Tuttut eqqissisimatitaanerat piniagaanerallu pillugu Namminersornerullutik Oqartussat nalunaarutaat nr. 18, 18. juli 1995-imeersoq.

Inuutissarsiutigalugu piniarnermut aallaaniarnermullu Inatsisartut inatsisaata nr. 12, 22. november 1984-imeersup § 3, imm. 3, § 4, imm. 1 §§ 6-a aamma 7-a aammalu § 9 imm. 2-a, allanngortinneralu Inatsisartut inatsisaat inuutissarsiutigalugu piniarnermut aallaaniarnermullu Inatsisartut inatsisaata allanngortinneqarneranut nr. 4 16. maj 1990-meersup aamma inuutissarsiutigalugu piniarnermut aallaaniarnermullu Inatsisartut inatsisaata allanngortinneqarneranut Inatsisartut inatsisaata nr. 10, 29. april 1992-imeersup, inuutissarsiutiginagu piniarneq, aallaaniarneq aalisarnerlu pillugit Inatsisartut inatsisaata nr. 11, 29. april 1992-imeersup § 5 aamma § 6 imm. 1-ia, kiisalu pinngortitamik allanngutsaaliuineq pillugu Inatsisartut inatsisaata nr. 11, 12. november 1980-imeersup § 2-ani imm. 3 aamma § 19 kiisalu 1995-imut Inatsisartut aningaasaqarnermut ilassutitut akuersissutissanut inatsimmi 2-mi ulloq 9. juni 1995-mi konto pingaarnermut 50.06.22 "Tuttunniarnissamut akiliutit" oqaasertaliussat malillugit aalajangersarneqarput:

 

Atuuffii.

§ 1. Nalunaarut atuuppoq Kalaallit Nunaanni tuttut (Rangifer tarandus) eqqissisimatitaanerannut aamma inuutissarsiutigalugu inuutissarsiutiginagulu piniarneqarnerannut aallaaniarneqarnerannullu, tuttuutit nujuitsut tassani pineqanngillat.

 

Eqqissisimatitaanerat.

§ 2. Tuttut Kalaallit Nunaanni tamarmi eqqissisimatitaapput periarfissiissutit § 3-mi taaneqartut eqqaassanngikkaanni.

 

Pisassarisat amerlassusilerneqarnerat agguataarneqarnerallu.

§ 3. Naalakkersuisut ukiumoortumik tuttut aallaaniarnikkut pisarineqarsinnaasut amerlassusissaat aalajangersarsinnaavaat.
Imm. 2. Norraat kulavaallu norrallit piniaqqusaanngillat. Pisassarisat suli Naalakkersuisunit killiliiffigineqarsinnaapput tuttut suussusaannut utoqqaassusaannullu aalajangersimasunut.
Imm. 3. Pisassarisat Naalakkersuisut pisassiissutinut ikinnerusunut sumiiffiit killilikkat iluini piniarneqarsinnaasunut agguataarsinnaavaat.
Imm. 4. Pisassarisat imm. 1-3-mi aalajangersarneqartut Naalakkersuisut agguataarsinnaavaat aallaaniarnermut allagartat suussusii malillugit kommuninut imaluunniit sumiiffinnut kommunit aggornerisa avataaniittunut KNAPK aamma KANUKOKA isumasioqatigereerlugit.
Imm. 5. Ukiumoortumik pisassiissutit aammalu tamatumani piumasaqaatit piffissap tuttunniarfissap aallartinnginnerani nuna tamakkerlugu tusagassiuutitigut tamanut saqqummiunneqassapput.

 

Akuersissutinik tunniussuineq.

§ 4. Kommunini kommunalbestyrelsit kommunini inuit allattorsimaffiannut najugaqartutut allassimasunut aammalu atuuttumik inuutissarsiutigalugu piniarnermut aallaaniarnermullu allagartalinnut imaluunniit inuutissarsiutiginagu piniarnermut aallaaniarnermullu allagartalinnut akuersissutinik tunniussissapput.
Imm. 2. Kommuni aggornerisa avataaniittunut Naalakkersuisut inuit allattorsimaffiannut najugaqartutut allassimasunut aammalu attuuttumik inuutissarsiutigalugu piniarnermut aallaaniarnermut kiisalu inuutissarsiutiginagu piniarnermut aallaaniarnermullu allagartalinnut akuersissutinik tunniussissapput.
Imm. 3. Imm. 1 aamma imm. 2 malillugit tuttumik pisaqarsinnaatitaanermut akuersissummik tunniussinermut atatillugu inuutissarsiutiginagu aallaaniarnermut allagartamik pigisaqartut tuttumut ataatsimut 500 kr.-inik aamma inuutissarsiutigalugu aallaaniarnermut allagartamik pigisaqartut tuttumut ataatsimut 100 kr.-imik akiliuteqartinneqassapput. Akuersissutip tunniunneqannginnerani aningaasat Namminersornerullutik Oqartussanut akilerneqareersimassapput.
Imm. 4. Qinnuteqartunut inuutissarsiutigalugu piniarnermut aallaaniarnermullu allagartamik pigisaqartunut akuersissutinik tunniussineq pissaaq sumiiffimmi aalisartut piniartullu peqatigiiffiat suleqatigalugit. Qinnuteqartunut inuutissarsiutiginagu piniarnermut aallaaniarnermullu allagartamik pigisaqartunut tunniussineq makitsinikkut pissaaq.

 

Tuttunniarnissamutpiffissarititat.

§ 5. Tuttunniarnissaq taamaallaat akuerisaavoq piffissami augustip 10-aniit sep-temberip 15-ianut ullut taaneqartut ilanngullugit.

 

Aallaaniarnissamut piumasaqaatit aamma uumasut misissuiffigineqarnissaannut atugassanik katersuineq.

§ 6. Inuit § 4-mi imm. 1 imaluunniit imm. 2 malillugu akuersissummik pigisaqartut kisimik, akuersissummilu pisassatut amerlatigisuinnarnik, tuttunniarsinnaatitaapput.
Imm. 2. Akuersissut inuup nammineq pigisaraa allanullu tunniutissanaguluunniit tuniniarsinnaanagu.
Imm. 3. Akuersissummi allassimassapput tuttut qassit pisarineqarsinnaanersut aammalu suiaassusii aamma qanoq utoqqaatigisut, aammalu tuttunniarneq qaqugu sumilu ingerlanneqassanersoq.
Imm. 4. Tuttunniartoq kinaluunniit tuttumik pisaqartoq pisussaatitaavoq tuttup alleruisa, kigutai ilanngullugit, nassarnissaannut aammalu tuttu qanga sumilu pisarisimanerlugu, tuttup suiaassusia aamma qanoq oqimaatsigissangatinneqarnersoq kiisalu nalunaaqutsiutassap normua pillugit paasissutissiinissaminut, tak. § 9, imm. 1.
Imm. 5. Paasissutissat tuttunniareernerup kingorna allanneqassapput tuttullu allerui akuersissutip normuanik nalunaaqutsersimasut ilanngullugit kommunimut tunniunneqartussamut. Paasissutissat tuttullu allerui piaarnerpaamik tuttunniarnerup kingorna tunniunneqassapput kingusinnerpaamillu tuttunniarnerup sapaatip akunnerinik pingasunik tuttunniarfissaq ulloq kingoqqullugu.
Imm. 6. Paasissutissat alleqqullu kommunimit ataatsimoortillugit nassiuteqqinneqassapput Pinngortitaleriffimmut, Box 570, 3900 Nuuk, uumasup misissuiffigineqarnissaanut atugassatut.

 

Tuttunniarnermi periaasissat.

§ 7. Tuttunniarnermi sakkut atorneqartussatut akuerineqartut tassatuaapput qoorortuut minnerpaamik kaliber .222 Rem. nerutussusillit. Qoorortuuaqqat, timmiarsiutit aamma aallaasit eqqarasuartaatit eqittaannarissallu tuttunniarnermi atoqqusaanngillat.
Imm. 2. Tuttunniarfinni aavarnerup nalaani qimmilisartoqaqqusaanngilaq.
Imm. 3. Timmisartut, helikopterit kiisalu qamutit motorillit suulluunniit tuttunniarnermi imaluunniit tuttunniarnermut atatillugu assartuutitut atoqqusaanngillat.

 

Uummasut pisarineqartut atorneqarnissaat il.il.

§ 8. Tuttut pisarineqartut neqaat tamakkerlugit pisaqarfiusumi atorneqassapput imalunniit tassanngaanniit nassarneqassallutik.
Imm. 2. Tuttut nassuinik katersisoqarsinnaavoq taamaallaat aavarfiup nalaani.

 

Nakkutilliineq.

§ 9. Inuit § 4-mi imm. 1 aamma 2 aamma § 6-imi imm. 1 naapertorlugit tuttunniarnissamut akuerineqartut akuersissummut ilanngullugu uumasumut ataatsimut nalunaaqutsiutassat ataasiaannarlugit atortakkat marluk assigiinnik normullit pissarsiarissavaat uumasut pisarineqartut kingusinnerusukkut uppernarsineqarnissaannut atugassat.
Imm. 2. Uumasumik pisaqarniariarluni, kingusinnerpaamillu angallammut ikineqarneratigut tuttunniarnermi angallatigineqartumut, nalunaaqutsiutassat ataasiaannarlugit atortakkat quttoraanut aalajangerlugit ikkunneqassapput, katajaatsunngorlugit takujuminartumullu inissillugit.
Imm. 3. Nalunaaqutsiutassat ataasiaannarlugit atortakkat uumasumiiginnassapput taassuma tunineqarnissaata atorneqarnissaataluunniit tungaanut.
Imm. 4. Nalunaaqutsiutassat ataasiaannarlugit atortakkat tunniunneqarsimasut kisiannili atorneqanngitsut sapinngisamik piaartumik kingusinnerpaamillu piffissap aallaaniarfiusup naaneratigut kommunimut tunniunneqassapput.

§ 10. Tuttunniartoq kinaluunniit politiit, aallaaniarnermik nakkutilliisut imaluunniit inuit allat tamatumunnga pisinnaatitaasut piumasaqarneratigut aallaaniarsinnaatitaanerminut uppernarsaammik atuuttumik takutitsisinnaasariaqarpoq.
Imm. 2. Tuttut pissatat naammattoorneqarpata piaartumik tamanna nakkutilliinermik suliaqartunut imm. 1-imi taaneqartunut nalunaarutigineqassaaq, Naalakkersuisunit pisinnaatinneqarsinnaasut tuttu pineqartoq toqunneqarnissaanut. Tuttu toqunneqarsimasoq Namminersornerullutik Oqartussanut tutsinneqassaaq.

 

Immikkut akuersissuteqarneq.

§ 11. Naalakkersuisut ilisimatusarnermut tunngasunut siunertanut nalunaarummi aalajangersakkat saneqqunneqarnissaannut immikkut akuersissuteqarsinnaapput.
Imm. 2. Naalakkersuisut aamma nalunaarutip malittarisassaani immikkut akuersissuteqarsinnaavoq, tuttu inuit inuuneranik, timmisartumik imaluunniit pisortat angallatsitsineranik navianartorsiortitsissagaluarpat, politiit, aallaaniarnermi nakkutilliisut imaluunnit allat taamatut pisinnaatitaaffilerneqarsimasut tuttu pineqartoq toqussallugu. Tuttu toqutaq taassuma kingorna Namminersornerullutik Oqartussanut tutsinneqassaaq.

 

Pineqaatissiinerit

§ 12. § 2-mi, § 3-mi imm. 2-mi kiisalu §§ 5-imiit 10-mut aalajangersakkanik unioqqutitsinerit akiliisitsinernik pineqaatissiissutaasinnaapput.
Imm. 2. § 2, § 3-mi imm. 2-mik aamma §§5-10 aalajangersakkanik unioqqutitsilluni tuttut pisarineqartut neqaat, amii avalequtaallu allat arsaarinninnikkut Namminersornerullutik Oqartussanut tutsinneqarsinnaapput.

 

Atuutilersitsineq il.il.

§ 13. Nalunaarut una atuutilerpoq 18. juli 1995.
Imm. 2. Nalunaarutit makku atorunnaarsinneqarput:
1) Kalaallit Nunaata Kitaani tuttunik eqqissisimatitsineq pillugu Namminersornerullutik Oqartussat nalunaarutaat nr. 16, 22. juli 1993-imeersoq.
2) Namminersornerullutik Oqartussat nalunaarutaat Kalaallit Nunaanni tuttunik eqqissisimatitsinermut tunngasoq nr. 29, 7. juli 1990-imeersoq.
Imm. 3. Tuttut eqqissisimatitaaffii imm. 2 nr. 2 nalimaarummi pineqartumi § 4 atorunnaarsinneqarpoq.

Namminersornerullutik Oqartussat, ulloq 18.juli. 1995

Pāviāraq Heilmann

/

Petrus Biilman