Ilinniagaqarnermut akiitsunik taarsersuinermut tapiissuteqartarneq pillugu Inatsisartut inatsisaat nr. 24, 3. november 1994-imeersoq.
Ilinniagaqarnermut akiitsunik taarsersuinermut tapiissuteqartarneq.
§ 1. Ilinniagaqarnermut Namminersornerullutik Oqartussanut akiitsut aamma ilinniagaqarnermut aningaaserivinnut akiitsut Namminersornerullutik Oqartussanit qularnaveeqqusikkat taarsersorneqarnissaannut Namminersornerullutik Oqartussat tapiissuteqartarput
1) ilinniagaqarneq naammassineqarsimagaangat imaluunniit kipitinneqarsimagaangat aamma
2) taarsigassarsiat aalajangersimasumik taarsigassarsiatut taarsigassarsiaritinneqaraangata imaluunniit taamatut taarsigassarsianngortinneqaraangata.
Imm. 2. Makkuninnga pissuteqartumik ilinniagaqarnermut akiitsorilersimasanut tapiissuteqartoqarsinnaanngilaq:
1) tillinniarnernik aserorterinernillu
2) nerisanut ineqarnermullu akiliingitsoortarsimanermik imaluunniit
3) ilinniagaqarnermut tapiissutinik amerlanaarlugit kukkusumilluunniit tunniussisarsimanermik.
Imm. 3. Aningaasat pissutsit imm. 2-mi taaneqartut tunngavigalugit atorneqarsimasut nalingi tapiissutissat annertussusissaasa naatsorsonerini ilanngunneqarsinnaanngillat. Aammattaaq ilinniagaqarnermut akiitsunik allanik peqarsimappat aningaasat taamatut atorneqarsimasut taarsersorsimanerisa nalingi tapiissutissat naatsorsornerini ilanngunneqarsinnaanngillat.§ 2. Inunnut Kalaallit Nunaanni najugaqavissunut tapiissuteqartoqartarpoq.
Imm. 2. Immikkut illuinnartunik pissutissaqartillugu inuit Kalaallit Nunaata avataani najugaqartut tapiissuteqarfigineqarsinnaapput, ilinniagaq naammassisimasaq imaaliallaannarluni Kalaallit Nunaanni suliffissaqaataalersinnaanngippat imaluunniit ilinniagaqarnermut tapiissuteqartarnerup ingerlateqqinnissaanut peqatigitillugu ilinniagaqarnermut akiitsutoqqat taarsersorneqarnissaat piumasaqaataasimappat.
Imm. 3. Naalakkersuisut tamakku pillugit sukumiinerusumik maleruagassiorsinnaapput.§ 3. Qaammatisiutit malillugit ukiup, tulliini ukiumik akilersuiffimmik taaneqartartussap, ingerlanerani akiliutaasimasut tunngavigalugit tapiissuteqartoqartassaaq, apeqqutaatinnagu aningaasat akiitsunut taarsersuutitut imaluunniit ernianut akiliutitut akiliutaasimanersut.
Imm. 2. Tapiissutit tunniunneqartassapput ukiup akilersuiffiup tulliani 1. decemberimi, tak. imm. 1,
1) akiliutaasimasut katillutik, tak. imm. 1, minnerpaamik 6.000,- kruuniuppata aamma
2) tassunga peqatigitillugu akiliutaasimasut ukiup akilersuiffiup ingerlanerani ernialiussaasimasunit amerlaneruppata.
Imm. 3. Akiitsut amerlasoorujussuusimagaangata qaammammullu akiliutaasartut minnerpaamik 2.000 kruuniusimagaangata imm. 2, nr. 2-mi patsisissaatitaasoq naatsorsuutigineqanngitsoorsinnaasassaaq.
Imm. 4. Tapiiffigineqarnissamik qinnuteqaatit ukiumi tapiissutisiffissami 1. september nallertinnagu nassiunneqareersimassapput.§ 4. Tapiissutit aallaavittut ukiup akilersuiffiup ingerlanerani akiliutaasimasut nalinginik amerlassuseqartinneqartassapput.
Imm. 2. Akilersuisup sumi najugaqarnera kiisalu akiitsut annertussusii suunerilu apeqqutaatillugit tapiissutit qaffanneqartassapput, tamatumanilu aningaasat imm. 1 naapertorlugu naatsorsorneqarsimasut kisitsimmik naatsorsuinermi tunngavissat ilaannik ilanngussaq 1-imiittumik amerlisarneqartassapput.
Imm. 3. Imm. 2-mi illoqarfinnik nunaqarfinnillu/isorliunerusunillu agguataarinermi Kalaallit Nunaanni tjenestemandinik agguataarineq qanoq ilisukkulluunniit atuuttoq malinneqartassaaq.
Imm. 4. Akiitsut annertussusii, tak. imm. 2, tassaapput ukiumi akilersuiffimmi decembarip 31-anni akiitsut annertussusii. Tapiissutit ukiup akilersuiffiup aappaaguani 1. december ilanngunneqartussat akiitsut naatsorsornerini ilaatinneqassanngillat. Akiitsut annertussusii tassaapput akiitsut tapiissutisiaqaataasinnaasut tamakkerlutik katinnerisa nalingi, tak. § 1.
Imm. 5. Akiitsunik assigiinngiiaartunik ilanngussaq 1-imi taagorneqartunik akiitsoqartoqartillugu taakkua immikkoortui ataasiakkaarlugit tapiissuteqarfigineqartassapput.§ 5. Ukiumi akilersuiffimmi aningaasarsiat akileraaruteqaataasussat Namminersornerullutik Oqartussani kommuniniluunniit tjenestemandip skalatrin 30-miittup ukiumi akilersuiffimmi, tak. § 3, imm. 1, 30. oktober akissarsiaanit ilanngaatitaqariinngitsunit 1.000 kruuninik amerlaneroriarneri tamaasa § 4 naapertorlugu tapiissutit 0,5 %-imik ilanngarneqartassapput. Naatsorsuisoqalersinnagu akissarsiat ilanngaatitaqariinngitsut aningaasanut 5.000-inik agguarneqarsinnaasunut qaninnernut akunnaallineqassapput.
§ 6. Akiitsut sorliit, tak. § 4, imm. 5, tapiissutisiaqarnermut pissutaanerat apeqqutaatinnagu pingaarnerutillugu Namminersornerullutik Oqartussanut akiitsut akilersornissaannut tapiissuteqartoqartassaaq.
§ 7. Ukiumi tapiissutisiffiusumi 1. decemberimi akiitsut tamarmiusut sinnerlugit tapiissuteqartoqarsinnaanngilaq.
Ilinniagaqarnermi akiitsunik isumakkeerinninneq.
§ 8. Aningaasanik atorsimasoq immikkut ajornartorsiorsimappat ilinniagaqarnermut akiitsunik taarsersuinermut tapiissuteqartarnermi piumasaqaataasut naammassisimanngikkaluarpagilluunniit qinnuteqarnera naapertorlugu Naalakkersuisut aningaasanut inatsimmi aningaasat amerlassusileriikkat iluanni ilinniagaqarnermut akiitsut tamakkerlugit ilaannaalluunniit isumakkeersinnaavaat.
Imm. 2. Ilinniagaqarnermut akiitsulik toquppat imaluunniit tamakkiisumik innarluuteqalerpat taamaalillunilu akiliisinnaajunnaavilluni akiitsui pinngitsoorani isumakkeerneqassapput.
Imm. 3. Aningaasanik atorsimasup ilinniagaqarnermut akiitsuisa qanoq ilineratigut imm. 1 aamma 2 naapertorlugit isumakkeerneqartarnissaat pillugu Naalakkersuisut sukumiinerusumik malittarisassaliussapput.
Paasissutissiisussaatitaaneq.
§ 9. Qinnuteqartut paasissutissat tapiissutissat naatsorsorneqarnerini pisariaqartut tamaasa saqqummiuttassavaat.
Imm. 2. Qinnuteqartoq paasissutissanik eqqunngitsunik amigartunilluunniit saqqummiussisimappat piumasaqaatigineqarsinnaavoq tapiissutit eqqunngitsumik tunniunneqarsimasut erniaat ilanngullugit utertinneqassasut. Erniat qanoq angissusiligaanissaat il.il. pillugit Naalakkersuisut malittarisassaliussapput.
Qinnuteqarnermi periusissat.
§ 10. Naalakkersuisut qinnuteqarnermi periusissat taamaaqataallu pillugit malittarisassaliorsinnaapput.
Imm. 2. Naalakkersuisut immikkut ittunik pisoqartillugu aalajangersinnaavaat ilinniagaqarnermi akiitsut Namminersornerullutik Oqartussanit atukkat taakkunanngaluunniit qularnaveeqqusikkat atortitsinissamik neriorsuuteqarnermi qularnaveeqqusiinermiluunniit utertitsilluni akilersornissaannut piffissarititaasumit kingusinnerusukkut akilerneqarsinnaasut.
Naammagittaalliorsinnaaneq atulerfissaalu.
§ 11. Inatsit taannaluunniit malillugu malittarisassat naapertorlugit aalajangiineq pillugu naammagittaalliuut aalajangiinerup tiguneraniit sapaatit akunneri sisamat qaangiutsinnagit Ilinniagaqarnersiuteqartitsinermi Naammagittaalliuteqartarfimmut suliassanngortinneqarsinnaavoq. Inatsit taannaluunniit malillugu malittarisassat naapertorlugit aalajangiineq tamatigut tamanna pillugu paasissutissamik ilaqartinneqassaaq.
§ 12. Inatsit una ukiumit akilersuiffimmit 1994-imit atuuttussanngorlugu 1. januar 1995 atortuulersinneqarpoq.
Imm. 2. Ilinniagaqarnermut akiitsunut oqilisaassivigineqartarneq pillugu Inatsisartut inatsisaat nr. 15 ulloq 23. november 1989-imeersoq kingusinnerusukkut allannguutilik atortuujunnaarsinneqarpoq.
Imm. 3. Inatsit imrn. 2-mi taaneqartoq naapertorlugu allaffeqarfikkut aalajangersakkat atortuuinnassapput inatsit una naapertorlugu aalajangersakkat naapertorlugit allanngortinneqarnissamik atorunnaarsinneqarnissamilluunniit tungaanut.
Namminersornerullutik Oqartussat, ulloq 3. november 1994
Lars Emil Johansen/
Emil Abelsen