Inuussutissarsiutinut ilinniartitaaneq, ilinniagaqarnermit tapiissutit inuussutissarsiutinullu tunngasunik siunnersuineq pillugit Inatsisartut peqqussutaat nr. 16, 28. oktober 1993-imeersoq.

Suliassaqartitsiniarnermik inunnillu isumaginninnermik Kalaallit Nunaannut inatsimmi nr. 580-imi, 29. november 1978-imeersumi § 1, imm. 1, aamma inuutissarsiutinik ilinniartitsisarnermik Kalaallit Nunaannut inatsimmi nr. 582-imi, 29. november 1978-imeersumi §§1, 2 aamma 5 naapertorlugit aalajangersarneqarput:

 

Inuussutissarsiutinut ilinniartitaanerit il.il.

§ 1. Inuussutissarsiutinut ilinniartitaanerit Naalakkersuisut ingerlatissavaat inuussutissarsiornermi suliffissaqartitsiniarnermilu naalakkersuinikkut Kalaallit Nunaanni Inatsisartunit anguniagassatut aalajangersakkat naammassiniarlugit.
Imm. 2. Inuussutissarsiutinut ilinniartitaanerit tassaapput:
1) Ilinniartitaanerit Siammasissumik Tunngaviusumik Ilinniartitaanerni ilinniakkat iluanni ikiortitut imaluunniit ilinniagalittut naammassiffiusut.
2) Umiartornerup iluani ilinniartitaanerit.
3) Ilinniarsimasami qulliusunut ilinniartitaanerit.
Imm. 3. Ilinniagassanut ataasiakkaanut maleruagassat Naalakkersuisunit aalaj angersarneqassapput.
Imm. 4. Inuussutissarsiutinut ilinniartitaanerit siulersorneqarnerat pillugu Naalakkersuisut maleruagassiussapput.
Imm. 5. Maleruagassat imm. 1-imiit 4-mut ilinniarnernut Inatsisartut peqqussutaatigut allatigut Inatsisartut maleruagassaliuussimasaannut atuutinngillat.

§ 2. Naalakkersuisut KANUKOKA isumaqatigiinniuteqarfigereerlugu inuussutissarsiutinut ilinniartitaanernut ilinniarnerilluunniit immikkoortuisa ilaannut kommunit aningaasaleeqataanissaat pillugit maleruagassat aalajangersassavaat.

§ 3. Inuussutissarsiutinut ilinniartitaanerit kikkunnulluunniit ammapput § 1, imm. 3 naapertorlugu tiguneqarnissamut piumasaqaataasunik sukkulluunniit aalajangersagaasunik naammassinnissimasunut, aamma
1) Kalaallit Nunaanni najugaqavissunut imaluunniit
2) Kalaallit Nunanni sivikinnerpaamik ukiuni qulini najugaqavissimasunut Kalaallit Nunaatalu avataani sivisunerpaamik ukiuni pingasuni najugaqarsimasunut.
Imm. 2. Kalaallit Nunaata avataani, tak. imm. 1, ilinniarnermut imaluunniit isumaginninnermut Kalaallit Nunaanni oqartussaasunit peqataaffigineqartunut atatillugu najugaqarnerit ilaatinneqanngillat.

§ 4. Ilinniartitsineq peqataasunut akeqanngilaq.
Imm. 2. Naalakkersuisut aalajangersinnaavaat inuussutissarsiutinut ilinniartitaanermi peqataasut atuarnermut atortut pigiligassatik tamakkiisumik ilaannakoortumilluunniit akilissagaat.

§ 5. Naalakkersuisut ilinniartitaaneq pillugu siunnersuisartoqatigiinnik pilersitsissapput, ilinniartitaaneq pillugu apeqqutini nalinginnaasuni Naalakkersuisunik siunnersuisartussamik. Naalakkersuisut ilinniartitaaneq pillugu siunnersuisoqatigiit suleriaasissaat aalajangersassavaat.
Imm. 2. Pisariaqartitsineq naapertorlugu Naalakkersuisut siunnersuisuutitanik immikkut ilisimasalinnik pilersitsisinnaapput.

 

Ilinniagaqarnersiat.

§ 6. Namminersornerullutik Oqartussat ilinniartunut ilinniagaqarnersiaqarfiusumik ilinniagaqartunut, ilinniagaqarnersiaqartitsissapput.
Imm. 2. Naalakkersuisut aalajangersartassavaat ilinniartitaanerit suut ilinniagaqarnersiaqarfiusinnaassanersut. Ilinniartitaanerit makku akornanni toqqarneqassapput:
1) Ilinniartitaanerit inuussutissarsiummik ingerlatsisinnaalernermik kinguneqartussat,
2 ) ilinniagaqarnissamut piareersarf iusut ilinniarnertuunngorniarlunilu ilinniarnerit, aamma
3) eqqumiitsuliornerup, nipilersornerup kulturikkulluunniit allanik ingerlataqarnerup iluanni ilinniartitaanerit.
Imm.3. Ilinniartitaanernutilinniagaqarnersiaqarfigisassanut qinnuteqarnermi periutsit, qinnuteqarnissamut piffissarititat, tiguneqarnissamut piumasaqaatit, ilinniarfinnik toqqaanerit il.il. pillugit Naalakkersuisut aalajangersaassapput.
Imm. 4. Ilinniartitaanerit Kalaallit Nunaanni naammassineqarnissaat pingaarnerutillugu ilinniagaqarnersiat tunniunneqartassapput. Kalaallit Nunaata avataani ilinniartitaanernut ilinniagaqarnersiaqartitsisoqarsinnaavoq:
1) ilinniarneq Kalaallit Nunaanni suliffiusinnaasutut naatsorsuutigineqarsinnaappat, aamma
2) ilinniartitaaneq taamaattoq Kalaallit Nunaanni ingerlanneqarsinnaanngippat.

§ 7. Ilinniagaqarnersiaq stipendiumitut, taarsigassarsiatut imaluunniit taarsigassarsianut qularnaveeqqutitut tunniunneqartarpoq.
Imm. 2. Inatsisartut ukiumoortumik aningaasanut inatsisikkut qaammatikkaartumik ilinniagaqarnersiat anngissusissaat aalajangersartassavaat.
Imm. 3. Naalakkersuisut ilinniagaqarnersiat annertussusii, suuneri amerlassusiilu kiisalu ilinniagaqarnersianik pisarnissamut piumasaqaatit pillugit maleruaqqusanik aalaj angersaasassapput. Taamaliortoqannginnerani siunnersuut ilinniartut kattuffiinut oqaaseqaateqarfigisassanngorlugu saqqummiunneqassaaq.

§ 8. Ilinniagaqarnermut tapiissuteqarfigineqassagaanni danskisut innuttaassuseqartariaqarpoq.
Imm. 2. Taamaattorli nunani allamiut ilinniagaqarnersiaqarsinnaapput nunat tamat akornanni isumaqatigiissutit naapertorlugit Qallunaat nunaanni innuttaasut assigalugit ilinniagaqarnersiaqarsinnaatitaagunik.

§ 9. Kalaallit Nunaanni ilinniarnernut tapiissuteqartoqarsinnaavoq inunnut Kalaallit Nunaanni najugaqavissunut.

§ 10. Kalaallit Nunaata avataani ilinniarnernut tapiissuteqartoqarsinnaavoq inunnut
1) qinnuteqaateqarnermik nalaanni Kalaallit Nunaanni najugaqavissunut ilinniarnerullu aallartilivinnera sioqqullugu ukiuni tallimani taamatut najugaqavissimasunut, imaluunniit
2) Kalaallit Nunaanni aalajangersimasumik sivikinnerpaamik ukiuni qulini najugaqarsimasunut Kalaallit Nunaatalu avataani sivisunerpaamik ukiuni pingasuni aalajangersimasumik najugaqarsimasunut.
Imm. 2. Kalaallit Nunaata avataani, tak. imm. 1, ilinniarnermut imaluunniit isumaginninnermut Kalaallit Nunaanni oqartussaasunit peqataaf f igeqartunut atatillugu najugaqarnerit ilaatinneqanngillat.

§ 11. Ilinniagaqartut inuuniarnerminni aningaasartuutaasa akilerneqarnissaat siunertaralugu pisortanit ikiorsiissutinik pisartagaqartinneqartut ilinniagaqarnersiaqanngitsoortitaasinnaapput.

§ 12. Ilinniagaqartut pissutsit inuninerminnut tunngasut tamaasa ilinniagaqarnersiaqartitsinissamut pingaaruteqartut kingusinnerusukkullu pissutsini tamakkunani allannguutaasinnaasut ilanngullugit nalunaarutigissavaat.
Imm. 2. Ilinniagaqartoq pissutsit imm. 1-imi taaneqartut pillugit eqqunngitsunik amigartunilluunniit paasissutissiippat, imaluunniit allannguutinik nalunaaruteqanngippat, aningaasat eqqunngitsumik pisartagarineqarsimasut utertillugit Naalakkersuisunit akileqquneqarsinnaapput erniat ilanngullugit. Erniat annertussusissiat Naalakkersuisunit aalajangerneqassaaq.
Imm. 3. Imm. 2-mi taarneqartumut ilassutitut Naalakkersuisut ilinniagaqartoq piffissami aalajangersimasumi imaluunniit qaqugumulluunniit ilinniagaqarnersianik tunineqarsinnaajunnaarsissinnaavaat. Taamatuttaaq iliortoqarsinnaavoq ilinniagaqartup siornatigut tapiissutisiaminut piumasaqaatit unioqqutissimappagit.

§ 13. Naalakkersuisut ilinniagaqarnersianit ilinniagaqartut kattuffiinut ilaasortaanermut akiliutissanik ilanngaassisinnaapput.
Imm. 2. Ilinniagaqartoq ilaasortaajunnaarpat ilinniagaqartup kattuffiata tamanna ingerlaannartumik allakkatigut Naalakkersuisunut nalunaarutigissavaa.

 

Inuussutissarsiutinut tunngasunik siunnersuineq

§ 14. Naalakkersuisut qularnaassavaat kommunit ilinniarfiillu paasissutissanik siunnersuinermut atugassanik tamanik pisariaqartunik pilersornissaat.

 

Immikkut akuersisarneq maalaaruteqartarnerlu

§ 15. Naalakkersuisut immikkut peqqutissaqavitsillugu § 3-mi, § 6-imi, imm. 4-mi, § 8-mi, imm. 1-imi, § 9-mi § 10-milu aalajangersakkat sanioqqussinnaavaat.

§ 16. §§ 6-13 naapertorlugit ilinniagaqarnersiaqartitsinissaq pillugu aalajangiinerit Ilinniagaqarnersianik Maalaaruteqartarfimmut allakkatigut suliassanngorteqqinneqarsinnaapput aalajangiinerup tiguneraniit sapaatip-akunneri sisamat qaangiutsinnagit. Maalaaruteqartarfiup aalajangigaa ingerlatsivinni oqartussaasunut allanut ingerlateqqinneqarsinnaanngilaq .
Imm. 2. Naammagittaalliuuteqartarfik siulittaasumik ilaasortanillu pingasunik inuttaqassaaq, Inatsisartunit, taakkua qinigaaffiat naallugu ilaasortaasussatut, toqqarneqartartussanik. Ilaasortat ilaat ataaseq ilinniagaqartut kattuffiisa inassuteqarnerisigut toqqarneqassaaq.
Imm. 3. Naammagittaalliuuteqartarfiup suleriaasissaa Naalakkersuisunit aalajangersarneqartassaaq.

§ 17. Peqqussut manna malillugu aalajangernernut allanut maalaarutit, aalajangernerup tiguneraniit sapaatip akunneri sisamat qaangiutsinnagit Naalakkersuisunut saqqummiunneqarsinnaapput.
Imm. 2. Imm. 1 susassaqarfinnut allanik maalaaruteqartarnermut maleruaqqusalinnut atuutinngilaq.

 

Atortuulersitsineq

§ 18. Peqqussut ukioq ilinniartuunersiaqarfiusoq 94/95 aallarnerfigalugu 1. januar 1994-imi atuutilissaaq.
Imm. 2. Tamatumunnga peqatigitillugu inuussutissarsiutitigut ilinniartitaaneq, ilinniagaqarnermut tapiissutit, inuussutissarsiutinullu tunngasunik siunnersuineq pillugit Inatsisartut peqqussutaat nr. 1, 4. maj 1990-imeersoq atorunnaarsinneqarpoq.
Imm. 3. Ingerlatsinermi aalajangersakkat uku malillugit aalajangersorneqarsimasut:
1) imm. 2-mi peqqussut taaneqartoq,
2) Kalaallit Nunaanni inuutissarsiutitigut tunngaviusumik ilinniartitaanermut landstingip peqqussutaa nr. 5, 24. oktober 1980-imeersoq,
3) Kalaallit Nunaanni inuutissarsiutitaarniarluni ilinniartitaanermut, ilinniarnermut tapiisarnermut inuutissarsiutinillu ilitsersuinermut landstingip peqqussutaa nr. 4, 24. oktober 1980-imeersoq,
4) inuutissarsiutitaarniarluni ilinniartitaanermut, ilinniarnermut tapiisarnermut inuutissarsiutinillu ilitsersuinermut landstingip peqqussutaa nr. 2, 16. november 1984-imeersoq atortuuinnassapput, aalajangersakkat peqqussut una naapertorlugu aalajangersarneqarsimasut allanngortinneqarnissaasa atorunnaarsinneqarnissaasaluunniit tungaannut.
Imm. 4. Ilinniagaqarnersiat imm. 2-mi peqqussut taaneqartoq malillugu akuersissutigineqarsimasut naanissamik tungaannut atortuuinnassapput.
Imm. 5. Ilinniagaqarniartunut 1. januar 1994-imi ilinniakkaminnik aallartitsinissamut tiguneqarsimasunut §§-it 3 aamma 10 atuutinngillat.

Namminersornerullutik Oqartussat, ulloq 28. oktober 1993.

Lars Emil Johansen

/

Marianne Jensen