Namminersornerullutik Oqartussat kommunillu inissiaataannit attartortittakkanit anisitsisarneq pillugu Namminersornerullutik Oqartussat nalunaarutaat nr. 60, 29. december 1994-imeersoq.
Inissianik attartorneq pillugu Inatsisartut peqqussutaanni nr. 3-mi, 13. juni 1994-imeersumi, § 33, imm. 7 naapertorlugu aalajangersarneqarput:
Kapitali 1
Nalinginnaasimik§ 1. Attartortitsisutut paasineqassaaq Inissiaatileqatigiiffik INI A/S, inissianik attartortittakkanik piginnittut, Namminersornerullutik Oqartussat imaluunniit kommuni inissiaatit ingerlanneqarnerat aqunneqarnerallu pillugit inissiaatileqatigiiffimmik isumaqatigiissuteqarsimappata.
Kapitali 2
Annertuumik simiginnaaneq§ 2. Attartortitsisup attartorneq atorunnaarsissavaa attartorneq annertuumik sumiginnarneqarpat attartortorlu allakkatigut aaqqeeqqusissummik nalunaarfigineqarsimagaluarluni aaqqiisimanngippat.
§ 3. Imatut pisoqartillugu attartorneq annertuumik sumiginnagaasimasutut isigineqassaaq:
1) § 2, imm. 1, naapertorlugu ineqarnermut kiassarnermullu akiliutissat immaqaluunniit qularnaveeqqusiissutissamut akilersuutissat attartornissamik isumaqatigiissut malillugu piffissaq eqqorlugu kingusinnerpaamik akilerneqarfissaat qaammatinik marlunnik kingoqqullugu akilerneqanngippata,
2) inissiaq paarinerlunneqarpat imaluunniit attartortup attartortitsisumit akuerineqaqqaarani inoqutiginngisaminut attartukkani atukkiuppagu, tamannali atuutinngilaq inisisimasunut ineeqqanik attartortitsineq pillugu Namminersornerullutik Oqartussat nalunaarutaanni § 9, imm. 1, naapertorlugu ineeqqanik attartortitsinermi,
3) attartortup attartortitsisoq tamatumunnga immikkut akuersiteqqaarnagu inissiaq inigineqarnissaanit allaanerusumik atorpagu,
4) ukiup ataatsip ingerlanerani torersaarnissamut maleruaqqusat minnerpaamik marloriarluni unioqqutinneqarsimappata imaluunniit uumasuuteqarneq pequusivinniititaqarnerluunniit pillugit maleruaqqusat unioqqutinneqarpata,
5) attartortup attartortitsisoq pisariaqartumik isumaqatigiissuteqarfigeqqaarnagu inissiaq piffissaanngitsukkut qimappagu, taamaapporlu attartortup ineqarnermut akiliut il.il. piffissaq eqqorlugu akilersimagaluarpagilluunniit,
6) attartortitsisup tunngavissaqarluni inissiamik takusaaniarnera attartortup pissutissaqarani itigartippagu.
Imm. 2. Akiitsoqartoqarnera paasineqarpat qanoq iliuuseqannginnermi paasiniarneqaqqaarallassaaq attartortoq inigisaminut akiligassaminik il.il. isumaginninnermi inatsisit malillugit tamakkiissumik ilaannakortumilluunniit akiliunneqarsinnaanersoq. Taamaaliortoqarsinnaappat ineqarnermut akiliutip siunissami akilerneqartarnissaa pillugu allakkatigut kommuni isumaqatigiissuteqarfigineqassaaq attartornerlu atorunnaarsinneqassanani. Akiitsullu ikilisarneqarnissaat attartortumik taamatulli isumaqatigiissutigineqassaaq.
Kapitali 3
Allakkatigut peqqusissut§ 4. Peqqusissut imaalillugu nalunaarutigineqassaaq pissutsip aaqqinneqarnissaanut attartortoq naammaginartumik piffissalerlugu. Sumiginnarneqartup suussusianut annertussusianullu naapertuuttumik piffissaliunneqartoq sivisussusilerneqassaaq.
Imm. 2. Ineqarnermut, kiassarnermut qularnaveeqqusiissutinilluunniit akiligassanik kinguaattoornikkut sumiginnaasoqarsimappat, inissianik attartorneq pillugu Inatsisartut peqqussutaanni § 33, imm. 2, malillugu attartortitsisoq attartornermik atorunnaarsitsinialersinnagu allakkatigut nukingisaarummik nalinginnaasumik nassiussisoqassaaq.§ 5. Allakkatigut peqqusinermi makku paasissutissiissutigineqassapput:
1) pissutsit peqqusinermut patsisaasut,
2) inissianik attartorneq pillugu Inatsisartut peqqussutaanni aalajangersagaq aalajangeeeersagaq, inissianik attartorneq pillugu Inatsisartut peqqussutaanni § 33-imut tapertaliulluni attartornermik atorunnaarsitsisinnaanermik imaqartoq,
3) piffissaliussap iluani peqqusissut naalanneqanngippat aaqqiivigineqaranilu imaluunniit piffissaliussaq naatinnagu attartortitsisoq immikkut ittumik isumaqatigiissuteqarfigineqanngippat attartortitsineq atorunnaarsinneqarumaartoq,
4) attartorneq atorunnaarsinneqassappat attartugaq erniinnaartumik qimanneqassasoq.
Imm. 2. Allaganngorlugu peqqusissutip nuutinnera kommunimut nassiunneqassaaq. Imm. 1, nr. 3-mi piffissaliussatut taaneqartoq imaalillugu naleqqussarneqassaaq, kommuni ikiorsiissuteqartariaqalersinnaanerminik naliliinissaminut naammaginartumik piffissalerlugu.
Kapitali 4
Attartornermik atorunnaarsitsineq§ 6. Piffissaliussap iluani peqqusissut malinneqarsimanngippat imaluunniit attartortoq attartortitsisorlu immikkut isumaqatigiissuteqarsimanngippata attartorneq atorunnaarsinneqarsinnaavoq.
Imm. 2. Attartornermik atorunnaarsitsineq allaganngorlugu attartortumut nalunaarutigineqassaaq. Peqqusissutip § 5-imi taaneqartup saniatigut atorunnaarsitsinerup kinguneri pillugit paasissutissanik nalunaarut imaqassaaq, ilanngullugit
1) inissiaq qaqugukkut qimanneqarlunilu pigisanik imaarneqassasoq,
2) attartukkamut matuersaatit attartortitsisumut qaqugukkut tunniunneqassasut,
3) inissianik attartorneq pillugu Inatsisartut peqqussutaanni § 35 naapertorlugu inissiaq qaqugu misissorneqassasoq,
4) piffissamut sumut ineqarnermut il.il. akiliutit akilerneqassanersut.
Kapitali 5
Anisitsineg§ 7. Attartortup taassumalu inoqutaasa piffissaliussap nallernerani inissiaq qimassimanngippassuk, attartortup inoqutaasalu inissiamit anisinneqarnissaat pigisaasalu peerneqarnissaat pillugit attartortitsisup politiit qinnuigissavai.
Imm. 2. Anisitsiniarneq attartortitsisup isumagissavaa attartortulli tamanna akilissavaa.
Kapitali 6
Pigisanik inissiineq§ 8. Pisattat assartorneqarnerinut inissinneqarnerinullu aningaasartuutit attartortitsisumit susassarineqanngillat. Politiinut immikkut isumaqatigiissuteqartoqarsimatinnagu pisattat inissinneqarnerinut attartortitsisoq allamik akisussaaffeqanngilaq.
§ 9. Pisattanut inissiivissamik politiit pissarsisinnaanngippata, attartortitsisup politiit immikkut isumaqatigiissuteqarfigeriarlugit pequusivimmik assigisaanilluunniit periarfissiisinnaavoq.
Imm. 2. Pisattat suulluunniit qaammatinik arfinilinnik sivisunerunngitsumik inissisimanissaat piumasaqaatigalugu pequusiviit akeqanngitsumik politiinut atugassiarineqassapput.
Kapitali 7
Anisitanik inisseeqqinneq§ 10. Anisitsinermi tamanna politiinit piumasarineqarpat, attartortup taassumalu inoqutaasa inisseqqinneqarnissaat attartortup neqeroorutigisinnaasariaqarpaa.
Imm. 2. Inissiani inisseeqqiffiusuni kiassarnikkut eqqiluisaarnikkullu atortut naammaginartumik pitsaassuseqassapput. Inisseeqqiffiusussat allatigut pitsaassuseqarnissaat piumasaqaatigineqanngilaq.§ 11. Inissiani inisseeqqiffiusuni attartornermut isumaqatigiissuteqartoqassanngilaq, inisseeqqinnerullu nalaani ineqarnermut akiliummik ineqarnermiluunniit akiligassanik allanik akiliisitsisoqassanngilaq.
Imm. 2. Inissiap inisseeqqiffiusup aniserfigineqarnerani inisseeqqinnerup nalaani inigineqartup annertussusia naapertorlugu, ineqarnermut il.il. akiliutit atuuttut tunngavigalugit akiligassiisoqassaaq.
Kapitali 8
Nalunaarutip atuutilerfia§ 12. Nalunaarut atuutilerpoq ulloq 1. januar 1995 atorneqassallunilu attartornernut tamatumap kingornagut isumaqatigiissutigineqartunut.
Namminersornerullutik Oqartussat, ulloq 29. december 1994.
Emil Abelsen/
Peter Beck