Kalaallit Nunaata avataani ilinniartitaanernut ingerlaqqiffiusunut qaffasinnerusunullu akuerineqassagaanni piumasaqaatit pillugit Namminersornerullutik Oqartussat nalunaarutaat nr. 51, 29. december 1994-imeersoq.
Inuussutissarsiutitigut ilinniartitaaneq, ilinniagaqarnermut tapiissutit inuussutissarsiutinullu tunngassutilinnik siunnersuineq pillugit Inatsisartut peqqussutaanni nr. 16-imi, 28. oktober 1993-imeersumi § 6, imm. 3 naapertorlugu aalajangersarneqarput:
Danmarkimi qaffasinnerusumik ilinniartitaanerit.
§ 1. Namminersornerullutik Oqartussat aqqutigalugit Danmarkimi ingerlaqqiffiusumik ilinniartitaanermi ilinniarfiup tungaanit Kalaallit Nunaanni ilinniarnertuunngorniarfimmi, HF-imi taamaaqataanilluunniit soraarummeersimanissamik piumasaqaateqarf iusumi tiguneqarnissamut innersuunneqarnermi qinnuteqartoq:
1) ilinniagaqarnersiuteqarsinnaatitaassaaq,
2) soraarummeernerit qulaani taaneqartut ilaannik ingerlatsisimassaaq angusisimassallunilu,
3) karakterit katillugit agguaqatigiisinneranni minnerpaamik 8-mik angusisimassaaq,
4) ilinniartitsissutini immikkut qinigassani tamani karakterit agguaqatigiinneranni minnerpaamik 8-mik ilinniartitaanermut qinnuteqarfigisamut piumasaqaataasumik angusisimassaaq, tak. ilanngussaq 1,
5) karakterini ataasiakkaani ilinniartitsissutini nr. 4-mi taaneqartuni karakterit agguaqatigiisillugit naatsorsorneranni ilaatinneqartuni minnerpaamik 6-imik angusaqarsimassaaq, aamma
6) qallunaat tuluillu oqaasiini piginnaassuseqarluassaaq.
Imm. 2. Kultureqarnermut, Ilinniartitaanermut Ilisimatusarnermullu Pisortaqarfik misilitsinnermi soraarummeernermilu angusat kiisalu §§ 3 aamma 4 naapertorlugit ilinniarnissamut piukkunnassusermik oqaaseqaataasinnaasut tunngavigalugit imm. 1 tunngavigalugu oqaatsitigut piginnaanerit ilinniartitaanermut qinnutigineqartumut naammannersut aalajangiissaaq.
Imm. 3. Kultureqarnermut, Ilinniartitaanermut Ilisimatusarnermullu Pisortaqarfik immikkut illuinnartumik pisoqartillugu qinnuteqartoq allat aqqutigalugit piumasarineqartunut naapertuuttumik piginnaassuseqalersimappat imm. 1-imi nr. 3-5-imi piumasaqaataasoq ataaseq arlallillunniit avaqqussinnaavai.§ 2. Qinnuteqartoq ingerlaqqiffiusumik ilinniartitaanermut tiguneqarnissamut pisariaqartinneqarpat Danmarkimi ilinniarnertuunngorniarfimmi sammisat assigisaannik ilassutaasumik ilinniartinneqarnissamut Namminersornerullutik Oqartussat aqqutigalugit tiguneqarnissamut innersuussutigineqarsinnaavoq, ilinniartitaaneq taamaattoq Kalaallit Nunaanni ingerlanneqarsinnaanngippat. Innersuussutigineqarnissamut qinnuteqartup piumasaqaatit § 1-imi taaneqartut eqquutsissimassavai.
§ 3. Soraarummeernermi angusarisimasassat piumasarineqartutut § 1-imi taaneqartut saniatigut qinnuteqartup ilinniarnissamut qanoq piukkunnaateqartigineranik oqaaseqaat piumasaqaataavoq, tassunga ilanngullugit qinnuteqartup:
1) ilinniartitaanermi tiguneqaataasinnaasumi maannamut qanoq aallussisimatiginera, aamma
2) imminut ilinniartinnissamut Kalaallit Nunaatalu avataani najugaqarnissamut qanoq inerisimatigissusia.
Imm. 2. Kultureqarnermut, Ilinniartitaanermut Ilisimatusarnermullu Pisortaqarfik oqaaseqaatip qanoq ilusilernissaa pillugu maleruaqqusanik aalajangersaasinnaavoq.
Imm. 3. Oqaaseqaat ilinniarfimmit ilinniartitaanermik tiguneqaataasussamik ingerlatsiviusimasumit tunniunneqassaaq, qaffasinnerusumillu ilinniartitaanermi tiguneqarnissamut qinnuteqaammut ilanngunneqarsimassalluni.
Imm. 4. Pissutsit immikkut ittut pisariaqalersippassuk oqaaseqaat ilinniarfimmit allamit tunniunneqarsinnaavoq.§ 4. Kultureqarnermut, Ilinniartitaanermut Ilisimatusarnermullu Pisortaqarfiup qinnuteqartoq qinnuteqarnerup nalaani ilinniarfimmut attuumassuteqanngippat imaluunniit Kalaallit Nunaata avataani ilinniarfimmit oqaaseqaammik tunniussisoqarsimanngippat ilinniartitaanermut piukkunnassuseq pillugu oqaaseqaateqarnissamut piumasaqaat avaqqussinnaavaa. Taamaalisoqarnerani pisortaqarfik ilinniarnissamut piukkunnassuseqarnermik naliliisuussaaq.
§ 5. Ilinniartitaanerni ataasiakkaani ilinniartitsissutini qinigassat sorliit Namminersornerullutik Oqartussanit tiguneqarnissamut piumasarineqartut saniatigut aammattaaq ilanngussaq 1-imi piumasaqaataasut allat eqquutsinneqarsimasussat allassimapput.
Danmarkimi ilinniartitaanerit allat.
§ 6. Namminersornerullutik Oqartussat aqqutigalugit ilinniartitaanernut ilinniarnertuunngorniarfimmi ilinniarsimanissamik piumasaqaateqarfiunngitsuni tiguneqarnissamut innersuunneqarsinnaassagaanni ilinniartitsissutini aalajangersimasuni immikkut karakterit minnerpaamik 8-nissaat piumasaqaataavoq, tak. ilanngussaq 1. Aammattaaq ilanngussaq 1-imi ilinniartitaanerni ataasiakkaani piumasaqaataasut sorliit eqquutsinneqarsimanissaat takuneqarsinnaavoq.
Nunani allani Kalaallit Nunaannilu ingerlaqqiffiusumik ilinniartitaanerit.
§ 7. Nunani avannarlerni allani ingerlaqqiffiusumik ilinniartitaanerni Namminersornerullutik Oqartussat aqqutigalugit tiguneqarnissamik innersuunneqarnissamut Danmarkimi ilinniagaqarnissamut piumasaqaataasut assingi aallaaviussapput.
Imm. 2. Kultureqarnermut, Ilinniartitaanermut Ilisimatusarnermullu Pisortaqarfik imm. 1 avaqqussinnaavaa, tamatumani pissutsit immikkut ittut pisariaqartippassuk.§ 8. Nunat Avannarliit Kalaallit Nunaatalu avataanni ingerlaqqiffiusumik ilinniartitaanerni Namminersornerullutik Oqartussat aqqutigalugit tiguneqarnissamik innersuunneqarnissamut piumasaqaatit aalajangersarneqassapput pisariaqartutut naatsorsuutigineqartut tunngavigalugit ilinniagaqarniartut ilinniarnissartik naammassisinnaassappassuk. Tamanna Kultureqarnermut, Ilinniartitaanermut Ilisimatusarnermullu Pisortaqarfimmit nalilerneqartassaaq.
Atortuulersitsineq
§ 9. Nalunaarut 1. januar 1995-imi atuutilissaaq, ullup taassuma kingorna tigusinernut atuutilersumik.
Imm. 2. Tamatumunnga peqatigitillugu atorunnaarsinneqarput:
1) Kalaallit Nunaata avataani ilinniagaqarnermut tapiissutisiaqarluni annertunerusumik ilinniagaqarsinnaaneq pillugu Namminersornerullutik Oqartussat nalunaarutaat nr. 33, 22. november 1991-imeersoq.
2) Kalaallit Nunaata avataani annertunerusumik ilinniagaqarnissamut tapiissutisiaqaataasinnaasunut akuerineqassagaanni piumasaqaatit pillugit Kultureqarnermut, Ilinniartitaanermut Ilisimatusarnermullu Pisortaqarfiup kaajallaasitaa nr. 4/92.
Namminersornerullutik Oqartussat, ulloq 29. december 1994.
Marianne Jensen/
Ejvind Christoffersen
Ilanngussaq (pdf-format)