Naartunermi, erninermi qitornavissiartaarnermilu sulinngiffeqarneq ullormusiaqarnerlu pillugit Inatsisartut peqqussutaata allanngortinneqarneranik Inatsisartut peqqussutaat nr. 10, 3. november 1994-imeersoq.

 

§ 1.

Naartunermi, erninermi qitornavissiartaarnermilu sulinngiffeqarneq ullormusiaqarnerlu pillugit Inatsisartut peqqussutaanni nr. 7-imi 22. oktober 1990-imeersumi Inatsisartut peqqussutaatigut nr. 11-kkut 30. oktober 1992-imeersukkut aamma Inatsisartut peqqussutaatigut nr. 13-ikkut 28. oktober 1993-imeersukkut allanngortinneqartarsimasumi makku allannguutigitinneqassapput:

 

1. § 18, imm. 3 imatut oqaasertalersorneqassaaq:
"Imm. 3. Ullormusiat nalunaaqquttap akunneranut aalajangersimasumik annertussusilerlugit tunniunneqartassapput, SIK-p pisortallu sulisitsisuisa ilinniagaqarsimanngitsunut nammineersinnaassusilinnut nalunaaqquttap akunnermusiassaasa minnerpaaffissaat pillugu isumaqatigiissutaata angeqataanik. Ukiut tamaasa 1. april annertussuseq taanna aaqqiissuteqarfigineqartassaaq. Aaqqiissuteqarneq atuutilertassaaq aaqqiissuteqarnermi ataasinngorneq qaninneq aallartiffigalugu. Isumaginninnermut Naalakkersuisup nalunaaquttap akunneranut tunniunneqartartut aaqqiivigineqarneri tamanut saqqummiuttassavai."

2. § 19, imm. 1, nr. 4 -mi "nal. akunnerinili 180-init ikinnerusuni sulisimasunut" imaalillugu allanngortinneqassaaq: "nal. akunneratalu ataatsip 180-illu akornanni sulisimasunut.

3. § 20-mi imm. 2-tut una ilanngunneqassaaq:
"Imm. 2. Ilinniagaqartut ilinniakkaminnik ingerlatsinermik nalaani erninermut atatillugu sulinngiffeqartut, sulinngiffeqarnermillu nalaani ilinniarnersiutisineq ajortut, praktikkernersiaqanngitsut praktikkernermiluunniit akissarsiaqanngitsut erninermut atatillugu sulinngiffeqarnertik tamaat meeqqat inoorlaat tamaasa eqqarsaatigalugit ilinniarnersiutit meeqqat tapiinik tapilerneqartut amerlaqataannik ullormusiaqarsinnaatitaassapput."

 

§ 2.

Inatsisartut peqqussutaat manna 1. november 1994 aallarnerfigalugu atortuulersinneqarpoq, l.november 1994-imilu tassanngaluunniit kingusinnerusukkut ernisunut atuulluni.

Namminersornerullutik Oqartussat, 3. november 1994

Lars Emil Johansen

/

Henriette Rasmussen