Namminersornerullutik Oqartussat kommunillu inissiaataanni attartortittakkani inisimasunut ineeqqanik attartortitsineq pillugu Namminersornerullutik Oqartussat nalunaarutaat nr. 58 , 29. december 1994-imeersoq.
Inissianik attartorneq pillugu Inatsisartut peqqussutaanni nr. 3-mi, 13. juni 1994-imeersumi, § 21 naapertorlugu aalajangersarneqarput:
Kapitali 1
Nalinginnaasumik§ 1. Attartortitsisutut paasineqassaaq Inissiaatileqatigiiffik INI A/S, inissianik attartortittakkanik piginnittut, Namminersornerullutik Oqartussat imaluunniit kommuni inissiat ingerlanneqarnerat aqunneqarnerallu pillugit inissiaatileqatigiiffimmik isumaqatigiissuteqarsimappata.
Kapitali 2
Attartortitsissagaanni piumasaqaatit§ 2. Attartortitsineq aatsaat pisinnaavoq inissiami ineqartut tamarmiusut inisisimasoq ilanngullugu inissiami init amerlassusaannit amerlanerunngippata.
§ 3. Attartortitsineq attartortitsisup inisisimasullu akornanni allakkatigut toqqaannartumik isumaqatigiissuteqarnikkut pissaaq.
Kapitali 3
Attartornermut ákiliut il.il.§ 4. Inisisimasup pisussaaffigisaanut sillimmatitut qaammatini pingasuni ineqarnermut akiliut qaangernagu qularnaveeqqusiisoqarsinnaavoq (depositum).
§ 5. Inisisimasup ineqarnermut akiliutissaa annerpaamik inigisap ineqarnermut, kiassarnermut, imermut, innaallagissamut il.il. aningaasartuutaanut tamarmiusunut inillu amerlassusaat naapertorlugit naatsorsorneqarsimasumut naapertuuttumik angissuseqarsinnaavoq.
§ 6. Ineqarnermut akiliut attartortitsisumut siumoortumik qaammatip aallaqqaataani akilerneqartassaaq.
Imm. 2. Attartortitsisup attartortitsinermi isumaqatigiissut atorunnaarsissinnaavaa kingusinaartumik akiliisoqartillugu, inisisimasup ineqarnermut akiliut kingusinnerpaamik qaammatip ulluinnaasa pingajuanni akilersimanngippagu.
Imm. 3. Attartortitsisup kingusinaartumik akiliisimaneq pissutigalugu attartortitsinermi isumaqatigiissut atorunnaarsippagu, inisisimasoq attartukkaminit ingerlaannaaq anissaaq.
Kapitali 4
Attartortitsinermik atorunnaarsitsineq il.il.§ 7. Attartortitsineq attartortitsisumit qaammatinik pingasunik inisisimasumillu qaammammik ataatsimik sioqqutsisumik ilisimatitsereernikkut qaammatip naanissaanut atorunnaarsinneqarsinnaavoq.
§ 8. Attartortitsisup attartornera atorunnaarpat piffissamissaaq tassani inisisimasup attartornera atorunnaassaaq.
Imm. 2. Attartortitsisup patsisissaqanngitsumik kinguartitsinani attartornermi atorunnaarnissaanut piffissamik paasitinneqareernermi kingorna tamatuminnga inisisimasumut nalunaarutiginnissaaq.§ 9. Attartortitsisup § 2-mi aalajangersagaq unioqqutippagu, attartukkamik atorunnaarsitsineq pillugu Namminersornerullutik Oqartussaat nalunaarutaat naapertorlugu, tamanna attartortitsisup nammineq attartorneranik unioqqutitsinertut isigineqassaaq.
Imm. 2. Ineeqqamik attartortitsisup inisisimasullu akornanni isumaqatigiinngissutaasinnaasut inissiamik attartortitsisup susassarinngilai.
Kapitali 5
Nalunaarutip atuutilerfía§ 10. Nalunaarut 1. januar 1995 atuutilerpoq atorneqassallunilu attartornernut tamatumap kingornagut isumaqatigiissutigineqartunut.
Namminersornerullutik Oqartussat, ulloq 29. december 1994.
Emil Abelsen/
Peter Beck