Tusagassiortunngorniartunik ilinniartitsineq pillugu Namminersornerullutik Oqartussat nalunaarutaat nr. 43, 22. december 1993-imeersoq.
Inuussutissarsiutitigut ilinniartitaaneq, ilinniagaqarnermut tapiissutit, inuussutissarsiutinullu tunngasunik siunnersuineq pillugit Inatsisartut peqqussutaanni nr. 1-imi 4. maj 1990-imeersumi § 1, imm. 3, naapertorlugu aalajangersarneqarput:
Kapitali 1.
Siunertaa sivisussusialu.§ 1. Ilinniartitsinerup siunertaraa ilinniartut atuagarsornikkut sulinikkullu piginnaaneqalersinnissaat tusagassiuutit pigineqartut atorlugit sulinissamut, aammalu pisortani namminersortunilu tusagassiuutinik paasissutissiuisarnermillu ineriartortitsiniarnermi peqataanissaannut.
§ 2. Tusagassiortunngorniartunut ilinniartitsineq ukiunik pingasunik ukiullu affaanik sivisussuseqarpoq. Tassani katillugit ukiut marluk ilinniarfimmiiffiusarput ukiullu aappaa-qeqqa sungiusarluni namminersortut pisortalluunniit tusagassiorfiiniiffiusarlutik.
Kapitali 2.
Ilinniartunngornissamut piumasaasut.§ 3. Tusagassiortunngorniartussatut ilinniartunngorsinnaapput inuit
1) kingusinnerpaamik ukiumi ilinnialerfissami 20-nik ukioqalersimasut,
2) GU/HF-imi soraarummeersimasut, tunngaviusumik ilinniarsimasut imaluunniit tassunga nallersuuttumik ilinniagaqarsimasut,
3) sivikinnerpaamik qaammatini arfinilinni ingerlaannartumik inuussutissarsiummik suliaqarsimasut,
4) kalaallisut allassinnaalluartut oqalussinnaalluartullu (oqaasivimmissut atorsinnaallugit),
5) danskisut oqaluttartut paasisartullu aamma
6) ilinnialernissamut misilitsinnermi angusisimasut.§ 4. Qinnuteqartut piukkunnaateqartut ilinniarfiup tigusinnaasaanit amerlanerugaangata ilinniarumallutik qinnuteqartunit tiguneqartassapput ilinniarfiup brancheudvalgillu naliliinerat malillugu ilinniarnermik naammassinninnissamut tunngavissaqarluarnerusut siulliullugit.
Kapitali 3.
Ilinniartunngornissamut misilitsinneq.§ 5. Ilinniartunngornissamut misilitsinnerup aaqqissuussaaneratigut siunertarineqarpoq ilinniartunngorniarlutik qinnuteqartut tusagassiortutut qanoq eqqarsarsinnaatigissusiisa, inuiaqatigiinni pissutsinik atuuttunik qanoq nalunngisaqartigissusiisa kiisalu oqaatsinik qanoq atuilluarsinnaatigissusiisa paasilluarneqarnissaat.
Imm. 2. Ilinniartunngornissamut misilitsissutissat ilinniarfimmit suliarineqassapput brancheudvalgimillu akuerineqassallutik.
Imm. 3. Ilinniartunngornissamut misilitsinnerit tamaginni, qinnuteqartut ilinniartunngornissamut piumasaqaatinik naammassinnissimasut piffissamut killiliussaq kingoqqunnagu qinnuteqarfigisaanni, ataatsikkut aammalu qaquguunissaa ilinniarfiup aalajangigaani ingerlanneqassapput.
Kapitali 4.
Atuartitsineq.§ 6. Tusagassiortunngorniartunut atuartitsineq aallarnerneqartarpoq ilinniarfimmi ukiup aappaata qeqqani atuagarsornermik aamma naammassiniagassaqartitsinertalimmik atuartitsinermik, ukiup aappaata qeqqani suliitigaluni ilinniarnermik malitsilimmik. Aappassaaneerlutik ukiup aappaata qeqqani ilinniarfimmiittut atuagarsornermik aamma naammassiniagassaqartitsinertalimmik atuartitsinneqartarput.
§ 7. Aallaqqaataasumik ilinniarfimmiittuni semesterini pingasuni atuartitsinermi lektionit 1896-iupput. Lektioni ataaseq atasuinnarmik minutsinik 45-nik sivisussuseqarpoq.
Imm. 2. Semesterimi siullermi lektionit agguaanneqartassapput tunngaviusumik imaalillugit:
1) Paasisimasassat tusagassiornermut tunngasut sulinermilu periaatsit (nutaarsiassalerineq, imaqarniliortarneq, misissuineq (research) aammaa persuilluni oqaaseqartitsiniartarneq) Lektionit 90
2) Naqitigassalereriaaseq Lektionit 30
3) Synopsis isumassarsialerinerlu Lektionit 30
4) Fagit inuiaqatigiinni pissutsinut tunngasut (politikki aamma aningaasarsiorneq) Lektionit 150
5) Projekti (aviisiliorneq aamma radiukkut aallakaatitassiorneq) Lektionit 240
6) Tusagassiuutini oqaatsit, (kalaallisut atuartitsineq) Lektionit 72
Imm. 3. Semesterit aappaanni lektionit agguaanneqartassapput tunngaviusumik imaalillugit:
1) Oqaluttuarinnilluni aviisiliorneq Lektionit 90
2) Ilisimaqqaagassat TV-mut tunngasut aallakaatitassiornerlu Lektionit 120
3) Fagit inuiaqatigiinni pissutsinut tunngasut (ilinniartitaaneq suliffeqarnerlu) Lektionit 150
4) Projekti (tusagassiuut nammineq qinersinnaasaq) Lektionit 240
5) Tusagassiuutini oqaatsit (kalaallisut atuartitsineq) Lektionit 72
Imm. 4. Semesterit pingajuanni lektionit agguaanneqartassapput tunngaviusumik imaalillugit:
1) Aaqqissuisumut ikiortitut kursusi Lektionit 60
2) Tusagassiuuteqarneq pillugu inatsisit/tusagassiortutut ileqqorissaarnissaq Lektionit 30
3) Fagit inuiaqatigiinni pissutsinut tunngasut, (inuit atugarisaat, inatsiseqarnikkut politikki aamma kulturi) Lektionit 150
4) Projekti (tusagassiuut nammineq qinersinnaasaq) Lektionit: 240
5) Praktikkernissap piareersarnera Lektionit 60
6) Tusagassiuutini oqaatsit, (kalaallisut atuartitsineq) Lektionit 72§ 8. Aallaqqaataasumik ilinniarfimmiittunut atuartitsinerup siunertaraa ilinniartut tusagassiortutut pinngitsoorani piginnaasassanik paasisaqartinnissaat sungiusarneqarnissaallu, inuiaqatigiinnut tunngasunik paasisaqartinnissaat tassani eqqarsaatiginerullugit tusagassiornermut tunngasunik suliassaqarfiit kiisalu tusagassiornermut tunngasut pillugit isummat.
Imm. 2. Tusagassiortutut piginnaasassani pineqarput pisaatsinut tunngasunik, misissuisarnikkut saqqummiisarnikkullu piginnaasassatut ilisimaqqaagassat, tamakkununnga ilanngullugit naqitigassalereriaaseq ilusilersuisarnerlu aammalu radiup TV-llu atornissaat.
Imm. 3. Inuiaqatigiinnut tunngasunik paasisaqartitsinissami pineqarput tusagassiornermut tunngasunik suliassaqarfiugajuttut, ilaatigut:
1) Namminersornerullutik Oqartussat kommunillu aaqqissugaaneri sulinerallu, tamatumani naalagaaffiup sunniuteqarnera ilanngullugu
2) Pisortani aningaasaqarnikkut pissutsit aamma namminersorlutik inuussutissarsiuteqartuni aningaasaqarnikkut pissutsit, tamatumunnga ilanngullugu aalisarnikkut pissutsit
3) Ilinniartitaanerup aaqqissuussaanera suliffeqarnerlu
4) Politiit, eqqartuussisoqarneq inunnillu isumaginninnerup aaqqissuussaanera
5) Peqqinnissamut avatangiisinullu tunngasut
6) Kulturikkut ineriartorneq kulturimillu allanngutsaaliineq
7) Peqatigiiffeqarneq, tamatumunnga ilanngullugu timersorneq.
Imm. 4. Tusagassiornermut tunngasut pillugit isummanut tunngatillugu ilaatigut pineqarput paasissutissiisarnermi inatsisitigut maleruagassat/tusagassiuuteqarneq pillugu inatsisit, Kalaallit Nunaanni tusagassiuuteqarnerup oqaluttuassartaa, tusagassiuutinut tunngasunik (ilisimatuutut) misissuineq aamma oqaatsit tusagassiuutini atorneqartut.§ 9. Aappassaaneerlutik ilinniarfimmiittunut, semesterimi ataatsimi lektionit 612-iupput:
1) Paasissutissiisartutut sulineq, nunanut allanut politikki, isummanik pilersitsinartunik tusagassiortarneq pillugit sammisassat sammisassallu allat atuarfiup toqqagaasa arlaasa iluanniittunik immikkut ittumik kursusernerit Lektionit 300
2) Tusagassiuutini oqaatsit, (kalaallisut atuartitsineq) Lektionit 72
3) Inaarutaasumik soraarummeerutissiorneq Lektionit 240§ 10. Aappassaaneerlutik ilinniarfimmiittunut atuartitsinerup siunertaraa ilinniartut tusagassiortarnermik, faginik inuiaqatigiinni pissutsinut tunngasunik tusagassiornermullu tunngasut pillugit isummanik paasisimasaasa paasisimasaminnillu atuisinnaanerisa annertusarneqarnissaat.
Kapitali 5.
Sungiusarfimmiinneq.§ 11. Sungiusarluni sulinermi siunertarineqarpoq ilinniartut periarfissinnissaat suleriaatsinik sulianillu aaqqissuusseriaatsinik piviusutigut ilinniarnissaat taamalu namminersorluni sulinissamut sungiusarneqarnissaat.
§ 12. Sungiusarfimmiinneq ukiup aappaata qeqqanik sivisussuseqartassaaq.
Imm. 2. Ilinniartoq § 16 malillugu ilinniarfimmiissimagaangat piffissaq sungiusarnermut atugassaq sivikillineqartarsinnaavoq, kisianni qaammatit arfinillit sinnernagit.§ 13. Sungiusarfimmiinneq ingerlanneqarajuttassaaq Kalaallit Nunaanni nutaarsiassaleriffinni.
Imm. 2. Ilinniartut namminneq sungiusarfissatut akuerisaasut arlaanni sungiusarumallutik qinnuteqartassapput.§ 14. Sungiusarluni suliffigisassat brancheudvalgimit akuerineqartassapput.
Imm. 2. Sungiusarluni suliffigisassaq akuerineqartarsinnaavoq minnerpaamik tusagassiortoq ilinniarsimasoq ataaseq tassani sulisorineqaraangat.§ 15. Sungiusarfigisamiissimaneq naammaginartumik naammassineqartutut ilinniarfimmit akuerineqaqqaartassaaq ilinniarfimmeeqqittussatut tiguneqarsinnaassagaanni.
Kapitali 6.
Aallarluni ilinniariartorneq.§ 16. Qaammatit sungiusarfimmiiffissat ilaat Kalaallit Nunaanni imaluunniit Kalaallit Nunaata avataani tusagassiornermut tunngasunik suliffimmi ilinniarnertut atorneqarsinnaapput sivisunerpaamik qaammatini arfinilinni.
Imm. 2. Aallarluni ilinniariarnissaq ilinniarfimmit akuerineqassaaq.
Imm. 3. Taassuma ingerlanissaa ilinniarfiup aaqqissuutissavaa ilinniartoq ilinniarfiusussarlu suleqatigalugit.
Kapitali 7.
Misiliinerit, naliliinerit il.il.§ 17. Ilinniarfimmiinnerup nalaani ilinniartup atuartitsinermik qanoq pissarsiffiginnitsigisimanera ilinniarfiup akuttunngitsumik naliliiffigisassavaa ilinniartup takkuttarneri naammassiniagassanillu (projektinik) suliai tunngavigalugit.
§ 18. Ilinniartut atuartitsinermut orniguttartussaatitaapput.
Imm. 2. Takkutikulanngitsoqaraangat brancheudvalgi ilinniarfiup inassuteqarnera malillugu aalajangiisinnaavoq ilinniartoq semesterimi atuaqqissasoq imaluunniit ilinniartuujunnaarsitaassasoq.§ 19. Naammassiniagassat (projektit) suliarineqartanngikkaangata imaluunniit naammaginanngitsumik suliarineqarsimagaangata § 18, imm. 2, taamaalluni atortassaaq.
§ 20. Semesterit aappaata naanerani semesterimi misilitsissutissaliortoqartassaaq ilinniartup sammisassatut mediatullu toqqakkaminik namminersorluni suliarisassaanik ilitsersuunneqareernermi kingorna.
Imm. 2. Semesterip misilitsissutissartaa piginnaasassat nalinginnaat misissuinermullu saqqummiisinnaanermullu tunngasut aallaavigalugit nalilerneqartassaaq nalileeqataasussaq ilinniarfimmit toqqarneqartoq brancheudvalgimillu akuerineqartoq peqatigalugu misiliilluni apersuinikkut.
Imm. 3. Semesterip misilitsissutissartaa angusiffigineqarsimassaaq karakteeri 6-iuppat tassanngaluunniit anneruppat.
Imm. 4. Semesterip misilitsissutissartaa ilinniartup angusiffiginngippagu ilinniartoq taanna pisinnaatitaavoq nutaamik suliaqariarluni misilitseqqinnissaminut. Misilitseqqinnissap qaqugu pinissaa ilinniarfiup aalajangissavaa.
Imm. 5. Semesterit aappaanni misilitsinnermi angusinermi immikkut ittumik uppernarsaat ilinniarfimmit atsiorneqassaaq.
Imm. 6. Semesterip misilitsissutissartaa angusilluni naammassineqareerpat ilinniartoq ilinniarnermini ingerlaqqissinnaalissaaq.§ 21. Semesterit pingajuata naalernerani ilinniartoq semesterip misilitsissutissartaanik allaaserisaqassaaq, tassani namminersorluni suliaqassalluni tusagassiortutut saqqummeeriaatsit ilinniarfimmit toqqarneqartut iluanni.
Imm. 2. Semesterip misilitsissutissartaa oqaatsitigut pisinnaasat tunngavigalugit nalilerneqassaaq nalileeqataasussaq ilinniarfimmit toqqarneqartoq brancheudvalgimillu akuerineqartoq peqatigalugu misiliilluni apersuinikkut.
Imm. 3. Semesterip misilitsissutissartaa angusiffigineqarsimassaaq karakteeri 6-iuppat tassanngaluunniit anneruppat.
Imm. 4. Semesterip misilitsissutissartaa ilinniartup naammassisimanngippagu angusiffigisimanngippaguluunniit brancheudvalgi ilinniarfiup inassuteqarnera malillugu akuersisinnaavoq nutaamik suliaqarluni misilitseqqinnissaanut. Misilitseqqinnissap qaqugu pinissaa ilinniarfiup aalajangissavaa.
Imm. 5. Semesterit pingajuata misilitsissutissartaanik angusereernermi immikkut ittumik uppernarsaat ilinniarfimmit atsiorneqassaaq.§ 22. Ilinniarneq naggaserlugu ilinniartoq, ilinniarfimmit ilitsersorneqarluni inaarutaasumik soraarummeerutissaminik namminersorluni suliaqassaaq sammisassani medialu nammineq toqqarlugit.
Imm. 2. Inaarutaasumik soraarummeerutissaq nalilerneqassaaq soraarummeernermi, tassani ilinniartup nassuiaateqarfigissallugit sammisassatut toqqagaq, suleriaaseq misissuinerlu.
Imm. 3. Naliliisuussapput taakkuninnga ilinniartitsisuusoq (ilitsersuisuusoq) kiisalu nalileeqataasussaq ataaseq imaluunniit nalileeqataasussat arlallit atuarfimmit toqqarneqartut brancheudvalgimillu akuerineqartut.
Imm. 4. Inaarutaasumik soraarummeerutissaq angusiffigineqarsimassaaq karakteeri 6-iuppat tassanngaluunniit anneruppat.
Imm. 5. Isumaqatigiinngitsoqarpat karakteeriliunneqartut agguaqatigiissinnerat atorneqassaaq kisitsimmut ilivitsumut qaninnermut qaffallugu.
Imm. 6. Sammisassatut toqqarneqartumut tunngasunik immikkut paasisimasalik soraarummeersumik apersuinermi peqataasinnaavoq, naliliinivimmili peqataasussaanani.§ 23. Inaarutaasumik soraarummeerutissaq ilinniartup naammassisimanngippagu angusiffigisimanngippaguluunniit brancheudvalgi ilinniarfiup inassuteqarnera malillugu akuersisinnaavoq nutaamik inaarutaasumik soraarummeerutissioqqinnissamut. Soraarummeeqqinnissap qaqugu pinissaa ilinniarfiup aalajangissavaa.
Imm. 2. Inaarutaasumik soraarummeerutissatut nutaatut toqqarneqassaaq sammisassaq nutaaq.
Imm. 3. Inaarutaasumik soraarummeerutissaq nutaaq siusinnerpaamik tunniunneqarsinnaavoq siulliup naammassineranit qaammatit pingasut qaangiunneranni.
Kapitali 8.
Ilinniarsimanermut uppernarsaat.§ 24. Inaarutaasumik soraarummeerutissap angusiffiginerata sungiusarfimmiinnerullu naammassinerata kingornagut tusagassiortutut ilinniarsimanermut uppernarsaat ilinniarfiup atsiussavaa.
Imm. 2. Uppernarsaammi tassani nalunaarsimassaaq inaarutaasumik soraarummeerutip inernera.
Kapitali 9.
Naammagittaalliorsinnaaneq, immikkut ittumik akuersisinnaaneq atortuulersitsinissarlu.§ 25. Nalunaarut una malillugu fagit imarisassaannut tunngasumik ilinniarfiup aalajangiineri pillugit naammagittaalliuutit brancheudvalgimut suliassanngortinneqarsinnaapput aalajangiinerup nalunaarutigineqarneranit sapaatit akunneri sisamat qaangiutsinnagit.
Imm. 2. Brancheudvalgip aalajangiinera ilinniartitaanermut naalakkersuisoqarfimmut suliassanngortinneqarsinnaavoq aalajangiinerup nalunaarutigineqarneranit sapaatit akunneri sisamat qaangiutsinnagit.
Imm. 3. Nalunaarut una malillugu allanut faginut tunngasuunngitsunut ilinniarfiup aalajangiineri pillugit naammagittaalliuutit ilinniartitaanermut naalakkersuisoqarfimmut suliassanngortinneqarsinnaapput aalajangiinerup nalunaarutigineqarneranit sapaatit akunneri sisamat qaangiutsinnagit.§ 26. Ilinniartitaanermut naalakkersuisoqarfiup brancheudvalgip inassuteqarnera malillugu nalunaarummit matumannga allaassuteqartitsigallartarnissaq akuerisinnaavaa ilinniartitsinerup misilinneqarnissaanut ineriartortinneqarnissaanulluunniit atatillugu.
§ 27. Nalunaarut una ulloq 31. december 1993 atortuulissaaq.
Namminersornerullutik Oqartussat, ulloq 22. december 1993.
Marianne Jensen/
Aqigssiaq Møller