinik uuttuilluni naatsorsugaagaluaq atunngitsoortinneqassaaq piniutillu uuttortarneqaqqillutik.

Uuttueqqinnermi oqimaalutaq naqitsinermilluunniit uuttuut nigartat nerutussusiinik uuttuummut ikkullugu uuttuisoqassaaq. Oqimaalutap naqitsinermilluunniit uuttuutip toqqarneqarnissaat nakkutilliinermi oqartussaasunit aalajangerneqassaaq.

Oqimaalutaq nigartanik uuttuutip nuuani putumut ikkunneqassaaq. Naqitsinermik uuttuut nigartanik uuttuutip nuuani putumut imaluunniit uuttuutip silinnersaanut ikkunneqarsinnaavoq.

Oqimaalutap naqitsinermillu uuttuutip eqqorluinnassusiat Dantestimit akuerisaasussaavoq.

Piniutinut 35 mm-inik nerutussusilinnik nerukinnerusunulluunniit imm. a) malillugu aalajangersaavigineqartutut nigartalinnut naqitsineq 19,61 newton (taassuma assigaa oqimaassuseq 2 kg) atorneqassaaq, piniutinullu allanut naqitsineq 49,03 newton (taassuma assigaa oqimaassuseq 5 kg) atorneqassalluni.

Imm. 5 malillugu nigartat nerutussusiinik uuttuinermi, oqimaalutaq naqitsinermilluunniit uuttuut atorneqartillugu, nigartat tulleriiaat 20-iinnaat uuttorneqassapput.