Namminersornerullutik Oqartussat kommunillu inissiaataanni attartortittakkani immikkoortortaqarfinni siulersuisunik qinersineq pillugu Namminersornerullutik Oqartussat nalunaarutaat nr. 54, 29. december 1994-imeersoq.
Inissianik attartorneq pillugu Inatsisartut peqqussutaanni nr. 3-mi, 13. juni 1994-imeersumi, § 7, imm. 4, naapertorlugu aalajangersarneqarput:
Kapitali 1
Nalinginnaasumik§ 1. Attartortitsisutut paasineqassaaq Inissiaatileqatigiiffik INI A/S, inissianik attartortittakkanik piginnittut, Namminersornerullutik Oqartussat imaluunniit kommuni inissiat ingerlanneqarnerat aqunneqarnerallu pillugit inissiaatileqatigiiffimmik isumaqatigiissuteqarsimappata.
Kapitali 2
Immikkoortortaqarfimmi ataatsimiigiaqqusineq§ 2. Namminersornerullutik Oqartussat kommunillu inissiaataanni attartortittakkani immikkoortortaqarfinni najugaqartut ataasiakkaat immikkoortortaqarfimmi siullermeerluni ataatsimiinnissamut namminneerlutik suliniuteqarsinnaapput, attartortitsisumulluunniit saaffiginnillutik immikkoortortaqarfimmi ataatsimiigiaqqusinissaq qinnutigisinnaavaat.
Imm. 2. Immikkoortortaqarfimmi ataatsimiinnermut immikkoortortaqarfimmi ineqartut tamakkerlugit ataatsimiigiaqquneqassapput. Naleqquttumi allagartaliinikkut, takoqqusaaruteqarnikkut ineqartunulluunniit tamanut allagaqarnikkut minnerpaamik ullunik 14-inik siumut nalunaaruteqarnikkut ataatsimiigiaqqusisoqartassaaq. Tamatumunnga peqatigitillugu attartortitsisoq ataatsimiigiaqquneqassaaq.
Imm. 3. Immikkoortortaqarfimmi ataatsimiinnermi peqataasinnaatitaallutillu tassani taaseqataasinnaatitaapput immikkoortortaqarfimmi ineqartut, taakkua aappaat inuillu taamatulli piginnaatitaaffeqartut. Inoqutigiit amerlassusii apeqqutaatinnagit inoqutigiit ataatsit marlunnik tassisinnaatitaapput. Attartortitsisoq taamatulli immikkoortortaqarfimmi ataatsimiinnermut peqataasinnaatitaavoq taasisinnaatitaananili.
Imm. 4. Immikkoortortaqarfimmi ataatsimiittut aqutsisussamik namminneerlutik toqqaassapput.
Imm. 5. Ineqartut namminneerlutik immikkoortortaqarfimmi ataatsimiigiaqqusinngippata, 1. januar 1996 tikitsinnagu ataatsimiigiaqqusinissamut attartortitsisoq pisussaavoq.
Kapitali 3
Immikkoortortaqarfimmi siulersuisunik qinersineq§ 3. Immikkoortortaqarfimmi ataatsimiinnermi immikkoortortaqarfimmi siulersuisunik qinersisoqassanersoq aalajangerneqassaaq. Peqataasut akornanni amerlanerussuteqarnikkut aalajangiisoqassaaq. Attartornerit tamarmik taasinernik marlunnik naleqarput.
Imm. 2. Imatut pisoqartillugu immikkoortortaqarfimmi ataatsimeeqataasut akornanni amerlanerussuteqarnikkut aalajangerneqarsinnaavoq, ineqartut peqatigiiffianni pioreersumi siulersuisut immikkoortortaqarfimmi siulersuisunngussanersut,
1) ineqartut amerlanersaat ineqartut peqatigiiffiannut ilaasortaappata,
2) immikkoortortaqarfimmi najugaqartuinnarnik ineqartut peqatigiiffiat ilaasortaqarpat,
3) § 4, imm. 1-imut naapertuuttumik siulersuisuni ilaasortat amerlassuseqarpata.
Imm. 3. Imm. 1-imi maleruagassat malillugit immikkoortortaqarfimmi siulersuisunik qinersisoqarnissaa kingusinnerusukkut immikkoortortaqarfimmi ataatsimiinnermi aalajangerneqarsinnaavoq.§ 4. Immikkoortortaqarfinni inoqutigiit 50-it sinneqaraangata immikkoortortaqarfimmi siulersuisut tassaassapput siulittaasoq ilaasortallu marluk, immikkoortortaqarfimmi ataatsimiinnermi qinerneqartussat. Immikkoortortaqarfinni annerusuni ilaasortassanik marlunnik amerlanerusunik qinersisoqarnissaa immikkoortortaqarfimmi ataatsimiinnermi aalajangerneqarsinnaavoq.
Imm. 2. Immikkoortortaqarfimmi siulersuisunut ilaasortassatut qineqarsinnaapput immikkoortortaqarfimmi najugaqartut, taakkua aappaat kiisalu inuit taakkutulli piginnaatitaaffeqartut.
Imm. 3. Qinersinerup inernera attartortitsisumut nalunaarutigineqassaaq, immikkoortortaqarfiup ingerlanneqarnera pillugu attartortitsisup kimut saaffiginnissaannera nalunaarutigalugu.
Imm. 4. Immikkoortortaqarfimmi siulersuisut sulinerannut atatillugu aningaasartuutit amerlanaagaanngitsut immikkoortortaqarfimmi missingersuutinut naapertuuttumik immikkoortortaqarfiup akilertassavai. Sulinermut tamatumunnga immikkoortortaqarfimmi siulersuisut akissaateqartinneqassanngillat.§ 5. Ukioq allortarlugu siulittaasoq tunuartassaaq, Siulersuisuni ilaasortaasut sinnerinit affaat ukioq allortarlugu tunuartassapput. Ilaasortat ataatsikkut qinigaasimasut tunuartarnerannik tulleriaarineq makitsinikkut pisassaaq taamaanngippallu ilaasortat qinigaanerminni tulleriinnilersorneqarnerat malillugu. Qinigaaqqittoqarsinnaavoq.
§ 6. Immikkoortortaqarfimmi siulersuisunik qinersisoqarsimanngippat immikkoortortaqarfimmiluunniit siulersuisut sulinertik taamaatissimappassuk, immikkoortortaqarfimmilu siulersuisunik nutaanik qinersisoqarsimanngippat, immikkoortortaqarfimmi siulersuisunut suliassiissutigineqartartut attartortitsisup isumagissavai.
Kapitali 4
Immikkoortortaqarfiit aqunneqarneri§ 7. Ukiut tamaasa 1. maj nallertinnagut immikkoortortaqarfinni tamani ileqquusumik ataatsimiittoqartassaaq. § 2-mi maleruagassat naapertorlugit immikkoortortaqarfimmi ataatsimiigiaqqusisoqartassaaq.
Imm. 2. Immikkoortortaqarfimmi ataatsimiinnermi oqaluuserisassat makkununnga tunngasuussapput:
1) Ukioq qaangiuttoq pillugu immikkoortortaqarfimmi siulersuisut nalunaarutaat.
2) Immikkoortortaqarfiup ukiumoortumik naatsorsuutaasa akuerisassanngorlugit saqqummiunneqarnerat.
3) Ukiumut missingersuutit ilisimatitsissutitut saqqummiunneqarnerat.
4) Siulittaasoq tunuassappat § 5 malillugu immikkoortortaqarfimmi siulersuisut siulittaasussaannik taassumalu sinniisussaanik qinersineq.
5) § 5 malillugu immikkoortortaqarfimmi siulersuisunut ilaasortassanik taakkulu sinniisissaannik qinersineq.
6) Siunnersuutit tiguneqarsimasut.
7) Saniatigut oqaluuseriumasat.
Imm. 3. Immikkoortortaqarfimmi immikkut ittumik ataatsimiittoqartassaaq, immikkoortortaqarfimmi siulersuisut tamanna pissutissaqarsorigaangassuk, immikkoortortaqarfimmi najugaqartut minnerpaamik arfineq pingajorarterutaasa oqaluuserisassatut nalunaarutigineqarsimasoq oqaluuserineqaqqullugu kissaatigippassuk, immikkut ittumik ataatsimiinnissaq siusinnerusukkut aalajangiunneqarsimappat taamaaliornissarluunniit attartortitsisup qinnutigippagu.§ 8. Immikkoortortaqarfimmi pineqartumi nalinginnaasumik ataatsimiinneq kingusinnerpaamik sapaatip akunneranik ataatsimik sioqqullugu ukiumoortumik naatsorsuutit missingersuutillu immikkoortortaqarfimmi inoqutigiinnit tamanit takuneqarsinnaassapput.
§ 9. Immikkoortortaqarfimmi ataatsimiinnermut peqataasinnaatitaallutillu taaseqataasinnaatitaapput immikkoortortaqarfimmi ineqartut, taakkua aappaat inuilluunniit taakkutulli piginnaatitaaffeqartut. Attartortitsisoq aammattaaq immikkoortortaqarfimmi ataatsimiinnermi peqataasinnaatitaavoq taasisinnaatitaananili. Ineqartoq piginnaatitsissummik nassartitsilluni ataatsimeeqataasinnaavoq.
Imm. 2. Kinaluunniit imm. 1 malillugu immikkoortortaqarfimmi ataatsimiinnermi peqataasinnaatitaasoq qulequtaq nalunaarutigisimasani oqaluuseritissallugu piginnaatitaavoq. Siunnersuutit nalinginnaasumik ataatsimiinnermi oqaluuseritikkusutat, ataatsimiinnissaq sapaatip akunneranik ataatsimik sioqqullugu immikkoortortaqarfimmi siulersuisunut tunniunneqareersimassapput. Kingusinnerpaamik ataatsimiinnissaq ullunik pingasunik sioqqullugu siunnersuutit immikkoortortaqarfimmi ineqartunut saqqununiunneqassapput.
Imm. 3. Immikkoortortaqarfimmi ataatsimmiinnermi aalajangiinerit peqataasut akornanni nalinginnaasumik amerlanerussuteqarneq tunngavigalugu aalajangerneqartassapput, attartortullu ataasiakkaarlutik marlunnik taasisinnaatitaapput. Piginnaatitsummik tunniussisinikkut taasisoqarsinnaavoq. Immikkoortortaqarfimmi ataatsimiinnermi aalajangerneqarsinnaavoq aalajangiivinnissaq immikkoortortaqarfimmi ineqartut taasiteqqinnerisigut pissasoq, tassanilu attartortut ataasiakkaat inoqutaasut amerlassusiat apeqqutaatinnagu marlunnik taasisinnaatitaapput.
Kapitali 5
Irnnikkoortortaqarfiimi siulersuisut suliassaat§ 10. Immikkoortortaqarfimmi aserfallatsaaliuinerup pitsaassusia nakkutiginissaalu immikkoortoqarfimmi siulersuisut nakkutigissavaat paaqqutaralugulu immikkoortortaqarfimmi peqqissaarussinissaq nakkutigalugu. Uparuaasoqassaguni attartortitsisumut uparuaasoqassaaq.
Imm. 2. Inissiaateqarfimmi sulisorisanik atorfinitsitsineq soraarsitsinerlu pillugit immikkoortortaqarfimmi siulersuisut ilisimatinneqartassapput.
Imm. 3. Immikkoortortaqarfimmi siulersuisut suliassaasa ingerlanneqarnissaat suleriaasissatut aalajangersagaq atorlugu erseqqinnerusumik aalajangersarneqassaaq, ilaatigut tamanit assigiimmik atorneqarsinnaasumik suleriaasissamut aalajangersagaliornikkut.
Imm. 4. Immikkoortortaqarfinni siulersuisut suliassaat inissianik attartorneq pillugu Inatsisartut peqqussutaanni §§ 8-mi 10-milu aammattaaq takuneqarsinnaapput.§ 11. Inissianik attartorneq pillugu Inatsisartut peqqussutaanni § 10, imm. 3 naapertorlugu naammaginartumik pitsanngorsaaneqarlunilu nutaanngorsaaneqassasoq, immikkoortortaqarfimmilu siulersuisut taamaaliornerup kinguneranik attartornermut akiliutip qaffaatissaa ilanngullugu akuersissutigippassuk, siunnersuutip piviusunngortinneqarnissaa attartortitsisup isumaginiassavaa.
Imm. 2. Imm. 1 malillugu immikkoortortaqarfimmi siulersuisut aalajangiineri immikkoortortaqarfimmi ataatsimiinnermi akuersissutigitinneqassapput. Attartornermut akiliutip qaffaataata ilanngunneqartussap ineqarnermut akiliut ukiumoortoq 5%-imik sinnerpagu, immikkoortortaqarfimmilu ataatsimiinnermi peqataasut minnerpaamik arfineq pingajorarterutaasa tamanna piumasarippassuk, § 9, imm. 3-mi maleruagassat naapertorlugit immikkoortortaqarfimmi ineqartut taasiteqqinnerisigut akuersissutigineqavinnissaa pissaaq.§ 12. Immikkoortortaqarfimmi siulersuisut immikkoortortaqarfimmi ataatsimiittut akuersitinnerisigut ineqarfimmi pissuserissaarnissamut maleruagassani allannguutissat, attartortitsisumit saqqummiunneqartut akuerisinnaavaat.
Kapitali 6
Immikkoortortaqarfinni siulersuisunik atorunnaarsitsineq§ 13. Immikkoortortaqarfimmi ataatsimiinnerit ikittuaraannarnik peqataaffigineqartarpata, attartortitsisup immikkoortortaqarfimmi siulersuisut isumaqatiginiareerlugit immikkoortortaqarfimmi ataatsimiinnissamut aggersaasinnaavoq immikkoortortaqarfimmi siulersuisut atorunnaarsinneqarnissaannik siunnersuut kisiviat oqaluuserisassanngorlugu.
Imm. 2. Taamaattorli immikkortortaqarfimmi siulersuisut atorunnaarsinneqarnissaannik siunnersuut, § 7 imm. 3 naapertorlugu, taammaallaat immikkoortortaqarfimmi immikkut ittumik ataatsimiinnermi oqaluuserineqarsinnaavoq, siunnersuut ataatsimmiinnermi kisiat oqaluuserisassanngorlugu.
Kapitali 7
Nalunaarutip atuutilerfia§ 14. Nalunaarut atuutilerpoq ulloq 1. januar 1995
Namminersornerullutik Oqartussat, ulloq 29. december 1994.
Emil Abelsen/
Peter Beck