Nunanit allanit aningaasanik taarsigassarsinissaq pillugu Inatsisartut inatsisaat nr. 13, 28. oktober 1993-imeersoq.
§ 1. Naalakkersuisut aningaasanik katillugit 1.900 mio. kr.-inik nunanit allanit taarsigassarsinissamut piginnaatinneqarput.
§ 2. Inatsit atortuulerpoq 1. november 1993.
Imm. 2. Tamatumunnga peqatigitillugu nunanit allanit aningaasanik attartornissaq pillugu Inatsisartut inatsisaat nr. 1, 22. april 1993-imeersoq atorunnaarsinneqarpoq.
Namminersornerullutik Oqartussat, ulloq 28. oktober 1993
Lars Emil Johansen/
Emil Abelsen
Aalajangersakkanut ataasiakkaanut oqaaseqaatit
§ 1-imut.
Aalajangersakkami tassani nunani allani aningaasanik nioqquteqartarfinni, tassa Nunatta Danmarkillu avataanni, qanoq amerlatigisunik taarsigassarsisinnaaneq qummut killilerneqarpoq.
§ 2-mut.
Aalajangersakkami inatsisartut inatsisaata qaqugu atortuulernissaa aalajangerneqarpoq, tamatumalu peqatigisaanik nunanit allanit taarsigassarsinissaq pillugu Inatsisartut inatsisaat maannamut atuuttoq atuukkunnaarsinneqarpoq.
Oqaaseqaatit nalinginnaasut
D-markinngorlugit 1988-imi ukiuni talliroani akilersugassatut taarsigassarsiat aallaqqaammut 225 mio. kr-iusut aningaasalersoqqinneqarnissaat siunertaralugu 1993-imi upernaakkut Namminersornerullutik Oqartussat 175 mio. D-markinik taarsigassarsipput. Taarsigassarsisitsisuupput nunarsuarmi aningaaseriviit assigiinngitsut 22-it Chase Manhattan Bank aaqqissuussisoralugu.
Aningaasalersueqqinnissamut taarsigassarsiat 175 mio. D-markit taarsigassarsiarineqarmata 1988-imi taarsigassarsiat utertillugit suli akilerneqanngitsut, pisariaqarsimavoq nunanit allanit taarsigassarsinissamut piginnaatitsissutip 2.500 mio. kr.-inut qaffakkallarneqarnissaa.
Namminersornerullutik Oqartussat akiitsui piffissami sivisuumi akilersugassat ullumikkut 1,8 mia. kr.-it missigaat, taakkunannga 365 mio. kr.-it missaat realkreditimut akiitsuullutik 1.460 mio. kr.-illu nunanut allanut akiitsuullutik. 1993-imi upernaakkut ataatsimiinnermi taarsigassarsisinnaanermut piginnaatitsissutip qaffanneqarneranut tunngaviusut kiisalu landskarsip akiitsuisa siunissaq isigalugu akilerneqarnissaannik anguniagaqarneq naapertorlugit matumuuna naalakkersuisut "Nunanit allanit aningaasanik taarsigassarsinissaq pillugu inatsisartut inatsisissaannut siunnersuut" saqqummiuppaat, taarsigassarsinissamut piginnaatitsissummik 1.900 mio. kr.-inut appartitsisoq.