Namminersornerullutik Oqartussat kommunillu inissiaataannik innersuussisarneq attartortitsisarnerlu pillugit Namminersornerullutik Oqartussat nalunaarutaat nr. 52, 29. december 1994-imeersoq.
Inissianik attartortitsisarneq pillugu Inatsisartut peqqussutaanni nr. 3-mi, 13. juni 1994-imeersumi § 4, imm. 7 naapertorlugu aalajangersarneqarput:
Kapitali 1
Nalinginnaasumik§ 1. Attartortitsisutut paasineqassaaq Inissiaatileqatigiifiik INI A/S, inissianik attartortittakkanik piginnittut, Namminersornerullutik Oqartussat imaluunniit kommuni, inissiat ingerlanneqarnerat aqunneqarnerallu pillugit inissiaatileqatigiiffimmik isumaqatigiissuteqarsimappata.
Kapitali 2
Maleruagassat atuuffii§ 2. Kalaallit Nunaanni Namminersornerullutik Oqartussat kommunillu inissiaataannut, imm. 2-mit 5-imut taaneqartut pinnagit, nalunaarut atuuppoq.
Imm. 2. Nalunaarut makkununnga atuutinngilaq
1) sulisorisanut inissiassavittut naatsorsuussanut,
2) inissianut piginnittumit aalajangersimasunut immikkoortinneqarsimasunut (inissianut aalajangersimasumik immikkoortinneqareersimasunut, nunaqarfinni ilinniartitsisunut inissianut, utaqqiisaasumik inissianut, inuussutissarsiutinik siuarsaa-
nermut assigisaannulluunni.it),
3) illuutini sulisorisanut, attartortitsisup sulisorisaanut inissianut,
4) inissianut timimikkut innarluutilinnut timimilluunniit aalatitsinikkut akornutilinnut sanaallutillu aaqqissuussanut,
5) inissianut ininullu inissiatut allaasumik atorneqartunut.
Imm. 3. Nalunaarummi § 3, imm. 1 aamma §§ 13-14 inis sianut, attartorneq pillugu peqqussummi § 4, imm. 3, naapertorlugu suliffeqarfinni sulisorisanut atugassianngorlugit tunniunneqarsimasunut, atuutinngilaq.
Imm. 4. Naalakkersuisut aalajangersassavaat, sulisorisanut inissiaatini ataatsimoortuni inissiat sorliit pilerinartutut isigineqassanersut periarfissanngornerinilu suliffeqarfinnut taakkunanilu sulisunut ineqartinneqarnissamik pisinnaatitaaffeqartunut allagarsiissutigineqassasut. Inissianut tamakkununnga qinnuteqaatinut aalajangiinerni taamaallaat Kalaallit Nunaanni pisortat suliffeqarfiini qanoq sivisutigisumik sulisimaneq tunngavigineqartassaaq. Nalunaarummi § 9, imm. 2 aamma 3 inissiamut pilerinartumut nutsernermi taamatulli atorneqassaaq.
Imm. 5. Nalunaarummi § 3 aamma §§ 5-9 isumaginninnikkut inissaaleqinermut atatillugu ajornartorsiutinik aaqqiiniarluni inissiaq kommunalbestyrelsimut atugassanngortinneqarpat atuutinngillat, aammattaaq atuutinngillat nutarsaanermut atatillugu Namminersornerullutik Oqartussat kommunilluunniit inisseeqqinnerannut inissiaq atorneqassappat.
Kapitali 3
Inissianik atorneqanngitsunik innersuussisarneq§ 3. §§ 4-5-imi maleruagassat naapertorlugit inissiat, inissarsiortunut sivisunerpaamik utaqqisunut allattorsimaffimmiissimasunut, innersuunneqartassapput.
Imm. 2. Ineqartut allamik initaarusuttut (namminneq kissaatigalugu nuukkusuttut), §§ 9-11 naapertorlugit utaqqisunut allattorsimaffimmut tulleriaartussanngorlugit allattorneqassapput.§ 4. Kinaluunniit 15-inik ukioqalereersimasoq utaqqisunut allattorsimaffimmut ilanngunneqarsinnaavoq.
Imm. 2. Attartortitsisup utaqqisunut allattorsimaffik kommunikkuutaarlugu ataatsimut allattorsimassavai Namminersornerullutik Oqartussat inissiaataat pillugit kommunimi ataatsimut utaqqisunut allattorsimaffiliortoqarsinnaavoq. Inissarsiortup utaqqisunut allattorsimaffimmi inissisimanera kommunimi allami utaqqisunut allattorsimaffimmut nuunneqarsinnaanngilaq.
Imm. 3. Utaqqisunut allattorsimaffimmut ilanngunneqarnermi attatortitsisoq akiliuteqaqqusissaaq allaffissornikkut aqutsinermi aningaasartuutit sinningaarlugit angineroqqusaanngitsumik. Allaffissornikkut aqutsinermi saniatigut akiliutissaq utaqqisunut allattorsimaffiup iluarsaanneqarneranut atatillugu ukiumut ataasiarluni akilersinneqartassaaq. Akiliutissaq akilerneqanngippat utaqqisunut allattorsimaffimmit piiarneqarneq kingunerissavaa.
Imm. 4. Inissarsiortut utaqqisunut allattorsimaffimmi allassimasut qinnuteqarnermikkut allattorsimaffimmi inissisimanerminnik paasitinneqassapput.
Imm. 5. Nuunnissamik nammineerluni kissaateqartunut tulleriiaaraluni utaqqisunut allattorsimaf fimmi imm. 2-4 taamatulli atorneqassapput.§ 5. Inissianik innersuussinermi init amerlassusii inoqutigiit amerlassusiannut naapertuutissapput. Inoqutigiit marlunnik amerlanerusunilluunniit meerartallit inissianut sisamanik amerlanerusunilluunniit initalinnut salliutinneqassapput.
Imm. 2. Innersuussinerup nalaani tamatumunnga periarfissaqarpat inoqutigiit amerlassusiat inimik ataatsimik sinnerlugu tunniussisoqarsinnaavoq.
Imm. 3. Inissianik attartortitsineq sumiiffimmi ajornakusoortoq paasinarsippat, pisarneq malinnagu inoqutigiit amerlassusiannit ataatsimik amerlanerusumik ininik tunniussisoqarsinnaavoq.
Kapitali 4
Itigartitsineq§ 6. Ineqarnermut akiliummut, kiassarnermut innaallagissamullu aningaasartuutinut matussutissatut inoqutigiit isertitaat naammanngippata attartortorluunniit qularnaveeqqusiissutinik akiliisinnaanngitsutut nalilerneqarpat attartortitsisup attartortitsinissaq itigartissinnaavaa.
§ 7. Inissarsiortoq ineqarnermut/kiassarnermut ukiup affakkaartumilluunniit akiliutinik akiitsoqarpat attartornissaq attartortitsisup itigartissinnaavaa.
§ 8. Ini inigineqarsinnaasoq ataaseq inunnit marlunnit amerlanerusunit inigineqassappat attartornissaq attartortitsisup itigartissinnaavaa.
Kapitali 5
Immikkut ittumik salliutinneqarsinnaatitaanerit§ 9. Namminersornerullutik Oqartussat kommunillu inissiaataat naleqqunnerpaamik atorneqarsinnaaqqullugit ineqartut, namminneq kissaatigalugu nuukkusuttut tulleriiaarlugit allattorsimaffianniittut, inigisaminnillu tigumminnikkunnaartut, inissiat inueruttut sisamanngorneri tamaasa, kommunimi najugaqarfimminni namminneq kissaatigalugu nuukkusunnerat naammassineqarsinnaaqqullugu salliutinneqarsinnaatitaapput.
Imm. 2. Inissiaq atorunnaagaq sulisorisanut inissiaappat, iserterfigineqarnerani iluarsaanneqarsimasoq, nalunaarullu una atuutilersinnagu inissiaq ineqartumut innersuunneqarsimappat, iserternerup nalaanisut pitsaassuseqalersinnaaqqullugu inissiamik iluarsaassineq ineqartup akilissavaa.
Imm. 3. § 2-mi iluarsaassinermut aningaasartuutit ineqartup qaammat naammatsillugu ineqarsimaneri tamaasa 1/60īdelimik appartinneqartassapput.§ 10. § 9-imi salliutinneqarsinnaatitaaneq inissiami aalajangersimasumik ineqareernermi aatsaat atorneqarsinnaasoq attartortitsisup aalajangersinnaavaa.
§ 11. § 9 naapertorlugu inissarsiotut salliutinneqarsinnaatitaasut arlallit inissiaq ataaseq kissaatigippassuk, § 3, imm. 2 malillugu, attartortumut nammineq kissaatigalugu nuukkusuttut tulleriiaarlugit allattorsimaffianni sivisunerpaamik utaqqisuniissimasumut inissiaq attartortinneqassaaq.
Kapitali 6
Piginnaatitaanerit allat§ 12. Inissarsiortut § 9-mi taaneqartutut saniatigut salliutinneqarsinnaatitaanernik allanik tunineqarsinnaanngillat.
§ 13. Inissiamik atuisinnaatitaanerup allamut nuunneqarsinnaanera pillugu attartornermut peqqussummi aalajangersakkat saniatigut, inuup inissiamik atuisumit toqusimasumit pilersorneqarsimasup, aammaattaaq toqusup qitornaasa 18-it inorlugit ukiullit, attartornermik nangitsisinnaanerat attartortitsisup akuerisinnaavaa.
Imm. 2. Imm. 1 aammattaaq inissiamik atuisup utoqqalinini napparsimaniniluunniit pissutigalugit angerlarsimaffimmut paaqqinnittarfimmut assigisaanulluunniit nuunnerani taamatulli atuuppoq.§ 14. Inissiamik atuisup toqunerani utaqqisunut allattorsimaffimmi nammineerlunilu kissaatigalugu nuunnissamik allattorsimaffimmi inissisimanera toqusup aappaanut taamatulluunniit piginnaatitaasumut nuunneqassaaq.
Imm. 2. Inissarsiortoq utoqqalinini napparsimaniniluunniit pissutigalugit angerlarsimaffimmut paaqqinnittarfimmut assigisaanulluunniit nuuppat, utaqqisunut allattorsimaffimmi imaluunniit nammineq kissaatigalugu nuukkusuttunut allattorsimaffimmi inissisimanera inissarsiortup aappaanut taamatulluunniit piginnaatitaasumut nuunneqassaaq.§ 15. §§ 13-14-imi pissutsit taaneqartut saniatigut attartornerit utaqqisunullu allattorsimaffimmiinnerit allanut nuunneqarsinnaanngillat.
Kapitali 7
Nalunaarutip atuutilerfia§ 16. Nalunaarut atuutilerpoq ulloq 1. januar 1995
Namminersornerullutik Oqartussat, ulloq 29. december 1994.
Emil Abelsen/
Peter Beck