Aalisarnissamut akuersissuteqartarneq pillugu Namminersornerullutik Oqartussat nalunaarutaat nr. 3, 1. januar 1995-imeersoq.

Inuussutissarsiutigalugu aalisarneq pillugu Inatsisartut inatsisaanni nr. 17-imi 22. oktober 1990-imeersumi §§ 7 - 9, 11 - 12, 18, 28 aamma 29, kingullermik allanngortinneqartumi Ltl.nr. 10, novemberip sisamaanni 1991-imi, kiisalu Ltl.nr. 24, oktoberip 30-anni 1992-imi aammalu Ltl. nr. 7. maajip 13-ani 1993-aneersut naapertorlugit aalajangersarneqarpoq:

 

Nalunaarutip atuuffii

§ 1. Nalunaarut inuussutissarsiutigalugu aalisarneq pillugu inatsimmi §§5 aamma 7 naapertorlugit angallammik Kalaallit Nunaanni nalunaarsorsimasumik, aamma inuussutissarsiutigalugu aalisarneq pillugu inatsimmi § 6 naapertorlugu nunani allamiut angallataannik imartani Kalaallit Nunaata aalisarnikkut oqartus-saaffigisaani inuussutissarsiutigalugu aalisarnermut atuuppoq.

§ 2. Nalunaarummi matumani angallatip usitussutsimigut killigititaasunik qaangiisimaneranut ataassisimaneranulluunniit aalajangiisuusussaq tassaavoq usitussutsikkut annertussuseq angallatip angissusiligaaneranut uppernarsaammi allassimasoq, angallatip angissusiligaaneranut uppernarsaasiinermi uuttuinermut maleruagassat sorliit atorneqarneri apeqqutaatinnagit.

 

Piffissaa killilerlugu akuersissut

§ 3. Piffissaa killilerlugu akuersissutit ukiumik ataatsimik sivisunerpaaffissalerneqartassapput.

§ 4. Aalisarnernut ukununnga annerpaaffissalerlugit pisaqarsinnaatitsissutitalimmik piffissaa killilerlugu, piumasaqaataasumillu inuussutissarsiutigalugu aalisarnissamut, akuersissuteqartoqartassaaq,
1) qaleralinniarnermut, nataarnarniarnermut, suluppaavarniarnermut, saarullinniarnermut ammassanniarnermullu angallatit 75 BRT/120 BT anginerusulluunniit atorlugit,
2) uiluinniarnermut assagiarsunniarnermullu angallatip angissusia apeqqutaatinnagu, aammalu
3) angallammik Kalaallit Nunaanni nalunaarsorsimasumik aalisarnikkut imartani nunat allat imaluunniit nunani tamalaani soqutigisaqaqatigiiffiit aalisarnikkut oqartussaaffigisaanni aalisarnermut .

§ 5. Aalisarnernut ukununnga annerpaaffissalerlugit pisaqarsinnaatitsissutitaqanngitsumik piffissaa killilerlugu, piumasaqaataasumillu inuussutissarsiutigalugu aalisarnissamut, akuersissuteqartoqartassaaq,
1) pissutsini immikkut ittuni aalisarnermi, uumasunik ilisimatuut siunnersuinerisa angallatinut ataasiakkaanut pisat annerpaaffissaannik aalajangiinissaq pissutissaqartinngippassuk, kalaallit angallataataat atorlugit aalisarnermut,
2) imartani Kalaallit Nunaata aalisarnikkut oqartussaaffigisaani, pisassat aalisarneqartussat nunap angerlarsimaffiup pineqartup angallataanit ataatsimoorunneqartussaappata, nunat allamiut angallaataataat atorlugit aalisarnermut, aamma
3) imartani Kalaallit Nunaata aalisarnikkut oqartussaaffigisaani angallatinut suminngaanneerneri apeqqutaatinnagit misileraalluni aalisarnermut atorneqartunut.

 

Piffissaa killilernagu akuersissut

§ 6. Angallatit 75 BRT/120 BT taakkulu sinnerlugit angissusillit atorlugit inuussutissarsiutigalugu raajarniassagaanni annerpaaffissalerlugit pisaqarsinnaatitsissutitalimmik piffissaa killilernagu akuersissuteqartoqartassaaq.
Imm. 2. Akuersissutip taamaattup pisassanit pisassat akuersissuteqarnermut tunngavigineqartut nalunaarpai. Pisassanit pisassat annertussusilerneqartarput, naalakkersuisut pisassiivigineqartumi qummut killiussaasa iluanni, ukiumut pisassiissutigineqartut (TAC) aggorneranik.
Imm. 3. Akuersissummut taamaattumut atatillugu ukiut tamaasa ukiup pisassaqarfiusup aallartinnginnerani pisassaqarfiusunut tamanut ukiumut pisassat nalunaarutigineqartassapput. Ukiumut pisassanik nalunaarummi annertussutsit tonsinngorlugit, ukioq taanna pisassanit pisassat amerlassusii, qanoq amerlatiginersut allassimassapput.

§ 7. Piffissaa killilernagu akuersissut, pisarisinnaasanik annertunerpaaffissaliiviunngitsoq, akuersissutigineqassaaq sinerissamullu qanittumi inuussutissarsiutigalugu raajarniartoqassappat pisariaqartinneqarluni.
Imm. 2. Akuersissummi allassimassaaq Pointit Pigisat sorliit akuersissummi tunngavigineqarnersut.Pointit pigisat tassaapput, taakkuninnga piginnittup akuersissuteqarfimmi (piffimmi) aalajangersimasumi, pisaqarsinnaassuseq qummut killiligaq (angallat) atorlugu tamakkiisumik aalisarsinnaatitaanera.

 

Aalajangersakkat tamanut atuuttut

§ 8. Akuersissut taassumaluunniit assilineqarnera aalisarnermi angallammiitinneqassaaq.

§ 9. Piginnittumut ataatsimut aalajangersimasumut akuersissuteqartoqartassaaq, angallatillu aalisarnermut atorneqartussat allassimassallutik.
Imm. 2. Akuersissuteqartoqarnerani pisariaqartitatut tunngavigineqartut allanngorneri, taamatuttaaq piginnittut allanngorneri aalisarneq pillugu inatsimmi § 5 malillugu Naalakkersuisunut akuersissutigisassanngorlugit saqqummiunneqassapput.

§ 10. Taamaallaat angallatit Naalakkersuisunit akuersissutigineqarsimasut atorneqarsinnaapput.
Imm. 2. Naalakkersuisut taamaallaat angallatit akuersissutigisinnaavaat
1) piginnittuunermik pissutsit inuussutissarsiutigalugu aalisarneq pillugu inatsimmi aalajangersakkanut naapertuuppata, aamma
2) aalisarsinnaassuseqarneq Naalakkersuisut naliliinerisigut aalisarnissamut periarfissanut atuuttunut naleqqussarneqarsimappat.
Imm. 3. Akuersissuteqartoqarnissaannik qinnuteqaat Naalakkersuisunut allaganngorlugu nassiunneqassaaq.

§ 11. Kikkulluunniit § 4 malillugu imartani Kalaallit Nunaata aalisarnikkut oqartussaaffigisaasa avataani inuussutissarsiutigalugu aalisarnissamut akuersissuteqarfigineqarsimasut, § 4 malillugu, nunat tamalaat isumaqatigiissutaat maleruagassaallu aalisarfimmi Kalaallit Nunaannut atuuttut malissallugit pisussaatitaapput.
Imm. 2. Kikkulluunniit imm. 1 malillugu imartami maleruagassaqarfiusumi inuussutissarsiutigalugu aalisartut nunat tamalaat isumaqatigiissutaat maleruagassaallu malillugit nakkutilliinernut allatulluunniit isumannaallisaanernut akerliliisinnaanngillat.

§ 12. §-inik 8-mik, 9-mi imm. 2-mik aamma 10-mi imm. 1-imik unioqqutitsinerit aamma akuersissuteqarnermi atugassarititaasunik sumiginnaanerit akiliisitsinermik kinguneqassapput.
Imm. 2. §11 unioqqutillugu inuussutissarsiutigalugu aalisarneq akiliisitsinermik kinguneqassaaq, nunat tamalaat isumaqatigiissutaat maleruagassaliaalluunniit pineqaatissiinissamut aalajangersakkanik imaqarnerat apeqqutaatinnagu.
Imm. 3. Aktiaateqarluni ingerlatseqatigiiffik (A/S), piginneqatigiilluni ingerlatseqatigiiffik (Aps), piginneqatigiiffik (AmbA) imaluunniit piginneqatigiilluni umiarsuaatileqatigiiffik (partrederi) unioqqutitsisimappata ingerlatseqatigiiffik taannaatillugu akiliinissamut akisussaatitaasinnaavoq.
Imm. 4. Pinerluttaalisisitsineq pillugu inatsimmi arsaarinnittarneq pillugu maleruagassat taamatuttaaq atorneqarsinnaapput.
Imm. 5. Kalaallit Nunaata eqqaani aalisarnermut tunngatillugu maleruagassanik imaluunniit akuersissummi piumasaqaataasunik unioqqutitsineq kinguneqarsinnaavoq taassuma atorsinnaanerata killiliiffigineqarneranik, kiisalu annertuumik arlaleriarluniluunniit unioqqutitsisoqarnerani akuersissut arsaarinnissutigineqarsinnaavoq. Tamatumunnga aalajangiineq Naalakkersuisut aalajangissavaat, nalunaarutigineqarneraniillu ullut 15-it qaangiutsinnagit Kalallit Nunaanni landsretsimut tamanna ingerlateqqinneqarsinnaavoq.
Imm. 6. Pineqaatissiinerit inuussutissarsiutigalugu aalisarneq pillugu inatsimmi aalajangersakkat malillugit suliarineqartassapput.

§ 13. Nalunaarut atuutilerpoq ulloq 1. januar 1995.
Imm. 2. Atuutilersitsinikkut Namminersornerullutik Oqartussat aalisarnermut akuersissuteqartarneq pillugu nalunaarutaat nr. 3, 31. januar 1994-imeersoq, atorunnaarsinneqarpoq.

Ulloq 29. december 1994

Lars Emil Johansen

/

Henrik Leth