Tikinnermi nioqqutissanik akitsuuteqanngitsunik eqqussisinnaaneq pillugu Namminersornerullutik Oqartussat nalunaarutaat nr. 6, 16. februar 1995-imeersoq.

Nioqqutissanik eqqussuineq annissuinerlu pillugit Inatsisartut inatsisaanni nr. 18, 30. oktober 1992-imeersumi, kingullermik Inatsisartut inatsisaatigut nr. 16, 3. november 1994-imeersukkut allanngortinneqartumi, § 17 aamma § 46, imm. 4 naapertorlugit aalajangersarneqarput:

 

§ 1. Tikinnermi angalasut nioqqutissanik akitsuuteqanngitsunik nassarsinnaatitaapput imaluunniit pisisinnaatitaapput kinguliini taagorneqartutut annertussuseqartunik:
1) Sikaritsit 200-t imaluunniit sikaat 50-it imaluunniit cigarillossit 100-t imaluunniit tupat 250 g,
2) Sikaritsinut imusivissat imaluunniit pappiarartassat immertariaannaat 200-t,
3) Imigassaq kimittooq (22 pct. sinnerlugu aalakoornartortalik) 1 literi imaluunniit hedviinni (15-22 pct.-imik aalakoornartortalik) 2 literi,
4) Viinni nerriseq (15 pct. inorlugu aalakoornartortalik) 2,25 literi,
5) Immiaaqqat 2 literi,
6) Imeruersaatit kulsyretallit 2 literi,
7) Tipigissoq 50 g aamma 0,25 literi tipigissut kimikinnerit. Tamakkua saniatigut kiinnamut tarngutit tipigissullu allat 1.000 koruunit nalinginut,
8) Sukkulaatinit mamakujuttunillu nioqqutissiat katillugit 2 kg,
9) Kaffit imaluunniit tiit 1 kg,
10) Neqi, neqinit nioqqutissiat imaluunniit timmissat katillugit 5 kg, aamma
11) Oqaluttartup nuutai, makku immiussivigineqarsimasut imaqanngitsullu: kassettebåndit, videobåndit, video- aamma cd-pladet kiisalu videokkut pinnguaatit sungiusaatillu il.il., katillugit amerlanerpaamik 500 koruunit nalinginut.
Imm. 2. Inuit 18-inik ukioqalereersimasut kisimik immiaaqqanik, viinninik imigassanillu kimittuunik akitsuuteqanngitsunik pisisinnaapput.
Imm. 3. Inuit 17-inik ukioqalereersimasut kisimik tupanit nioqqutissianik akitsuuteqanngitsunik pisisinnaapput.

§ 2. Tikittunut nioqqutissanik akitsuuteqanngitsunik nioqquteqarneq § 1 naapertorlugu pissaaq, mittarfinnilu taamatut nioqquteqarnissamut Akileraartarnermi Pisortaqaríîmmit akuerineqarsimasuni taamaallaat pisinnaalluni.

§ 3. Angallassinermi sulisuusut, tassa inuit umiarsuarni timmisartunilu nunat tamat akornanni angalasuni angallassissutip ingerlanneqarnerani imaluunniit taassuma iluani suliaqartut, ullut unnuallu 15-it inorlugit sivisussusilimmik Kalaallit Nunaata avataaniikkallarnerup kingorna uternerminni makkuninnga eqqussisinnaa-titaapput:
1) sikaritsit 60-it imaluunniit sikaat 40-t imaluunniit cigarillossit 50-it imaluunniit tupat 250 g,
2) hedviinni 2 literi aamma viinni nerriseq 2,25 literi, kisianni imigassanik kimittuunik pinnatik,
3) tipigissoq 50 g aamma 0,25 literi tipigissoq kimikinneq, aamma
4) kaffit tiilluunniit 500 g.
Imm. 2. Ulluni 15-ini taakkuluunniit sinnerlugit Kalaallit Nunaata avataaniikkallarnerup kingorna angallassinermi sulisuusut § 1-imi maleruagassat naapertorlugit nioqqutissanik nassarsinnaapput.

§ 4. Umiarsuarni Kalaallit Nunaata imartaaniinnerminni nioqqutissanik akitsuuteqanngitsunik nassataqarnissaminnut akuerineqarsimasuni umiarsuup inuttaanut ataatsimut ullormut unnuamullu ataatsimut naatsorsuullugu makku nassarneqarsinnaapput: Viinni 0,25 literi, imigassaq kimittooq 0,25 literi aamma tupanit nioqqutissiat 40 g.
Imm. 2. Umiarsuarni inuttaasut, imm. 1 naapertorlugu nioqqutissanik akitsuuteqanngitsunik pissarsisimasut, akitsuuteqarfiusumit aallarnissartik pissutigalugu umiarsuarmit niusimasut nioqqutissanik akitsuuteqanngitsunik §§-ini 1-imi 3-milu annertussusissamut aalajangersakkat annertoqataannik, nassataqarsinnaatitaapput. Nioqqutissat taakku akitsuuteqarfiusumi atorneqaqqusaanngillat.
Imm. 3. Imm. 1 naapertorlugu akitsuuteqannginnissaq taamaallaat nioqqutissanut, umiarsuup akitsuuteqarfiusup avataani pisiarisimasaanut, atuuppoq.

§ 5. Takornariat nunat allamiut umiarsuaannut ilaasartaatinut ilaasut umiarsuup Kalaallit Nunaata imartaaniinnerani akitsuuteqanngitsunik atugaqarsinnaatitaapput. Inummut ataatsimut ulloq unnuarlu atorneqarsinnaasut imaapput: Viinni 0,25 literi, imigassaq kimittooq 0,25 literi aamma tupanit nioqqutissiat 40 g.
Imm. 2. Takornariat, imm. 1 naapertorlugu akitsuusigaanngitsumik atugaqartut, nioqqutissanik akitsuusigassanik allanik nunaliaasseqqusaanngillat, taamaallaat tupanit, sukkulaatinit aamma mamakujuttunit nioqqutissiat, nammineq atugassat. Kalaallit Nunaat aqqusaarlugu angerlamut aallarnissaq akuersissutigineqarpat takornariat § 1 naapertorlugu nioqqutissat akitsuuteqanngitsut nassatarisinnaavaat. Nioqqutissat taakku akitsuuteqarfiusumi atorneqaqqusaanngillat.
Imm. 3. Imm. 1 naapertorlugu akitsuuteqannginnissaq taamaallaat nioqqutissanut, umiarsuup akitsuuteqarfiusup avataani pisiarisimasaanut, atuuppoq.

§ 6. Inuit akitsuuteqarfiusumi aalajangersimasumik najugaqanngitsut najugaqarallartuunngitsulluunniit angalanerni nammineq atugassatut akitsuuteqanngitsumik eqqussinnaavaat tipigissut, kiinnamut tarngutit tipigissullu kimikinnerit nioqqutissanik eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § 1, nr. 18 naapertorlugu akitsuusigassaasut, taamaaliorsinnaappullu taakkua annertussusaat suunerilu piffissap angalaffissap sivisussusianut Nioqqutissanik Akitsuutinillu Nakkutilliisoqarfiup naleqquttuusorippagit.

§ 7. Inuit Kalaallit Nunaanniikkallarnerminni nammineq atugassatut angalanermi atortut, nioqqutissanik eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § 1, imm. 1, nr. 22-mi aamma 23-mi pineqartutut ittut akitsuusernagit eqqussinnaavaat, Nioqqutissanik Akitsuutinillu Nakkutilliisoqarfiup naliliinera tunngavigalugu annertussutsimikkut suunermikkullu angalanermi atortussatut nalinginnaasutut isigineqarsinnaappata.
Imm. 2. Akitsuusiinnginnissamut piumasarineqarpoq angalanermi atortut aallarnermi nassarneqarnissaat.

§ 8. Inuit Kalaallit Nunaanni aalajangersimasumik najugaqartut najugaqarallartulluunniit Kalaallit Nunaannut tikeqqinnerminni angalanermi atortut, nioqqutissanik eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § 1, imm. 1, nr. 18-imi, 22-mi 23-milu taaneqartutut ittut, akitsuuteqarfiusup avataani angalanermi nammineq atorsimasatik akitsuuteqanngitsumik eqquteqqissinnaavaat.

§ 9. §§-it 1 aamma 3-miit 8-mut malillugit akitsuusiinnginnissamut piumasarineqarpoq nioqqutissat/angalanermi atortut inummit nassarneqarnissaat imaluunniit tikinnermi inummit namminermit nassataniitinneqarnissaat, taamaalillugit nioqqutissat/angalanermi atortut tikiffimmi takutinneqarsinnaanngorlugit.

§ 10. Nalunaarummi matumani §§-inik 1-imiit 2-mut, § 3, imm. 1, § 4, imm. 2, § 5, imm. 2 aamma § 9-mik unioqqutitsineq akiliisitsinermik pillarneqaatissiissutaasinnaavoq, soorluttaaq nioqqutissaq taannaluunniit peqanngippat aningaasat taassuma nalingata amerlaqatai, arsaarinnissutigineqarsinnaasut.

§ 11. Nalunaarut manna 1. marts 1995 aallarnerfigalugu atortuulersinneqarpoq.
Imm. 2. Tamatumunnga peqatigitillugu tikinnermi nioqqutissat akitsuuteqanngitsut nassatarisinnaasat pillugit Namminersornerullutik Oqartussat nalunaarutaat nr. 33, 17. december 1992-imeersoq atorunnaarsinneqarpoq.

Namminersornerullutik Oqartussat, ulloq 16. februar 1995.

Emil Abelsen

/

Kaare Hagemann