Umimmaat eqqissisimatitaanerat piniagaanerallu pillugu Namminersornerullutik Oqartussat nalunaarutaat nr. 19 18. juli 1995-imeersoq.
Inuutissarsiutigalugu piniarnermut aallaaniarnermullu Inatsisartut inatsisaata nr. 12, 22. november 1984-imeersup § 3, imm. 3, § 4, imm. 1 §§ 6-a aamma 7-a aammalu § 9 imm. 2-a, allanngortinneralu Inatsisartut inatsisaat inuutissarsiutigalugu piniarnermut aallaaniarnermullu Inatsisartut inatsisaata allanngortinneqarneranut nr. 4 16. maj 1990-meersup aamma inuutissarsiutigalugu piniarnermut allaaniarnermullu Inatsisartut inatsisaata allanngortinneqarneranut Inatsisartut inatsisaata nr. 10, 29. april 1992-imeersup, inuutissarsiutiginagu piniarneq, aallaaniarneq aalisarnerlu pillugit Inatsisartut inatsisaata nr. 11, 29. april 1992-imeersup § 5 aamma § 6 imm. 1-ia, kiisalu pinngortitamik allanngutsaaliuineq pillugu Inatsisartut inatsisaata nr. 11, 12. november 1980-imeersup § 2-ani imm. 3 aamma § 19 malillugit aalajangersarneqarput:
Atuuffii.
§ 1. Nalunaarut atuuppoq Kalaallit Nunaanni umimmaat (Ovibus moschatus) eqqissimatinneqarneranut aammalu inuutissarsiutigalugu inuutissarsiutiginagulu piniarneqarnerannut aallaaniarneqarnerannullu.
Pisassarisat amerlassusilerneqarnerat agguataarneqarnerallu.
§ 2. Naalakkersuisut ukiut tamaasa umimmaat aallaaniarnikkut pisarineqarsinnaasut amerlassusissaat aalajangersartarpaat.
Imm. 2. Norraat kulavaallu norrallit piniaqqusaanngillat. Pisassarisat suli Naalakkersuisunit killiliiffigineqarsinnaapput umimmaat suiassusaannut utoqqaassusaannullu aalajangersimasunut.
Imm. 3. Pisassarisat imm. 1-3-mi aalajangersarneqartut Naalakkersuisut agguataarsinnaavaat aallaaniarnermut allagartat suussusii malillugit kommuninut imaluunniit sumiiffinnut kommunit aggornerisa avataaniittunut KNAPK aamma KANUKOKA isumasioqatigereerlugit.
Imm. 4. Ukiumoortumik pisassiissutit aammalu tamatumani piumasaqaatit piffissap umimmanniarfissap aallartinnginnerani nuna tamakkerlugu tusagassiuutitigut tamanut saqqummiunneqassapput.
Akuersissutinik tunniussuineq.
§ 3. Kommunini kommunalbestyrelsit kommunini inuit allattorsimaffiannut najugaqartutut allassimasunut aammalu atuuttumik inuutissarsiutigalugu piniarnermut aallaaniarnermullu allagartalinnut imaluunniit inuutissarsiutiginagu piniarnermut aallaaniarnermullu allagartalinnut akuersissutinik tunniussissapput.
Imm. 2. Kommuni aggornerisa avataaniittunut Naalakkersuisut inuit allattorsimaffiannut najugaqartutut allassimasunut aammalu attuuttumik inuutissarsiutigalugu piniarnermut aallaaniarnermut imaluunnit inuutissarsiutiginagu piniarnermut aallaaniarnermullu allagartalinnut akuersissutinik tunniussissapput.
Imm. 3. Qinnuteqartunut inuutissarsiutigalugu piniarnermut aallaaniarnermullu allagartamik pigisaqartunut akuersissutinik tunniussineq pissaaq sumiiffimmi aalisartut piniartullu peqatigiiffiat suleqatigalugit. Qinnuteqartunut inuutissarsiutiginagu piniarnermut aallaaniarnermullu allagartamik pigisaqartunut tunniussineq makitsinikkut pissaaq.
Imm. 4. § 2-mi imm. 3-mi pisassiissutit iluini akiliilluni aallaaniarneqarsinnaasutut aalajangikkani akiliillutik aallaaniarnermi peqataasussanut inunnut Naalakkersuisut akuersissutinik tunniussisinnaapput. Aallaaniaqataasinnaatitaanermut piumasaqaatit aalajangersarneqarsimapput akiliilluni aallaaniarneq aalisarnerlu pillugit nalunaarummi immikkoortumi.
Piffissat sumiiffillu umimmanniarfiusinnaasut.
§ 4. Taamaallaat umimmanniartoqarsinnaavoq
1) Ittoqqortoormiit kommuniani, tassani umimmanniarnissaq akuerineqarsinnaavoq piffissani 20. august - 20. september aamma 20. november - 20. december,
2) Ivittuut kommuniani, tassani umimmanniarnissaq akuerineqarsinnaavoq piffissani 1. august - 20. august aammalu 1. november - 10. december,
3) Ivittuut kommuniani tammajuitsussarsiniarluni piniartitsinissamut umimmanniartitsisoqarsinnaavoq piffissani 1. august - 20. august aammalu 1. november - 10. december,
4) nunap ilaani matumani Ammalortup Nunaani aammalu Iperaarissap Nunaani akuerineqarsinnaavoq piffissami 1. august - 10. september, nunap assingani ilanngussami piniarfissaq I takuuk,
5) nunap ilaani matumani Perserajuut akiliilluni tammajuitsussarsiniarluni umimmanniarnissaq akuerineqarsinnaavoq piffissami 15. juli - 5. august, nunap assinga takuuk,
6) nunap ilaani matumani Ammalortup Nunaa aammalu Iperaarissap Nunaani ukiuunerani umimmanniarnissaq akuerineqarsinnaavoq piffissami 5. februar - 14. marts, aammalu
7) nunap ilaani Ammalortup Nunaata ilaani akiliilluni umimmanniarnissaq akuerineqarsinnaavoq piffissami 15. marts - 5. april.
Imm. 2. KNAPK aamma KANUKOKA isumasioqatigereerlugit Naalakkersuisut umimmanniarnissap imm. 1-mi nr. 4 aamma nr. 6 malillugit akuerineqarneranut atatillugu piffissat sumiiffiillu umimmanniarfiusinnaasut erseqqinnerusumik killissaat aammalu akiliilluni umimmanniarnissap imm. 1-mi nr. 5 aamma nr. 7 malillugit akuerineqarneranut atatillugu sumiiffiit umimmanniarfiusinnaasut erseqqinnerusumik killissaat aalajangersarsinnaavaat.
Imm. 3. Piffissani umimmanniarfiusinnaasuni ilaatinneqarput ulloq aallaaniarfiup aallartiffia naaffialu.
Imm. 4. Kalaallit Nunaata avannaarsuani kangianilu Nuna Allanngutsaaliugassatut Immikkoortitami umimmaat eqqissisimatitaanerat pillugu immikkut aalajangersakkat atuupput. Aalajangersakkat aalajangersarneqarput Nuna Allanngutsaaliugassatut Immikkoortitaq pillugu nalunaarummi immikkoortumi Kalaallit Nunaanni pinngortitamik allanngutsaaliuineq pillugu Inatsisartut inatsisaat malillugu nalunaarutigineqartumi.
Aallaaniarnissamut piumasaqaatit.
§ 5. Inuit § 3-mi imm. 1, imm. 2 aamma imm. 4 malillugit akuersissutinik pigisaqartut kisimik akuersissummilu pisassatut amerlatigisuinnarnik umimmanniarsinnaatitaapput.
Imm. 2. Akuersissut inuup nammineq pigisaraa allanullu tunniutissanaguluunniit tuniniarsinnaanagu.
Imm. 3. Akuersissummi allassimassapput umimmaat qassit pisarineqarsinnaanersut aammalu suiaassusii aamma qanoq utoqqaatigisut, aammalu umimmanniarneq qaqugu immaqalu sumi ingerlanneqassanersoq.
Imm. 4. Umimmanniarnissamut akuersissutinik tunniussuinermut atatillugu Naalakkersuisut amerlanerusunik piumasaqaateqarsinnaapput, taakkununnga ilanngullugit uumasunit piigassat tunniunneqarnissaat aammalu paasissutissat ilisimatuussutsikkut misissuinissami atugassat tunniunneqarnissaannik piumasaqaatit.
Umimmanniarnermi periaatsit.
§ 6. Umimmanniarnermi taamaallaat atorneqaqqusaavoq aallaat. Kaliiberi atorneqarsinnaasoq minnerpaaq 6,5 x 55-iuvoq. Imalissat aqerlortaqanngitsut manngersut atorneqassapput. Aallaasit eqqarasuartaatit eqittaannarissallu atorneqaqqusaanngil-lat. Taamaattoq akiliilluni aallaaniarnermi kaliiberi atorneqarsinnaasoq minnerpaaq 30-06-iuvoq imalissallu aqerlortaqanngitsunit manngersunit allaanerusut atorneqarsinnaallutik.
Imm. 2. Kalaallit Nunaata Kitaani umimmanniarnermi qimmilisartoqaqqusaanngilaq. Taamaattoq Naalakkersuisut akuersissutigisinnaavaat ukiuunerani umimmanniarnermi qimussit assartuutitut atorneqarnissaat. Umimmanniarfimmi qimmit pitutaanngitsut inerteqqutaapput.
Imm. 3. Timmisartut, helikopterit kiisalu qamutit motorillit suulluunniit umimmanniarnermi imaluunniit umimmanniarnermut atatillugu assartuutitut atoqqusaanngillat. Taamaattoq Naalakkersuisut akuersissutigisinnaavaat ukiuunerani umimmanniarnermut § 4 imm. 1-imi nr. 6 malillugu akuerisaasumut atatillugu snescooterit assartuutitut atorneqarnissaat.
Imm. 4. Akiliilluni umimmanniarnermut atatillugu qimussit snescooterillu assartuutitut atorneqarnissaat Naalakkersuisut akuersissutigisinnaavaat. Aammattaaq akiliilluni umimmanniarnermut atatillugu umimmanniarfimmut umimmanniarfimmiillu helikopterip assartuutitut atorneqarnissaa akuersissutigineqarsinnaavoq.
Umimmaat il.il. pisarineqartut atorneqarnissaat.
§ 7. Umimmaat pisarineqartut neqaat amiilu tamarmik pisaqarfimmi atorneqassapput imaluunniit tassanngaaniit qimagunneqassallutik.
Nakkutilliineq.
§ 8. Inunnut § 4 imm. 1-mi nr. 1, nr. 2, nr. 4 imaluunniit nr. 6 malillugu umimmanniarnissamut akuerineqarsimasunut akuersissummut ilanngullugu tunniunneqassapput nalunaaqutsiutassat normulikkat marlukkuutaat ataasiarlugit atugassat umimmammut ataatsimut atugassat umimmattassap pisarineqarsimaneranut uppernarsaatissatut.
Imm. 2. Umimmaap pisarineqareerneratigut nalunaaqutsiutassat ataasiarlugit atugassat umimmaap quttoraanut sukkanerpaamik kingusinnerpaamik angallammut ikineqalernerani ivertinneqassapput katajaatsumut erseqqissumullu inissillugit.
Imm. 3. Nalunaaqutsiutassat ataasiarlugit atugassat ivertisimaneqassapput umimmaap tunineqarnissaata imaluunniit tamakkerlugu atorneqarnissaata tungaanut.
Imm. 4. Nalunaaqutsiutassat ataasiarlugit atugassat tunniunneqarsimasut atorneqanngitsulli sapinngisamik piaarnerpaamik kingusinnerpaamillu piffissap umimmanniarfissaatitaasup naaneratigut kommunimut tunniunneqassapput.§ 9. Umimmanniartup kialuunniit politiit, aallaaniarnermik nakkutilliisut imaluunniit inuit allat taamatut piginnaanilerneqarsimasut piumasaqaateqarnerisigut umimmanniarsinnaatitaanerminut uppernarsaat atuuttoq takutissinnaassavaa.
Imm. 2. Umimmaat pissatat siumorneqartut pillugit tamatuminnga piaarnerpaamik ilisimatinneqassapput nakkutilliisut imm. 1-imi taaneqartut arlaat, Naalakkersuisunit pisinnaatinneqarsinnaasut umimmak pineqartoq toqunneqarnissaanut. Umimmak toqunneqarsimasoq Namminersornerullutik Oqartussanut tutsinneqassaaq.
Tigusinerit nuussinerillu.
§ 10. Umimmaat soriarsinnaajunnaarsinneqarnissaat tiguneqarnissaallu aammalu Naalakkersuisut akuersiteqqaarsimatinnagit ungalusat iluiniisinneqarnissaat inerteqqutaavoq.
Imm. 2. Umimmaat sumiiffinnut nutaanut nuunneqarnissaat aatsaat pisinnaavoq Naalakkersuisut akuersiseqqaarlugit.
Immikkut akuersissuteqarsinnaaneq.
§ 11. Siunertanut ilisimatuussutsikkut siunertaqartunut nalunaarummi aalajangersakkat Naalakkersuisunit immikkut akuersissuteqarfigineqarsinnaapput.
Imm. 2. Naalakkersuisut aamma nalunaarutip malittarisassaani immikkut akuersissuteqarsinnaavoq, umimmak inuit inuuneranik, timmisartumik imaluunniit pisortat angallatsitsineranik navianartorsiortitsissagaluarpat, politiit, aallaaniarnermi nakkutilliisut imaluunnit allat taamatut pisinnaatitaaffilerneqarsimasut umimmak pineqartoq toqussallugu. Umimmak toqutaq taassuma kingorna Namminersornerullutik Oqartussanut tutsinneqassaaq.
Pineqaatissiinerit.
§ 12. § 2-mi imm. 2-mik aamma §§ 4 - 10 aalajangersakkanik unioqqutitsinerit akiliisitaanermikpineqaatissinneqarsinnaapput.
Imm. 2. § 2-mi imm. 2-mik aamma §§ 4 - 10 aalajangersakkanik imioqqutitsilluni umimmaat pisarineqartut neqaat, amii avalequtaallu allat arsaarinninnikkut Namminersornerullutik Oqartussanut tutsinneqarsinnaapput.§ 13. Nalunaarut atortuulerpoq ulloq 18. juli 1995. Tamatumunnga peqatigitillugu atorunnaarsinneqarpoq Kalaallit Nunaanni umimmanniarneq pillugu Namminersornerullutik Oqartussat nalunaarutaat nr. 4, 7. februar 1995-imeersoq.
Namminersornerullutik Oqartussat, ulloq 18. juli 1995.
Pāviāraq Heilmann/
Petrus Biilman
