Suliffissaaleqisunik sulisitsiniarneq pillugu Inatsisartut peqqussutaat nr. 9, 3. november 1994-imeersoq.
Suliassaqartitsiniarnermik inunnillu isumaginninnermik Kalaallit Nunaannut inatsimmi nr. 580-imi 29. november 1978-imeersumi § 2 tunngavigalugu makku aalajangersarneqarput:
Kapitali 1.
Siunertaa atorneqarfissaalu.§ 1. Peqqussutip siunertaraa suliassaqartitsiniutit aqqutigalugit kommunit makkununnga periarfissinneqarnissaat:
1) kommunimi massakkorpiaq suliffissaaleqinerup oqilisaavigineqarnissaa, aamma
2) kommunimi suliffissaaleqisut sulisinneqarnissaannut periarfissat pitsanngorsarnissaat.
Imm. 2. Suliassaqartitsiniutit makkuusinnaapput:
1) suliffissaaleqisup ilinniagaqarnissaanik, tassunga ilanngullugu ilinniaqqinnissaanik aamma allamik ilinniagaqarnissaanik neqeroorfigineqarnera, kapitali 2 naapertorlugu.
2) suliffissaaleqisup kommunip suliffissaqartitsiniutaani sulisinneqarnera, kapitali 3 naapertorlugu, imaluunniit
3) suliffissaaleqisup akissarsiamigut tapiiffigineqarluni suliffimmi nalinginnaasumi sulisinneqalernera, kapitali 4 naapertorlugu.
Kapitali 2.
Ilinniagaqarnissamik neqeroorutit.§ 2. Suliffissaaleqisut ilinniagaqarnissamik neqeroorutit aqqutigalugit sulisinneqarnissaannik kommunalbestyrelsi kapitalimi pineqartumi aalajangiisinnaavoq, matumani ilinniagaqaqqitsitsineq sulianullu allanut ilinniartitaaneq ilanngullugit.
Imm. 2. Naalakkersuisut aalajangersaassapput ilinniartitaanernut pikkorissarnernullu sorlernut peqataatinneqarnissaat pillugit peqqussut manna malillugu ingerlanneqassasut, aammalu suliffissaaleqisup ilinniakkamut sumut pikkorissartsitinissamullu sumut peqataatinneqarsinnaaneranut tunngasut.§ 3. Suliffissaaleqisoq ilinniarnermini pikkorissarnerminiluunnit ilinniagaqarnermi ikiuutinik tapiiffigineqarsinnaavoq ilinniakkamut eqqartorneqartumut tapiissutaasartut aalajangersagaareersut naapertorlugit, taamatuttaaq ilinniagaqarnermut tamatumunnga ilinniagarnermut ikiuutit tunniunneqartassapput maleruagassat pioreersut naapertorlugit.
Imm. 2. Ilinniarneq pikkorissarnerluunnit Inuutissarsiutinik ilinniagaqarnerup ilinniagaqarnermut ikiorsiissutit inuutissarsiutinillu ilitsersuussineq pillugit peqqussut malillugu ilinniagaqarneq tapiiffigineqarsinnaanngippat suliffissaaleqisoq ilinniagaqarnermi ikiorsiissutinik ilinniagaqarnermut tapiissutit peqqusummi taaneqartumi atugassarititaasut naapertorlugit pisartagaqarsinnaminut periarfissaqarpoq.
Kapitali 3.
Kommunit suliffissaqartitsiniutaat.
Pilersitsinissamut ingerlatsinermullu piumasaqaatlt.§ 4. Suliffissaaleqisut kommunip suliffissaqartitsiniutai aqqutigalugit sulisinneqassasut kommunalbestyrelsi kapitalimi matumani malittarisassat tunngavigalugit aalajangiisinnaavoq.
Imm. 2. Kommunit suliffissaqartitsiniutaat paasineqassapput tassaasut suliffissaqartitsiniutit kommunimit ataatsimit kommuninilluunnit arlalinnit ataatsimoorullugit pilersinneqarlutillu ingerlanneqartut akilersorneqartullu.§ 5. Kommunalbestyrelsi pisussaavoq suliffissaqartitsiniutini piumasaqaatit nalinginnaasut makku naammassineqarsimanissaat qulakkiissallugu:
1) Ingerlatassap aallartinneqannginnerani pilersaarummut nalunaarsuut saqqummiunneqarsimassaaq minnerpaamik makkuninnga imaqartussaq:
a) ingerlatassap siunertaa
b) ingerlatassami suliassat
c) ingerlatap siulersorneqarnera
d) suliffissaqartinniakkat kikkuuneri
e) peqataasussat qassiussusissaat
f) ingerlatap sivisussusissaa
g) ingerlatamut aningaasatigut missingersuusiat
2) Ingerlatamut qullersaasunik aqutsisoqassaaq aammalu ingerlataq ulluinnarni ingerlatsisoqassalluni.
3) Ingerlatamik aqutsisut nalilersuiuarnissaat qulakkeerneqarsimassaaq, tamatuttaarlu ingerlatamik aqutsisut nakkutilliissapput.§ 6. Suliffissaqartitsiniutit aallartinneqarnissaat sioqqullugit kommunalbestyrelsip sulinermik inuussutissarsiuteqartut kattuffii aamma sulisitsisut kattuffii §§ 7, 8, 12, 13 aamma 14-imi pissutsinut taaneqartunut oqaaseqaateqarnissaannut periarfississavai.
§ 7. Suliffissaqartitsiniutinik pilersitsinerup ingerlanneratalu kingunerissanngilaat suliffeqarfinnit pioreersunit nioqqutissiat sullissinerillu pioreersut ingerlanneqareersulluunniit piumaneqarnerisa annikinnerulernerat.
Imm. 2. Suliffissaqartitsiniutit pilersinneqarnerisa ingerlanneqarnerisalu nassatarissanngilaat atorfiit ingerlatamut attuumassuteqartut ikilisinneqarnissaat.
Imm. 3. Suliffissaqartitsiniutit pilersinneqarnerisa ingerlanneqarnerisalu STI-mi ilinniartut sulinermik ilinniarfigisinnaasaasa ikileriarnerat nassatarissanngilaat.§ 8. Suliffissaqartitsiniutit taamaallaat tunisassiorsinnaallutillu tunisassiaminnik tuniniaasinnaapput niuernermi atugassarititaasut atuuttut malillugit, matumani sulianut taamaattunut tunngasut tuniniarneqartarnerini akigitinneqartuni nalinginnaasumik iluanaarutissatut naatsorsuutigineqartartoq ilanngullugu.
§ 9. Suliffissaqartitsiniutit tunisassiornermik ingerlataqartut eqqarsaatigalugit kalaallit tunisassiassaataasa atortussallu allat iningajareersimasut pissarsiarineqarsinnaatillugit atorneqarnissaasa qulakkeerneqarnissaat kommunalbestyrelsip pisussaaffigaa.
Akissarsiat atorfinitsitaanermilu atugassarititaasut.
§ 10. Suliffissaqartitsiniummi sulilernermi piumasarineqarpoq suliffissaaleqisup peqqissutsimigut inuttulluunniit atukkamigut allatigut atugaasa tamanna akornutissaqartissanngikkaat.
§ 11. Suliffissaqartitsiniutini sulisut sulisinneqarnerup ingerlanerani suliffissarsiortutut nalunaarsimassapput. Tamannali atuutinngilaq suliffissaqartitsiniummi sulinermut atatillugu ilinniagaqarnermik ingerlatsiganni. Suliffissaaleqisutut nalunaarsorsimanissaq sulisut pisortaannut, ilitsersuisunut assigisaannullu atuutinngilaq.
§ 12. Sulisoq nalunaaquttap akunnermusiat minnerpaaffiat qaqugukkulluunnit atuuttoq tunngavigalugu akissarsiaqartinneqassaaq, ilinniagaqarsimanngitsut feriarnermi aningaasarsiaat ilanngullugit, sulisunut ilinniagaqarsimasunut ilinniagaqarsimanngitsunullu nal. akunnermusiat pillugit SIK-p pisortallu sulisitsisuisa isumaqatigiissutaat innersuussutigalugu.
Imm. 2. Akissarsiat ullut 14-ikkaarlugit kingumoortumik tunniunneqartassapput, sulisullu nal. akunneri suliffigisimasai tunngavigalugit naatsorsorneqartassallutik.
Imm. 3. Ingerlataq ilinniagaqarnermik ilaqarpat tassunga atatillugu sulisoq akissarsiaqartinneqassaaq kapitali 2-mi malittarisassat naapertorlugit.§ 13. Sap. akunneranut suliffissaq sivikinnerpaamik nal. akunnerinik 20-nik sivisussuseqassaaq.
Imm. 2. Pisortat annertussusileriikkanik ikiorsiisarnerat pillugu Inatsisartut peqqussutaat malillugu inunnut annertussusileriikkanik ikiorsiissutisinissamut piumasaqaataasunik eqqortitsisimasunut sap. akunneranut suliffissarititaq sivikinnerpaamik tassaassaaq suliffissaarunneq sioqqullugu sap. akunnerisa kingulliit 13-it ingerlaneranni agguaqatigiissillugu sap. akunneranut suliffiusarsimasup sivisoqataa.§ 14. Atorfinitsitaanermi atugassarititaasut sulianut taamaattunut isumaqatigiissutini atugassarititat aalajangersarneqarsimasut assigissavaat, pineqartunulli isumaqatigiissuteqanngippat atorfinitsitaanermi atugassarititaasut nalinginnaasumik sulianut taamaattunut atugassarititaasut assigissavaat.
Kapitali 4.
Akissarsianut tapiissutit.
Akissarsianut tapiissuteqarnissamik isumaqatigiissuteqarnissami piumasaqaatit.§ 15. Suliffissaaleqisut namminersortuni aamma pisortat suliffiini suliffeqarfiutaannilu sulilernissaannut kapitalimi matumani malittarisassat tunngavigalugit kommunalbestyrelsi akissarsianut tapiissuteqarsinnaavoq.
Imm. 2. Akissarsianut tapiissutit tunniunneqarsinnaanngillat suliffinnut suliffeqarfinnullu tamakkiisumik ilaannakortumilluunniit kommunimit tapiissuteqartumit pigineqarlutilluunniit ingerlanneqartunut.§ 16. Kommunalbestyrelsip suliffissarsiuussisarfini aqqutigalugu namminersortunut aamma pisortat suliffiinut suliffeqarfiutaannullu akissarsianut tapiissuteqarfigineqartartumik sulisussamik innersuussinissaq isumagissavaa.
§ 17. Akissarsianut tapiissuteqarluni sulilersitsinissamik isumaqatigiissuteqarnissaq sioqqullugu kommunalbestyrelsip sulinermik inuussutissarsiortut kattuffii aamma sulisitsisut kattuffii § 20-mi, § 22-mi aamma § 23-mi pissutsinut taaneqartunut oqaaseqaateqarnissaannut periarfississavai.
§ 18. Kommunalbestyrelsip suliffik imaluunniit suliffeqqarfik isumaqatiginiareerlugu tapiissutip angissusia aalajangissavaa, matumani aamma tapiissutinik sulisitaanerup nalaani millisitsissutaasinnaasut ilanngullugit aalajangiiffigalugit.
Imm. 2. Tapiissut annerpaamik akissarsianut tapiissuteqarluni sulisitamut ataatsimut angissuseqarsinnaavoq akissarsianut aningaasartuutit 50%-iannik.
Imm. 3. Suliffimmi suliffeqarfimmiluunniit akissarsianut tapiissuteqarluni sulisinneqartut amerlassusiisa suliffimmi suliffeqarfimmiluunniit sulisut tamarmiusut annerpaamik 50%-iinik amerlassuseqassapput. Suliffiup suliffeqarfiulluunniit immikkoortuani nammineersumi sulisitsinermi akissarsianut tapiissuteqarluni sulisinneqartut amerlassusiisa immikkoortoqarfirami sulisut tamarmiusut annerpaamik 50%-iinik amerlassuseqassapput.
Imm. 4. Qinnuteqartoqareerneratigut imm. 2-mi aamma imm. 3-mi aalajangersakkat sanioqqunneqarnissaannut Naalakkersuisut immikkut akuersissuteqarsinnaapput.§ 19. Inunnut sulisunut ataasiakkaanut piffissaq tapiissuteqarfiusinnaasoq qaammatit 12-iusinnaapput, tamatuma kingorna piffissamut nutaamut tapiissuteqartoqarsinnaalluni, peqqussummi matumani piumasaqaataasut eqqortinneqarsimappata.
§ 20. Akissarsianut tapiissutitalimmik sulilernerup kingunerissanngilaa suliffinnut suliffeqarfinnullu allanut pissusissamisuunngitsumik unammillerneq.
§ 21. Suliffik suliffeqarfilluunniit sulisitsinerup nalaani akissarsianut tapiissutitaqanngitsumik sulisunutulli sulisitsisutut pisinnaatitaavoq.
Akissarsiat atorfinitsitaanermilu atugassarititaasut
§ 22. Akissarsiat atorfinitsitaanermilu atugassarititaasut isumaqatigiissutini aalajangersarneqarsimasut assigissavaat, imaluunniit sulianut taamaattunut atugassarititaasut assigissavaat.
§ 23. Akissarsianut tapiissutitalimmik sulilerneq taamaallaat pisinnaavoq sap. akunneranut suliffigisartagaq sivikinnerpaamik nal. akunnerinik 20-nik sivisussuseqarpat.
Imm. 2. Pisortat annertussusileriikkanik ikiorsiisarnerat pillugu Inatsisartut peqqussutaat malillugu inunnut annertussusileriikkanik ikiorsiissutisinissamut piumasaqaataasunik eqqortitsisimasunut sap. akunneranut suliffissarititaq sivikinnerpaamik aamma tassaassaaq suliffissaarunneq sioqqullugu sap. akunnerisa kingulliit 13-it ingerlaneranni sap. akunneranut agguaqatigiissillugu suliffiusarsimasup sivisoqataa.
Kapitali 5.
Aqutsineq.§ 24. Peqqussutip matuma aqunneqarnissaanut kommunalbestyrelsi akisussaavoq.
Imm. 2. Kommunit aqutsinerminnut ilagitillugu suliffissaarusimasut sulilersinneqartut tamaasa kisitsisitigut peqqussut tunngavigalugu takussutissiortassavaat.
Imm. 3. Kisitsisitigut takussutissiap paasissutissat makku minnerpaamik imarissavai:
1) sulilersinneqartup aqqa aamma CPR-normua,
2) ilinniagaqarnissamik neqeroorutaanersoq, suliffissaqartitsiniutaanersoq imaluunniit akissarsianut tapiissuteqarluni sulilersitsinerunersoq,
3) sulilersitsinerup aallartiffia qanorlu sivisussuseqarnissaatut pilersaarutigineqartoq,
4) sulilersitsinermi sap. akunneranut nalunaaquttap akunneri suliffissat aamma nalunaaquttap akunneri ilinniarfissat.
Imm. 4. Paasissutissat imm. 3-mi taaneqartut Isumaginninnermut Suliffeqarnermullu Pisortaqarfimmut nalunaarutiginissaat kommunalbestyrelsip pisussaaffigaa. Qaammatit pingasut naaneri (kvartal) tamaasa nalunaaruteqartoqartassaaq. Nalunaaruteqartoqassaaq kingusinnerpaamik qaammatit pingasut naanerata kingorna qaammatip tulliup aallaqqaataani.
Imm. 5. Naalakkersuisut nalunaarutip ilusissaa imarisartagassaalu erseqqinnerusumik malittarisassaliuussinnaavaat.§ 25. Suliffissaaleqisut peqqussummi matumani malittarisassat tunngavigalugit sulisinneqartut sulisinneqalernermik siorna aningaasatigut atukkaminnit ajornerusunik atugaqalinnginnissaasa qulakkeerneqarnissaat kommunalbestyrelsip akisussaaffigaa.
Imm. 2. Peqqussummi matumani malittarisassat tunngavigalugit sulisinneqartumut ikiorsiissutit tunniunneqartut pineqartup pissaaleqinerata oqilisaavigineqarneranut naammanngippata ikiorsiissutinut tapiissutitut pisortanit ikiorsiissutit pillugit Inatsisartut peqqussutaat tunngavigalugu annertusisanik pisariaqartitat naapertorlugit ikiorsiissutit tunniunneqarsinnaapput, piumasaqaatigineqartut matumani naammassineqarsimassappata.
Kapitali 6.
Aningaasalersorneqarnera.§ 26. Peqqussut manna malillugu aningaasartuutit kommuninit aningaasartuutigineqassapput, taamaattorli § 3, imm. 1 naapertorlugu.
Kapitali 7.
Naammagittaalliuuteqartarneq.§ 27. Peqqussut manna tunngavigalugu aalajangiinerit isumaginninnermut tunngasut siulersorneqarnerat aaqqissuunneqarnerallu pillugit Inatsisartut peqqussutaanni aalajangersakkat malillugit naammagittaalliuutigineqarsinnaapput.
Kapitali 8.
Atortuulersitsineq.§ 28. Peqqussut manna 1. januar 1995 aallarnerfigalugu atortuulersinneqarpoq. Tamatumunnga peqatigitillugu kommunit suliffissaqartitsiniutaat akissarsianullu tapiissutit pillugit Inatsisartut peqqussutaat nr. 1 11. maj 1993-imeersoq atorunnaarsinneqarpoq.
Namminersornerullutik Oqartussat, ulloq 3. november 1994
Lars Emil Johansen/
Henriette Rasmussen