Namminersornerullutik Oqartussat kommunillu inissiaataanni attartortittakkani qularnaveeqqusiissuteqartarneq pillugu Namminersornerullutik Oqartussat nalunaarutaat nr. 53, 29. december 1994-imeersoq.
Inissianik attartortitsineq pillugu Inatsisartut peqqussutaanni nr. 3, 13. juni 1994-imeersumi, § 5, imm. 5 naapertorlugu aalaj angersarneqarput:
Kapitali 1
Nalinginnaasumik§ 1. Attartortitsisutut paasineqassaaq Inissiaatileqatigiiffik INI A/S, inissianik attartortittakkanik piginnittoq, Namminersornerullutik Oqartussat imaluunniit kommuni, inissiat ingerlanneqarnerat aqunneqarnerallu pillugit inissiaatileqatigiiffimmik isumaqatigiissuteqarsimappata.
Kapitali 2
Attartornissamik isumaqatigiissuteqarneq§ 2. Isertertoqartinnagu attartortoq qularnaveeqqusiissummik qaammatini pingasuni attartornermut akiliuititut annertutigisumik attartortitsisumut akiliuteqassaaq, attartornermut isumaqatigiissut naapertorlugu anisernermi attartortitsisup attartortumut piumasaqaataanut qularnaveeqqutigut.
Imm. 2. Qularnaveeqqusiissutissaq naatsorsorneqartassaaq iserternermi ineqarnermut akiliutip angissusia tunngavigalugu, kiassarnermut akiliut ineqarnermullu meeqqanut tapiissutaasinnaasut ilanngunnagit.
Imm. 3. Attartortup qularnaveeqqusiissutissaq tamaat ataatsikkut akilersinnaanngippagu, sivisunerpaamik qaammatini 12-ini angeqqatigiiaarlugit akilersuinissamik isumaqatigiissuteqartoqarsinnaavoq.§ 3. Qularnaveeqqusiissutip qanoq ililluni akilerneqarnissaa tamatigut inissiamik attartornermut isumaqatigiissummi allaqqasassaaq.
Imm. 2. Akileraasussaatitaanermik eqqortitsinnginneq attartornissamut isumaqatigiissummik naammassinninnginneruvoq, tamannalu naapertorlugu attartorneq atorunnaarsinneqarsinnaalluni.
Kapitali 3
Attartornerup atorunnaarnera§ 4. Attartornerup atorunnaarnerani, inissianik attartorneq pillugu Inatsisartut peqqussutaanni § 34 naapertorlugu, qularnaveeqqusiissutit attartortitsisup aserukkanut, attartortumut tutsinneqarsinnaasunut matussutissatut atorsinnaavai, aamma anisernermi iluarsaassinermut attartortup akiligassaanut matussutissatut.
Imm. 2. Aammattaaq ineqarnermut akiliutinik akiitsoqartoqarsimappat qularnaveeqqusiissutit akiitsunut matussutissatut attartortitsisup atorsinnaavai.§ 5. § 4 malillugu qularnaveeqqusiissutinit attartortup ilanngaatigisinnaasai naatsorneqareerpata, attornerup atorunnaarneranit qaammatit pingasut qaangiutsinnagit attartortitsisoq attartortumut allaganngorlugu naatsorsuusiamik nassiussaqassaaq, tassanngalu takuneqarsinnaassaaq attartortup qularnaveeqqusiissutinit utertitassai qanoq amerlatigisut imaluunniit attartornermut isumaqatigiissut naapertorlugu attartortup pisussaaffiinut matussutissanik attartortitsisumut akiligassai qanoq amerlatiginersut.
Kapitali 4
Nalunaarutip atuutilerfia§ 6. Nalunaarut 1. januar 1995 atuutilerpoq atorneqassallunilu attartornernut tamatumap kingornagut isumaqatigiissutigineqartunut.
Namminersornerullutik Oqartussat, ulloq 29. december 1994.
Emil Abelsen/
Peter Beck