Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaata allanngortinneqarneranik Inatsisartut inatsisaat nr. 15, 28. oktober 1993-imeersoq.

 

§ 1.

Inuutissarsiutitigut ilinniagaqarnermut sulitsitsisut akiliutaat pillugit Inatsisartut inatsisaanni nr. 16, 23. november 1989-imeersumi imatut allanngortitsisoqarpoq:

1. § 1-mi, imm. 2-mi, nr. 4) oqaaseqatigiit naaneranni "." ima allanngortinneqassaaq ", aamma".

2. § 1-imi, imm. 2-mi 5)-itut nutaatut ikkunneqassaaq:
"5) sulisitsisut taxat atorlugit inunnik angallassisinnaanermut akuersissutillit."

3. § 1-mi, imm. 3 ima oqaasertaqassaaq:
"Imm. 3. Imm. 2, nr. 3, 4 aamma 5 malillugit taamaallaat akiliuteqartussaatitaannginnermi pineqarput akissarsiat ilaat isumaqatigiissutit naapertorlugit nunaateqarnermi, aallaaniarnermi, piniarnermi imaluunniit aalisarnermi taxat atorlugit inunnik angallassinermi sulinermi akissarsiaritinneqartut."

4. § 2, imm. 2, ima oqaasertaqassaaq:
"Imm. 2. Sulisitsisut sulisut ilinniagaqarsimasut ilinniagaqarsimanngitsullu inuutissarsiutitigut ilinniarteqqinneqarnerisa annerusumillu ilinniagaqarlutik pikkorissartinneqarnerisa, tamakkununnga ilanngullugu suliffissaaruttut suliarisarsimanngisaannik pisariaqartumik sulisinnaalersinniarneqartarnerisa, aningaasaliiffigineqarnerinut akiliuteqarlutik tapiissuteqassapput. Siunertaavoq sulisitsisut ataasiakkaat pikkorissartitsinernut aningaasartuutaasa annikillisinneqarnissaat naligiissarnissaallu suliffissaaruttullu periarfissinnissaat inuutissarsiutitigut pikkorissartitsisarnernik malinnaanissamut."

5. § 3-mi imm. 4-tut nutaatut ilanngunneqassaaq:
"Imm. 4. Sulisitsisut inatsisitigut allatut inissisimalersut allannguisut akiliutissaat ukiut marluk siornatigut akissarsiarititat tunngavigalugit naatsorsorneqassaaq, aamma tak. imm. 1."

 

§ 2.

Inatsisartut inatsisaat una atortuulissaaq 1. januar 1994.

Namminersornerullutik Oqartussat, ulloq 28. oktober 1993.

Lars Emil Johansen

/

Marianne Jensen