Kangerlussuup akitsuuteqarfiunnginnissaa pillugu Namminersornerullutik Oqartussat nalunaarutaat nr. 7, 16. februar 1995-imeersoq.

Nioqqutissanik eqqussuineq annissuinerlu pillugit Inatsisartut inatsisaanni nr. 18, 30. oktober 1992-imeersumi, kingullermik Inatsisartut inatsisaatigut nr. 16, 3. november 1994-imeersukkut allanngortinneqartumi, § 19, imm. 2 aamma 3 kiisalu § 46, imm. 4 naapertorlugit makku aalajangersarneqarput:

 

§ 1. Nalunaarummi pineqarpoq Kangerlussuarmi mittarfiup eqqaa, 1. oktober 1992 tikillugu Kalaallit Nunaata illersorneqarnissaa pillugu isumaqatigiissummi 27. april 1951-imeersumi ilaatinneqartoq.
Imm. 2. Nioqqutissat imm. 1-imi taaneqartumut, tassani inuussutissarsiornermut atorneqarnissaat imaluunniit tuniniaqqinnissaat siunertaralugu eqqunneqartut aammalu nioqqutissat inuinnarnit, tamaani najugaqavissunit imaluunniit aalajangersimasumik najugaqarallartunit, nammineq atugassatut eqqunneqartut kiisalu nioqqutissat ilisimatusaatigalugu angalaqatigiinnit ilisimasassarsiortunillu eqqunneqartut, takuuk § 4, eqqussuinermi akitsuummik akitsuuserneqassanngillat.

§ 2. Nioqqutissanik, eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § 1, imm. 1, nr. 3-mi aamma 7-imiit 10-mut pineqartunik aatsaat Kangerlussuarmut eqqussisoqarsinnaavoq Nioqqutissanik Akitsuutinillu Nakkutilliisoqarfiup akuersissuteqarneratigut.
Imm. 2. Akuersissut taamaallaat nioqqutissanut Kangerlussuarmi inuussutissarsiutigalugu tuniniaqqitassatut eqqunneqartunut atuutsinneqarsinnaavoq.
Imm. 3. Tikinnermi nioqqutissat akitsuuteqanngitsut nassatarisinnaasat pillugit Namminersornerullutik Oqartussat nalunaarutaat naapertorlugu nioqqutissanik eqqussinermi akuersissut imm. 1-imi pineqartoq piumasaqaataanngilaq.

§ 3. Nioqqutissat akitsuuteqartinneqanngitsut akitsuuteqarfimmut anniseqqusaanngillat, nassaqqusaanatilluunniit, taamaaliornissamut Akileraartarnermi Pisortaqarfik akuersissuteqaqqaartinnagu.
Imm. 2. Aatsaat taamaaliornissamut akuersissuteqartoqarsinnaavoq eqqussuinermi akitsuutit pillugit Inatsisartut inatsisaat nr. 19, 30. oktober 1992-imeersoq naapertorlugu akitsuummik akiliisoqartillugu.
Imm. 3. Imm. 1-imi 2-milu aalajangersakkanut ilaatinneqanngillat nuunnermi nassiussat aamma angalanermi nassatat, eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § 1, imm. 1, nr. 22-mi aamma 23-mi pineqartutut ittut, inuussutissarsiornermut atorneqarnissaat siunertarinagu eqqunneqarsimasut aammalu sivikinnerpaamik qaammatini arfinilinni piginnittuminnit atorneqareersut kiisalu nioqqutissat, tikinnermi nioqqutissanik akitsuuteqanngitsunik eqqussisinnaaneq pillugu Namminersornerullutik Oqartussat nalunaarutaat naapertorlugu Kangerlussuarmut eqqunneqartut Kangerlussuarmiluunniit pisiarineqarsimasut.

§ 4. § 2-mi § 3-milu aalajangersakkat apeqqutaatinnagit nioqqutissanik ilisimatusarlutik angalaqatigiinni ilisimasassarsiortunilu peqataasut inuussutissarsiutiginagu sermersuarmi imaluunniit Kangerlussuup nunataani ilisimasassarsiornermut atatillugu nerisassatut atugassatullu Kangerlussuarmut eqqussisinnaapput.
Imm. 2. Nioqqutissanik Akitsuutinillu Nakkutilliisoqarfik aalajangersagaliorsinnaavoq nioqqutissat akitsuusernagit ilisimatusaatigalugu angalaqatigiinnit ilisimasassarsiortunillu Kangerlussuarmut eqqunneqartut Nioqqutissanik Akitsuutinillu Nakkutilliisoqarfiup erseqqinnerusumik toqqagaani toqqortarineqassasut.

§ 5. Inuit Kangerlussuarmi najugaqavissut aalajangersimasumilluunniit najugaqarallartut Kangerlussuarmi Kangerlussuullu eqqaani namminneq ilaquttamillu atugassaminnik nungutassaminnillu Kangerlussuarmi sutorniartarfinni niuertarfinnilu nioqqutissanik akitsuuteqanngitsunik pisiniarsinnaapput.
Imm. 2. Inuit Kangerlussuarmi najugaqavissuunngitsut aalajangersimasumilluunniit najugaqarallartuunngitsut Kangerlussuup eqqaani, taamaattorli takuuk § 6, namminneq atugassaminnik nungutassaminnillu Kangerlussuarmi sutorniartarfinni kiisalu nioqqutissanik akitsuuteqanngitsunik, imigassat aalakoornartortallit pinnagit, Kangerlussuarmi niuertarfinni allani sulisut niuertarfiginngisaani pisiniarsinnaapput.
Imm. 3. Takornariat, pikkorissariat ataatsimeersuariallu, atasuinnarmik ulluni unnuanilu marluni Kangerlussuarmiittut, Kangerlussuarmi najugaqarallarnerminni, taamaattorli takuuk § 6, nammineq atugassaminnik nungutassaminnillu Kangerlussuarmi sutorniartarfmni kiisalu Kangerlussuarmi niuertarfinni allani sulisut niuertarfiginngisaani pisiniarsinnaapput.
Imm. 4. Nioqqutissanut pisiarineqartunut imm. 1-imiit 3-mut taaneqartunut aammattaaq ilaatinneqarput nioqqutissat, nioqqutissat akitsuuteqanngitsut atorlugit sananeqarsimasut.

§ 6. Kangerlussuarmi sutorniartarfiit niuertarfiillu inunnut Kangerlussuarmi najugaqavissuunngitsunut aalajangersimasumilluunniit najugaqarallartuunngitsunut ullormut unnuamullu ataatsimut tupanit nioqqutissianik ima annertutigisunik nioqquteqarsinnaapput: sikaritsit 40-t imaluunniit sikaat 10-t imaluunniit cigarillot 20-t imaluunniit tupat 50 g.

§ 7. Kangerlussuup eqqaani piniariarfmni aallaaniarfinnilu piniariarnermi aallaaniarnermilu peqataasut nerisassaannik atugassaannillu niuertarfiit, taamaattorli takuuk § 6, kiisalu sutorniartarfiit Kangerlussuarmiittut, imigassat aalakoornartortallit pinnagit, nioqqutissanik akitsuuteqanngitsunik, tamatumani ilaallutik nioqqutissat taakkunannga sananeqarsimasut, peqataasut amerlassusii ullullu unnuallu qassit tamaaniissanganerit eqqarsaatigalugit nioqquteqarsinnaapput.

§ 8. Nunanit allanit tikittunut nunanulluunniit allanut aallartussanut Kangerlussuup mittarfiani niuertarfiit nioqqutissanik akitsuuteqanngitsunik nioqquteqartarnissaat Akileraartarnermi Pisortaqarfiup akuersissutigisinnaavaa.
Imm. 2. Umiarsuit timmisartullu Kangerlussuarmiit danskit, savalimmiormiut nunalluunniit allat umiarsualiviannut imaluunniit mittarfiannut ingerlasussat taquassaannik nioqqutissanik akitsuuteqanngitsunik nioqquteqarnissamut Akileraartarnermi Pisortaqarfik akuersissuteqarsinnaavoq.

§ 9. §§-ini 4-miit 8-mut pineqartut saniatigut inunnut akitsuuteqanngiffiusup avataani najugalinnut Kangerlussuarmi nioqqutissanik akitsuuteqanngitsunik nioqquteqarnissaq, atukkiinissaq allatulluunniit tunniussinissaq inerteqqutaavoq.
Imm. 2. §§-ini 4-miit 5-imut, § 7-imi § 8, imm. 2-milu pineqartut saniatigut suliffeqarfinnut akitsuuteqanngiffiusumi aalajangersimasumik atassuteqanngitsunut Kangerlussuarmi nioqqutissanik akitsuuteqanngitsunik nioqquteqarnissaq, atukkiinissaq allatulluunniit tunniussinissaq inerteqqutaavoq.

§ 10. Akileraartarnermi Pisortaqarfiup pisortat oqartussaasut allat maleruagassat malinneqarnerinik nakkutilliisussatut piginnaatissinnaavai.

§ 11. § 2, imm. 1-imik, § 3, imm. 1-imik aammalu § 9-mik unioqqutitsineq akiliisitsinikkut pillarneqaatissiissutaasinnaavoq, soorluttaaq nioqqutissaq, taannaluunniit peqanngippat aningaasat taassuma nalingata angeqqatai, arsaarinnissutigineqarsinnaasut.
Imm. 2. §§-ini 5-imiit 8-mut aalajangersakkat sutorniartarfik, niuertarfik assigisaaluunniit sinnerlugu unioqqutinneqarpata sutorniartarfimmik, niuertarfimmik il.il. piginnittoq, attartortoq, akisussaalluni naalagaasoq assigisaaluunniit akiliisinneqarsinnaavoq, piaaraluneerluni mianersuaalliorujussuarluniluunniit unioqqutitsisimanermut pisuutinneqarsinnaaguni.

§ 12. Nalunaarut ullormi 1. marts 1995-imi atuutilissaaq.
Imm. 2. Tamatumunnga ilutigitillugu Kangerlussuup akitsuuteqarfiunngissaa pillugu Namminersornerullutik Oqartussat nalunaarutaat nr. 38, 17. december 1992-imeersoq atorunnaarsinneqassaaq.

Namminersornerullutik Oqartussat, ulloq 16. februar 1995.

Emil Abelsen

/

Kaare Hagemann