Sanaartornerni Namminersornerullutik Oqartussanit aningaasalersorneqartuni suliassanut tunniutassanullu suliarinnittussarsiortarneq pillugu Namminersornerullutik Oqartussat nalunaarutaat nr. 41, 7. oktober 1994-imeersoq.
Suliariumannittussarsiuussisarnermut il.il. Inatsisartut inatsisaanni nr. 3-mi 6. april 1992-imeersumi § 6 naapertorlugu aalajangersarneqarput:
§ 1. Nalunaarut una atortuuvoq sanaartornermi suliassanut tunniutassanullu, Namminersornerullutik Oqartussat tamakkununnga tapiissuteqaraangata, utertitsissuteqartussaagaangata, taarsigassarsisitsigaangata imaluunniit qularnaveeqqusiigaangata.
Imm. 2. Tunniutassat suliariumannittussarsiuussineq sioqqullugu inniminnerneqartut ilanngunneqassanngillat.§ 2. Suliarinnittussarsiorneq pisassaaq "Kalaallit Nunaanni sanaartornerni suliassanut tunniutassanullu ataatsimut piumasarisat" sukkulluunniit atortuusut tunngavigalugit.
Imm. 2. Tassannga allaassuteqartitsisoqartarsinnaavoq taamaallaat taamaaliornissamut immikkut pissutissaqaraangat, allaassuteqartitsisoqarsimappallu tamanna erseqqissumik allassimasassaaq suliarinnittussarsiornermi atortuni.§ 3. Sanaartortitsinermi suliassat tunniutassallu suliarinnittussarsiorneqartassapput faginut immikkoortiterlugit. Suliarinnikkumasut, suliarinnittussarsiuussami ataatsimi faginik arlalinnik suliarinnikkumassuteqartut, akigitinniakkaminnik millilerisinniarsinnaasariaqarput.
Imm. 2. Suliassat tamakkerlugit suliarinnitsitsineq taamaallaat atorneqarsinnaavoq Naalakkersuisut immikkut akuersissuteqarpata.§ 4. Sanaartortitsinermi suliassat tunniutassallu tamanut ammasumik suliariumannittussarsiuunneqassapput.
Imm. 2. Taamaattorli qinikkanik toqqaalluni suliariumannittussaarsiuussineq atorneqarsinnaavoq
1) suliffeqarfiit aalajangersimasuinnaat suliassap tunniutassallu suliarinissaannut pisariaqartumik immikkut piginnaassuseqarpata aamma/imaluunniit sulisussaqarpata, imaluunniit
2) suliassani tunniutassanilu katillugit 2 mio. kruunit inorlugit naleqartuni.
Imm. 3. Taamaattorli suliaqartinniakkat ilisimatereerlugit suliarinnittussarsiortoqarsinnaavoq
1) suliassanut tunniutassanullu, annertussusii, pitsaassusissaat imaluunniit qaqugu naammassineqarfissat suliarinnittussarsiornermi tunngavigisani aalajangerniaruminaatsunut, soorlu sanaqqitassanut, iluarsagassanut allanngortitigassanullu,
2) suliassanut tunniutassanullu 300.000 kruuninik imaluunniit taakku inorlugit nalilinnut.
3) suliffeqarfik ataasiinnaq pisinnaalluarpat suliassaq tunniutassarlu suliarissallugit imaluunniit
4) suliarissallugit nangillugit suliassat tunniutanullu nangissutissat, entreprenøri/mesteri suliassamut isumaqatigiissuteqarfigineqareersimappat.
Imm. 4. Imm. 1-imi aalajangersagaq sanioqqunneqartassaaq suliassaq erseqqissumik immikkoortiterneqarsinnaanngikkaangat suliassallu ataatsimut nalingata kr. 300.000 sinnersimanngikkaangatigik suliassat tunniutassallu regningiliorlugit suliarisarnerisigut. Suliassat tunniutassallu 300.000 kruuninit naleqarnerusut immikkut ittutigut regningiliugassatut suliarinnittussarsiorneqarsinnaapput.§ 5. Tamanut ammasumik suliariumannittussarsiuutat katillutik 5 mio. kruuninik imaluunniit taakku sinnerlugit naleqartut tamanut nalunaarutigineqartassapput aviisini nunamut tamarmut nassiunneqartartuni. Tamanut ammasumik suliariumannittussarsiuutat katillutik 5 mio. kruunit inorlugit naleqartut tamanut nalunaarutigineqartassapput illoqarfimmi aviisimi imaluunniit allagarsiinikkut, imaluunniit suliarinnittussarsiortup nammineq aalajangertarsinnaavaa nalunaarutiginerini aviisit nunamut tamarmut nassiunneqartartut atussanerlugit.
Imm. 2. Tamanut ammasumik suliariumannittussarsiuussinermi kikkulluunniit suliariumannikkumassuteqarsinnaatitaassapput.§ 6. Tamanut ammasumik qinikkanillu toqqaalluni suliariumannittussaarsiuussinermi sanatitsisussap (suliarinnittussarsiortup) suliarinnikkumasunit nalornisoorutigineqarsimasinnaasut nalilissavai, aalajangersinnaajumallugu suliarinnikkumassut sorleq akikinnerpaanersoq.
Imm. 2. Akikinnerpaamik suliarinnikkumassutaasoq akueriumaneqanngippat sanatitsisussap tamanna akikinnerpaamik suliarinnikkumasumut allakkatigut itigartitsissutitigut nalunaarutigissavaa pissutigisaasut ilanngullugit.
Imm. 3. Akikinnerpaamik suliarinnikkumassutaasoq akuerineqanngippat sanatitsisussap akikinnerpaamik suliarinnikkumasoq ullunik 14-inik piffissalersinnaavaa aalajangiineq pillugu Sanaartortitsinermut Aqutsisoqarfimmut Pisortaasunut naammagittaalliuteqarnissaanut.§ 7. Suliarinnittussarsiortup piumasarissavaa suliarinnikkumasup uppernarsarsinnaassagaa isumaqatigiinngissutinik suliamut tunngasunik aaqqiisarsinnaanissani.
§ 8. Suliarinnittussarsiortup piumasarissavaa isumaqatigiissutit malillugit suliffissap suliffigineqartarnissaa imaluunniit aalajangissallugu qanoq sivisutigisumik qaangiuttoortarnissap akuerineqarnissaa aamma qanoq sivisutigisumik sapaatini nalliuttunilu sulisoqartarnissaa.
Imm. 2. Qaangiuttoortarnissaq akuerineqarpat ullormut taamatullu sapaatip akunneranut qanoq sivisutigisumik qaangiuttoortarnissaq nalunaarsimassaaq.§ 9. Nalunaarummik matuminnga unioqqutitsinerup kingunerisinnaavaa Namminersornerullutik Oqartussat aningaasaliinerminnik imaluunniit tapiissuteqarnissamik, utertitsissuteqarnissamik, taarsigassarsisitsinissamik imaluunniit qularnaveeqqusiinissamik neriorsuutiminnik utertitsinerat.
§ 10. Nalunaarut una atulissaaq 1. december 1994.
Namminersornerullutik Oqartussat, ulloq 7. oktober 1994
Kuupik Kleist/
Stig Bendtsen