Qilalukkanik qaqortanik qernertanillu piniarneq pillugu Namminersornerullutik Oqartussat nalunaarutaat nr. 30 11. oktober 1995-imeersoq.

Inuutissarsiutigalugu piniarnermut aallaaniarnermullu Inatsisartut inatsisaanni nr. 12-imi 22. november 1984-imeersumi § 4, imm. 1 aamma 2, §§ 6 aamma 7 kiisalu § 9 imm. 2 allanngortinneqartoq Inatsisartut inatsisaanni nr. 416. maj 1990-imeersumi aammalu inuutissarsiutiginagu piniarneq, aallaaniarneq aalisarnerlu pillugit Inatsisartut inatsisaat nr. 11 29. april 1992-imeersoq §§5 aamma 6 kiisalu Kalaallit Nunaanni pinngortitamik allanngutsaaliuineq pillugu inatsisartut inatsisaanni nr. 11 12. november 1980-imeersumi § 2, imm. 1 aamma 3 aamma § 19 naapertorlugit matumuuna aalajangersarneqarpoq:

 

Nalunaarutip atuuffia

§ 1. Nalunaarut Kalaallit Nunaani qilalukkanik qaqortanik (Delphinapterus leucas) aammalu qilalukkanik qernertanik (Monodon monoceros) piniarnermut tamarmut atuuppoq.

 

Inuit piniarsinnaatitaasut

§ 2. Qilalugaq qaqortaq aamma qernertaq taamaallaat piniarneqarsinnaavoq atuuttumik inuutissarsiutigalugu inuutissarsiutiginaguluunniit allagartaqartunit

 

Kalaallit Nunaata avannaarsuani tunuanilu nunamik uumasuinillu eqqissisimatitsivik Qimusseriarsuarlu

§ 3. Qilalukkat qaqortat qernertallu eqqissisimatitaapput Kalaallit Nunaata avannaarsuani tunuanilu nunamik uumasuinillu eqqissisimatitsiviup imartaani kiisalu Qimusseriarsuarmi uumasunik eqqissisimatitsiviup iluani.
Imm. 2. Taamaattorli Upernaviup, Avanersuup imaluunniit Ittoqqortoormiit kommuneeni najugaqavissut, inuiaqatigiinnullu aalajangersimasumik attuumassuteqartut, piniarnermik aallaaniarnermillu ingerlatsisinnaatitaapput, Qimusseriarsuarmi aamma Kalaallit Nunaata avannaarsuani tunuanilu nunanik uumasuinillu eqqissisimatitsiviit pillugit malittarisassat atuuttut malillugit.

 

Nalinginnaasumik piniariaatsit

§ 4. Qernertanik qaqortanillu qilalugarniarnermi imaluunniit piniarfissamukarnermi tassanngaanniillu ingerlaarnermi timmisartut, helikopterit kiisalu qamutit motorillit suulluunnit atoqqussaanngillat, § 9, imm. 2 takuuk.
Imm. 2. Qassutinik qilalukkanik qaqortanik qernertanillu piniarnermi qassutit ikkusimatillugit akunnerit 24-it iluanni minnerpaamik ataasiarlutik alakkarneqartassapput inissinneqarsimassallutillu angalasunut akornutaanngitsumik.

§ 5. Qoorortuut atorneqartussatut akuerisat minnerpaamik 7,62 mm-mik sulloqqortussuseqassapput (cal. 30-06); taammaattorli qilalukkamut naalitamut, qassutinik pisamut allatulluunniit pisarinissaa qularnaakkamut toqutsissutigis-sallugu 5,64 mm-imik sulloqqortussusilik (cal. 222) atorneqarsinnaavoq. Qilalugarniarnermi patronit aqerlui tamakkiisumik manngertumik puukkat kisimik atoqquneqarput.
Imm. 2. Qaartiterutissat, qamutillit tuukkartallit, timmiarsiutit qoorortuuaqqallu qilalugarniarnermi atorneqarnissaat inerteqqutaavoq.
Imm. 3. Toqusaaneq sapinngisamik pilertortumik ingerlanneqassaaq. Qilalugaq nunamut sikumulluunniit qaqinneqarniariarpat pilallugu aallartinneqassaaq.

 

Angallatit

§ 6. Angallatit taamaallaat 25 BRT-tut angitigisuniit imalunniit taakkuninnga mikinerniit qernertanik qaqortanillu qilalugaqqusaapput, taakkuninngalu kalaalimineerniarfinni pisititsisinnaapput kiisalu tunitsivinnut tunisisinnaatitaallutik.
Imm. 2. Angallatiniit 50 BRT-tut angitigisuniit taakkuninngaluunniit mikinerniit, kisianni 25 BRT-mit anginerit namminermut atugassanik qernertanik qaqortanillu qilalugarsinnaatitaapput. Immikkoortumi tassani angallatit pineqartut tuniniaasinnaatitaanngillat tunitsivinnullu tunisisinnaatitaanatik.
Imm. 3. Angallatiniit 79, 9 BRT-tut angitigisut taakkuninngaluunniit mikinerniit, kisianni 50 BRT-mit anginerit amerlanerpaamik qilalukkanik qernertanik qaqortanilluunniit marlunnik angalanermi ataatsimi taquassatut pisaqarsinnaapput. Immikkoortumi tassani angallatit pineqartut qilalugartaminnik tunisisinnaanngillat tuniniaasinnaanatillu.
Imm. 4. Angallatiniit 79,9 BRT-mik anginerusuniit qilalukkanik qaqortanik qernertanillu piniarneq inerteqqutaavoq.
Imm. 5. Kommuni kommunimi ileqqoreqqusakkut imm. 1-4-imi piumasamit sakkortunerusumik aalajangersaasinnaavoq.

 

Ungusisarneq

§ 7. Unguseriaatsit tamarmik, soorlu nunamut aninaveerlugit ungusineq imaluunniit nunamut sikulluunniit sinaavanut patugussilluni ungusineq, inerteqqutaapput.

 

Sassat

§ 8. Sassat nassaarineqaraangata piaarnerpaamik tamanna kommunalbestyrelsimut nalunaarutigineqartassaaq radio oqarasuaalluunnit atorlugu. Kommunalbestyrelsip erniinnaq tamanna Aalisarnermut, Piniarnermut Nunalerinermullu Pisortaqarfimmut kalerriutissavaa.
Imm. 2. Sassanik nassaartoqarpat sumiiffiat nunaqarfinnut imaluunniit illoqarfinnut eqqaanniittunut tuaviornerpaamik nalunaarutigineqassaaq.

§ 9. Sasseqataasut sassereernermi qimussinik angerlaassinnaasatik sinnerlugit pisaqassanngillat.
Imm. 2. Toqusaaneq sapinngisamik pilertortumik ingerlanneqassaaq. Qilalugaq sikumut qaqinneqarniariarpat pilallugu aallartinneqassaaq.
Imm. 3. Sassinermi immikkut ittumik pisoqartillugu pisanik angerlamut assartuinissamut snescooterit atorneqarnissaat kommunalbestyrelsip immikkut akuerisinnaavaa, siku silalu pissutigalugit pisat tuaviortumik assartornissaat pisariaqaleraangat.
Imm. 4. Sassani qilalukkat qaqortat qernertallu pisat tamarmik najukkamut angerlaanneqassapput imaluunniit qimatulineqarlutik. Sassani pisanik pilaffik torersarneqassaaq, sinnikut atorneqarsinnaanngitsut peerneqarnerisigut.
Imm. 5. Neqit, mattaat orsullu piginnittumit nalunaaqutsikkat kiisalu qilalukkat pitutat piginnittui akuersitinnagit nikisinneqassanngillat. Nikisitsineq pisinnaavoq kommunimi oqartussaniit nikisitsinissaq piumasarineqarpat silalunniit peqqutigalugu nikisinneqarnissaannut ullormik killiliussisoqarsimappat killiliussarlu qaangerneqarsimappat.

§ 10. Kommune ataaseq imaluunniit arlallit peqatigiillutik kommunemi ileqqoreqqusaliatigut qilalugarniartarneq annertunerusumik killilersorsinnaavaat, immikkut pisariaqartitsisoqartillugu. Kommunemi ileqqoreqqusaq naalakkersuisunit akuerineqareeruni aatsaat atuutilersinnaavoq.

 

Nalunaartarneq nakkutilliinerlu

§ 11. Qilalukkanik qaqortanik qernertanillu pisaqarneq pissaanerlu kommunerisamut nalunaarutigineqassaaq, takukk imm. 5.
Imm. 2. Sassani qilalugartat qaqortat qernertallu tamarmik najukkami KNAPP-mut piniarnerup kinguninngua nalunaarutigineqassapput. Najukkami KNAPP-p nalunaarutigineqartut kommunimut ingerlateqqissavaat.
Imm. 3. Qilalugarnermik Nalunaarutit Aalisarnermut, Piniarnermut Nunalerinermullu Pisortaqarfimmut nassiunneqassapput kingusinnerpaamik nalunaarutip tiguneraniit ullut 14-issaanni.
Imm. 4. Kommunalbestyrelsip nalunaarutit tigusassavai tiguneqartullu ingerlateqqittassallugit.
Imm. 5. Nalunaaruteqarnissaq sapinngisamik piaartumik pisassaaq. Suuneri, qassiuneri, suiaaneri (utoqqaassusiat, suiaanerat, inuusukaajunersut uiaanersulluunnit), ulloq pisaqarfik pissaavilluunniit sumilu tamanna pisimanersoq nalunaarutigineqassapput. Pisaqarneq pissaanerluunnit qoorortuumik, unaamik, qassutinik sassaniluunniit pisimanersoq ilanngullugu nalunaarutigineqassaaq. Pisat annaasalluunnit allattorneqassapput, takuuk ilanngussaq I, piniartup aqqanik, CPR-normuanik, kommunianik, qaammat pisaqarfik, angallatip angissusia fodingorlugu ilanngullugit, takuuk

§ 8. Piniaqatigiinnermi peqataasut aqqi CPR-normuilu nalunaarutigineqassapput. Allattuiffissaq kommunimut nunaqarfimmiluunniit aqutsisut allaffiannut piniarneqarsinnaavoq.

§ 12. Qaqugukkulluunniit politiit, piniarnermut nakkutilliisoq imaluunniit nakkutilliisinnaanermut pisussaaffilikkamiit piumasarineqarpat piniarnermut allagartaq takutinneqartassaaq.

 

Alleqqunik katersuineq

§ 13. Piniartoq kinaluunniit qilalukkamik qernertartoq imaluunniit qaqortartartoq pisussaatitaasinnaavoq ilisimatuussutsikkut atugassanik, ilaatigut allerui tunniutassanngorlugit angerlaatissallugit.
Imm. 2. Naalakkersuisut immikkut piumasaqaateqarsinnaapput uumasunit piigassat tunniunneqarnissaannut aammalu paasissutissat ilisimatuussutsikkut misissuinissami atugassat tunniunneqarnissaannut.

 

Immikkut akuersineq

§ 14. Ilisimatusarnermut tunngatillugu naalakkersuisut aalajangersinnaavaat nalunaarummi aalajangersakkat sanioqqunneqarnissaat.

 

Avammut annissineq

§ 15. Taamaallaat Namminersornerullutik Oqartussat akuersisereernerisigut qilalukkap qaqortap qernertallu ilamerninik nunanut allanut annissisoqarsinnaavoq.

 

Pineqaatissiinerit

§ 16. Maleruagassanik §§ 2 aama 3,§ 4, § 5, § 6 imm. 1, §§ 7 - 9, § 11 aamma §12-mik unioqqutitsineq akiliisitsissutaasinnaavoq.
Imm. 2. Qilalukkat qaqortat qernertallu inatsisinik unioqqutitsilluni pisarineqartut pissarsiarineqartulluunniit neqaat, mattaat, niaquisa saarni, tuugaavi ilamernilu allat arsaarinnissutigineqarsinnaapput Namminersornerullutik Oqartussanut pigineqartussanngorlugit.
Imm. 3. Nalunaarut una malillugu kommunemi ileqqoreqqusalianik unioqqutitsisoqarsimatillugu akiliisitsisoqarsinnaavoq pisanillu arsaarinnittoqarsinnaalluni.

§ 17. Nalunaarut una ulloq 17. oktober 1995 atortuulerpoq, peqatigitillugulu qilalukkanik qaqortanik qernertanillu piniarneq pillugu Namminersornerullutik Oqartussat nalunaarutaat nr. 21 29. juli 1993-meersoq atorunnaarsinneqarpoq.
Imm. 2. Sassat pillugit Landsrådip ileqqoreqqusaa 18. januar 1958-imeersoq naapertorlugu kommunini ileqqoreqqusaliat atortussanngortinneqarsimasut imaluunniit allakkiat atortuuinnassapput, qilalugarniarnermi malittarisassat sakkortunerusimappata.




Namminersornerullutik Oqartussat, ulloq ll.oktober 1995.




Pāviāraq Heilmann

/

Bent Buch

Ilanngussaq (pdf-format)