"Tillinniat illuinnarmik talillit" pillugit Namminersornerullutik Oqartussat nalunaarutaat nr. 45, 5. december 1994-imeersoq.

Aningaasanik ikisilluni pinnguaatinut akileraarut pillugu Inatsisartut inatsisaanni nr. 3-mi 17. maj 1990-imeersumi, kingullermik Inatsisartut inatsisaatigut nr. 15-ikkut 3. november 1994-imeersukkut allanngortinneqartumi, § 14, imm. 1 aamma § 15, imm. 2 naapertorlugit imaattut aalajangersarneqarput:

 

Kapitali 1
Aggortitsineq

§ 1. Aningaasaasanik aamma/imaluunniit pointinik "tillinnianit illuinnarmik talilinnit" eqquinikkut pissarsianik aggortitsisoqarsinnaavoq taarsiinermi ataatsimi 1.500 kr.-t angullugit.
Imm. 2. Imm. 1 malillugu aningaasaasanik aamma/imaluunniit pointinik "tillinnianit illuinnarmik talilinnit" eqquinikkut pissarsiat suliffeqarfimmi eqquiffiusumi nioqqutissanngorlugit pineqarsinnaapputtaaq.

§ 2. Aningaasaasat aamma/imaluunniit pointinik "tillinnianit illuinnarmik talilinnit" eqquinikkut pissarsianik aggortitsisussaq tassaavoq aningaasanik ikisilluni pinnguaammik ikkussinissamut akuersissummik piginnittoq, eqquiniaasitsinermi akileraarutit pillugit Inatsisartut inatsisaat nr. 7, 31. oktober 1987-imeersoq, Inatsisartulli inatsisaatigut nr. 5, 9. april 1992-imeersukkut allanngortinneqartoq naapertorlugu tassaasoq eqquiniaasitsisoq.
Imm. 2. Aningaasaasanik il.il. aggortitsineq "eqquiniarnernut", "pinnguarnernut" il.il. naligitinneqassaaq.
Imm. 3. Aggortitsinermi tamani aningaasaasat aggortitat nalingat "eqqukkanut", "eqqukkamut", "eqqukkallu nalinganut" il.il. naligitinneqassaaq.
Imm. 4. Aningaasaasanik il.il. aggortitsinermik nalunaarutiginninnermi "tillinnianit illuinnarmik talilinnit" eqquinikkut pissarsianik aggortitsineq pillugu allaffissiaq Akileraartarnermi Pisortaqarfimmit suliarineqarsimasoq nassiunneqassaaq.

 

Kapitali 2
Qassinik ukioqarnissamik piumasarísaq

§ 3. Aningaasanik ikisilluni pinnguaammik ikkussinissamut akuersissummik piginnittoq "tillinniat illuinnarmik talillit" ikkussorneqarsimasut qanittunnguani isersimasut takulertorsinnaasaanni allagartaliissaaq, tassuuna takuneqarsinnaanngorlugu "tillinniat illuinnarmik talillit" 18-inik ukioqalersimanngitsunut atoqqusaannginnerat.
Imm. 2. Aningaasanik ikisilluni pinnguaammik ikkussinissamut akuersissummik piginnittoq aammalu inuit § 8, imm. 2-mi pineqartut pisussaapput inimi "tillinniat illuinnarmik talillit" ikkussorneqarsimasut 18-inik ukioqalersimanngitsunit atorneqannginnissaanut qulakkeerinissamut.

 

Kapitali 3
Allagartanik uppernarsaatissaqarnissamut pinnguarnerullu qanoq aaqqissuussaanissaanut piumasarisat

§ 4. Aningaasanik ikisilluni pinnguaammik ikkussinissamut akuersissummik piginnittup kingusinnerpaamik "tillinniap illuinnarmik talillup" ullormi ikkunneqarfigisaani "tillinniamik illuinnarmik talilimmik" inissiinini uppernarsaatissaqartissinnaassavaa Dansk Teknologisk Institutimit, Force Institutinit imaluunniit laboratoriamit akuerisaasumit allamit nalunaarummik.
Imm. 2. Nalunaarutip imm. 1-imi taaneqartup uppernarsassavaa "tillinniap illuinnarmik talillup" piumasarisanik makkuninnga naammassinnissimanera:
1) aningaasap ikisap periarnermi ataatsimi 1 kr. sinnersimassanngikkaa.
2) aningaasap ikisap aningaasanik pissarsissutaasinnaannginnissaa.
3) pinnguaat innaallagiaq atorlugu aqutaappat aningaasaasanik pissarsisitsissutaasinnaannginnissaa.
4) periarnermi ataatsimi eqqukkat 750 koruuninit amerlanerusinnaannginnissaat.
5) eqqukkat eqqugassat "tillinniaq illuinnarmik talilimmi" allattorsimaffianniittunut naapertuuttuunissaat.
6) ilisarnaqutserneqarsimassasoq laboratoriamit akuerisamik, aserorneqartinnagu peerneqarsinnaanngitsumik, tassani allassimassallutik "tillittup illuinnarmik talinniap" aqqa normualu kiisalu qaammat ukiorlu misilinneqarfia, aamma
7) billedbåndi indekshjulilu imaluunniit atortut (komponentit) innaallagiaq atorlugu programminik aqutsisut laboratoriamit akuerisamit aqerlumik naqissuserneqarsimassasut qaammat ukiorlu misilinneqarfia nalunaarlugit.
Imm. 3. Imm. 2-mi, nr. 7-imi taaneqartutut komponentinik innaallagissamik atuisunik ikkussinermi aningaasanik ikisilluni pinnguaammik inissiinissamut akuersissummik piginnittup imm. 1-mi taaneqartutut uppernarsaatissaqartissinnaassavaa "tillinniami illuinnarmik talilimmi" inissinneqartumi komponentimik innaallagissamik atuisumik ikkussinerup immini sunniuteqannginnissaa piumasarisanik imm. 2-mi nr. 1-imit 4-mut taaneqartunik sumiginnaanissamut.
Imm. 4. Uppernarsaatit imm. 1-imi 3- milu taaneqartut aningaasanik ikisilluni pinnguaammik ikkussinissamut akuersissummik piginnittup paarissavai misissuisussaatitaasumilli takorusunneqarpata takuteriaanaasariaqassallugit.
Imm. 5. Imm. 3-mi taaneqartunik komponentinik innaallagissamik atuisumik, "tillinnianik illuinnarnik talilinnik" iluarsartuusinerit assigisaalluunniit saniatigut atortualunnik allanik ikkussinermi imm. 1 aamma 3 naapertorlugu uppernarsaaseqqiisoqassanngilaq.
Imm. 6. Nalunaarutinik imm. 1-imi 3-milu taaneqartunik pissarsiniarnermut takutitsinissamullu aningaasartuutit aningaasanik ikisilluni pinnguaammik ikkussinissamut akuersissummik piginnittup akilissavai.

§ 5. Aningaasanik ikisilluni pinnguaammik ikkussinissamut akuersissummik piginnittup "tillinniat illuinnarmik talillit" ikkussorsimasani § 4-mi, imm. 2-mi, nr. 1-imit 6-imut piumasarisanik sukkulluunniit naammassinninnissaat akisussaaffigissavai.
Imm. 2. § 4-mi, imm. 2-mi, nr. 1-imiit 6-imut piumasarisanik illuartitsineq § 8-mi, imm. 2-mi pineqartunut inummut inunnulluunniit arlariinnut atuuppat, taava aamma akisussaassuseq taakkununnga atuutissaaq.

 

Kapitali 4
Naatsorsuutit, paasisitsisussaassuseq nakkutilliinerlu

§ 6. Inini "tillinniat illuinnarmik talillit" inissinneqarfigisaanni tamani aningaasanik ikisilluni pinnguaammik ikkussinissamut akuersissummik pigisaqartoq pisussaavoq "tillinniat illuinnarmik talillit" atorlugit tunisat (aningaasat kaaviiaartitat) Akueraartarnermi Pisortaqarfiup maleruagassiai malillugit naatsorsuusiornissamut.
Imm. 2. Aningaasanik "tillinnianut illuinnarmik talilinnut" ikisanik imaarsinerit tamaasa tunisat allanneqartassapput naatsorsuutinut imm. 1-imi taaneqartunut.
Imm. 3. Kvartalit 1. januar, 1. april, 1. juli aamma 1. oktober aallartittut naaneri tamaasa naatsorsuutinut imm. 1-imi taaneqartunut allattorneqartut Akileraartarnermi pisortaqarfimmut nassiunneqassapput. Naatsorsuutit Akileraartarnermi Pisortaqarfimmi tiguneqareersimasassapput kingusinnerpaamik kvartalip naareernerani qaammatip naanerani.

§ 7. Akileraartarnermi Pisortaqarfik sukkulluunniit misissuiartorsinnaavoq.
Imm. 2. Aningaasanik ikisilluni pinnguaatinik ikkussinissamut akuersissummik pigisaqartut kiisalu inuit § 8, imm. 2-mi pineqartut pisussaapput Akileraartarnermi Pisortaqarfimmeersut misissuineranni ikiussallugit.
Imm. 3. Akileraartarnermi Pisortaqarfimmeersut misissuiartorlutik isersimanerminni akornusersorneqarnatik aningaasanik ikisilluni pinnguaatinik inimiittunik tamanik misissuisinnaatitaassapput.
Imm. 4. Akileraartarnermi Pisortaqarfiup pisortat allat oqartussaasut imaluunniit allat piginnaatissinnaavai, Akileraartarnermi Pisortaqafimmik suleqateqarnikkut ilitsersorneqarnikkullu, misissuinerit imm. 2-mi 3-milu taaneqartut ingerlanneqarnissaanut.

 

Kapitali 5
Pineqaatissiinerit atulersitsinermillu aalajangersakkat

§ 8. Nalunaarummi uani §§-inik 1, 3, 4, imm. 1-imik, 3-mik 4-millu §§-inik 5, 6 aamma 7, imm. 2 - 3-mik unioqqutitsisoqartillugu Akileraartarnermi Pisortaqarfiup kommunalbestyrelse peqqusinnaavaa aningaasanik ikisilluni pinnguaammik ikkussinissamut akuersissummik pigisaqartumut aningaasanik ikisilluni pinnguaammik ikkusinissamut akuersissutit tamaasa pisariaqanngitsumik kinguartiterinani erniinnarluinnarlu atulersussamik arsaarinnissutigeqqullugit.
Imm. 2. Imm. 1-imi aalajangersagaq taamatuttaaq atuutilissaaq §§-inik 1, 3-imik , imm. 2-mik, §§-inik 5-imik 7-imillu, imm. 2-mik aamma 3-mik unioqqutitsineq sulisumit, ikiortimit, taartaasumit imaluunniit inummit allamit "tilliniamik illuinnannik talilimmik"ikkussivigineqarsimasumi attuumassuteqartumit unioqqutinneqarsimappata.

§ 9. §§-inik 1, 3, 4, imm. 1-imik, 3-mik 4-millu, §§-inik 5, 6 aamma 7, imm. 2 - 3-mik unioqqutitsisoq akiliisinneqarsinnaavoq.

§ 10. Nalunaarut una atortuulissaaq ullormi 15. december 1995.
Imm. 2. Taamaattorli § 4, imm. 1, imm. 2, nr. 6 aamma imm. 3 aatsaat atortuulissapput 1. juli 1995.
Imm. 3. Aningaasanik ikisilluni pinnguaatinik ikkussinissamut akuersissummik, 30. juni 1995-imi akuerisamik pigisaqartut, 15. juli 1995 nallertinnagu Akileraartarnermi Pisortaqarfimmut "tillinniat illuinnarmik talillit" akuerisaasumik ikkorsorsimasatik immikkut tamaasa nalunaarsuiffissaq Akileraartarnermi Pisortaqarfimmit suliarineqarsimasoq atorlugu nalunaarutigissavaat. Nalunaarsuiffik Akileraartarnermut Pisortaqarfimmit atsiorlugu uppernarsarneqartoq nalunaarummut § 4, imm. 1-imi 3-milu taaneqartumut taarsiullugu 1. januar 1997-ip tungaanut atuutissaaq.
Imm. 4. "Tillinnianik illuinnarmik talilinnik", imm. 3-mi aalajangersakkanik naammassinnissimanngitsunik, ikkussinerni § 4, imm. 1-imi taaneqartutut uppernarsaasiisoqarsinnaasaaq.
Imm. 5. Komponentinik innaallagissamik atuisunik § 4, imm. 2, nr. 7-imi taaneqartunik ikkussinermi imm. 3-mi aalajangersagaq apeqqutaatinnagu § 4, imm. 3 naapertorlugu uppernarsaasiisoqarsinnaavoq.

Namminersornerullutik Oqartussat, ulloq 5. december 1994.

Emil Abelsen

/

Kaare Hagemann