Meeqqanut akilersuutit il.il. pillugit Inatsisartut peqqussutaata allanngortinneqarneranik Inatsisartut peqqussutaat nr. 4, 11. maj 1993-imeersoq.

 

§ 1

Meeqqanut akilersuutit il.il. pillugit Inatsisartut peqqussutaanni nr. 9-mi 28. oktober 1982-imeersumi, inatsisartullu peqqutaatigut nr. 3-kkut 11. november 1986-imeersukkut allanngortinneqartumi makku allannguutigitinneqassapput:

 

1. § 3, inun. 3-mi oqaaseqatigiit siulliit imatut oqaasertalerneqassapput:
"Meeqqap pilersorneqarnissaanut tapiissutit meeqqap inuuviani aammalu inuuvianit ukiup affaa qaangiukkaangat tunniunneqartussanngortassapput, tunniussinerli ulloq tunniussivissaq sioqqullugu ulluinnarmi kingullermi oqartussaqarfiup tunniussisussap allaffiata ammaffiani pissalluni."

2. § 16-ip kingorna una ilanngunneqassaaq:

"Kapitali 6 a.
Meeravissiartaarnermi tapiissutit

§ 16 a. Angajoqqaat meeqqamik nunami allamiumik meeravissiartaartut aningaasanik ataasiaannartumik tunniunneqartussanik pisinnaatitaapput, taakkulu akilersuutit nalinginnaasut ukiumoortumik aningaasartaasa sukkulluunniit atuuttut pingasoriaataannik amerlassuseqarput. Meeravissiartaarnermi tapiissutinik pisinnaatitaaffeqarneq meeravissiartaarnerup meeravissiartaartarneq pillugu inatsit tunngavigalugu suliniaqatigiiffiit inatsisinik atortitsinermut ministeriaqarfiup akuerisaasa ilaat aqqutigalugu ingerlanneqarsimanissaanik piumasaqaateqarfiuvoq.
Imm. 2. Meeravissiartaarnermut tapiissutit qinnuteqarnikkut kommunimit tunniunneqassapput, angajoqqaallu meeravissiartaarnissamik qinnuteqartut meeqqap Kalaallit Nunaannut tikissimanera uppernarsarsinnaappassuk tunniunneqarsinnaallutik. Meeravissiartaarnermili tapiissutit siusinnerusukkut tunniunneqarsinnaapput angajoqqaat meeravissiartaarniarlutik qinnuteqartut meeqqap Danmarkimut nunanulluunniit allanut aaneranut atatillugu angalanermut najugaqarnermullu aningaasartuuteqarpata, tassa meeravissiartaassaq innersuussutigineqarsimasoq uppernarsarneqarpat, tamatumunngalu atatillugu angalanermut aningaasartuuteqarnissaq qanittukkut pisussaappat."

3. § 19, imm. 1 imatut oqaasertalerneqassaaq:
"Kapitali 2 aamma kapitali 6 a malillugit aningaasartuutit Landskarsimit akilerneqartassapput."

 

§ 2

Inatsisartut peqqussutaat manna 1. juni 1993 aallarnerfigalugu atuutilerpoq.

Namminersornerullutik Oqartussat, ulloq 11. maj 1993

Lars Emil Johansen

/

Henriette Rasmussen