Namminersornerullutik Oqartussat kommunillu inissiaataanni attartortittakkani ineqarnermut akiliutip naatsorsorneqartarnera pillugu nalunaarut nr. 56 , 29. december 1994-imeersoq.
Inissianik attartorneq pillugu Inatsisartut peqqussutaanni nr. 3-mi, 13. juni 1994-imeersumi § 10, imm. 4, naapertorlugu aalaj angersarneqarput:
Kapitali 1
Nalinginnaasumik§ 1. Attartortitsisutut paasineqassaaq Inissiaatileqatigiiffik INI A/S, inissianik attartortittakkanik piginnittut Namminersornerullutik Oqartussat kommuniluunniit inissiat ingerlanneqarnerat aqunneqarnerallu pillugit inissiaatileqatigiiffimmik isumaqatigiissuteqarsimappata.
Kapitali 2
Maleruagassat atuuffii§ 2. Namminersornerullutik Oqartussat Kalaallillu Nunaanni kommunit inissiaataannut, aammattaaq ilaqutariinnut arlalinnut, ilaqutariinnut ataatsinut illuliani illulianilu marloqiusani inissianut, ineeqqanut (hybler) inissianilu ineerakkaarlugit arlaliuttarissanut (klubværelser) nalunaarut atuuppoq.
Imm. 2. Ilaqutariinnut arlalinnut naatsorsuutigineqartarput inissiat quleriiaat, inissiat uiulukuttut illullu ataqatigiit minnerpaamik pingasunik inissiartaqartut, ilaqutariinnut ataatsinut illuliaasinnaasut ataqatigiissillugit sanaat.,
Imm. 3. Ineeqqatut (hybel) paasineqassaaq inissiaq ataasiinnarmik initalik immikkut igaffeqanngitsoq, kisannili igaffeeralik, uffarfilik anartarfilillu, klubværelsitullu paasineqassapput inissiani ineeqqat ataasiakkaat inissiami soorlu igaffimmut, uffarfimmut anartarfimmullu atuinissamut periarfissallit.
Kapitali 3
Ineqarnermut akiliutip naatsorsorneqarnera§ 3. §§5 aamma 6 naapertorlugit inissiap ingerlanneqarneranut atatillugu pisariaqartumik aningaasartuutit kiisalu § 7 naapertorlugu aningaasaliissutaasimasunit iluanaarutit sinnerlugit ineqarnermut akiliut angissuseqassanngilaq.
Imm. 2. Ineqarnermut akiliut qaammatinik pingasunik sioqqutsisumik allakkatigut nalunaaruteqarnikkut qaffanneqarsinnaavoq.
Imm. 3. Inissiap inigineqarsinnaasortaata angissusiata naatsorsorneqarnera pillugu Namminersornerullutik Oqartussat nalunaarutaat naapertorlugu inissiat ataasiakkaat inigineqarsinnaasortaasa angissusii tunngavigalugit ineqarnermut akiliut tassungalu qaffaat agguataarneqassapput. Annerpaamilli inissiami inigineqarsinnaasunut 150 kvadratmeterinut ineqarnermut akiliisoqartassaaq.
Imm. 4. Inissiani ineerakkaarlugit arlaliuttarissani ineeqqap inigineqarsinnaasortaata angissusia tassaavoq ineeqqap angissusia taamatullu inissiami ataatsimoorussiffinni atukkap angissusia. Ineeqqat ataasiakkaat angissusii naapertorlugit akiliutissap naatsorsornerini init ataatsimoorussiffiit angissusii agguataarlugit naatsorsuiffigineqassapput.§ 4. Inissianik attarneq pillugu Inatsisartut peqqussutaanni § 7 naapertorlugu inissiani attartortittakkani ilaqutariinnut arlalinnut illuliat immikkoortukkuutaanut agguataarneqassapput. Immikkoortoqarfinni ataasiakkaani attartornermut akiliut ullorsiutit malillugit ukiumoortumik missingersuutit atuuttut tunngavigalugit naatsorneqassaaq, immikkoortortaqarfiup isertitaanik immikkoortortaqarfiup aningaasartuutai akilerneqarsinnaanngorlugit.
Imm. 2. Ukiumoortumik missingersuutit suliarineqarnerannut atatillugu immikkoortortami siulersuisut attartortitsisullu sinniisaata nalinginnaasumik aserfallatsaaliuinerup pitsaassusia misissuataassavaat ukiumilu missingersuusiorfiusumi suut suliarineqassanersut oqaluuseralugu.
Imm. 3. Imm. 2-mi misissuataarineq taaneqartoq tunngavigalugu attartortitsisoq missingersuutinut siunnersuusiussaaq, attartortitsisumit akuerineqavitsinnani immikkoortoqarfimmi siulersuisunit akuerineqartussamik.
Imm. 4. Ilaqutariinnut ataatsinut illuni aamma illuni marloqiusani ineqarnermut akiliutit kommunimi ilaqutariinnut ataatsinut illunilu marloqiusani tamani ullorsiutit malillugit ukiumut missingersuutit tunngavigalugit aalajangersarneqassapput.
Kapitali 4
Ingerlatsinermut aningaasartuutit§ 5. Ingerlatsinermut aningaasartuutit pisariaqartut tassaapput ingerlatsinermut aningaasartuutit tamarmiusut, ilanngullugit ilaqutariinnut arlalinnut illuni sulisut akissarsiaat, avataanit sullinneqarnerit, pisiniarnerit, ingerlatsinermut atortut, iluarsaassineq aserfallatsaaliuinerlu, aningaasartuutit assigiinngitsut, allaffissornermut aningaasartuutit il.il. kiisalu iluarsaatilersaakkanut toqqortat.
Imm. 2. Imm. 1-imi ingerlatsinermut aningaasartuutit taaneqartut saniatigut ilaqutariinnut ataatsinut illuni aamma illuni marloqiusani aammattaaq ingerlatsinermut aningaasartuutinut ilaapput anartarfilerineq, septiktankip imaarneqarnera, paaviaaneq, erngup aqqutaanik innaallagissamik kiassarneq kiisalu illu imiisiveqanngippat imermik pajunneqarnermut aningaasartuutit.
Imm. 3. Sumiiffinni sermimik aatsitsinikkut imermik pilersuisoqaraangat nammineerluniluunniit imertartarfeqarpat imaluunniit anartarfinnik imaarsisoqarneq ajorpat, tamatumunnga aningaasartuutit pillugit attartortitsisoq attartortorlu immikkut isumaqatigiissuteqassapput.
Kapitali 5
Aningaasaliissutaasimasunit iluanaarutit§ 6. § 7 naapertorlugu aningaasaliiissutaasimasunit iluanaarutit illup sananeqarnerani aningaasartuutit 2,75%-eraat, taamaallaalli sananeqarnerini akiinit kvadratmeterimut 6.500 kr.-init amerlanerussutaannit aningaasaliissutaasimasunit iluanaarutit naatsorneqartassapput.
§ 7. Sananermut aningaasartuutinut ilaapput inissiap sananeqarneranut aningaasartuutit tamarmik, taakkununnga ilaatinneqarlutik pilersaarusiornermut, nakkutilliinermut, allaffissornermut sanaartorfiullu iluani nunagissaanermut aningaasartuutit. Sanaartornermulli aki minnerpaamik kvadratmeterimut 7.000 kr.-iussaaq.
Imm. 2. Iserternerup nalaani illuutit sanaartorneqarnerannut naatsorsuutit takkussimanngippata, sanaartornermut naatsorsuusiaagallartut, ukiut tamaasa sanaartornermut naatsorsuutaagallartut kukkunersiorneqarsimasut malillugit iluarsineqartartut, tunngavigalugit aningaasaliissutaasimasunit iluanaarutit naatsorsorneqartassapput, sanaartornermi aningaasartuutit tamarmiusut takkunnissaasa tungaanut.
Imm. 3. Illuliami nutarsakkami sanaartornermut aki nutarsaaneq naammassereerpat iluarsineqassaaq, imm. 1 naapertorlugu nutarsaanerup aallartinnerani atuuttut, nutarsaanermi illumut pitsanngoriaatit sanaartornermut akianut ilanngullugit.
Imm. 4. Illuni pisiarineqarsimasuni sanaartorneqarnerinut akii ilisimaneqanngikkaangata, imm. 1 naapertorlugu pisinermi aki kingusinnerusukkut allanngortiterisimasinnaanerit pitsanngorsaatillu ilanngullugit sanaartorneqarnerini akiisut naatsorsorneqassapput.
Kapitali 6
Attartornermut akiliummit ilanngaatit§ 8. Ineqarnermut akiliummut apparsaatitut meeqqanut 18-it inorlugit ukiulinnut ineqarnermut tapiissuteqartoqartarpoq. Ullormi attartornermut akiliutip akilerneqarfissaani meeraq najukkami pineqartumi najugaqartutut inunnut allattorsimaffimmi nalunaarneqarsimappat tapiissuteqartoqartarpoq.
Imm. 2. Ineqarnermut meeqqanut tapiissut meeqqamut ataatsimut attartornermut akiliutissatut naatsorsorneqarsimasup 10%-iatut tunniunneqartarpoq, annerpaamilli 60% tapiissutigineqarsinnaavoq.§ 9. Illumi atortulersuutit inissiani attartortittakkani atorutlersuutit nalinginnaasumik atorneqartut pitsaassusii inorpatigik, illumi atortulersuutinit amigaatit attartornermut akiliummit ilanngaatigineqassapput.
Imm. 2. Atortulersuutit illumi amigaataasut ilanngaatissatut pointit ataani taaneqartut atorlugit ilanngaatigineqassapput:
1) uffarfik 3 point
2) kiassaateqarfik/kiassaat uuliatortoq 4 point
3) innaallagiaq 3 point
4) imeq kuuinnartoq imaluunniit imiisivik 4 point
5) gas/innaallagiaq iganermut atugassaq 3 point
6) anartarfik 3 point
7) 250 mm tikillugu oqorsaanerup nalinga 4 point
Imm. 3. Oqorsaaneq ilanngaataassaaq naqqit, qilaat iikkallu kiffiutissanik mineraluldinik 250 mm inorlugit oqorsarneqarsimappata. Oqorsaatissat allat atorlugit oqorsaasoqarsimappat mineraluldit oqorsaasinnaanerinut naleqqersuullugu ilanngaatissaq naatsorsorneqassaaq.
Imm. 4. Ilanngaatissatut pointi ataaseq imm. 2-mi taaneqartoq ukiumut m2-mut 6 kr.-inik naleqarpoq.
Imm. 5. Imm. 4 naapertorlugu attartornermut akiliummut ilanngaat, ilaatigut ingerlatsinermi aningaasartuutinut appariaataassaaq, atortulersuutinut amigaataasunut toqqaannartumik attuumassuteqarnerat naapertorlugu ilaatigullutunut § 6 naapertorlugu periarfissaqarneq malillugu inissiami pineqartumi aningaasaliissutaasimasunit iluanaarutissatut naatsorsorneqarsimasunut.
Kapitali 7
Nalunaarutip atuutilerfia§ 10. Nalunaarut atuutilerpoq ulloq 1. januar 1995.
§ 11. Ikaarsaariarnerup nalaani 1. januar 1995-imit immikkoortoqarfinni missingersuutit aamma ilaqutariinnut ataatsinut illuni illunilu marloqiusani missingersuutit 1. januar 1997-imi atulersumik immikkoortoqarfinni ataasiakkaani aningaasartuutit uppernarsarneqarsinnaasut imaluunniit illuni ataasiakkaani ingerlatsinermut aningaasartuutit uppernarsarneqarsinnaasut tunngavigalugit suliarineqarsinnaalernissaasa tungaanut, immikkoortoqarfiit pillugit tapiliussaq 1 aamma ilaqutariinnut ataatsinut illut illullu marloqiusat pillugit tapiliussaq 2 naapertorlugit aningaasartuutinut ataatsiakkaanut killiliunneqarsimasut tunngavigalugit attartortitsisoq ingerlatsinermut missingersuusiortassaaq.
Imm. 2. Tapiliussani iluarsaassinermi aserfallatsaaliuinermilu ingerlatsinermut aningaasartuutinut aamma aserfallatsaaliulersaakkanut toqqortanut killiussat minnerpaaffissaannut kisitsisitaligaapput, aqutsinermulli kisitsinut killiussat missingersuutini ilanngunneqarsinnaasut amerlanerpaaffissaannut kisitsisiligaallutik.
Namminersornerullutik Oqartussat, ulloq 29. december 1994.
Emil Abelsen
/
Peter Beck
Ilanngussaq 1 (pdf-format)
Ilanngussaq 2 (pdf-format)