TELE Attaveqaatit aktiaateqarluni ingerlatseqatigiiffinngortinneqarnera pillugu Inatsisartut peqqussutaat nr. 11, 28. oktober 1993-meersoq.
Innaallagiaq, imeq kiallu, qatserisartoqarneq, umiarsualiviit, aqqusernit, nalunaarasuaatikkut atassuteqarneq il.il. pillugit Kalaallit Nunaannut inatsimmi nr. 943-imi, 23. december 1986-meersumi §-it 7 aamma 8 naapertorlugit aalajangersarneqarpoq:
Kapitali 1.
Ingerlatseqatigiiffiup pilersinneqarnera.§ 1. Naalakkersuisut pilersissavaat aktiaateqarluni ingerlatseqatigiiffik, TELE Attaveqaatit A/S (nalunaarasuartaaserinermik ingerlatseqatigiiffik), 1. januar 1994 aallarnerfigalugu atuuttuulersoq.
Imm. 2. Nalunaarasasuartaaserinermik ingerlatseqatigiiffiup suliassat Namminersornerullutik Oqartussat suliffeqarfiutaata TELE Attaveqaatit (nalunaarasuartaaseriveqarfiup) maannamut ingerlassimasaralui tigussavai ingerlateqqillugillu. Nalunaarasuartaaserinermik ingerlatseqatigiiffiup siuliini taaneqartup pilersinneqarnera ilutigalugu nalunaarasuartaaserisoqarfik ingerlatsiunnaassaaq.
Kapitali 2.
TELE Attaveqaatit A/S.§ 2. Nalunaarasuartaaserinermik ingerlatseqatigiiffiup siunertaraa Kalaallit Nunaanni pisortat nalunaarasuartaatitigut attaveqaataasa atortui ingerlannerallu pisortaaffigissallugit aammalu tamanut ammasunik nalunaarasuartaatitigut attaveqarnermi sullissinerit neqeroorutigissallugit naalakkersuisut akuersissutaat naapertorlugu. Akuersissutip iluaniittut avataatigut nalunaarasuartaaserinermik ingerlatseqatigiiffiup neqeroorutigisassavai nalunaarasuartaatitigut attaveqarnermut tunngasutigut suliassat atortorisanut, ingerlatsinermut sullissinermullu tunngasut aaqqittarnissaat Kalaallit Nunaanni nunanilu allani.
Imm. 2. Nalunaarasuartaaserinermik ingerlatseqatigiiffik akuersissut naapertorlugu aammalu niuernermi atugassarititaasut tunngavigalugit ingerlanneqassaaq.
Imm. 3. Nalunaarasuartaaserinermik ingerlatseqatigiiffiup aktiatigut aningaasaataasa pilersinneqarneranni Namminersornerullutik Oqartussat aningaasaliissuteqassapput, taakkulu pilersitsinermi 150 mio. kr.-iupput.
Imm. 4. Naalakkersuisut piginnaatitaapput nalunaarasuartaaserinermik ingerlatseqatigiiffik landskarsimiit sivisuumik akilersugassanik taarsigassarsitissallugu piumasaqaatit Inatsisartunit aalajangerneqartut tunngavigalugit.
Kapitali 3.
Ingerlatseqatigiiffimmut piumasaqaatit allat.§ 3. Nalunaarasuartaaserinermik ingerlatseqatigiiffik inatsisip inatsisillu allat akitiaateqarluni ingerlatseqatigiiffinnut tunngassuteqartut Kalaallit Nunaanni atulersinneqarsimasut iluanni inissisimavoq. Peqqussummi matumani aalajangersakkat tamakkununnga allannguutinik kinguneqassanngillat.
§ 4. Naalakkersuisut piginnaatitaapput akileeqqaarutitut taarsigassarsiatulluunniit nalunaarasuartaaserinermik ingerlatseqatigiiffimmi aningaasaatinut akiliutigissallugit maannamut nalunaarasuartaaseriveqarfiusimasup aningaasaatai pigisaalu nalillit, taamaattoqarsimappat akiitsut ilanngaatigereernerisigut.
§ 5. Nalunaasuartaaseriveqarfiup pisinnaatitaaffii pisussaatitaaffiilu nalunaarasuartaaserinermik ingerlatseqatigiiffiup tigummisarilissavai.
Imm. 2. Nalunaarasuartaaseriveqarfiup pisussaatitaaffiisa naammassinissaat Namminersornerullutik Oqartussat qulakkiissavaat.§ 6. Nalunaarasuartaaserinermik ingerlatseqatigiiffiup malittarisassai taakkununngalu allannguutit Naalakkersuisunit akuerineqartassapput.
§ 7. Naalakkersuisut aalajangersagaliorsinnaapput nalunaarasuartaaserinermik ingerlatseqatigiiffiup taarsigassarsinissaanut, qularnaveeqqusiinissaanut aammalu Namminersornerullutik Oqartussanut paasissutissiisarnissaanut.
Kapitali 4.
Sulisorisat.§ 8. Namminersornerullutik Oqartussat nalunaarasuartaaseriveqarfimmi atorfilittaasa sulinertik ingerlatiinnarallarsinnaavaat teleselskabimi Namminersornerullutik Oqartussat sukumiinerusumik ilitsersuutaat malillugit, tassa nalunaarasuartaaserinermik ingerlatseqatigiiffimmi atorfilinngunngikkunik.
Imm. 2. Tjenestemandit imm.l naapertorlugu Namminersornerullutik Oqartussani atorfeqarnerminnik attassiinnartut piumasarilersinnaanngilaat akissarsiat ilaat utaqqiisaasumik tigusartakkat, suliartoqqusaanermi akissarsiat imaluunniit soraarnerussutisiassat, nalunaarasuartaaterinermik ingerlatseqatigiiffimmi taaneqartumi sulisuunertik pissutigalugu.
Imm. 3. Nalunaarasuartaaserinermik ingerlatseqatigiiffiup akissarsiat il.il. imm. 1 naapertorlugu Namminersornerullutik Oqartussat akilertagaat utertittassavai.
Imm. 4. Tjenestemandinut imm. 1 naapertorlugu nalunaarasuartaaserinermik ingerlatseqatigiiffimmut atukkiunneqartunut tjenestemanditut soraarnerussutisiassanut aningaasartuutit Namminersornerullutik Oqartussanit akilerneqartassapput. Namminersornerullutik Oqartussanut soraarnerussutisiaqalernissamut akileeqataassutit nalunaarasuartaaserinermik ingerlatseqatigiiffiup ingerlaavartumik akilertassavai piffissamut atorfillip nalunaarasuartaaserinermik ingerlatseqatigiiffimmi atorfeqarnermini soraarnerussutisiaqalernissamut katersiffianut tunngasut.§ 9. Kalaallit Nunaanni atorfilinnut tunngatillugu pisinnaatitaaffiit pisussaatitaaffiillu peqqussutip atuutilernerani atuutereersut naapertorlugit ataatsimoortunut akissarsiat pillugit isumaqatigiissutit paaseqatigiinnikkulluunniit isumaqatigiissutit, akissarsianut sulinermullu tunngatillugu aalajangersakkat Kalaallit Nunaanni naalakkersuisunit aalangersarneqarsimasut akuerineqarsimasulluunniit aamma akissarsiat sulinermullu tunngasut pillugit inunnut ataasiakkaanut isumaqatigiissutaasimasut nalunaarasuartaaserinermik ingerlatseqatigiiffiup ingerlaannartumik tigummisarilissavai.
Kapitali 5.
Atortuulerfia.§ 10. Inatsisartut peqqussutaat manna atortuulerpoq 1. januar 1994.
Namminersornerullutik Oqartussat, ulloq 28. oktober 1993
Lars Emil Johansen/
Kuupik Kleist