TELE Attaveqaatit A/S-imut akuersissut pillugu nalunaarut nr. 46, 21.december 1993-imeersoq.

Nalunaarasuartaatitigut attaveqarneq sullissinerillu pillugit Inatsisartut peqqussutaanni nr. 10-mi 29. oktober 1993-imeersumi §§3, 4 aamma 7 naapertorlugit aalaj angersarneqarput:

 

§ 1. TELE Attaveqaatit A/S (akuersissummik pigisaqartoq) akuerineqarpoq nalunaarasuartaatinik telefoninillu pilersitsisarnissamut ingerlatsinissamullu, aamma makkunuuna sullissisarnissamut (akuersissummi pineqartunut tunngasut):
1) Telefonitigut sullissineq.
2) Allakkatigut paasissutissiatigullu attaveqarnermi sullissinerit.
3) Attaveqarnermi aalajangersimasumik atortorisat atukkiuttarnerat.
4) Attaveqaatit angallattakkat qaammataasallu atorlugit attaveqarnernik sullissinerit.
5) Radiukkut fjernsynikkullu aallakaatitat nalunaarasuartaatitigut aqqutit atorlugit ingerlateqqinneqartarnerat.
Imm. 2. Akuersissut una 1994-imi januaarip aallaqqaataanit atortuulissaaq.
Imm. 3. Tulliini taaneqartut makku akuersissummi pineqartunut ilaatinneqanngillat:
1) Atortut, illersornissaq siunertaralugu atorneqartut.
2) Atortut, danskit Amerikamiullu illersornissamut sakkutooqarfiini, Kalaallit Nunaata illersornissaa pillugu 1951-imi aggustusip 27-anni isumaqatigiissut naapertorlugu sakkutooqarfinngortinneqartuni, nalunaarasuartaatitigut attaveqarneq sullissinerillu pillugit Inatsisartut peqqussutaata nr. 10-p 28. oktober 1993-imeersup Kalaallit Nunaannut ministerimit atortuulersinneqarnissaata tungaanut atorneqartut.
3) Atortut, naalagaaffimmi oqartussaasunit kommunimilluunniit imminuinnaq tunngasunut atorneqartut.
4) Atortut, illuutip killigisaata iluani imaluunniit illuutit arlallit ataatsimik piginnittoqartut akornanni taamaallaat atorneqartut.
5) Kalaallit Nunaata Danmarkillu akornanni, Kalaallit Nunaata Savalimmiullu akornanni kiisalu Kalaallit Nunaata nunallu allat akornanni nalunaarasuaatikkut atassuteqarneq naalagaaffimmi oqartussaasunut ataj unnaarsimanngitsoq.
Imm. 4. Akuersissummik pigisaqartup nalunaarasuartaatitigut attaveqarneq sullissinerillu pillugit Inatsisartut peqqussutaanni nr. 10-mi 28. oktober 1993-imeersumi § 3, imm. 2, naapertorlugu naammagisariaqarpaa akuersissutip qumartinneqartarnissaa akuersissummi pineqartut, tak. imm. 1, tungaasigut amerlanerusunik peqataatitaqalertarnerit imaluunniit immikkut ittunik pisinnaatitaaffiliisarnerit najoqqutaralugit.

§ 2. Akuersissummik pigisaqartup akuersissummi pineqartunut akigititassanik aalajangersagai tamatumanilu tunngavigisai kiisalu tamakkunani allannguutigititai Naalakkersuisunit akuerineqaqqaartassapput.
Imm. 2. Grønlands Tekniske Organisationi pillugu Inatsisartut peqqussutaanni nr. 8-mi 19. december 1986-imeersumi § 3, imm. 4, naapertorlugu ukiup ingerlanerani telefonip, telexip qarasaasiakkullu atassuteqaatit akiisa allanngortinneri atulersitsinnagit Inatsisartut aningaasanut ataatsimiititaliaannut akuerisassatut saqqummiunneqartassapput.
Imm. 3. Akigititassatut aalajangerneqartut atortuusut tamatumanilu tunngavigineqartut Naalakkersuisut allanngorteqqusinnaavaat.

§ 3. Akuersissummik pigisaqartoq nalunaarasuartaatitigut aqqutit pigisami atorneqarneranni akuersissummilu pineqartutigut sullissinermini atuisunut piumasaqaasiussaaq, taakkunuuna ilaatigut kikkut tamarmik pisinnaatinneqassallutik naammaginartumik assigiimmillu piumaffigineqarlutik atortorissaarutinut akuersissummik pigisaqartup pigisaanut atassusernissamut tamakkuninngalu atuinissamut. Naalakkersuisut aalajangissappata operatørit allat immikkut ittunik pisinnaatitaaffilertarumallugit, taava akuersissummik pigisaqartoq tamanut ammasumik nalunaarasuartaatitigut attaveqarnermi aqqutinut atassusernissamut piumasaqaasiussaaq.
Imm. 2. Akuersissummik pigisaqartoq nalunaarasuartaatitigut attaveqarnermi atortut tamanut ammasumik nalunaarasuartaatitigut attaveqarnermi aqqutinut atassuserneqartut taakkununngaluunniit atatillugu atorneqartut pillugit malittarisassiorlunilu piumasaqaasiussaaq, kiisalu atortulersuutinik ikkussornerinillu takusaasassalluni nakkutilliisuussallunilu.
Imm. 3. Akuersissummik pigisaqartup nalunaarasuartaatitigut attaveqarnermi atortut pillugit piumasaqaasiai malittarisassiaalu kiisalu tamakkunani allannguutigititai Naalakkersuisunit akuerineqassapput.
Imm. 4. Malittarisassat piumasaqaatillu atortuusut allanngortinneqarnissaat Naalakkersuisut piumasarisinnaavaat, tak. imm. 1 aamma imm. 2.

§ 4. Pissutsit immikkut illuinnartut eqqarsaatigalugit Naalakkersuisut akuersissummik pigisaqartoq peqqusinnaavaat nalunaarasuartaatitigut atassuteqarneq inuiaqatigiinnut pingaaruteqartoq Namminersornerullutik Oqartussanut aningaasartuutaanngitsumik isumannaallileqqullugu ingerlajuarteqqullugulu, pisariaqarpat atassuteqaatinik kikkulluunniit atuisinnaatitaanerata killiliiffigineratigut.

§ 5. Akuersissummik pigisaqartup Naalakkersuisut erseqqinnerusumik aalajangiinerat malillugu nalunaarasuartaatitigut attaveqarnermik ingerlatsinerup tungaatigut nunat assigiinngitsut akornanni nunamilu namminermi suleqatigiinnerni aalajangikkat eqqortissavai.
Imm. 2. Akuersissummik pigisaqartoq Naalakkersuisut erseqqinnerusumik aalajangiinerat malillugu immikkut akilersinngikkaluarlugu nunat assigiinngitsut akornanni nunamilu namminermi suleqatigiiffinni kiisalu immikkut ittunik suliaqarnerni peqataasassaaq, tamanna akuersissummi pineqartut sullinneqarnerannut pingaaruteqaraangat.

§ 6. Akuersissummik pigisaqartup nalunaarasuartaatitigut attaveqarneq sullissinerillu pillugit Inatsisartut peqqussutaanni nr. 10-mi 28. oktober 1993-imeersumi § 6 naapertorlugu naalagaaffimmi oqartussaasut akuersissummillu Danmarkimi piginnittoq Kalaallit Nunaata Danmarkillu akornanni, Kalaallit Nunaata Savalimmiullu akornanni kiisalu Kalaallit Nunaata nunallu allat akornanni nalunaarasuartaatitigut attaveqarnerup pilersinnerani ingerlannerannilu suleqatigissavai.

§ 7. Akuersissummik pigisaqartoq pisussaavoq Naalakkersuisut erseqqinnerusumik aalajangiinerat malillugu suliassat immikkut ittut suliarissallugit iluanaaruteqarnani imaluunniit ajunaaruteqarluni.

§ 8. Akuersissummik piginnittup nalunaarsuartaatitigut attaveqarneq sullissinerillu pillugit Inatsisartut peqqussutaanni nr. 10-mi 28. oktober 1993-imeersumi § 5 naapertorlugu suliffeqarfiit allat isumaqatigiissuteqarfigisinnaavai taakkua sukumiinerusumik aalajangersakkat iluanni nalunaarasuartaatitigut ingerlatat ingerlassinnaagaat.

§ 9. Akuersissummik piginnittup nalunaarasuartaatitigut attaveqarneq sullissinerillu pillugit Inatsisartut peqqussutaanni nr. 10-mi 28. oktober 1993-imeersumi § 4 naapertorlugu KNR isumaqatigiissuteqarfigalugu pilersissavai atortorisat KNR-p assiliartalitsigut nipiinnakkullu aallakaatitaasa siammartarnissaannut pisariaqartut, aammalu atortorisat ingerlanerat ingerlatissallugu.
Imm. 2. Akuersissummik piginnittup imm. 1-imi suliassat taaneqartut suliarinerannut aallakaatitsinermilu atortorissaarutinut tamatumunnga atasumik atorneqartartunut akissaajaataasa akilerneqarnissaannut patsisissaatitat erseqqinnerusut nalunaarasuartaatitigut attaveqarneq sullissinerillu pillugit Inatsisartut peqqussutaanni nr. 10-mi 28. oktober 1993-imeersumi § 4 imm. 2 naapertorlugu Naalakkersuisut aalajangersarsinnaavaat.
Imm. 3. Akuersissummik piginnittup atortorissaarutit imm. 1-imi eqqartorneqartut pilersinnerannut ingerlatinnerannullu aningaasartuutai akilerneqartassapput iluanaaruteqaataatinnagit.

§ 10. Akuersissummik pigisaqartup makku isumagissavai:
1) Radiomik naalaarniarneq akornuserneqatsaaliniarlugu qanoq iliuuseqartarnissanik Inatsisartut inatsisaata nr. 11, 15. december 1987-imeersup ingerlatsisuuffiginissaa.
2) Radiukkut fjernsynikkullu aallakaatitsisarneq pillugu Inatsisartut peqqussutaat nr. 3, 17. maj 1990-imeersoq tunngavigalugu inuit namminerisaminnik najugaqarfiini ataatsimoortumik antennit kabelillu sumiiffinnut agguataarlugit ikkussornissaat piorsarnissaallu.
Imm. 2. Akuersissutit allagarserneqarnerannut akiliutit akuersissummik pigisaqartup pisassavai.

§ 11. Telemi ikkussuinerit kabelilersuinerillu pillugit nalunaarasuartaatitigut attaveqarneq sullissinerillu pillugit Inatsisartut peqqussutaanni nr. 10-mi 28. oktober 1993-imeersumi §§ 11-mi 12-imilu aalajangersakkat atortuussapputtaaq akuersissummik piginnittup iluaqusersuutaanut, nakkutigineqassallutilli Naalakkersuisunit.

§ 12. Akuersissummik pigisaqartup sulisuisa kiisalu piginnittup ataani ingerlatsiviit sulisuisa nalunaarasuartaatitigut attaveqarneq sullissinerillu pillugit Inatsisartut peqqussutaanni nr. 10-mi 28. oktober 1993-imeersumi § 9 naapertorlugu nalunaarasuartaatitigut attaveqaatitigut attaveqatigiinnermi tusakkat tamaasa taamatullu atuisut aqqi nipangiussimasussaassavaat.
Imm. 2. Nipangiussisussaatitaaneq atuuttuassaaq sulisuuj unnaarsimagaluaraanniluunniit.

§ 13. Naalakkersuisunit akuerineqassapput:
1) Ingerlatsiviup akuersissummik piginnittup naatsorsuusiornissaanut naatsorsuutinillu saqqummiussisarnissaanut il.il. malittarisassat kiisalu taakkunani allannguutit imaluunniit malittarisassanit allaassuteqartitsisarnissat.
2) Akuersissummik pigisaqartup ingerlatsivinnut malittarisassiai tamakkunanilu allannguutit.
3) Akuersissummik pigisaqartup taarsigassarsinera imaluunniit taarsigassarsiai il.il. allat akuersissummik pigisaqartup qularnaveeqqusigai.
4) Taarsigassarsinernut nr. 3-mi taaneqartunut taakkunanilu allanngutissanut piumasarisat.

§ 14. Akuersissummik pigisaqartoq Naalakkersuisut erseqqinnerusumik aalajangersagaat malillugit akissarsiat, pensionisiassat atorfeqarnermilu atugarititat allat kiisalu imminut atasunik ingerlatsiveqarsimaguni tamakkunani sulisorisassat amerlassusilerneqartarnerinut nakkutilliisuussaaq.

§ 15. Iluaqusersuutit akuersissummik pigisaqartup pigisai akuersissummilu pineqartunut sullissinertai, tamatumunnga ilanngullugit illunik allilerineq, aserfallatsaaliuineq ingerlatsinerlu, pillugit Naalakkersuisut piumasaqaatinik aalajangersaasinnaapput.

§ 16. Akuersissut atorunnaarsinneqarsinnaavoq januaarip aallaqqaataani 1999-imi, tamanna ukioq ataaseq sioqqullugu ilimasaarutigineqarsimappat.
Imm. 2. Akuersissut januaarip aallaqqaataani 1999-imi atorunnaarsinneqanngippat akuersissut una akuersissummik pigisaqartup pisinnaatitaaffii pisussaatitaaffiilu ilanngullugit suli ukiuni tallimani atuutiinnassaaq, taakku naappata atuuttussaajunnaarseqqinneqarsinnaalluni paragraffip matuma imm. 1-ianni taaneqartutut, taamatullu iliortoqartassaaq ukiut tallimakkuutaarlugit.
Imm. 3. Naalakkersuisut akuersissut uterteqqusinnaavaat tassani aalajangersakkat unioqqutinneqarsimappata.

§ 17. Naalakkersuisut pissutsinik akuersissummut tunngasunik tamanik nakkutilliisuupput.
Imm. 2. Akuersissummik pigisaqartup Naalakkersuisut qinnuteqarnerat malillugu pissutsinik imminut tunngasunik paasissutissittassavai, tak. nalunaarasuartaatitigut attaveqarneq sullissinerillu pillugit Inatsisartut peqqussutaanni nr. 10-mi 28. oktober 1993-imeersumi § 8.
Imm. 3. Akuersissummik piginnittup naatsorsuusiortarneranik nakkutilliinissaq pillugu aalajangersakkat aalajangersarneqassapput malittarisassani § 13, imm. 1 nr. 1-imi taaneqartuni.
Imm. 4. Akuersissummik piginnittup paragraffi una malillugu nakkutilliinermi aningaasartuutigineqartut  Landskarsimut taarsertassavai Naalakkersuisut erseqqinnerusumik aalajangiinerat malillugu.

§ 18. Akuersissummik piginnittup imaluunniit ingerlatsiviit tassunga atasut akuersissummi pineqartutigut pisortanut imaluunniit inuinnarnut pissuserisaat pillugit naammagittaalliuutit Naalakkersuisut aalajangiiffigisinnaavaat akuersissummik piginnittumut pinngitsoorani kinguneqartussamik.

§ 19. Akuersissutip matuma qanoq paasineqarnissaanut tunngasunik inaarutaasumik aalajangiinissat Naalakkersuisut aalajangertassavaat.

§ 20. Nalunaarut una atortuulissaaq januaarip aallaqqaataani 1994-imi.

Namminersornerullutik Oqartussat, ulloq 30.december 1993.

Kuupik Kleist

/

Jens K.Lyberth