Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Namminersornerullutik Oqartussat nalunaarutaat nr. 33, 26. juli 1994-imeersoq.

Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaanni nr. 2-mi 3. marts 1994-imeersumi §§ 8 aamma 16 tunngavigalugit makku aalajangersarneqarput:

 

Kapitali 1.
Aalajangersakkat nalingijnnaasut.

§ 1. Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaat tunngavigalugu tunniussinerit inummit taakkuninnga pisinnaatitaasumit erseqqissumik qinnuteqartoqarneratigut aatsaat pisinnaapput.
Imm. 2. Inatsisartut peqqussutaat taanna tunngavigalugu tunineqarnissaminik qinnuteqartup paasissutissat suliassap suliarineqarnissaanut pisariaqartut tamaasa paasissutissiissutigissavai.
Imm. 3. Qinnuteqaatip suliarineqarnerani uppernarsaatit pisariaqartinneqartut pissarsiarineqarnissaat qinnuteqartup isumagisassaraa.

§ 2. Kommunit isumaginninnermi ataatsimiititaliaasa meeqqanut akilersuutinik meeravissiartaarnermiluunniit tapiissutinik pisinnaatitaasussat Inatsisartut peqqussutaat tunngavigalugu tunniussisoqarsinnaaneranut periarfissanik ilitsersussavaat, matumani tunniussinnginnermi uppernarsaatit suut pissarsiarineqareersimanissaat ilanngullugu paasissutissiissutigalugu.

 

Kapitali 2.
Meeqqanut akilersuutit pisortanit siumoortumik tunniunneqartartut.

§ 3. Meeqqanut akilersuutinik pisortanit siumoortumik tunniuneqartartunik qinnuteqaammi kina meeqqamut akilersuisussaatitaanersoq nalunaarneqarsimassaaq, kiisalu akiliutit ullormi akilerneqarsimaffissaminni akilerneqarsimannginnerat aamma ilanngullugu nalunaarneqarsimassalluni.
Imm. 2. Qinnuteqaat akilersuisussaatitsinermik imaluunniit ataatassarsiuinermut, akilersuisussaatitassarsiornermut avinniarnermulluunniit atatillugu akilersuisussaatitaasoqarnissaanik qinnuteqaateqarsimanermik uppernarsaammik ilaqartinneqassaaq.

§ 4. Meeraq akilersuutinik pisinnaatitaasumi najugaqanngippat meeqqap pilersorneqarneranut kina aningaasartuuteqartarnersoq paasissutissiissutigineqassaaq. Akilersuutinik pisinnaatitaasoq meeqqap pilersorneqarneranut aningaasartuuteqartanngippat meeqqamut akilersuutit pisortanit siumoortumik tunniunneqarsinnaanngillat.

§ 5. Meeqqamut akilersuutit siumoortumik tunniunneqarnissaat ullup akilerneqarfissaata aqaguani aatsaat qinnutigineqarsinnaapput.

§ 6. Akilersuisussaatitaaneq allanngortittariaqartoq unitsittariaqartorluunniit isumaginninnermi ataatsimiititaliap paasiguniuk meeqqamut akilersuisussaatitaasoq tamatumunnga periarfissat pillugit ilitsersussavaa.

 

Kapitali 3.
Meeqqanut akilersuutit pîsortanit tapiissutitut tunniunneqartartut.

§ 7. Meeqqanut akilersuutit pisortanit tapiissutitut tunniunneqartartut inunnut Inatsisartut peqqussutaanni kapitali 3-mi piumasaqaatitut aalajangersakkanik eqqortitsisimallutik uppernarsaasinnaasunut qinnuteqarsimasunullu tunniunneqarsinnaapput.
Imm. 2. Meeqqap ataasiinnarmik pilersuisoqarnera meeqqamullu akilersuisussaatitaasoqannginnera qinnuteqartup uppernarsagassaraa. Uppernarsaat tassaasinnaavoq ataatassarsiuinerup inaarneqarnera pillugu eqqartuussivimmi allattaavimmi allattukkat assilinerat, akilersuisussaatitaasup angajoqqaajusulluunniit toqusimanerannut uppernarsaat assigisaalluunniit.

§ 8. Meeqqanut akilersuutit pisortanit tapiissutitut tunniunneqartartut tunniunneqarnissaannut piumasaqaatit eqqortinneqarsimatillugit tapiissutit meeqqap inuuia qiteqquffialu ullormik ataatsimik sioqqullugit kommunip allaffiani oqartussanit tunniunneqartassapput.
Imm. 2. Meeqqap inuuia qiteqquffialuunniit ullormik ataatsimik sioqqullugu oqartussat saaffigineqartussat matoqqassappata meeqqanut akilersuutit tapiissutitut tunniunneqartartut matoqqanissaq sioqqullugu ullormi ammaffimmi kingullermi tunniunneqassapput.

 

Kapitali 4.
Meeravissiartaarnermitapiissutit.

§ 9. Meeraq meeravissiartaarnissaq siunertaralugu inuinnaat isumaqatigiissuteqarnerisigut ilaqutariinnut  allanut paarsassanngorlugu inissinneqarsimappat meeravissiartaarnermi tapiissutit tunniunneqarsinnaanngillat, meeravissiartaarniartut meeqqap inissinneqarneranut atatillugu angalanermut uninnganermullu aningaasartuuteqarsimagaluarpataluunniit.
Imm. 2. Inatsisartut peqqussutaanni § 15, imm. 2-mi piumasaqaatit malillugit meeqqap meeravissiassanngortinneqarneranut atatillugu meeraq ilaqutariinnut inissinneqarpat inissiineq taamaattoq meeravissiartaarnertut isigineqassaaq, naak meeravissiartaarnissamut akuersissut suli tunniunneqarsimanngikkaluartoq.

§ 10. Meeravissiartaarnermi tapiissutit tunniunneqannginnerini qinnuteqaateqartup makku uppernarsassavai:
1) qinnuteqartup meeravissiartaarniarneranut akuersissut takutinneqassaaq,
2) meeraq meeravissiartaarnissaq siunertaralugu tigusassaasoq, kiisalu
3) meeqqap aaneqarneranut atatillugu angalanermut uninnganermullu aningaasartuutit qinnuteqartup aningaasartuutigisimallugilluunniit aningaasartuutigissagai.
Imm. 2. Meeravissiartaarnermut tapiissutit aallarnissaq siusinnerpaamik ullut 14-nit sioqqullugu aatsaat tunniunneqarsinnaapput.
Imm. 3. Meeqqap angerlarsimaffimmi tiguneqarnissaa sioqqullugu tunniunneqartut siumoortumik tunniussatut (aconto) tunniunneqassartassapput

§ 11. Meeraq angerlarsimaffimmi tiguneqaraangat meeravissiartaarnermi tapiissutit amerlassusissaat isumaginninnermi ataatsimiititaliap naatsorsortassavai.
Imm. 2. Aningaasartuutit pisariaqavissut kisimik naatsorsuinermi ilanngunneqartarnissaat isumaginninnermi ataatsimiititaliap nakkutigisassavaa.
Imm. 3. Aningaasartuutitut pisariaqavissutut isigineqartut tassaapput, pisortat meeravissiartaarnissaq pillugu suliniuteqarsimasut meeravissiartaartussat meeqqamik nammineq aallernissaannik piumasaqaataat tunngavigalugu angalanermut aningaasartuutit. Meeqqamut angalaqataanissaq kisimi piumasaqaataasimappat angalaqataalluni angalanermut aningaasartuutit kisiisa ilanngullugit naatsorsuunneqassapput.
Imm. 4. Uninnganermi aningaasartuutitut pisariaqavissutut isigineqartut tassaapput, angalanermut angalaqataallunilu angalanermut kiisalu meeqqap tunniunneqarneranut atatillugu sivikinnerpaamik unnuinernut aningaasartuutit uppernarsaasikkat. Meeraq meeravissiartaartussaanngitsumit angalaqatigineqarsimappat nerisaqarnermut aningaasartuutit uppernarsaasikkat kiisalu angalaqataasup aningaasarsiai naatsorsuinermi ilanngunneqarsinnaapput, aningaasartuutit taakku meeravissiartaartussamit akilerneqarnissaat piumasarineqarsimappat.
Imm. 5. Meeravissiartaartussap aappaannaata angalaneranut aningaasartuutinut tapiissutit kisiisa ilanngullugit naatsorsuunneqassapput, meeravissiartaartitsinermi oqartussaasup meeravissiartaartussat tamarmik marluullutik aalleqataanissaat piumasarisimagaa uppernarsarneqarsinnaanngippat.
Imm. 6. Pisariaqavissunut aningaasartuutit amerlassusii apeqqutaatinnagit meeravissiartaarnermi tapiissutit annerpaamik meeqqanut akilersuutit nalinginnaasut ukiumoortumik amerlassusiisa atuuttut pingasoriaataattut amerlassuseqarsinnaapput.

 

Kapitali 5.
Aningaasalersuineq.

§ 12. Meeqqanut akilersuutit il.il. kiisalu meeravissiartaarnermi tapiissutit tunniunneqartarnerat pillugu malittarisassat tunngavigalugit tunniunneqartartut qinnuteqartup kommunianit aningaasartuutigineqassapput.
Imm. 2. Meeqqanut akilersuutitut pisortanit tunniunneqartartunut kiisalu meeravissiartaarnermi tapiissutinut tunniunneqartartunut aningaasartuutit Isumaginninnermut Suliffeqarnermullu Pisortaqarfimmit utertillugit akiligassanngorlugit qaammammut ataasiarlugit nassiunneqartassapput.

 

Kapitali 6.
Atortuulersitsineq.

§ 13. Nalunaarut manna 1. august 1994 aallarnerfigalugu atortuulersinneqarpoq.

Namminersornerullutik Oqartussat, 26. juli 1994.

Henriette Rasmussen

/

Nukákuluk Kreutzmann