Init inuutissarsiornermut atorneqartut inigisamilu inuutissarsiummik ingerlatsineq pillugit Namminersornerullutik Oqartussat Nalunaarutaat nr. 7, 22. marts 1994-imeersoq.

Inissialiornermut tapersiissuteqartarneq pillugu Inatsisartut peqqussutaani nr. 1-imi 9. april 1992-imeersumi § 2, imm. 2, naapertorlugu aalajangersarneqarpoq:

 

§ 1. Init inuutissarsiornermut atorneqartussanngorlugit aaqqissuunneqarnissaat inuutissarsiutinullu ingerlatsiffiulernissaat inissiani makkunani Naalakkersuisut akuersissutigisinnaavaat:
1) Inissialiornermut tapersiissuteqartarneq pillugu inatsisartut peqqussutaanni kapitali 3 malillugu tapiiffigineqarlutik Kommunet attartortittakkatut inissialiarisimasaanni.
2) Inissialiornermut tapersiissuteqartarneq pillugu inatsisartut peqqussutaanni kapitalit 4, 5 aamma 6 malillugit taarsigassarsinikkut inissialiaasimasuni.

§ 2. § 1 malillugu akuersineq taamaallaat pisinnaavoq,
1) inissiaq inigisatut pingaartumik atorneqaannassappat,
2) inissiap ilaa annikinnerusoq taamaallaat inuutissarsiornermut atorneqassappat,
3) isumaqarnarpat inissiaq inigisatut atorneqarnerminit aserfallannerunavianngitsoq, aamma
4) akuersineq inissianut eqqaamiunut akornutaasumik kinguneqassanngippat.

§ 3. Nalunaarut atulissaaq 1. april 1994-imi.

Namminersornerullutik Oqartussat, ulloq 22. marts 1994

Emil Abelsen

/

Peter Beck