Pensionit utoqqarnullu angerlarsimaffiit il.il. pillugit Inatsisartut peqqussutaata allanngortinneqarnera pillugu Inatsisartut peqqussutaat nr. 14, 28. oktober 1993-imeersoq.

 

§ 1

Isumaginninnikkut pensionit utoqqarnillu angerlarsimaffiit il.il pillugit Inatsisartut peqqussutaanni nr. 8, 22. oktober 1990-imeersukkut Inatsisartut peqqussutaatigut nr. 3, 9. april 1992-imi allanngortinneqartumi makku allannguutigitinneqassapput:

1. § 1, imm.2 imatut oqaasertalerneqassaaq:
"Isumaginninnikkut Isumannaallisaaneq pillugu Nunat Avannarliit Isumaqatigiissutaat 15. juni 1992-imeersoq tunngavigalugu Finlandimi, Islandimi, Norgemi Sverige-milu innuttaasunik pensionisiaqalersitsisoqarsinnaavoq, pineqartunut ikinnerpaamik ukiuni pingasuni Nunatsinni najugaqareersimappata."

2. § 1, imm. 3 imatut oqaasertalerneqassaaq:
"Nunatsinni pensionisiaqarsinnaatitaalerneq pigiinnarneqassaaq Isumaginninnikkut Isumannaallisaaneq pillugu Nunat Avannarliit Isumaqatigiissutaat tunngavigalugu pensionisiat naatsorsorneqassatillugit, tamatumani pineqartup Nunatta avataani najugaqarnera apeqqutaatinnagu, EØS-ili pillugu isumaqatigiissutip atuuffiata iluaniinneq apeqqutaatillugu."

3. § 1-imi imm. 4-10-tut makku ilanngunneqassapput:
"Imm. 4. Tamakkiisumik pensionisiaqarsinnaatitaaneq piffissami 15-inik ukioqalernermiit 60-inik ukioqalernerup tungaanut sivikinnerpaamik ukiuni 40-ni Nunatsinni najugaqarsimanissamik piumasaqaatitaqarpoq. Tamakkiisumik pensionisiaqarnissamut piumasaqaataasoq eqqortinneqarsimanngippat pensionisiat amerlassusissaat piffissap najugaqarfigisimasap ukiullu 40-1 imminnut sanilliullugit agguaqatigiissinneqarnerisigut aalajangersarneqassaaq."
Imm. 5. Siusinaartumik tamakkiisumillu pensionisiaqarsinnaatitaaneq 15-inik ukioqalernermiit piffissap pensionisiaqalersitsiffiup tungaanut ukiut najugaqarfigisimasat sivikinnerpaamik 4/5-iannik sivisussuseqarsimanissaanik piumasaqaateqarfiuvoq. Tamakkiisumik pensionisiaqarnissamut piumasaqaataasoq eqqortinneqarsimanngippat pensionisiat amerlassusissaat piffissap najugaqarfigisimasap 15-inillu ukioqalernermiit ukiut najugaqarfiusimasut 4/5-iisa imminnut sanilliullugit agguaqatigiissinneqarnerisigut aalajangersarneqassaaq. Pensionisiassatut naatsorsorneqartut tamakkiisumik pensionisiat 40-mik agguarnerisigut kisitsimmut pissarsiarineqartumut qaninnerpaamut appartinneqassaaq.
Imm. 6. Siusinaartumik pensionisialik utoqqalinersiaqalerpat pensionisiat siusinnerusukkut 40-nik agguaanermi tunniunneqartartut amerlaqataat tunniunneqartassapput.
Imm. 7. Qanoq sivisutigisumik najugaqarsimanerup naatsorsorneqarnerani 15-inik ukioqalernermiit 60-inik ukioqalernerup tungaanut piffissat najugaqarfigisimasat kisimik ilanngunneqartassapput. Piffissat najugaqarfigisimasat katinneqassapput, tamakkiisumik pensionisiat 40-mik agguarnerisigut najugaqarfigisimallu sivisussusii naapertorlugit inerneri kisitsimmut pissarsiarineqartumut qaninnerpaamut appartinneqassapput.
Imm. 8. Pensionit inunnut Danmarkimi, Finlandimi, Islandimi, Norgemi Sverigemilu innuttaassuseqanngitsunut tunniunneqarsinnaapput qinnuteqartoq qinnuteqarnini sioqqullugu sivikinnerpaamik ukiuni pingasuni Kalaallit Nunaanni najugaqarsimappat. Qinnuteqaat 60-inik ukioqalerneq kingoqqullugu tunniunneqarpat 60-inik ukioqalernermi najugaqarsimanissamik piumasaqaat eqqortinneqarsimassaaq.
Imm. 9. Najugaqarsimaneq, innuttaassuseqarneq, ukiunik katersineq tunniussinerlu pillugit avaqqussisinnaanermik Naalakkersuisut malittarisassanik aalajangersaasinnaapput naalagaaffimmi oqartussanut naalagaaffinnillu allanut isumaqatigiissutaasut eqqortinneqarnissaat tamatumani siunertarineqarpat.
Imm. 10. Pissutsit immikkut ittut atuutsillugit Naalakkersuisut akuersissuteqarsinnaapput inuit pensionisiaqalereernermik kingorna nunanut allanut nuuttut pensionisiaminnik pisartagaqaannarnissaannut."

4. § 8, imm. 4 naggatit 3-atut ilanngunneqassaaq:
"Pensionisialik Nunatsinni akileraaruteqaataasussaanngitsunik isertitaqartarpat tunngaviusumik aningaasartat isertitaqqortussuseq tunngavigalugu aaqqiivigineqartarneri pillugit Naalakkersuisut malittarisassanik aalajangersaassapput."

5. § 8-imi imm. 7-itut una ikkunneqassaaq:
"Tamakkiisumik pensionisiat (tunngaviusumik aningaasartat) 40-nik agguarlugit pissarsiarineqartoq tunngavigalugu pensionisiatut tunniunneqartussat naatsorsorneqarnerini, tak. allannguutissatut siunnersuummi § 1, imm. 4, naggatit aappaat aamma § 1, imm. 5, naggatit aappaat, tamakkiisumik tunngaviusumik aningaasartat § 8, imm. 1-6 tunngavigalugit naatsorneqaqqaartassapput. Taamaalilluni tunngaviusumik aningaasartassatut naatsorsorneqartut 40-mik agguaanikkut pissarsiarineqartunut appartinneqassapput. Tapit appartinneqassanngillat."

6. § 12 naggatit 3-tut ilanngunneqassaaq:
"Tapit pensionisialinnut Nunatta avataani najugaqartunut tunniunneqartassanngillat."

7. § 19-imi imm. 1, naggatit 2-tut oqaasertalerneqassaaq:
"Nunatsinniit nuunnermi qaammat nuuffiusoq naappat aningaasat tunniunneqartarneri unitsinneqassapput, imm. 3-mi alajangersakkat eqqaassanngikkaani."

8. § 19-imi mannakkut imm. 3-tut ikkunneqassaaq:
"Naalakkersuisut malittarisassiussapput qanoq pensionit agguataarlugit tunniunneqartassanersut, pensionit § 1 imm. 3-mi aalajangersaaneq naapertorlugu naatsorsuineqassatillugu."

9. § 27 imatut oqaasertalerneqassaaq:
"Tunngaviusumik aningaasartanut meeqqanullu tapiutinut aningaasartuutit Landskarsip aningaasartuutigissavai. Aningaasartuutit allat, matumani inummut tapiutinut aningaasartuutit ilanngullugit, kommuninit ataasiakkaanit aningaasartuutigineqassapput. Aningaasartuutinik matussusiisarneq, naatsorsuutinik saqqummiussineq kukkunersiuinerlu pillugit malittarisassat Naalakkersuisut aalajangersassavaat."

 

§ 2

Inatsisartut peqqussutaanni § 1-imi imm. 9 1. januar 1994 atuutilissaaq. Peqqussummi malittarineqartussat allat Nunatsinnut atuutilissapput Isumaginninnermi Isumannaallisaaneq pillugu Nunat Avannarliit isumaqatigiissutaata 15. juni 1992-imeersup ulloq atortuulerfia aallarnerfigalugu. Ulloq taanna aallarnerfigalugu pensionisiaqarnissanik qinnuteqaatit Inatsisartut peqqussutaanni matumani malittarisassat nutaat malillugit suliarineqartalissapput.

Namminersornerullutik Oqartussat, ulloq 28. oktober 1993.

Lars Emil Johansen

/

Henriette Rasmussen