Kalaallit Nunaanni nannunniarneq pillugu Namminersornerullutik Oqartussat nalunaarutaat nr. 20, 11. maj 1994-imeersoq.
Inuutissarsiutigalugu piniarnermut aallaaniarnermullu Inatsisartut inatsisaat nr. 12, 22. november 1984-imeersoq §§ 4, 6, 7, 9 aamma 10 naapertorlugit, allanngortinneqartoq Inatsisartut inatsisaatigut nr. 4, 16. maj 1990-imeersukkut aamma Inatsisartut inatsisaat nr. 7, 30. oktober 1991-imeersoq aammalu Kalaallit Nunaanni pinngortitamik allanngutsaaliuineq pillugu Inatsisartut inatsisaat nr. 11, 12. november 1980-imeersoq 1 aamma 2 naapertorlugit makku aalajangersarneqarput:
Inuit piniarsinnaatitaasut
§ 1. Nanoq (Ursus maritimus) piniarneqarsinnaavoq taamaallaat inunnit Kalaallit Nunaanni najugaqartunit kalaallinullu inuiaqatigiinnut aalajangersimasumik attuumassuteqartunit inuutissarsiutigalugulu piniarsinnaanermut uppernarsaammik pigisaqartunit imaluunniit savaatilittut nalunaarsorneqarsimasunit.
Imm. 2. Taamaattoq kinaluunniit inunnit imm. 1-imi piumasaqaatinik naammassinninngitsunit angallanneqartoq imaluunniit akissarsiaqarluni ingiortaasoq nannussinnaatitaanngilaq.
Piffissat eqqissisimatitsiviusut
§ 2. Nannut eqqissisimatitaapput 1. julimiit 31. augustimut, taamaattorli Ammassallip kommuneani 1. augustimiit 30. septemberimut.
Imm. 2. Nannut piaqqat qaammatinik 24-nik utoqqaassuseqalernissartik tikillugu kiisalu nannut arnavissat taamaattunik piaqqisartut ukioq tamaat eqqissisimatitaapput. Taamaakkaluartoq Avanersuup, Upernaviup, Illoqqortoormiut Ammassallillu kommuniini nanuaqqat qaammatit 12-it sinnerlugit utoqqaassusillit arnavissallu taamaattunik piaqqisartut imm. 1-imi piffissap taaneqartup eqqissisimatitsiviusup avataani pisarineqarsinnaatitaapput.
Imm. 3. Naak imm. 1 aalajangersaagaluartoq nannut angutivissat inersimasut kisermaat kiisalu nannut savaateqarfiit nunaataasa iluinut isersimasut ukioq kaajallallugu pisarineqarsinnaapput.§ 3. Nannut apissiminniittut akornusersornissaat apissiinillu assaanissaq inerteqqutaavoq.
Piniariaatsit
§ 4. Timmisartut, helikopterit, qamutit motorillit, taakkununnga ilaallutik snescooterit, kiisalu imaatigut angallatit 40 BRT-it sinnerlugit angissusillit nannunniarnermi imaluunniit piniarfimmut utimullu angallassinermut atorneqassanngillat.
Imm. 2. Toqunartut, kiisartut, nigarniutit isigassiutit aallaasillu nammineq aallartussiat atorneqassanngillat.
Imm. 3. Qoorortuuaqqat, timmiarsiutit kiisalu aallaasit eqqarasuartartut nutsuinnartakkalluunniit nannunniarnermi atorneqassanngillat.
Nalunaaqutsersuineq aamma nunanut allanut annissineq
§ 5. Namminersornerullutik Oqartussanit akuerineqarsimagaanni aatsaat nannunik ilisimajunnaartitsisoqarlunilu nalunaaqutsersuisoqarsinnaavoq.
§ 6. Nannup timaata ilaannik suugaluartumik nunanut allanut annissisoqarsinnaavoq aatsaat Naalakkersuisunit akuerineqarluni.
Imm. 2. Nannut piaraallu uumasuutigeqqusaanatillu Kalaallit Nunaannit aallaruteqqusaanngillat Namminersornerullutik Oqartussanit akuerineqanngitsumik.§ 7. Nannup unioqqutitsinikkut pisarineqartup neqaanik imaluunnit amianik kiisalu timaata ilaanik allanik pisinissaq imaluunniit pinnannissaq inerteqqutaavoq.
Pisanik nalunaarsuineq nakkutilliinerlu
§ 8. Nannuttarineqartut tamaasa kommunimut najugarisamut nalunaarutigineqartassapput suiaaneri, utoqqaassusiat, ulloq suna sumilu pisarineqarnerat immersugassakkut Aalisarnermut, Piniarnermut Nunalerinermullu Pisortaqarfimmi suliarineqartukkut. Pissatat tamarmik aamma nalunaarutigineqartassapput. Arlaliussilluni nannunnermi pisaq nalunaarutiginnittussaatitaasumit, soorlu nannumik toqutsisumit, nalunaarutigineqasaaq, pisaqaqataasut tamakkerlutik aqqi inuttullu normui ilanngullugit. Nannutaq nalunaaqutaqarpat radioqarpalluunniit taanna immersugassamut ilanngullugu tunniunneqartassaaq.
Imm. 2. Immersugassaq imm. 1-imi taaneqartoq kommunip imaluunnit nunaqarfiup allaffianut piniarneqarsinnaavoq. Piniartup atini, inuttut normuni najukkani aamma assartuut, angallataasimappallu angissusaa immersugassakkut tassuuna nalunaassavai.
Imm. 3. Immersukkat tiguneqartut kommunip nassiutissavai Aalisarnermut, Piniarnermut Nunalerinermullu Pisortaqarfimmut pisat pillugit nalunaarusiap tiguneraniit qaammat ataaseq qaangiutsinnagu.
Pineqaatissiissutissat
§ 9. Maleruagassanik siuliini allassimasunik unioqqutitsineq akiliisitsissutaasinnaavoq, kiisalu nannut unioqqutitsilluni pisarineqarsimasut pissarsiarineqarsimasulluunniit neqaat, amii nannumeersullu allat arsaarinnissutaassapput. Arsaarinnissutaasut sumut atornissaat Namminersornerullutik Oqartussanit aalajangiiffigineqartassaaq. § 4-mi aalajangersakkanik unioqqutitsinermi angallatigineqartut sakkugineqartullu arsaarinnissutaasinnaapput.
Imm. 2. §§-ini 1-imi aamma 2-mi kiisalu § 4-mi aalajangersakkanik unioqqutitsinermut piniartoq kisimi akisussaanngilaq, aammali akisussaavoq imaatigut angallammik, qamutinik imaluunniit sakkumik sumilluunniit allamik piniarnermi atorneqarsimasumik piginnittoq, piniaqataasimaguni imaluunniit atortut pineqartut unioqqutitsilluni piniarnermut atorneqarumaarnerannik siumut ilisimannereersimaguni.
Immikkut akuerineqarneq atortussanngortitsinerlu
§ 10. Naalakkersuisut ilisimatuut misissuinissaannut siunertanullu allanut nalunaarummi maleruaqqusanit allaasumik immikkut akuersissuteqarsinnaapput.
§ 11. Nalunaarut una 1. juni 1994-imi atortuulissaaq, tamannalu peqatigalugu atorunnaassaaq Kalaallit Nunaanni nannut eqqissisimatitaanerat pillugu nalunaarut nr. 25, 2. oktober 1992-imeersoq.
Kalaallit Nunaanni Namminersornerullutik Oqartussat, 11. maj 1994.
Hans Iversen/
Henrik Leth