Kalaallit Nunaanni umimmaanniarneq pillugu Namminersornerullutik Oqartussat nalunaarutaat nr. 4, 7. februar 1995-imeersoq.

Inuussutissarsiutigalugu piniarneq aallaaniarnerllu pillugit inatsisartut inatsisaanni nr. 12-imi 22. november 1984-imeersumi § 4, § 7 aamma § 9, Inuussutissarsiutigi-nagu piniarneq, aallaaniarneq aamma aalisarneq pillugit inatsisartut inatsisaanni nr. 11-mi 29. april 1992-imeersumi § 5 kiisalu pinngortitamik eqqissisimatitsineq pillugu inatsisartut inatsisaanni nr. 11-mi 12. november 1980-imeersumi § 2-mi imm. 1, § 18 aamma § 19 naapertorlugit aalajangersarneqarpoq:

 

Piffissat nunallu piniarfiusussat.

§ 1. Umimmak (Ovibus moschatus) Kalaallit Nunaanni eqqissisimatitaavoq.
Imm.2. Imm. 1-imi maleruagassamut ilaatinneqanngillat
1) Ittoqqortoormiit kommuniat, piffissani 20. augustimiit 20. septemberimut aamma 20. novemberimiit 20. decemberimut umimmanniarnissamut akuersissuteqarfigineqarsinnaasoq,
2) Angujaartorfmp Nunaa (Maniitsup kommunia), piffissami 1. augustimiit 25. septemberimut umimmanniarnissamut akuersissuteqarfigineqarsinnaasoq,
3) Nunatat ukuusut Pinguarsuk, Kiinnarissut ilaat, Perserajuut aamma Akuliarusiarsuup kangiatungaa piffissami ukiukkut umimmanniartoqarnissaanut akuersissuteqarfigineqarsinnaasut, aamma
4) Nunataq tassaasoq Ammalortup Nunaata ilaa, piffissami 15. martsimiit 5. aprilimut akiliilluni umimmanniartoqarnissaanut akuersissuteqarfigineqarsinnaasoq.
Imm. 3. Naalakkersuisut KNAPK KANUKOKA-lu isumasioreerlugit ukiuunerani piniartoqassatillugu piffissat piniarfissat sorpiaanerat sumilu pi-niartoqarnissaa aalajangertarpaat imm. 2-mi litra 3 malillugu, aammalu akiliilluni piniarfissap sorpiamiinnera imm. 2 litra 4 malillugu.
Imm. 4. Piffissap piniarfiusussap aallartiffiatut naaneratullu ullut taaneqartut piniarfissamut ilaapput.
Imm. 5. Kalaallit Nunaata Avannaani Tunumilu nunami eqissisimatitami umimmaat eqqissisimatitaanerannut aalajangersakkat immikkut ittut atuupput. Nuna eqqissisimatitaq pillugu immikkut nalunaarummi aalajangersakkat aalajangersarneqarsimapput, Kalaallit Nunaanni pinngortitamik eqqissisimatitsineq pillugu inatsisartut inatsisaat malillugu atuutilersinneqarsimasumi.

 

Pisassat amerlassusissaasa aalajangersarneqartarnerat.

§ 2. Ittoqqortoormiit kommunianni Angujaartorfiullu Nunaani (Maniitsup Kommuniani) umimmattarineqarsinnaasut amerlassusissaat (kvota) ukiut tamaasa Naalakkersuisut KNAPK KANUKOKA-lu isumasioreerlugit aalajangertassavaat, taamatuttaarlu § 1, imm. 2, litra 3 malillugu ukiuunerani piniartoqassatillugu.
Imm. 2. Pisassiissutaasut taakku (kvota) angutivissanut arnavissanullu aammalu qanoq utoqqaassuseqarnissaasa aalajangerneratigut killiliiffigineqarsinnaapput.

§ 3. Naalakkersuisut aalajangersaasinnaapput § 2-mi amerlassusiliunneqartut kommuninut aalajangersimasunut agguaanneqarnissaat pillugu.
Imm. 2. Ukiumut pisassiissutit kiisalu taakkununnga piumasaqaataasut piffissap piniarfiusinnaasup aallartinnginnerani tusagassiuutitigut nuna tamakkerlugu saqqummersartutigut radiokkullu saqqummiunneqartassapput.

 

Aallaaniarnissamutpiumasaqaatit.

§ 4. Inuit tamatumunnga akuersissummik pigisaqartut kisimik umimmassinnaatitaapput, aamma akuersissummi taaneqartutut taamaallaat amerlassusilinnik.
Imm. 2. § 2-mi amerlassusissatut killiliunneqartut iluannit Naalakkersuisut akuersissutinik tunniussisinnaapput inunnut
1) atuuttumik inuussutissarsiutigalugu aallaaniarnissamut allagartalinnut, imaluunniit
2) akiliilluni aallaaniarnermut peqataasimut, aallaaniarnermut peqataassagaanni piumasaqaatit akiliilluni aallaaniarneq aamma aalisarneq pillugit immikkut nalunaarummi aalajangersarneqarsimassallutik.
Imm. 3. Akuersissummi umimmattarineqarsinnaasut amerlassusii kiisalu sumi piffissallu qanoq ilinerani pisarineqarsinnaanersut allanneqarsimassapput.
Imm. 4. Naalakkersuisut § 3-mi pisassiissutaasut iluanni imm. 2-mi litra 1-imi imm. 3-milu pisassiinissamut piumasaqaataasut malillugit akuersissuteqarsinnaanermut oqartussaassuseq kommunalbestyrelsinut ataasiakkaanut tunniussisinnaavaat. Agguaassisoqartassaaq najukkani aalisartut piniartullu peqatigiiffii isumasioqatigereerlugit.

§ 5. Inuit § 4-mi imm. 2 imaluunniit 4 naapertorlugit Angujaartorfiup Nunaani imaluunniit Pinguarsummi, Kiinnarissut ilaanni, Perserajuuni aamma Akuliarusiarsuup kangiatungaani umimmanniarnissamut akuerineqarsimasut akuersissummut ilanngullugu nalunaaqutsersuutinik marlunnik ataasiaannarlugit atugassanik normulikkanik tunineqassapput umimmaat pisarineqartut kingusinnerusukkut uppernarsineqarnissaannut atugassanik.
Imm. 2. Umimmaap pisarineqarnerata kinguninngua nalunaaqutsiutassat katassinnaajunnaarlugit takulertorneqarsinnaasumillu quttoraannut ikkunneqassapput.
Imm. 3. Nalunaaqutsiussat umimmaap tunineqarnissaata nerineqarnissaataluunniit tungsaanut quttoraani atatinneqassapput.
Imm. 4. Nalunaaqutsiussassat tunniunneqarsimasut atorneqanngitsut piffissaq umimmanniarsinnaatitaaffik naaniariarpat kommunimut utertinneqassapput.

 

Piniariaatsit.

§ 6. Umimmanniarnermi qoorortooq kisimi atoqqusaavoq. Kaliberi atoqqu-saasoq minnerpaaq 6,5 mm-iuvoq. Aqerlut manngertumik qallikkat (hel mantel) atorneqassapput. Qoorortuut eqqarasuartaatit aamma eqittaannarissat atoqqusaanngillat. Taamaakkaluartoq akiliilluni piniarnermi sakkugineqartoq minnerpaamik 7,62 mm-iussaaq akerlullu tamakkerlutik poorsimanngikkaluartut atorneqarsinnaapput.
Imm. 2. Kitaani umimmanniarnermi qimmilisarnissaq inerteqqutaavoq. Taamaattorli Naalakkersuisut ukiukkut umimmanniarnermut atatillugu qamutit qimuttullit assartuutitut atorneqarnissaannut akuersissuteqarlutik nalunaaruteqarsinnaapput.
Imm. 3. Timmisartut, helikopterit kiisalu qamutit motorillit suulluunniit umimmanniarnermi imaluunniit piniarfissamukarnermut utimulluunniit atoqqusaanngillat. Taamaattorli Naalakkersuisut ukiukkut umimmanniarnermut atatillugu qamuteralaat assartuutitut atorneqarnissaannut akuersissuteqarlutik nalunaaruteqarsinnaapput soorlu § 1, imm. 2 litra 3-mi nalunaarutigineqartoq.
Imm. 4. Naalakkersuisut qamutit qimmillit qamuteralaallu akiliilluni umimmanniarnissamut atatillugu atorneqarnissaat nalunaarutigisinnaavaat. Aamma akiliilluni piniarnermut atatillugu nalunaarutigineqarsinnaavoq qulimiguullip piniarfimmut piniarfimmiillu assartuutigineqarsinnaanera..
Imm. 5. Umimmattarineqartut neqaat tamakkerlugit amiilu pisarineqarfianni atorneqassapput angerlaanneqassallutilluunniit.

 

Uumatillugit tigusisarneq aamma umimmaliisarneq.

§ 7. Kalaallit Nunaanni naalakkersuisut akuersiseqqaarsimatinnagit umimmaat ilisimajunnaarsinnissaat uumatillugillu tiguniarnissaat aammalu ungalusaniitinnissaat inerteqqutaavoq.
Imm. 2. Umimmannik uumasunik nujuartanik allammut nuussineq taamaallaat Kalaallit Nunaanni naalakkersuisut akuersiseqqaarlugit pisinnaavoq.

§ 8. Umimmaat unioqqutitsinikkut pisarineqartut neqaannik amiinillu kiisalu umimmaap ilaanik allamik sumilluunniit pisineq imaluunniit pissarsineq inerteqqutaavoq.

 

Immikkut akuersissuteqarneq.

§ 9. Siunertanut ilisimatuussutsikkut misissuinernut tunngasunut Nalakkersuisut nalunaarummi aalajangersakkat immikkut ittumik sanioqqunnissaannut aalajangiisinnaapput.

 

Pineqaatissiisarnerit.

§ 10. § 1-imi aamma §§ 4-miit 8-mut aalajangersakkanik unioqqutitsinerit akiliisitsissutaasinnaapput.
Imm. 2. § 1-imi aamma §§ 4-miit 8-mut aalajangersakkanik unioqqutitsinermi umimmaat unioqqutitsinikkut pisarineqartut pisiarineqartulluunniit neqaat, amii, niaquisa saarngi kiisalu umimmaat ilaat suulluunniit kiisalu sakkut arsaarinnissutaasinnaapput.
Imm. 3. Arsaarinnissutit Kalaallit Nunaanni Namminersornerullutik Oqartussanit oqartussaaffigineqassapput.
Imm. 4. §§-it 1, 4, 6 aamma 7 unioqqutinneqarnerini piniartut ataasiakkaat kisimik akisussaatinneqassanngillat, aammali angallammik piginnittoq, qamutinik, qamuteralammik imaluunniit allanik piniarnermut atorneqarsimasunik piginnittoq piniarnermut peqataasimaguni, imaluunniit piniarnermut atortut taaneqartut unioqqutitsilluni piniarnermut atorneqartussaanerinik ilisimannissimaguni akisussaaqataatinneqassaaq.

§ 11. Nalunaarut 7. februar 1995-imiit atulerpoq. Tamatumunnga peqatigitillugu Kalaallit Nunaanni umimmaat eqqissisimatinneqarnissaannik nalunaarut nr. 18, 21.juli 1992-imeersoq atorunnaarsinneqarpoq.

Namminersornerullutik Oqartussat, 7. februar 1995.

Lars Emil Johansen

/

Henrik Leth