Naammattusaammik atuartitsineq, kalaallit danskillu oqaasiinik inunikkut aaqqissuussamik atuartitsineq kiisalu inunnguutsimit pigisatut oqaaserisanik atuartitsineq pillugit Namminersornerullutik Oqartussat nalunaarutaat nr. 18, ulloq 9. maj 1994-imeersoq.
Meeqqat atuarfiat pillugu Inatsisartut peqqussutaanni nr. 10-mi, 25. oktober 1990-imeersumi, Inatsisartullu peqqussutaatigut nr. 1, 1. marts 1994-imeersukkut allanngortinneqartumi § 12 naapertorlugu aalajangersarneqarput:
Kapitali 1.
Naammattusaammik atuartitsineq.§ 1. Naammattusaammik atuartinneqassapput atuartut, atuartitsissummi ataatsimi arlalinniluunniit atuartitsinermi nalinginnaasumi malinnaalluarsinnaanngikkallartut, tassa:
1) Napparsimanertik pissutigalugu atuartinneqarsimanngitsut naammattumilluunniit atuartinneqarsimanngitsut.
2) Nuussimallutik atuarfimmit atuartitsissutip imarisaa, atuartitsissutigineqarnera annertussusialu eqqarsaatigalugit atuarfigilikkaminnit allaanerungaatsiartumik atuartinneqarsimasut.
Imm. 2. Immikkut ittunik pissutissaqarpat aatsaat atuartut sap. akunnerinit pingasunit sivikinnerusumik atuartinneqarsimanngitsut naammattusaammik atuartinneqarsinnaapput.§ 2. Atuartumik atuarfimmut allamut nuuttoqartillugu atuarfiup nuuffigineqartup isummerfigisussavaa atuartoq naammattusaammik atuartinneqarnissamik pisariaqartitsinersoq, pisariaqartitsisoriguniullu atuarfigisimasaanit paasissutissanik piniarnissaq.
§ 3. Atuartitsinermi salliutinneqassapput kalaallit oqaasii, danskit oqaasii, kisitsineq/matematikki, tuluit oqaasii aamma fysikki/kemii.
§ 4. Atuartitsineq sapinngisamik atuartup atuartitsissummi ilinniartitsisua ilinniartitsisoritillugu ingerlanneqartassaaq, aaqqissuunneqartassalluni atuartumik ataatsimik atuartunilluunniit arlalinnik (holdinik) atuartitsinikkut atuartup atuarnerata nalinginnaasup avataani.
§ 5. Naammattusaammik atuartitsinermut atatillugu taarsiulluguluunniit atuartoq immikkut ittumik taperserneqarluniluunniit ilitsersorneqarsinnaavoq atuartitsissummik nalinginnaasumik atuartitsinermi.
§ 6. Atuartut atuarfimmiit meeqqat atuarfiata atuartitsissutaanik tamakkiisumik neqerooruteqarsimanngitsumit nuuttut klassimi atuartut allat atuartitsissutini ataasiakkaani atuartinneqarsimanerisa assigisaanik atuartinneqarnissaat qulakkeerneqassaaq.
Imm. 2. Atuartitsineq taamaattoq piffissani sivikinnerusuni pikkorissarnertut itisilikkatut aaqqissuunneqarsinnaavoq.
Kapitali 2.
Kalaallit oqaasiinik immikkut aaqqissuussamik atuartitsineq.§ 7. Atuartut 1. klassiniit 11. klassiniittut inunnguutsimit pigisamittut kalaallisut oqaaseqanngitsut kalaallit oqaasiinik immikkut aaqqissuussamik atuartinneqassapput.
§ 8. Kalaallit oqaasiinik immikkut aaqqissuussamik atuartitsinerup siunertaraa, qulakkiissallugu atuartut kalaallit oqaasiinik atuinissaminnut ima piginnaaneqartigilissasut klassimi atuartitsinermik nalinginnaasumik atuarfiullu ingerlataanut allanut malinnaasinnaanngornissaat.
§ 9. 1. klassimi atuartitsineq atuartunik nalinginnaasumik ilinniartitsinerup iluani sap. ak. akunnernut tallimanut aaqqissuunneqassaaq. Atuarfik ukioqatigiinnik arlalinnik klasseqarpat holdiliortoqarsinnaavoq, 1. klassinit arlalinnit atuartunik inuttaqartunik. Holdini atuartut amerlanerpaamik 16-iussapput.
Imm. 2. 2. klassimit 11. klassimut nalinginnaasumik atuartitsinissamut pilersaarut malillugu klassini taakkunani akunnerni kalaallit oqaasiinik atuartitsiffiusussaasuni tamani kalaallit oqaasiinik immikkut aaqqissuussamik atuartitsineqassaaq. Atuartitsineq aaqqis-
suunneqarsinnaavoq holdini, ukioqatigiit klassiinik arlaqartunik inuttalinni, holdinilu nalinginnaasumik klassinit tulleriinnit inuttalinni. Holdini atuartut amerlanerpaamik 16-iussapput.
Imm. 3. Paragrafi taanna malillugu atuartitsineq klassimi tapertaliussatut aaqqissuunneqarsinnaavoq.
Imm. 4. Imm. 1 aamma 2 malillugit akunnerit amerlassusii 1. klassimi sap. ak. akunnernut pingasunut ikilisinneqarsinnaapput, 2. - 6. klassini sap. ak. akunnernut tallimanut, holdimi atuartut amerlassusaat tallimat ataappassuk. Akunnerni sinneruttuni klassini pineqartuni atuartitsiviusussaasuni atuartut kalaallisut oqaaseqartuunngitsut klassimi kalaallit oqaasiinik atuartitsinermi nalinginnaasumi malinnaasinnaapput.
Imm. 5. Atuartut ataasiakkaat ataavartumik naliliiffigineqartassapput, paasiniarlugu atuartoq kalaallit oqaasiinik ima piginnaaneqartigilersimanersoq 1. klassimi atuartitsinermut nalinginnaasumut imaluunniit klassimi tulliuttumi kalaallit oqaasiinik nalinginnaasumik atuartitsinermut nuunneqarsinnaalluni. Nuutitsineq taanna arriitsumik aallartinneqarsinnaavoq.§ 10. 2. klassimiit 11. klassimut atuartut Kalaallit Nunaannut nuuttut kalaallillu oqaasiinik ilisimasaqanngitsut qaavatigut aamma sap. ak. akunnerit tallimat tikillugit atuartinneqassapput.
Imm. 2. Atuartitsineq atuartunik ataasiakkaanik, holdinik imaluunniit klassimi tapertaliussatut atuartitsinikkut pisinnaavoq. Holdinik atuartunillu ataasiakkaanik atuartitsineq annerusumik atuartitsinerup nalinginnaasup avataani pisussatut aaqqissuunneqartassaaq.
Imm. 3. Atuartut ataasiakkaat ataavartumik naliliiffigineqartassapput atuartoq paragraffi taanna malillugu atuartinneqarnissaminik suli pisariaqartitsinersoq paasiniarlugu.
Kapitali 3.
Danskit oqaasiinik immikkut aaqqissuussamik atuartitsineq.§ 11. Atuartut 1. klassimiit 9. klassimiittut inunnguutsininnit pigisatut danskisut oqaasillit, tassunga ilanngullugit atuartut inunnguutsiminnit pigisatut kalaallisut danskisullu oqaaseqartut, danskit oqaasiinik immikkut aaqqissuussamik atuartinneqassapput.
§ 12. 1. klassimi atuartitsineq piffissap atuartut nalinginnaasumik atuarfigisaasa iluani sap. ak. akunnerni tallimani ingerlanneqartassaaq. Atuarfik taamatut ukiulinnik arlalinnik klasseqarpat, holdiliortoqarsinnaavoq atuartunik 1. klassinit arlalinninngaanneersunit inuttaqartunik.
Imm. 2. Holdinut pingasut ataallugit inuttaqartunut imm. 1 malillugu akunnerit amerlassusaat sap. ak. akunnernut pingasunut ikilisinneqarsinnaapput.
Imm. 3. 2. klassimit 9. klassimut nalinginnaasumik atuartitsinissamut pilersaarut malillugu klassini taakkunani akunnerni danskit oqaasiinik atuartitsiffiusussaasuni tamani danskit oqaasiinik immikkut aaqqissuussamik atuartitsineqassaaq. Tamanna aamma atuuppoq atuarfinnut 2. klassinut 3. klassinullu atuartitsissutissatut pilersaarummi danskit oqaasiinik ilanngussisimanngitsunut. Atuartitsineq aaqqissuunneqarsinnaavoq holdini, ukioqatigiit klassiinit arlaqartunit inuttalinni, holdinilu nalinginnaasumik klassit tulleriit marlunneersuinnarnik inuttaqarsinnaasuni.
Kapitali 4.
Inunnguutsimit pigisatut oqaatsinik atuartitsineq.§ 13. Atuartunut inunnguutsimit pigisatut kalaallisut qallunaatulluunniit oqaasiliunngitsunut pissutsit apeqqutaatillugit inunnguutsimit pigisatut oqaatsinik atuartitsinissamik aaqqissuussisoqarsinnaavoq.
Kapitali 5.
Aalajangersakkat allat.§ 14. Naammattussaammik atuartitsilernissaq imaluunniit ilinniagassanut tunngasutigut allatut tapersiinissaq tamatumalu annertussusissaa tak. kapitali 1, atuarfiup pisortaata aalajangissavaa atuartup atuartitsissutini ataasiakkaani ilinniartitsissuisa inassuteqarnerat tunngavigalugu aammalu atuartoq angajoqqaavilu isumasioqqaarlugit.
Imm. 2. Nalunaarut una malillugu holdiliornerit ilinniartitsisoqatigiinnik tusarniaareernikkut atuarfiup pisortaanit aalajangiiffigineqartassapput.
Imm. 3. Atuartup ilinniartitsisuisa inassuteqarnerisigut aammalu atuartut angajoqqaajusullu isumasioreernerisigut atuarfiup pisortaa makkuninnga aalajangiisassaaq:
1) § 7 naapertorlugu atuaqatigiit kalaallit oqaasiinik immikkut aaqqissuussamik atuartinneqarsinnaasut killilerneqarnissaat.
2) § 9, imm. 5. naapertorlugu atuartut kalaallit oqaasiinik atuartitsinermut nalinginnaasumut nuunneqarnissaat.
3) § 10 naapertorlugu kalaallit oqaasiinik immikkut aaqqissuussamik atuartitsinermik aallartitsinissaq.
4) § 11 naapertorlugu atuaqatigiit danskit oqaasiinik immikkut aaqqissuussamik atuartinneqartussat killilersorneqarnissaat.
5) § 13 naapertorlugu inunnguutsimit pigisatut oqaaserisanik atuartitsinermik aallartitsinissaq.§ 15. Kultureqarnermut, Ilinniartitaanermut Ilisimatusarnermullu Pisortaqarfiup pissutsit immikkut ittut peqqutigalugit nalunaarummi uani aalajangersakkat sanioqqunneqarnissaat akuerisinnaavaa, kiisalu nalunaarummi aalajangersakkat malinneqarnissaat pillugugu aalaj angersagaliorsinnaalluni.
§ 16. Nalunaarut 1. august 1994-imi atuutilissaaq.
Imm. 2. Tamatumunnga peqatigitillugu tapiusumik ilinniartitsineq pillugu Kultureqarnermi Atuartitsinermilu Pisortaqarfiup kaajallaasitaa nr. 4/88, 25. januar 1988-imeersoq atorunnaarsinneqarpoq.
Imm. 3. Nalunaarummi kapitali 2, 3 aamma 4 atuartunut 1. august 1994-imiit kingusinnerusukkulluunniit atuartussaatitaasunut atuuppoq.
Namminersornerullutik Oqartussat, ulloq 9. maj 1994
Marianne Jensen/
Aqigssiaq Møller