"Raajakarsini" aalisarneq pillugu Namminersornerullutik Oqartussat nalunaarutaat nr. 1, 1. januar 1995-imeersoq.
Inuussutissarsiutigalugu aalisarneq pillugu Inatsisartut inatsisaanni nr. 17-imi 22. oktober 1990-imeersumi §§19 aamma 28 aammalu Inatsisartut inatsisaanni Ltl nr. 10-mi 4. november 1991-imeersumi aamma Ltl nr. 24 30. oktober 1992 kiisalu nr. 7 13. maj 1993-imeersumi ilassutit tunngavigalugit aalajangersarneqarpoq:
§ 1. Nalunaarut atuuppoq inuussutissarsiutigalugu raajarniarluni aalisarnermut Kalaallit Nunaata aalisarnermut oqartussaaffigisaani 44°00'V-ip kitaani inunnit ingerlatseqatigiiffinnilluunniit kalaallit angallataannik, angallatip angissusianut uppernarsaat malillugu 75 BRT/120 BT-it taakkuninngalu anginerusut atorlugit ingerlanneqartunut.
Imm. 2. §§2, 3.imm.2, 4.imm.2, 5.imm.2 aamma 6.imm.2-mi aalajangersakkat taamaallaat angallatinut ukununnga atuupput (Aqqa/kalerrisaaritilluni nalunaaqutaa): Erimaat/OZTZ, Imerigsoq/OULB, Isaarut/OVXD, Lampo/OWES, Qillaq/OYKA, Qavak/OVOJ, Qingaaq/OWMZ aamma Lasarus/OZTJ.
Imm. 3. Angallatit uku nalunaarummi pineqanngillat (Aqqa/kalerrisaaritilluni nalunaaqutaa): Tobias Noahsen/OZJO, Ánáse/OUHK aamma Qarsaaq/OUUC.
Hareø-karsi
§ 2 . Angallatit § 1 imm. 2-mi taaneqartut aalisarnermut oqartussaaffeqarfiup tunngaviusumik killeqarfianiit titarnerit 70°00'N aamma 71°30'N akornanni, ilummut titarneq narlusooq atuarlugu Qingniviup, 71°23'N 55°19'V, aamma Erquata, 71°09'N 54°02'V, akornanni, aamma erquata kujataani allorniusaq sanimukartoq 54°00'V tikillugu angallatit raajarniarnermut akuersissutaaniittut (licens) piumasaqaatit naapertorlugit raajarniarsinnaapput .
Disko-karsi
§ 3. 68°00'N aamma 69°30'N akornanni 56°30'V-ip kangiani, aamma 69°30'N aamma 71°30'N akornanni 57°00'V-ip kangiani, raajarniarneq inerteqqutaavoq.
Imm. 2. Angallatilli § 1 imm. 2-mi taaneqartut Disko-karsimi aalisarnermut oqartussaaffeqarfiup tunngaviusumik killeqarfiata kitaani raajarniarsinnaapput .
Sisimiut Karsiat
§ 4. 66°00'N aamma 67°00'N akornanni aalisarnermut oqartussaaffeqarfiup tunngaviusumik killeqarfianiit (Fiskeriterritoriet) kimmut 6 sømilit tikillugit raajarniarneq inerteqqutaavoq.
Imm. 2. Angallatit § 1-imi imm. 2-mi taaneqartut Sisimiut karsianni aalisarnermut oqartussaaffeqarfiup tunngaviusumik killeqarfianit 3 sømilinit avasinnerusumit raajarniarsinnaapput.
Nuup Karsia
§ 5. 64°00'N aamma 65°00'N akornanni aalisarnermut oqartussaaffeqarfiup tunngaviusumik killeqarfianiit (Fiskeriterritoriet) kimmullu 6 sømilit tikillugit raajarniarneq inerteqqutaavoq.
Imm. 2. Angallatilli § 1 imm. 2-mi taaneqartunut Nuup karsiani aalisarnermut oqartussaaffeqarfiup tunngaviusumik killeqarfiata kitaani raajarniarsinnaapput .
Qaqortup Karsia
§ 6. 59°58'36"N-ip aamma 60°34'42"N-ip akornanni aalisarnermut oqartussaaffeqarfiup tunngaviusumik killeqarfianiit kimmut 6 sømilit tikillugit raajarniarneq inerteqqutaavoq, tassa aalisarnermut killissarititaasup titarneraniit avammut 90 grad-inik tukingasumik titarlugu.
Imm. 2. Angallatilli § 1 imm. 2-mi taaneqartut Qaqortup Karsiani aalisarnermut oqartussaaffeqarfiup tunngaviusumik killeqarfiata kitaani raajarniarsinnaapput.
Banan-karsi
§ 7. 59°58'6N, 45°21'9V (Naujat) aamma 60°347N, 47°34'9V (Qeqertat kujallerpaartaat) akornanni angallatit uku: Isaarut/OVXD aamma Lampo/OWES raajarniarsinnaapput, imartap oqartussaaffeqarfiup tunngaviusumik killeqarfianit (Søterritoriet) 3 sømilit kitaanni.
§ 8. Piumasaqaatinut allanut tunngatillugu Kalaallit Nunaata Kitaani sinerissamut qanittumi raajarniarneq pillugu nalunaarut innersuussutigineqarpoq.
§ 9. Nalimaarummi aalajangersakkanik unioqqutitsineq akiliisitsissutigineqarsinnaavoq. Tamakku pillugit suliassat inuussutissarsiutigalugu aalisarneq pillugu Inatsisartut inatsisaanni aalajangersakkat malillugit suliarineqartassapput.
§10. Nalunaarut ingerlaaannaq atuutilerpoq 1. januar 1995.Tamatumunnga peqatigitillugu "Raajakarsini" Aalisarneq pillugu Namminersornerullutik Oqartussat nalunaarutaat nr. 36, 9. september 1994-imeersoq atorunnaarsinneqarpoq.
Ulloq 29. december 1994.
Lars Emil Johansen/
Henrik Leth