Kommunit missingersuusiortarnerat, naatsorsuutaat, kukkunersiuisarneq aamma karseqarnerat naatsorsuuseriveqarnerallu pillugit Namminersornerullutik Oqartussat nalunaarutaat nr. 29, 18. september 1995-imeersoq
Kommunalbestyrelsit, nunaqarfinni aqutsisut il.il. pillugit Inatsisartut inatsisaanni nr. 20-mi 3. november 1994-imeersumi § 39, imm. 5, § 40, imm. 3, § 45, imm. 1 aamma imm. 3 aamma § 48, naapertorlugit aalajangersarneqarput:
Missingersuusiortarneq
§ 1. Kommunit missingersuutat ukiunut arlalinnut missingersuutitallit akuersissutigineqareersimassapput isertitanit akileraarutit pillugit inatsisartut inatsisaanni kommunimi isertitatigut akileraarutit procentiata aalajangiivigineqarnissaanut piffissarititap qaangiutinnginerani.
Imm. 2. Aningaasaqarnermut ataatsimiititaliap missingersuutinut siunnersuut kingusinnerpaamik piffissaliussaq imm. 1-imi taaneqartoq qaammatinik marlunnik sioqqullugu kommunalbestyrelsimut saqqummiutissavaa.
Imm. 3. Missingersuutinut siunnersuummut aningaasaqarnermut ataatsimiititaliami ikinnerussuteqartunit inassuteqaatit §§-ini 2-mi, 3-mi 4-milu piumasaqaatinik naammassinnissimassapput.§ 2. Aningaasaqarnermut ataatsimiititaliap aningaasanut missingersuusiatut siunnersuusiaani ilaatinneqassapput kommunip isertitassai aningaasartuutissaalu tamarmiusut aammalu aningaasani tigoriaannarni nikinnerit aamma aningaasaatit nikeriarnerat.
Imm. 2. Aningaasaqarnermut ataatsimiititaliap aningaasanut missingersuusiatut siunnersuusiaa ilaqartinneqassaaq missingersuusiornermi periaaseq toqqarneqarsimasoq missingersuusiallu kontoplani akuerisaasoq malillugu qanoq immikkoortiterneqarsimatiginerat pillugu nassuiaammik.
Imm. 3. Aningaasanut missingersuusiatut siunnersuusiaq ilaqartinneqassaartaaq aningaasaliissutissatut siunnersuutigineqartunut ataasiakkaanut nassuiaatitut oqaasertaliussanik, imaalillugulu killiliussatut akuersissutini nalunaarneqassalluni piumasaqaatit sorliit naapertorlugit akuersissutit atorneqassanersut, aningaasaliissutinilu allani, tassa isertitassatut aningaasartuutissatullu kiisalu naatsorsuutinik oqimaaqatigiissitsinermi akuersissutini, aningaasaliissutit taakku atorlugit suliassaq sukumiisumik allaaserineqartassalluni.
Imm. 4. Missingersuusiatut siunnersuusiaq akuersissutissatut siunnersuutini tamani sivikinnerpaamik ukiunut pingasunut missingiutinik ilaqartinneqassaaq, taakkunani suliassaqarfimmi pineqartumi ineriartornissamut kommunip naatsorsuutigisai nalunaarneqassallutik. Missingersuutinut nassuiaatini pisariaqarnera malillugu taamatuttaaq ukiuni missingersuusiorfiusuini ineriartorneq aallaaserineqassaaq.§ 3. Kommunit pigisat atoriaannaat nikerarnerinik missingersuusiorneri pissapput aningaasanut tigoriaannarnut missingersuusiatut isikkulerlugit, missingersuusianut tamarmiusunut ilanngullugit akuersissutigineqartartussatut.
Imm. 2. Aningaasanut tigoriaannarnut missingersuusiani oqaatigineqassaaq missingersuusiani akuersissutit tamarmiusut, tassunga ilanngullugu killiffimmut missingersuusiat aamma aningasat nikeriarnerat, ilaat qanoq amerlatigisut qaammammut atorneqartassasut naatsorsuutigineqarnersoq.
Imm. 3. Aningaasanut tigoriaannarnut missingersuusiat pisariaqarnera malillugu ilaqartinneqassapput nalunaarsuutinik oqaaseqaatinilluunniit nassuiaataasunik.§ 4. Kommunit sumut killinnermut postiinut missingersuusiornerminni minnerpaamik oqaatigineqassapput piffissami sivikitsumi pisassarisaanut akiitsunullu, piffissami sivisunerusumi pisassarisaanut akiitsunullu aammalu pigisat nalillit aalaakkaasullu qanoq ingerlanissaannut kommunip naatsorsuutigisai.
Imm. 2. Sumut killinnermut postinut missingersuusiornermi aamma a-tuupput § 3, imm. 2-mi aalajangersakkat.§ 5. llassutitut akuersissutissanut siunnersuutini oqaatigineqassapput ilassutitut akuersissutit qanoq aningaasalersorneqarnissaannut siunnersuutit aammalu ilassutitut akuersissutit aningaasatigut kingunerisassaat. § 2-mi imm. 3-mi aamma imm. 4-mi aalajangersakkat ilassutitut akuersissutinut aamma atuupput.
Imm. 2. Aqutsinissamut inatsisip § 42-ani imm. 2 tunngavigalugu aningaasaqarnermut ataatsimiititaliap missingersuusiani nuussuineri kommunalbestyrelsimut ilisimatitsissutitut saqqummiunneqassapput.
Imm. 3. llassutitut akuersissutissatut siunnersuutit kommunalbestyrelsimut saqqummiunneqarnerminni aningaasaqarnermut ataatsimiititaliap inassuteqaataanik ilaqartinneqassapput, aammalu ilassutitut akuersissutissat ataatsimiititaliap atauartup susassaqarfianut tunngassuteqarpata ataatsimiititaliap pineqartup inassuteqaataanik.
Naatsorsuutit
§ 6. Kommunip naatsorsuutai ukiup naatsorsuusiorfiusup naanerata kingornatigut aprilip qaammataani aningaasaqarnermut ataatsimiititaliamit saqqummiunneqassapput.
Imm. 2. Kommunalbestyrelsip naatsorsuutinik, aqutsinissamut inatsisip § 45-ani imm. 2 malillugu, oqaluuserinninnissaa pissaaq naatsorsuutit aningaasaqarnermut ataatsimiititaliamit saqqummiunneqarnerisa kingornatigut kingusinnerpaamik kommunalbestyrelsip ataatsimiinnerani tullermi.
Imm. 3. Kommunip naatsorsuutaanut ilaatinneqassapput ukiumi naatsorsuiffiusumi qaangiuttumi atuinerit isertitallu tamarmiusut ukiumi tulliuttumi februarip qaammataata naanera ilanngullugu.
Imm. 4. Ukiuni arlalinni sanaartugassat eqqarsaatigalugit naatsorsuutinut oqaaseqaatini missingersuusianit atuineq nassuiaateqarfigineqassaaq, tassunga ilanngullugu pilersaarutip naammassineqarnissaanut piffissamut pilersaarutinut naleqqiullugu utertitassat tiguneqarsimanersut, aammattaaq oqaatigineqassaaq pilersaarutaasumut kommunip aningaasartuutissaanut tamarmiusunut naleqqiullugu aningaasartuutit amerleriaateqassanersut imaluunniit annikinnerussuteqassanersut naatsorsuutigineqarnersoq, oqaaseqaatit missingersuusiornikkut iluarsiissutissanut tunngavissaasinnaassapput.
Imm. 5. Aningaasat atunngisat naatsorsuutini aningaasartuutitut nalunaarneqarsinnaanngillat aningaasat ukiumi naatsorsuiffimmi tulliuttumi akuersissutigeqqinneqassagaluarpataluunniit.
Imm. 6. Naatsorsuutinut oqaaseqaatini aammattaaq ilaatinneqassapput kommunip sumut killinnermut kontuini nikeriarnerit immikkut pingaaruteqartut.§ 7. Naatsorsuutit saqqummiunneqassapput innuttaasunut, suliffinnut il.il. piumasaqaateqartunut imaaliallaannaq tunniunneqarsinnaasunngorlugit.
§ 8. Naatsorsuutit kommunalbestyrelsip oqaaseqaataanik, aqutsinissamut inatsisip § 45-ani imm. 2 malillugu, ilaqartillugit Naalakkersuisunut aamma Nakkutiiliisoqarfimmut nassiunneqassapput kommunalbestyrelsimi oqaluuserineqareerpata kingusinnerpaamik qaammatip ataatsip qaangiunnerani.
Kukkunersiuineq
§ 9. Kommunip naatsorsuutai kukkunersiorneqassapput kukkunersiuisunit Naalakkersuisunit akuerineqarsimasunit.
Imm. 2. Kukkunersiuisunik soraarsitsineq, aqutsinissamut inatsisip § 46-ani imm. 1 malillugu, aatsaat pisinnaavoq ukiup naatsorsuiffiup nutaap aallartinnerani.§ 10. Ukiumut naatsorsuutit kukkunersiorneqarnerat pillugu kukkunersiuisut ukiumoortumik nalunaarusiortassapput. Aammattaaq kukkunersiuisut ukiup ingerlanerani nalunaarusiortassapput, tamanna peqqussutigineqarsimagaangat imaluunniit tamanna kukkunersiuisut pisariaqartikkaangassuk (nalunaarusiap ilai).
Imm. 2. Nalunaarusiap ilaani nassuiaateqarfigineqassapput kukkunersiuisutut suliat aammalu pissutsit allat kukkunersiuisut saqqummiutissallugit pissutissaqartitaat. Kukkunersiuisut oqaaseqaateqartassapput isumaqarunik naatsorsuutini postit kommunalbestyrelsip aalajangiinerinut naapertuutinngitsut imaluunniit maleruagassat atuuttut unioqqutillugit iliuuseqartoqarsimasoq.§ 11. Kukkunersiuisut nalunaarutaat kommunalbestyrelsimit oqaluuserineqassapput kukkunersiuisut nalunaarutaata kalaallisuuata kommunimiit tiguneqarnerata kingornatigut kingusinnerpaamik qaammatit pingasut qaangiunneranni.
Imm. 2. Kukkunersiuisut nalunaarutaata kommunalbestyrelsimi oqaluuserineqarnerata kingornatigut kingusinnerpaamik ullut 14 qaangiunneranni kukkunersiuisut oqaaseqaataannut kommunalbestyrelsip akissutai Nakkutilliisoqarfimmut nassiunneqassapput.§ 12. Kommunalbestyrelsi kukkunersiuisut nalunaarutaannut, kommunalbestyrelsimit aalajangiiffigineqartariaqartunut, akissuteqarnermini sianigissavai makkua:
1) Suliassanik suliarinnittarnermi suleriaatsinilu allannguutissanik imaluunniit pitsanngoriaatissanik kukkunersiuisut kaammattuuteqarsimappata kommunaibestyrelsip nalunaassavaa allannguutit imaluunniit pitsanngoriaatissat qanoq iliorluni piffissallu qanoq sivisutigisup iluani naammassineqassanersut,
2) kommuni suliassanik suliarinninnermini kukkussuteqarsimasoq kukkunersiuisut uparuarsimappassuk kommunalbestyrelsip nalunaarutigissavaa kukkuneq qaqugu iluarsineqassanersoq, oqaatigissallugulu kukkuneq suleriaatsini allanngortitsinissamut pissutissaanersoq imaluunniit allanik sulissuteqartoqassanersoq siunissami kukkunerit taamaattut pinngitsoortinniarlugit,
3) akissuteqaat kukkunersiuisut oqaaseqaataata tusaatissatut tiguneqarneranik imaqartoq taamaallaat naammaginartinneqarsinnaavoq kukkunersiuisut erseqqissumik oqaatigisimappassuk oqaaseqaat immikkut malersoqqittariaqanngitsoq, imaluunniit malersueqqinnissaq pisariaqartoq kukkunersiuisut namminneq isumaginiarpassuk,
4) kukkunersiuisut oqaaseqaataat kommunalbestyrelsimit akuersaarneqarsinnaanngippat tamatumunnga tunngavilersuutaasut akissuteqaammi erseqqissumik oqaatigineqassapput.
Karseqarneq naatsorsuuseriveqarnerlu
§ 13. Kommunip karseqarnerata naatsorsuuseriveqarneratalu aaqqissuunneqarnissaanut suleriaasissaanullu malittarisassat sukumiinerusut aqutsinermut inatsimmi § 47 naapertorlugu kommunalbestyrelsimit aalajangersarneqassapput.
Imm. 2. Malittarisassat imm. 1-imi pineqartut pillugit kukkunersiuisut kommunalbestyrelsillu akornanni isumaqatigiinngittoqartillugu Naalakkersuisut aalajangiisassapput.
Atortuulersitsineq
§ 14. Nalunaarut manna atuutilerpoq 1. oktober 1995 imaalillugu:
1) §§ 1-4 1996-imut missingersuusiornermi atuutissapput,
2) §§ 6-8 1995-imut naatsorsuutinik saqqummiussinermi atuutissapput, aamma
3) §§ 10-12 nalunaarutip atuulernerata kingornatigut kukkunersiuisut nalunaarutaannut tamanut atuutissapput.
Namminersornerullutik Oqartussat, ulloq 18. september 1995
Lars Emil Johansen/
Kaj Kleist